ກອງທັບປະຊາຊົນຫວຽດນາມຍາມໃດກໍຈົງຮັກພັກດີກັບພັກ, ປະເທດຊາດ ແລະ ປະຊາຊົນ
(ພາບ:quandoinhandan)
|
ມາດຕາ 70 ຂອງຮ່າງລັດຖະທຳມະນູນປີ 1992 ສະບັບປັບປຸງໄດ້ກຳນົດວ່າ ກຳລັງປະກອບອາວຸດ ປະຊາຊົນຕ້ອງຈົງຮັກພັກດີກັບພັກກອມມູນິດຫວຽດນາມ, ປະເທດຊາດ ແລະ ປະຊາຊົນຢ່າງເດັດຂາດ. ນີ້ເປັນຄັ້ງທຳອິດທີ່ຫວຽດນາມໄດ້ມີ ລັດຖະທຳມະນູນກຳນົດວ່າ ກຳລັງປະກອບອາວຸດປະຊາຊົນຕ້ອງ ຈົ່ງຮັກພັກດີ ກັບພັກກອມມູນິດຫວຽດນາມຢ່າງເດັດຂາດ. ສິ່ງດັ່ງກ່າວແມ່ນສອດຄ່ອງກັບ ຂະບວນວິວັດແຫ່ງການສ້າງຕັ້ງ, ຂະຫຍາຍຕົວຜ່ານ 69 ປີ ທີ່ຜ່ານມາຂອງກອງທັບປະຊາຊົນຫວຽດນາມ, ພ້ອມທັງຢືນຢັນຄືນກ່ຽວກັບຄວາມຈິງໂດຍພາວະວິໄສວ່າ ບໍ່ມີເລື່ອງກອງທັບໃດຢືນຢູ່ນອກລະບົບການເມືອງ. ເນື້ອໃນດັ່ງກ່າວ ໄດ້ຮັບການຕອບສະໜອງຈາກຫາງສຽງໃນວິວັດການປະກອບຄຳເຫັນໃສ່ຮ່າງລັດຖະທຳມະນູນປີ 1992 ສະບັບປັບປຸງ ຊຶ່ງພວມໄດ້ຮັບການດຳເນີນ.
ກອງທັບບໍ່ແມ່ນກຳລັງການເມືອງໂດຍສ້າງຕັ້ງເອງ, ບໍ່ແມ່ນກຸ່ມສິດອຳນາດ. ທ່ານ ພົນຈັດຕະວາ, ສາດສະດາຈານ ບຸຍຟານກີ ນັກວິຊາການສະຖາບັນຍຸດທະສາດປ້ອງກັນຊາດຫວຽດນາມຖືວ່າ ຢູ່ບໍ່ວ່າປະເທດໃດໆ, ກອງທັບຍາມໃດກໍຕ້ອງຕິດພັນກັບກຳລັງການເມືອງໃດໜຶ່ງ. ທ່ານກ່າວວ່າ :
“ກອງທັບຫວຽດນາມ ໄດ້ຮັບການສ້າງຕັ້ງຂຶ້ນເມື່ອວັນທີ 22/12/1944, ກ່ອນທີ່ມີປະເທດສາທາລະນະລັດປະຊາທິປະໄຕຫວຽດນາມເກືອບ 1 ປີ ແລະ ກ່ອນທີ່ຈະມີລັດຖະທຳມະນູນ 2 ປີ. ເມື່ອອ່ານຄືນ ຄຳສັ່ງຂອງປະທານໂຮ່ຈິມິນເມື່ອຮຽກຮ້ອງໃຫ້ສ້າງຕັ້ງກອງທະຫານໂຄສະນາປົດປ່ອຍຊຶ່ງແມ່ນຕົ້ນກຳເນີດຂອງ ກອງທັບປະຊາຊົນຫວຽດນາມນັ້ນ ກໍເຫັນວ່າ ຄຳສັ່ງດັ່ງກ່າວ ໂດຍແມ່ນການສະເໜີຂອງບັນດາອົງການຈັດຕັ້ງ, ອົງການຈັດຕັ້ງຢູ່ບ່ອນນີ້ ກໍແມ່ນອົງຄະນະພັກກອງທັບ, ໃນຄາວນັ້ນຍັງບໍ່ທັນມີລັດ. ນີ້ກໍບໍ່ແມ່ນຈຸດພິເສດສະເພາະຂອງຫວຽດນາມ. ຢູ່ບໍ່ວ່າປະເທດໃດໃນໂລກ, ກອງທັບຕ້ອງຈົ່ງຮັກພັກດີກັບ ພັກກຳອຳນາດ, ປະເທດໃດກໍຕ້ອງມີພັກໜຶ່ງນຳພາ. ”
