(vovworld) – ຊາວຫວຽດນາມ ທຸກຄົນ ພວມດຳລົງຊີວິດໃນຄວາມເບີກບານມ່ວນຊື່ນ ແລະ ຄວາມຜາສຸກຂອງຊຸມວັນຕົ້ນລະດູບານໃໝ່. ຊາວຫວຽດນາມຫຼາຍຄົນ, ແລະບັນດາເອກອັກຄະລັດຖະທູດທີ່ພວມປະຕິບັດງານຢູ່ຫວຽດນາມ, ເຖິງວ່າຈະຢູ່ຫ່າງໄກກັບຍາດຕິພີ່ນ້ອງກໍ່ຕາມ, ແຕ່ເຂົາເຈົ້າຍັງຄົງຮູ້ສຶກໄດ້ຄວາມອົບອູ່ນ, ເມື່ອໄດ້ເຕົ້າໂຮມຮ່ວມກັບບັນດາເພື່ອນມິດຊາວຫວຽດນາມໃນໂອກາດບຸນປີໃໝ່ວຽນມາ.
ບຸນປີໃໝ່ປະຈຳຊາດຫວຽດນາມ-ງານບຸນແຫ່ງການເຕົ້າໂຮມ
(ພາບ: ອິນເຕີແນດ)
ບັນດາເອກອັກຄະລັດຖະທູດຕ່າງປະເທດປະຈຳຫວຽດນາມ, ເຖິງວ່າເຂົາເຈົ້າໄດ້ໄປຫຼາຍປະເທດ, ເຂົ້າຮ່ວມຫຼາຍພິທີ ແລະ ບຸນປີໃໝ່ຢູ່ຫຼາຍປະເທດໃນໂລກແລ້ວກໍ່ຕາມ, ແຕ່ບຸນປີໃໝ່ປະຈຳຊາດຂອງຫວຽດນາມ (ບຸນເຕັດ) ພັດສ້າງຄວາມປະທັບໃຈພິເສດສະເພາະ, ເຮັດໃຫ້ເຂົາເຈົ້າບໍ່ອາດຫຼົງລືມໄດ້.
ບຸນປີໃໝ່ປະຈຳຊາດເຂັ້ມຄົ້ນໄປດ້ວຍສີສັນຊາດຫວຽດນາມ
ປີນີ້ແມ່ນປີທີ 12 ທີ່ທ່ານເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງລັດປາແລສຕີນ ປະຈຳຫວຽດນາມ Saadi Salama ໄດ້ຕ້ອນຮູບບຸນເຕັດພ້ອມກັບເພື່ອນມິດຫວຽດນາມ. ກ່ອນນີ້ 33 ປີ, ເມື່ອຍັງເປັນນັກສຶກສາ, ທ່ານໄດ້ຕ້ອນຮັບບຸນເຕັດເທື່ອທຳອິດຢູ່ຫວຽດນາມ ແລະ ຄວາມປະທັບໃຈກ່ຽວກັບບຸນເຕັດນັ້ນຍັງຄົງຝັງເລິກຢູ່ໃນໃຈຂອງທ່ານ, ດ້ວຍບັນຍາກາດຟົດຟື້ນຂອງຊຸມວັນຕົ້ນລະດູບານໃໝ່. ປະເທດຫວຽດນາມ ພວມພັດທະນາ, ເຖິງວ່າຮູບການຈັດຕັ້ງບຸນເຕັດໄດ້ມີການປ່ຽນແປງສ່ວນໃດສ່ວນໜຶ່ງກໍ່ຕາມ, ແຕ່ສຳລັບທ່ານແລ້ວ, ສີສັນບຸນເຕັດຫວຽດນາມ ຍັງຄົງຮັກສາໄວ້, ປະຊາຊົນຍັງຄົງຮັກສາບັນດາຈຸດວັດທະນະທຳອັນດີງາມຂອງບຸນເຕັດຢູ່ຄື: ເກັບໃບໄມ້ປົ່ງໃໝ່ (ເພື່ອຂໍໂຊກຂໍໝານ), ອວຍພອນຜູ້ເຖົ້າຜູ້ແກ່ໃຫ້ມີອາຍຸໝັ້ນຂວັນຍືນ, ອວຍພອນເດັກນ້ອຍປະສົບແຕ່ສິ່ງທີ່ຈົບງາມ. ໄດ້ຕ້ອນຮັບບຸນເຕັດຂອງຫວຽດນາມຫຼາຍປີ, ທ່ານເອກອັກຄະລັດຖະທູດສາມາດລວບລວມຄວາມປະທັບໃຈກ່ຽວກັບບຸນເຕັດຂອງຫວຽດນາມທີ່ວ່າ: ”ໃກ້ຊິດຕິດພັນ - ສາມັກຄີ - ຮັກແພງມະນຸດ - ເຫັນແກ່ຄົນອື່ນ”. ທ່ານເອກອັກຄະລັດຖະທູດ Saadi Salaman ອະທິບາຍວ່າ:
