(vovworld)- ເບິ່ງແຍງດູແລ, ບຸລິມະສິດຜູ້ມີຄຸນງາມຄວາມດີຕໍ່ການປະຕິວັດ ແມ່ນນະໂຍບາຍໃຫຍ່ຂອງພັກ, ລັດ, ແມ່ນຫລັກການທີ່ໄດ້ຮັບການກຳນົດໃນລັດຖະທຳມະນູນ, ສະແດງໃຫ້ເຫັນຫລັກສິນທຳອັນເລິກເຊິ່ງ“ກິນເຂົ້າ ຄິດຮອດຄຸນນາ, ກິນປາຄິດຮອດຄຸນນຳ້“ ຂອງຊາດ. ໃນຊຸມປີຜ່ານມາ, ມີຫລາຍນະໂຍບາຍລະອຽດເພື່ອເບິ່ງແຍງດູແລຜູ້ມີຄຸນງາມຄວາມດີຕໍ່ການປະຕິວັດໄດ້ຮັບການປະກາດໃຊ້, ປັບປຸງໃຫ້ເໝາະສົມກັບແຕ່ລະໄລຍະແຫ່ງການພັດທະນາຂອງປະເທດຊາດ. ໃນປີ 2014, ຫວຽດນາມ ຈະສືບຕໍ່ຍູ້ແຮງການເບິ່ງແຍງດູແລຜູ້ມີຄຸນງາມຄວາມດີຕໍ່ການປະຕິວັດເພື່ອໃຫ້ເຂົາເຈົ້າມີຊີວິດນັບມື້ນັບດີກວ່າຄືດັ່ງຄຳຢືນຢັນຂອງທ່ານນາງ ຫງວຽນທິຫາຍຈວ່ຽນ, ລັດຖະມົນຕີກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ໃນລາຍການ“ປະຊາຊົນຖາມ-ລັດຖະມົນຕີຕອບ” ໃນວັນທີ 30/3.
ພາບປະກອບ:internet
|
ປະຈຸບັນ, ຜູ້ມີຄຸນງາມຄວາມດີຕໍ່ການປະຕິວັດຢູ່ຫວຽດນາມມີກວ່າ 8 ລ້ານຄົນ, ໃນນັ້ນ 1,5 ລ້ານຄົນໄດ້ຊົມໃຊ້ການອຸດຫນູນບຸລິມະສິດເປັນປະຈຳ. ແຕ່ລະປີ, ລັດ ລ້ວນແຕ່ສະຫງວນງົບປະມານຫລາຍພໍສົມຄວນໃຫ້ແກ່ການອຸດຫນູນຜູ້ມີຄຸນງາມຄວາມດີ ຕໍ່ການປະຕິວັດ. ທົ່ວສັງຄົມໄດ້ລະດົມແຫລ່ງກຳລັງຫລາຍຢ່າງເພື່ອຊ່ວຍຫນູນ, ສະແດງການເບິ່ງແຍງດູແລທາງດ້ານວັດຖຸ ແລະ ຈິດໃຈໃຫ້ແກ່ເປົ້າໝາຍນີ້.
ລະບອບນະໂຍບາຍບຸລິມະສິດຜູ້ມີຄຸນງາມຄວາມດີຕໍ່ການປະຕິວັດໄດ້ຮັບການເປີດກວ້າງ, ສອດຄອ່ງກັບສະພາບການພັດທະນາຂອງປະເທດຊາດ
ຜູ້ມີຄຸນງາມຄວາມດີຕໍ່ການປະຕິວັດ ໄດ້ຮັບຄວາມເອົາໃຈໃສ່, ເບິ່ງແຍງດູແລຈາກພັກ,ລັດ ດ້ວຍການບຸລິມະສິດຫລາຍຢ່າງທ່ີແຕກຕ່າງກັນ. ເຂົາເຈົ້າໄດ້ຮັບການຫນູນຊ່ວຍດ້ານການເງິນ ຜ່ານຫລາຍຮູບການ, ໃນນັ້ນ ສຳຄັນກວ່າໝູ່ແມ່ນຜ່ານການອຸດຫນູນປະຈຳເດືອນ.
ນັບແຕ່ເດືອນ 1/2008 ຮອດ ປີ2013, ລັດຖະບານ ໄດ້ປະຕິບັດການດັບປັບລະດັບອຸດຫນູນໃຫ້ ຜູ້ມີຄຸນງາມຄວາມດີຕໍ່ການປະຕິວັດເຖິງ 7 ຄັ້ງ ຈາກ 470.000 ດົງ/ເດືອນ(ປີ 2007) ຂຶ້ນເຖິງ 1.22.000 ດົງ/ເດືອນ(ແມ່ນສູງກວ່າລະດັບເງິນເດືອນພື້ນຖານ ແມ່ນ1.150.000 ດົງ/ເດືອນ).