ໃນວັນນີ້, ກອງທັບປະຊາຊົນຫວຽດນາມໄດ້ຮັບການກໍ່ສ້າງຕາມທິດເປັນກຳລັງຫຼວງ, ທັນສະໄໝເພື່ອຮັບໃຊ້ 2 ໜ້າທີ່ຍຸດທະສາດ, ນັ້ນແມ່ນກໍ່ສ້າງ ແລະ ປົກປັກຮັກສາປະເທດຊາດຫວຽດນາມສັງຄົມນິຍົມ. ກອງທັບຕ້ອງຢືນຢູ່ຝ່າຍປະຊາຊົນ, ທາດແທ້ຂອງຊົນຊັ້ນກຳມະກອນ. ທ່ານ ພົນຈັດຕະວາ, ສາດສະດາຈານ ບຸຍຟານກີ ໄຈ້ແຍກວ່າ :
“ ເລື່ອງຈົງຮັກພັກດີກັບປະເທດຊາດ, ປະຊາຊົນ ແລະ ກັບພັກນຳພາ ແມ່ນທາດແທ້ຂອງກອງທັບ, ທັງແມ່ນໜ້າທີ່ຊຶ່ງຈຳເປັນຕ້ອງປະຕິບັດ. ຂ້າພະເຈົ້າເຊື່ອ ໝັ້ນວ່າ ກອງທັບໜຶ່ງມີທາດແທ້ເຊັ່ນນັ້ນ ແມ່ນບໍ່ອາດຢືນຢູ່ນອກລະບົບການເມືອງ. ຖ້າຫາກວ່າ ຢືນຢູ່ນອກລະບົບການເມືອງ, ຈະກາຍເປັນກອງກຳລັງອາຊີບ, ສູ້ຮົບຕາມການຊີ້ນຳເທົ່ານັ້ນ. ນີ້ແມ່ນການຫຼຸດລະດັບຂອງຕົນເອງ, ກາຍເປັນກຳລັງ ໂຣບົດ ”
ທ່ານພົນຕີ, ຮອງສາດສະດາຈານ ດຣ ຫງວຽນງອກໂຮ່ຍ ບັນນາທິການໃຫຍ່ວາລະສານ ປ້ອງກັນຊາດທົ່ວປວງຊົນຢືນຢັນວ່າ ທີ່ຈິງແລ້ວ, ບັນດາສິ່ງທີ່ເພີ່ມເຕີມໃນມາດຕາ 70 ຂອງຮ່າງລັດຖະທຳມະນູນປີ 1992 ສະບັບປັບປຸງ ແມ່ນການທີ່ລັດຖະທຳມະນູນໄດ້ກຳນົດກ່ຽວກັບປະຫວັດສາດຕົວຈິງໂດຍພາວະວິໄສຊຶ່ງໄດ້ຄົງຕົວມາເປັນເວລາ 69 ປີ ນັບແຕ່ມີກອງທະຫານໂຄສະນາປົດປ່ອຍຊຶ່ງແມ່ນຕົ້ນກຳເນີດຂອງ ກອງທັບປະຊາຊົນຫວຽດນາມ. ໃນຕະຫຼອດໄລຍະດັ່ງກ່າວ, ກອງທັບປະຊາຊົນຫວຽດນາມຍາມໃດກໍຈົ່ງຮັກພັກດີກັບພັກກອມມູນິດ ຫວຽດນາມ, ຍາມໃດກໍປົກປັກຮັກສາພັກ, ປະເທດຊາດ ແລະ ປະຊາຊົນ. ເພາະສະນັ້ນ, ຈຸດໃໝ່ໃນມາດຕາ 70 ແມ່ນຈຳເປັນ ແລະ ສອດຄ່ອງກັບຄວາມຕ້ອງການສ້າງພື້ນຖານດ້ານກົດໝາຍໃຫ້ແກ່ການເຄື່ອນໄຫວຂອງກອງທັບປະຊາຊົນຫວຽດນາມ. ດ້ານອື່ນ, ມັນຍັງສ່ອງແສງບາດກ້າວຂະຫຍາຍຕົວໃໝ່ໃນຈີນຕະນາການຍຸດທະສາດຂອງພັກໃນການສ້າງລັດແຫ່ງອຳນາດນິຕິບັນຍັດສັງຄົມນິຍົມ. ທ່ານພົນຕີ, ຮອງສາດສະດາຈານ ດຣ ຫງວຽນງອກໂຮ່ຍ ເວົ້າວ່າ :
“ໃນຕະຫຼອດໄລຍະ 69 ປີທີ່ຜ່ານມາ, ກອງທັບປະຊາຊົນຫວຽດນາມຍາມໃດກໍຈົງຮັກພັກດີກັບພັກ, ໂດຍອີງບົນ 3 ພື້ນຖານຄື : ອຸດົມການສູ້ຮົບຂອງກອງທັບ, ວຽກງານແນວຄິດ ແລະ ວຽກງານການຈັດຕັ້ງຂອງກອງທັບແມ່ນປະຕິບັດຕາມແນວທາງກໍ່ສ້າງກອງທັບຂອງພັກຫຼືບໍ່. ຄວາມຈິງໃນ 69 ປີທີ່ຜ່ານມາ, ໄດ້ສະແດງໃຫ້ເຫັນວ່າ ຈຸດໝາຍສູ້ຮົບຂອງພັກ ກໍແມ່ນຈຸດໝາຍສູ້ຮົບຂອງກອງທັບ. ນັ້ນແມ່ນເອກະລາດແຫ່ງຊາດ ແລະ ລັດທິສັງຄົມນິຍົມເພື່ອຄວາມຜາສຸກຂອງປະຊາຊົນ. ການສ້າງຕັ້ງຂຶ້ນຂອງກອງທະຫານໂຄສະນາປົດປ່ອຍ ກໍເພື່ອແນໃສ່ຈຸດປະສົງເພື່ອປົດປ່ອຍຊາດຕາມເສັ້ນທາງຂະບວນການຮັກຊາດໂດຍພັກກອມມູນິດຫວຽດນາມນຳພາ. ທີ່ 2 ແມ່ນວຽກງານແນວຄິດໃນກອງທັບປະຊາຊົນຫວຽດນາມໃນ 69 ປີທີ່ຜ່ານມາ, ລ້ວນແຕ່ແມ່ນເພື່ອແນໃສ່ໂຄສະນາແນວຄິດຂອງພັກໃນກອງທັບ. ທາງດ້ານການຈັດຕັ້ງຂອງກອງທັບປະຊາຊົນຫວຽດນາມ, ພ້ອມກັບລະບົບບັນຊາການນັ້ນ, ຍັງມີລະບົບການຈັດຕັ້ງພັກ ”
ສ່ວນທ່ານ ດຣ ກາວດຶກທ້າຍ ອະດີດຫົວໜ້າສະຖາບັນສິດທິມະນຸດ - ສະຖາບັນການເມືອງການປົກຄອງແຫ່ງຊາດ ໂຮ່ຈິມິນ ໃຫ້ຮູ້ວ່າ :
“ ຄວາມສຳນຶກກ່ຽວກັບເລື່ອງຈົງຮັກພັກດີກັບພັກ ແມ່ນຖືກເຂົ້າໃຈວ່າແມ່ນຈົງຮັກພັກດີກັບແນວທາງການກໍ່ສ້າງ ແລະ ປົກປັກຮັກສາປະເທດຊາດ, ໃນນັ້ນຕ້ອງຈົງຮັກພັກດີກັບແນວທາງການຕ່າງປະເທດ, ບໍ່ຖືກຕົກຢູ່ໃນກົນອຸບາຍຂອງບັນດາກຳລັງເປັນປໍລະປັກ. ທີ່ 2 ແມ່ນຈົງຮັກພັກດີກັບຈຸດໝາຍເອກະລາດແຫ່ງຊາດ ຕິດພັນກັບລັດທິສັງຄົມນິຍົມ, ລະອຽດແມ່ນສະໜັບສະໜູນບັນດາປັດໄຈທີ່ຕັ້ງໜ້າ, ຕ້ານຄືນການສະແຫວງຫາຜົນປະໂຫຍດຂອງກຸ່ມໃດໜຶ່ງ. ເລື່ອງຈົງຮັກພັກດີນີ້ ກໍລວມມີທັງການແບ່ງປັນຄວາມຫຍຸ້ງຍາກຂອງພັກ ແລະ ລັດໃນຈຸດເວລາປະຈຸບັນ ”
ການຮັກສາການນຳພາຂອງພັກກອມມູນິດຫວຽດນາມທີ່ມີຕໍ່ກອງທັບຢ່າງໝັ້ນຄົງ, ການກໍ່ສ້າງກອງທັບ ຍາມໃດກໍມີຄວາມໝັ້ນຄົງເຂັ້ມແຂງທາງດ້ານການເມືອງ ໄດ້ເຮັດໃຫ້ບັນດາພັກຝ່າຍການເມືອງປະຕິການ, ບັນດາກຳລັງສວຍໂອກາດ, ເດີນຕາມລັດທິສ່ວນບຸກຄົນ ຫວັງຍາດເອົາສິດອຳນາດ ບໍ່ສາມາດມີສິດນຳພາກອງທັບ ແລະ ຄວບຄຸມການບັນຊາກອງທັບ, ຫວັງແກ່ດຶງກອງທັບເຂົ້າຮ່ວມການເຄື່ອນໄຫວທໍລະຍົດຊາດ ແລະ ປະຊາຊົນ. ຄວາມຈິງໂດຍພາວະວິໄສ ແລະ ຜ່ານຂະບວນວິວັດ 69 ປີແຫ່ງການສ້າງຕັ້ງ, ຂະຫຍາຍຕົວຂອງກອງທັບ ປະຊາຊົນຫວຽດນາມ ໄດ້ສະແດງໃຫ້ເຫັນວ່າ ເລື່ອງລັດຖະທຳມະນູນກຳນົດວ່າ ກຳລັງປະກອບອາວຸດປະຊາຊົນຕ້ອງຈົ່ງຮັກພັກດີກັບພັກກອມມູນິດຫວຽດນາມ ຢ່າງເດັດຂາດ ແມ່ນສົມເຫດສົມຜົນຢ່າງສິ້ນເຊິ່ງ .