“ໃນໂອກາດບຸນເຕັດຊາວຫວຽດນາມ ໃກ້ຊິດຕິດພັນນຳກັນ, ເຖິງວ່າຈະຢູ່ໃສເຂົາເຈົ້າກໍ່ກັບເມືອບ້ານ, ກັບເມືອຄອບຄົວເພື່ອພ້ອມກັນຕ້ອນຮັບບຸນເຕັດ. ທັງປະເທດພ້ອມກັນຈັດຕັ້ງບຸນເຕັດ, ພິທີສົ່ງທ້າຍປີເກົ່າຕ້ອນຮັບປີໃໝ່ ສະແດງໃຫ້ເຫັນຄວາມສາມັກຄີ ແລະ ຊາວຫວຽດນາມ ກໍ່ແມ່ນປະຊາຄົມທີ່ມີຄວາມຮັກແພງມະນຸດດ້ວຍກັນ. ຮອດບຸນເຕັດເຂົາເຈົ້າໄປຢ້ຽມຢາມຖາມຂ່າວ, ອວຍພອນກັນປີໃໝ່ມີອະນາໄມສົມບຸນ, ມີຄວາມຜາສຸກ, ມີໂຊກມີໝານ ແລະ ປະສົບຜົນສຳເລັດໃນໜ້າທີ່ວຽກງານ. ຊາວຫວຽດນາມ ມີມູນເຊື້ອເຫັນແກ່ຜູ້ອື່ນ, ພ້ອມແລ້ວທີ່ຈະລົບລ້າງທຸກສິ່ງທຸກຢ່າງທີ່ເກີດຂຶ້ນໃນສາຍພົວພັນລະຫວ່າງຊາວຫວຽດນາມນຳກັນ, ຊ້ຳບໍໜຳລະຫວ່າງຊາວຫວຽດນາມກັບປະຊາຊົນປະເທດຕ່າງໆໃນໂລກ”.
ນີ້ແມ່ນເທື່ອທຳອິດທີ່ທ່ານນາງເອກອັກຄະລັດຖະທູດອາຟະກາໃຕ້ປະຈຳຫວຽດນາມ, Kgomostso Ruth Magau ໄດ້ຕ້ອນຮັບບຸນເຕັດຂອງຫວຽດນາມ. ສຳລັບທ່ານນາງແລ້ວ, ບຸນເຕັດຫວຽດນາມ ມີຫຼາຍສິ່ງທີ່ໃໝ່ອ່ຽມ ແລະ ແປກປະຫຼາດ. ບັນດາທຳນອງເພງອວຍພອນປີໃໝ່ທີ່ເບີກບານມ່ວນຊື່ນໃນງານລ້ຽງພົບປະສ້າງສັນບັນດາເອກອັກຄະລັດຖະທູດຕ່າງປະເທດປະຈຳຫວຽດນາມ, ໂດຍສະຫະພັນບັນດາອົງການຈັດຕັ້ງມິດຕະພາບຫວຽດນາມຈັດຕັ້ງຂຶ້ນ, ແມ່ນສິ່ງທີ່ທ່ານນາງນິຍົມທີ່ສຸດ. ໃນທຳນອງເພງເບີກບານມ່ວນຊື່ນນັ້ນ, ທ່ານນາງໄດ້ເວົ້າດ້ວຍຄວາມພາກພູມໃຈວ່າ:
“ຂ້າພະເຈົ້າໄດ້ເຫັນທຸກຄົນກະກຽມຕ້ອນຮັບບຸນເຕັດ. ໃນໂອກາດບຸນເຕັດ, ບັນດາຖະໜົນຫົນທາງລ້ວນແຕ່ໄດ້ຮັບການປະດັບປະດາຢ່າງສວຍງາມ, ທຸກຄົນຕ່າງກໍມ່ວນຊື່ນ, ອັນໄດ້ສ້າງຄວາມຈັບອົກຈັບໃຈທີ່ສຸດ”.