ຄຽງຄູ່ກັບການອຸດຫນູນ, ແຕ່ລະປີ ລັດ ຍັງສະຫງວນຈຳນວນເງິນນັບພັນຕື້ດົງ ເພື່ອຫນູນຊ່ວຍກ່ຽວກັບເຮືອນຢູ່, ເບີກຈ່າຍບັນດາບວ້ງເງິນບຸລິມະສິດກ່ຽວກັບສາທາລະນະສຸກ, ການສຶກສາ, ໃຫ້ກູ້ຢືມແກ່ການພັດທະນາເສດຖະກິດ, ສ້າງວຽກເຮັດງານທຳໃຫ້ຜູ້ມີຄຸນງາມຄວາມດີຕໍ່ການປະຕິວັດ ແລະ ຍາດຕິພີ່ນ້ອງຂອງເຂົາເຈົ້າ.
ພ້ອມກັນນັ້ນ ບັນດາຂະບວນການ“ຕອບບຸນແທນຄຸນ”, “ກິນເຂົ້າຄິດຮອດຄຸນນາ, ກິນປາຄິດຮອດຄຸນນຳ້”,“ຕາແສງປະຕິບັດວຽກງານທະຫານເສຍອົງຄະ, ນັກຮົບເສຍສະຫລະຊີວິດເພື່ອຊາດ, ຜູ້ມີຄຸນງາມຄວາມດີຕໍ່ການປະຕິວັດ” ໄດ້ຮັບການພັດທະນາຢ່າງເລິກເຊິ່ງ, ກວ້າງຂວາງ ຢູ່ ທອ້ງຖິ່ນທັງໝົດ. ຕາມການສະຖິຕິແລ້ວ,97% ຄອບຄົວ ຜູ້ມີຄຸນງາມຄວາມດີຕໍ່ການປະຕິວັດ ມີລະດັບຄອງຊີບເທົ່າກັບ ຫລືສູງກວ່າລະດັບຄອງຊີບສະເລ່ຍຂອງປະຊາຊົນຢູ່ສະຖານທີ່ເຂົາເຈົ້າອາໄສ.
“ພັກ, ລັດ ໄດ້ພະຍາຍາມຫລາຍຢ່າງໃນການປະຕິບັດນະໂຍບາຍໃຫ້ແກ່ ຜູ້ມີຄຸນງາມຄວາມດີຕໍ່ການປະຕິວັດ. ບັນດານະໂຍບາຍນັ້ນ ໄດ້ຊ່ວຍສ້າງເງື່ອນໄຂໃຫ້ແກ່ ຜູ້ມີຄຸນງາມຄວາມດີຕໍ່ການປະຕິວັດຈຳນວນສ່ວນຫລາຍມີຊີວິດດີກວ່າ.”
ປັບປຸງນະໂຍບາຍບຸລິມະສິດຜູ້ມີຄຸນງາມຄວາມດີຕໍ່ການປະຕິວັດ ໃຫ້ສົມບູນແບບເທ່ືອລະກ້າວ.
ຖ້າວ່າ ປີ 2012 ແລະ 2013 ແມ່ນໄລຍະຊື່ງນະໂຍບາຍ ບຸລິມະສິດ ຜູ້ມີຄຸນງາມຄວາມດີຕໍ່ການປະຕິວັດ ມີການປ່ຽນແປງໃຫຍ່ຫລາຍຢ່າງ, ໃນນັ້ນ ປີ 2013 ແມ່ນປີທຳອິດປະຕິບັດຂໍ້ກຳນົດກ່ຽວກັບບັນດາລະບອບນະໂຍບາຍເພີ່ມເຕີມທີ່ມີຕໍ່ ຜູ້ມີຄຸນງາມຄວາມດີຕໍ່ການປະຕິວັດ, ປີ 2014-2015 ຈະກວດກາຄືນການປະຕິບັດນະໂຍບາຍບຸລິມະສິດຜູ້ມີຄຸນງາມຄວາມດີຕໍ່ການປະຕິວັດ. ນີ້ແມ່ນການສຳຫລວດກວດກາທີ່ມີຂອບຂະຫນາດໃຫຍ່ສຸດນັບແຕ່ກ່ອນມາຮອດປະຈຸບັນ ແລະ ຄາດວ່າ ມີປະມານ 4,8 ລ້ານຄົນຖືກກວດກາຄືນ. ແລະ ວຽກງານນີ້ ຈະໄດ້ຮັບການປະຕິບັດຢ່າງຄົບຊຸດຢູ່ 11.000 ຕາແສງໃນທົ່ວປະເທດ. ການກວດກາດັ່ງກ່າວແມ່ນສະແດງໃຫ້ເຫັນຄວາມເອົາໃຈໃສ່ຂອງພັກ, ລັດ ເພື່ອປັບປຸງນະໂຍບາຍທີ່ມີຕໍ່ ຜູ້ມີຄຸນງາມຄວາມດີຕໍ່ການປະຕິວັດ.
