(ພາບປະກອບ)
(vovworld)- ຕໍ່ຈາກຂໍ້ຕົກລົງຂອງອາເມລິກາ, ວັນທີ 25/7, ສະຫະພາບເອີລົບ (EU) ລວມມີ 28 ປະເທດສະມາຊິກບັນລຸໄດ້ຂໍ້ຕົກລົງເບື້ອງຕົ້ນກ່ຽວກັບການຈັດວາງບັນດາມາດຕະການລົງໂທດດ້ານເສດຖະກິດຕໍ່ລັດເຊຍ. ຄາດວ່າ, ເອກະສານສຸດທ້າຍຈະໄດ້ຮັບຮອງເອົາໃນອາທິດນີ້. ຝ່າຍຕາເວັນຕົກຖືວ່າ, ການເພີ່ມທະວີການລົງໂທດແມ່ນມາດຕະການທີ່ມີປະໂຫຍດເພື່ອຮັບປະກັນອັນທີ່ເອີ້ນວ່າສະຖຽນລະພາບ ແລະ ສັນຕິພາບໃນພາກພື້ນເພື່ອກ່າວເຕືອນບັນດາການກະທຳທີ່ຖືກຖືວ່າຍື່ນມືເຂົ້າຢູແກຼນ, ຂອງລັດເຊຍ. ເຖິງຢ່າງໃດກໍ່ຕາມ, ຜົນຮ້າຍຢ້ອນຫຼັງເຖິງ EU ຕ້ອງຮັບພັດບໍ່ແມ່ນໜ້ອຍ
ຂໍ້ຕົກລົງກ່ຽວກັບການລົງໂທດເບື້ອງຕົ້ນຂອງ EU ແນໃສ່ພື້ນຖານເສດຖະກິດລັດເຊຍ ຖືກຍົກອອກມາພາຍຫຼັງເຫດການເຮືອບິນ MH 17 ຂອງມາເລເຊຍ ຖືກຍິງຕົກເມື່ອວັນທີ 17/7 ຢູ່ ຢູແກຼນຕາເວັນອອກໂດຍກຳລັງແຍກຕົວອອກນິຍົມລັດເຊຍຄວບຄຸມ. ຂໍ້ຕົກລົງນີ້ເຮັດໃຫ້ການພົວພັນທີ່ເຄີຍຖືກແຕກແຫງລະຫວ່າງຝ່າຍຕາເວັນຕົກ ແລະ ລັດເຊຍ ນັບແຕ່ແຫຼມ ກຣຶມ ຖືກໂອນເຂົ້າລັດເຊຍ ເມື່ອເດືອນ 3/2014 ຜ່ານມາ ຖືກຊົ່ວຮ້າຍລົງ.
ລົງໂທດບັນດາຂົງເຂດຕົ້ນຕໍຂອງພື້ນຖານເສດຖະກິດເວັ້ນເສຍແຕ່ອາຍແກດ
EU ມອບໃຫ້ຄະນະກຳມະການເອີລົບ (EC) ຊື່ງແມ່ນອົງການບໍລິຫານຂອງ EU ສ້າງບັນດາມາດຕະການລົງໂທດດ້ານເສດຖະກິດເພິ່ມເຕີມສຳລັບລັດເຊຍ. ຄະນະກຳມະການນີ້ໄດ້ສະເໜີ 4 ເນື້ອໃນລົງໂທດຕົ້ນຕໍ, ນັ້ນແມ່ນປິດຕະຫຼາດ EU ສຳລັບບັນດາທະນາຄານແຫ່ງລັດຂອງລັດເຊຍ, ຫ້າມຄ້າຂາຍອາວຸດກັບມົດສະກູ, ຈຳກັດການຂາຍພະລັງງານ ແລະ ບັນດາເຕັກໂນໂລຊີຮັບໃຊ້ທັງຈຸດປະສົງພົນລະເຮືອນ-ການທະຫານ. ແຕ່ວ່າ, ຄຳສັ່ງລົງໂທດຈະບໍ່ຈັດວາງໃນຂົງເຂດເຕັກໂນໂລຊີອາຍແກດສຳຄັນທີ່ສຸດຂອງລັດເຊຍ ກໍ່ຄືບໍ່ສົ່ງຜົນສະທ້ອນເຖິງການເຄື່ອນໄຫວສະໜອງນ້ຳມັນອາຍແກດ ແລະ ສິນຄ້າປະເພດອື່ນຈາກລັດເຊຍ.