ທຸກຄົນໃກ້ຊິດຕິດພັນກວ່າ, ບຸນເຕັດເຕົ້າໂຮມທຸກຄົນໃນຄອບຄົວ
ຖ້າຫາກວ່າຢູ່ຫຼາຍປະເທດ, ປະຊາຊົນເຄີຍຕ້ອນຮັບບຸນປີໃໝ່ດ້ວຍການໄປທ່ອງທ່ຽວ, ຫຼືພັກຜ່ອນຢ່ອນອາລົມຢູ່ສະຖານທີ່ໃດໜຶ່ງ, ແຕ່ຢູ່ຫວຽດນາມ, ເມື່ອມາຢ້ຽມຢາມບໍ່ວ່າຄອບຄົວໃດໃນໂອກາດບຸນເຕັດ ກໍ່ສາມາດຮັບຮູ້ໄດ້ບັນຍາກາດອັນອົບອູ່ນ. ທຸກຄົນໄດ້ເຕົ້າໂຮມກັນອ້ອມພາເຂົ້າ, ເລົ່າໃຫ້ກັນຟັງບັນດາເລື່ອງລາວທີ່ມ່ວນຊື່ນ ເພື່ອໃຫ້ບຸນເຕັດເຕັມໄປດ້ວຍຄວາມເບີກບານ. ທ່ານເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງສາທາລະນະລັດ ອິນໂດເນເຊຍ ປະຈຳຫວຽດນາມ Mayerfas, ໃຫ້ຮູ້ວ່າ:
“ຂ້າພະເຈົ້າມັກເຊີນເພື່ອນມິດມາກິນເຂົ້າພ້ອມກັບຄອບຄົວໃນບັນຍາກາດອົບອູ່ນທີ່ສຸດ. ນັ້ນແມ່ນສິ່ງທີ່ຂ້າພະເຈົ້າຮູ້ສຶກນິຍົມທີ່ສຸດໃນວັນບຸນເຕັດຂອງຫວຽດນາມ”.
ບັນດາທ່ານເອກອັກຄະລັດຖະທູດ ກໍ່ຄືບັນດາເພື່ອນມິດຕ່າງປະເທດເມື່ອມາຫວຽດນາມ ເຂົາເຈົ້າກໍ່ຢາກຕ້ອນຮັບບຸນເຕັດ. ເພາະວ່າບຸນເຕັດຍາມໃດກໍ່ສ້າງຄວາມປະທັບໃຈທີ່ສຸດ. ຄວາມເບີກບານມ່ວນຊື່ນ, ຄວາມຜາສຸກ ແລະ ຮອຍຍີ້ມອັນສະໜິດສະໜົມຂອງຊາວຫວຽດນາມໃນໂອກາດບຸນເຕັດ ໄດ້ເຮັດໃຫ້ທ່ານເອກອັກຄະລັດຖະທູດວິສາມັນ ຜູ້ມີອຳນາດເຕັມ ນີເຊຣີ ປະຈຳຫວຽດນາມ ຮູ້ສຶກມີຄວາມອົບອຸ່ນ. ໃນບຸນເຕັດ, ທ່ານເອກອັກຄະລັດຖະທູດຢາກມອບຂອງຂວັນ, ອວຍພອນເພື່ອນມິດ ແລະ ຍາດຕິພີ່ນ້ອງຄືປະເພນີຂອງຊາວຫວຽດນາມ.
“ບຸນເຕັດແມ່ນໂອກາດທີ່ດີເພື່ອໃຫ້ທຸກຄົນສະແດງຄວາມເອົາໃຈໃສ່ເຖິງຍາດຕິພີ່ນ້ອງ, ເພື່ອນມິດຂອງຕົນຫຼາຍກວ່າ. ໃນໂອກາດບຸນເຕັດ, ຂ້າພະເຈົ້າກໍ່ໄປຢ້ຽມຢາມເພື່ອມິດຂອງຕົນ, ໄປທ່ຽວເພື່ອເຈືອຈານໃນບັນຍາກາດບຸນເຕັດ ແລະ ໄປຍັງສະຖານທີ່ລະຫຼິ້ນ, ບັນເທິງຕ່າງໆ. ໂອກາດນີ້, ຂ້າພະເຈົ້າກໍ່ມັກຖີບລົດໄປໂບດ. ຂ້າພະເຈົ້າມັກຕ້ອນຮັບບຸນເຕັດຕາມວິທີສະເພາະຂອງຕົນ”.