“ເປັນຄັ້ງທຳອິດທີ່ພວກເຮົາປະຕິບັດການສຳຫລວດກວດກາ. ປະຈຸບັນ ເງື່ອນໄຂດ້ານເສດຖະກິດພັດທະນາ, ລະດັບອຸດຫນູນ ແລະ ເປົ້າໝາຍໄດ້ຮັບການອຸດຫນູນຖືກເປີດກວ້າງອອກ. ສະນັ້ນ ພວກຂ້າພະເຈົ້າໄດ້ສົມທົບກັບແນວໂຮມປະເທດຊາດ ລະດົມທຸກກຳລັງໃນທົ່ວສັງຄົມພ້ອມກັນເຂົ້າຮ່ວມການສຳຫລວດກວດກາ, ພິເສດ ແມ່ນອົງການການເມືອງສັງຄົມ. ນີ້ແມ່ນການສຳຫລວດກວດກາທີ່ມີຄວາມໝາຍ ແລະ ເຕັມໄປດ້ວຍຄວາມຮັບຜິດຊອບຂອງພັກ, ລັດ ທີ່ມີຕໍ່ ຜູ້ມີຄຸນງາມຄວາມດີຕໍ່ການປະຕິວັດ ເພື່ອແກ້ໄຂກໍລະນີ ຜູ້ມີຄຸນງາມຄວາມດີຕໍ່ການປະຕິວັດ ແຕ່ບໍ່ທັນໄດ້ຊົມໃຊ້ ຫລື ບັນດາກໍລະນີຊົມໃຊ້ບໍ່ຖືກຕ້ອງ.”
ໄປຄຽງຄູ່ກັບການຜັນຂະຫຍາຍການສຳຫລວດກວດກາປະຕິບັດນະໂຍບາຍ ບຸລິມະສິດຜູ້ມີຄຸນງາມຄວາມດີຕໍ່ການປະຕິວັດ, ໃນປີ 2014, ກະຊວງແຮງງານ, ທະຫານເສຍອົງຄະ ແລະ ສັງຄົມ ໄດ້ປະຕິບັດແຜນຮ່າງ ກຳນົດອັດຖິນັກຮົບທີ່ເສຍສະຫລະຊີວິດເພື່ອຊາດທີ່ຍັງຂາດຂໍ້ມູນຂ່າວ, ສົມທົບກັບກະຊວງກໍ່ສ້າງ ສູ້ຊົນສຳເລັດການຫນູນຊ່ວຍເຮືອນຢູ່ໃຫ້ແກ່ຄອບຄົວ ຜູ້ມີຄຸນງາມຄວາມດີຕໍ່ການປະຕິວັດ ທີ່ພວມອາໃສໃນເຮືອນຊົ່ວຄາວ, ເຮືອນຖືກເປ່ເພ. ກະຊວງແຮງງາງນ, ທະຫານເສຍອົງຄະ ແລະ ສັງຄົມ ກໍໄດ້ວາງແຜນກຳນົດ, ສັບຊ້ອນ ແລະ ລົງທຶນພັດທະນາຮາກຖານລ້ຽງດູ, ປິ່ນປົວບຳລຸງສຸຂະພາບ, ຟື້ນຟູອະໄວຍະວະໃຫ້ແກ່ ຜູ້ມີຄຸນງາມຄວາມດີຕໍ່ການປະຕິວັດ.
ການປະຕິບັດນະໂຍບາຍ ບຸລິມະສິດ ຜູ້ມີຄຸນງາມຄວາມດີຕໍ່ການປະຕິວັດບໍ່ພຽງແຕ່ຊ່ວຍໃຫ້ ຜູ້ມີຄຸນງາມຄວາມດີຕໍ່ການປະຕິວັດນັບລ້ານໆຄົນ ມີຊີວິດດີກວ່າເທົ່ານັ້ນ, ຫາກຍັງປະກອບສວ່ນຮັບປະກັນຊີວິດສັງຄົມ, ສະແດງໃຫ້ເຫັນຫລັກສິນທຳ ກິນເຂົ້າຄິດຮອດຄຸນນາ, ກິນປາຄິດນອດຄຸນນຳ້ຂອງຊາດຫວຽດນາມ ອີກດ້ວຍ.