ເພື່ອຢັ້ງຢືນຂໍ້ມູນຂ່າວດັ່ງກ່າວ, ວັນທີ 28/7, ທຳນຽບຂາວອອກແຈ້ງການໂດຍໃຫ້ຮູ້ວ່າ: ອາເມລິກາ ແລະ EU ມີແຜນການຈັດວາງບັນດາມາດຕະການລົງໂທດໃໝ່ສຳລັບລັດເຊຍ ເພື່ອແນໃສ່ບັນດາຂົງເຂດຫຼັກແຫຼ່ງໃນພື້ນຖານເສດຖະກິດ. ໃນຂະນະນັ້ນ, ໂຄສົກຂອງທ່ານນາຍົກລັດຖະມົນຕີອັງກິດ David Cameron ຮັບຮູ້ວ່າຝ່າຍຕາເວັນຕົກເຫັນດີເຫັນພ້ອມນຳກັນວ່າ EU ຄວນໃຊ້ມາດຕະການລົງໂທດທີ່ແຂງກະດ້າງ ຍິ່ງໄວກໍຍິ່ງດີ. ສາຍເຫດແມ່ນຍ້ອນວ່າ, ລັດເຊຍ ບໍ່ກໍ່ກຳລັງດັນ ຕໍ່ບັນດາມືປືນຢູ່ ຢູແກຼນຕາເວັນອອກ ຢ່າງມີປະສິດທິຜົນ ເພື່ອເຮັດໃຫ້ເຂົ້າເຈົ້າຕ້ອງເຂົ້າຮ່ວມການເຈລະຈາ ຫຼືບໍ່ມີມາດຕະການລະອຽດເພື່ອຄວບຄຸມເຂດຊາຍແດນລະຫວ່າງລັດເຊຍ ແລະ ຢູແກຼນ.
ບໍ່ພຽງແຕ່ຍູ້ໄວການເພີ່ມເຕີມ ບັນດາມາດຕະການລົງໂທດດ້ານເສດຖະກິດ ເທົ່ານັ້ນ, ອີຢູ ຍັງເພີ່ມເຕີມຄຳສັ່ງປິດລ້ອມຊັບສົມບັດ ແລະ ຫ້າມເຈົ້າໜ້າທີ່ຂັ້ນສູງຈຳນວນໜຶ່ງຂອງລັດເຊຍ ເຂົ້າອີຢູ ອີກດ້ວຍ, ໃນນັ້ນມີຫົວໜ້າອົງການປ້ອງກັນຄວາມສະຫງົບສະຫະພັນ (FSB) Alexander Bortnikov ແລະ ຫົວໜ້າອົງການສືບລາຊະການລັບການຕ່າງປະເທດ, Mikhaik Dradkov. ນີ້ແມ່ນເຈົ້າໜ້າທີ່ສອງທ່ານໃນຈຳນວນເຈົ້າໜ້າທີ່ລັດເຊຍ ແລະ ຢູແກຼນ 15 ທ່ານ, ພ້ອມກັບບໍລິສັດ ແລະ ອົງການຈັດຕັ້ງ 18 ແຫ່ງທີ່ນອນໃນບັນຊີລາຍຊື່ຖືກລົງໂທດເພີ່ມເຕີມຂອງອີຢູ.
ຜົນຮ້າຍຢ້ອນຫຼັງ
ການລົງໂທດຢ່າງເຄັ່ງຄັດບໍ່ພຽງແຕ່ສົ່ງຜົນເສຍຫາຍເຖິງເສດຖະກິດຂອງລັດເຊຍເທົ່ານັ້ນ, ຫາກຍັງສົ່ງຜົນເສຍຫາຍເຖິງຝ່າຍຕາເວັນຕົກອີກດ້ວຍ. ບັນດານັກເສດຖະກິດຖືວ່າ, ຖ້າຢາກລົງໂທດດ້ານເສດຖະກິດລັດເຊຍ, ບັນດາການນຳອີຢູ ຈະຕ້ອງຍອມຫຼຸດລະດັບເຕີບໂຕ ຈີດີພີ ໃນອີຢູ ລົງ 2..3%. ຕາມທ່ານ Eckhard CordesF ປະທານຄະນະກຳມະການພົວພັນເສດຖະກິດກັບເອີລົບຕາເວັນອອກ ຂອງເຢຍລະມັນ ແລ້ວ, ການເພີ່ມມາດຕະການລົງໂທດ ຈະເຮັດໃຫ້ຄ່າທົດແທນເຊິ່ງ ອີຢູ ຕ້ອງເສຍເພີ່ມຂຶ້ນ.ປະຈຸບັນ, ອີຢູ ພວມສົ່ງອອກສິນຄ້າ ແລະ ການບໍລິການເຂົ້າລັດເຊຍ ກວ່າ 100 ຕື້ USD/ປີ, ສະເພາະປີ 2013 ແມ່ນ 161 ຕື້ USD. ເຖິງຢ່າງໃດກໍ່ຕາມ, ຕົວເລກນີ້ຈະຖືກຫຼຸດລົງຢ່າງແນ່ນອນ ເມື່ອບາງປະເທດໃນອີຢູ ຖືກຜົນສະທ້ອນຈາກການລົງໂທດລັດເຊຍ. ຕົວຢ່າງຄື: ເຢຍລະມັນ ຖືກຮັບຜົນເສຍຫາຍກວ່າໝູ່ ເມື່ອການພົວພັນລະຫວ່າງອີຢູ ກັບລັດເຊຍ ຊົ່ວຮ້າຍລົງ, ວຽກເຮັດງານທຳຂອງຊາວເຢຍລະມັນ 300.000 ຄົນແມ່ນຂຶ້ນກັບການແລກປ່ຽນດ້ານການຄ້າກັບລັດເຊຍ. ປີ 2013, ເຢຍລະມັນ ສົ່ງອອກສິນຄ້າໄປຍັງລັດເຊຍ 36 ຕື້ເອີໂຣ, ແຕ່ໃນ 4 ເດືອນຕົ້ນປີ 2014 ໄດ້ຫຼຸດລົງ 14%. ສ່ວນຝລັ່ງ ປະຈຸບັນແມ່ນປະເທດສະໜອງອາວຸດຫຼາຍສຸດໃຫ້ແກ່ລັດເຊຍ, ດ້ວຍສັນຍາຂາຍກຳ່ປັ່ນສູ້ຮົບ Mistral 2 ລຳ ທີ່ມີມູນຄ່ານັບຕຶ້ເອີໂຣໃຫ້ແກ່ລັຍເຊຍ, ໝາຍຄວາມວ່າວຽກເຮັດງານທຳຂອງຊາວ ຝລັ່ງ 1.000 ຄົນຈະຖືກຜົນສະທ້ອນ. ຖ້າຫາກ ອີຢູ ລົງໂທກບັນດາທະນາຄານແຫ່ງລັດຂອງລັດເຊຍ, ສູນການເງິນລອນດອນ ຈະຂາດແຫຼ່ງທຶນທີ່ສຳຄັນ.
ໃນຂະນະນັ້ນ, ກະຊວງການຕ່າງປະເທດລັດເຊຍ ພັດຖືວ່າ, ບັນດາຄຳສັ່ງລົງໂທດເພີ່ມເຕີມ ແມ່ນພະຍານຫຼັກຖານສະແດງໃຫ້ເຫັນວ່າ, ບັນດາປະເທດອີຢູ ພວມຫຼຸດຜ່ອນການພົວພັນຮ່ວມມືຮອບດ້ານກັບລັດເຊຍ ໃນບັນດາບັນຫາຄວາມສະຫົງບປອດໄພສາກົນ ແລະ ພາກພື້ນ. ເຖິງຢ່າງໃດກໍ່ຕາມ, ທ່ານລັດຖະມົນຕີວ່າການກະຊວງການຕ່າງປະເທດລັດເຊຍ Sergei Lavrov ໄດ້ຢືນຢັນວ່າ, ບັນດາມາດຕະການລົງໂທດໂດຍອາເມລິກາ ແລະ ອີຢູ ຈັດວາງສຳລັບລັດເຊຍ ຈະບໍ່ບັນລຸໄດ້ຈຸດປະສົງ, ຫາກພຽງແຕ່ເຮັດໃຫ້ລັຍເຊຍກາຍເປັນປະເທດເອກະລາດດ້ານເສດຖະກິດກວ່າເທົ່ານັ້ນ. ທ່ານກໍ່ຊີ້ແຈ້ງວ່າ, ມົດສະກູ ຈະບໍ່ປະຕິບັດບັນດາມາດຖະການໂຕ້ຕອບ ຫຼືການກະທຳຮັບມືໃດໆຕໍ່ມາດຕະການລົງໂທດຂອງອາເມລິກາ ແລະ ອີຢູ ທີ່ກ່ຽວຂ້ອງເຖິງວິກິດການ ຢູແກຼນ.
ການນຳໃຊ້ບັນດາມາດຕະການລົງໂທດດ້ານເສດຖະກິດ ແມ່ນເຄີຍມີຢູ່ແລ້ວໃນການພົວພັນສາກົນ. ເຖິງຢ່າງໃດກໍ່ຕາມ, ເຖິງວ່າຈະລົງໂທດດ້ວຍລະດັບໃດກໍ່ສົ່ງຜົນເສຍຫາຍໃຫ້ທັງສອງຝ່າຍ. ໃນກໍລະນີນີ້, ການເພີ່ມມາດຕະການລົງໂທດລັດເຊຍ ຂອງອີຢູ ຈະເຮັດໃຫ້ການພົວພັນຮ່ວມມືຮອບດ້ານລະຫວ່າງອີຢູ - ລັດເຊຍ ນັບມື້ນັບຊົ່ວຮ້າຍລົງເທົ່ານັ້ນ.