ບັນດາຄວາມຫວັງຍາມລະດູບານໃໝ່
ບັນດາຜົນງານເຊິ່ງຂະແໜງການທູດຫວຽດນາມບັນລຸໄດ້ໃນປີຜ່ານມາ, ແມ່ນຍ້ອນທີຄວາມມານະພະຍາຍາມຂອງບັນດາກະຊວງ, ຂະແໜງການຫວຽດນາມແລ້ວ, ຍັງມີການສະໜັບສະໜູນ, ການຊ່ວຍເຫຼືອຢ່າງສຸດຈິດສຸດໃຈຂອງບັນດາທ່ານເອກອັກຄະລັດຖະທູດອີກດ້ວຍ. ທ່ານເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສ.ປາແລສຕິນ ປະຈຳຫວຽດນາມ Saadi Salama, ອວຍພອນ:
“ໃນໂອກາດບຸນເຕັດຂໍອວຍພອນປະຊາຊົນຫວຽດນາມ ສືບຕໍ່ພາລະກິດກໍ່ສ້າງປະເທດຫວຽດນາມໃຫ້ຮັ່ງມີເຂັ້ມແຂງ. ອວຍພອນໃຫ້ສາຍພົວພັນມິດຕະພາບລະຫວ່າງປະຊາຊົນຫວຽດນາມ ແລະ ປະຊາຊົນປາແລວຕິນ ນັບມື້ນັບໄດ້ຮັບການປັບປຸງ ແລະ ພັດທະນາໃນທຸກຂົງເຂດວຽກງານ, ອວຍພອນໃຫ້ການພົວພັນລະຫວ່າງຫວຽດນາມ ກັບປະເທດຕ່າງໆໃນໂລກພັດທະນາເພື່ອຜົນປະໂຫຍດລວມ ແລະ ເພື່ອສັນຕິພາບ”.
ພາກພູມໃຈຕໍ່ຜົນງານຂອງຫວຽດນາມ ໃນປີ 2013, ທ່ານເອກອັກຄະລັດຖະທູດ ສປປ ເກົາຫຼີ ປະຈຳຫວຽດນາມ ກິມຈາງອິນ, ອວຍພອນ:
“ອວຍພອນລັດຖະບານ ແລະ ປະຊາຊົນຫວຽດນາມ ປີໃໝ່ປະສົບຜົນສຳເລັດ ແລະ ບັນລຸໄດ້ຈຸດໝາຍຫັນເປັນປະເທດອຸດສາຫະກຳໃນປີ 2020. ອວຍພອນໃຫ້ທຸກຄົນປີໃໝ່ມີຄວາມຜາສຸກ ແລະ ການພົວພັນລະຫວ່າງສອງປະເທດພວກເຮົານັບມື້ນັບພັດທະນາກວ່າອີກ”.
ຄວາມເບີກບານມ່ວນຊື່ນ, ຄວາມອົບອຸ່ນ ແລະ ຄວາມຮັກແພງມະນຸດດ້ວຍກັນ ແມ່ນໜຶ່ງໃນບັນດາສາຍເຫດທີ່ພາໃຫ້ເພື່ອນມິດສາກົນມີຄວາມນິຍົມບຸນເຕັດຫວຽດນາມ. ຄືດັ່ງທຸກຄອບຄົວຊາວຫວຽດນາມ ບັນດາທ່ານເອກອັກຄະລັດຖະທູດກໍ່ຊື້ດອກຄາຍທີ່ສົດໃສ, ດອກໄມ້, ຕົ້ນກ້ຽງນ້ອຍ ດ້ວຍຄວາມຫວັງປີໃໝ່, ປີມະເມຍ ເຕັມໄປດ້ວຍພະລັງຊີວິດ ແລະ ຄວາມໂຊກດີ.