(vovworld) - ພາຍຫຼັງສະຫະພາບເອີລົບ (ອີຢູ) ອອກສັນຍານຢາກຊຸກຍູ້ການຮ່ວມມືກັບກູບາເປັນເວລາເກືອບ 1 ເດືອນ, ວັນທີ 6/3 ຜ່ານມາ, ທ່ານລັດຖະມົນຕີການຕ່າງປະເທດກູບາ Bruno Rodriguez ໄດ້ປະກາດເຫັນດີດຳເນີນການເຈລະຈາ ເພື່ອສ້າງການພົວພັນສອງຝ່າຍເປັນປົກກະຕິ ພາຍຫຼັງ 10 ປີຖືກຢຸດສະງັກ. ສິ່ງດັ່ງກ່າວໝາຍຄວາມວ່າ, ບັນຫາກີດຂວາງສຸດທ້າຍໃນການສ້າງການພົວພັນ 2 ຝ່າຍເປັນປົກກະຕິໄດ້ຮັບການແກ້ໄຂແລ້ວ, ອັນໄດ້ສ້າງເປັນພື້ນຖານໃຫ້ແກ່ບາດກ້າວໃຫຍ່ກວ່າໃນການພົວພັນລະຫວ່າງອີຢູ - ກູບາ ໃນອະນາຄົດ.
ທ່ານເອກອັກຄະລັດຖະທູດອີຢູ ປະຈຳກູບາ Herman Portocarero
(ພາບ: AP)
ລັດຖະບານກູບາ ເຫັນດີຕໍ່ຂໍ້ສະເໜີດຳເນີນການເຈລະຈາ ໂດຍຜູ້ຕາງໜ້າຂັ້ນສູງກ່ຽວກັບນະໂຍບາຍປ້ອງກັນຄວາມສະຫງົບ ແລະ ການຕ່າງປະເທດຂອງອີຢູ, ທ່ານນາງ Catherine Ashton, ຍົກອອກມາເມື່ອວັນທີ 10/3. ຕາມນັ້ນແລ້ວ, ສອງຝ່າຍຈະດຳເນີນການເຈລະຈາເພື່ອມຸ້ງໄປສູ່ການເຊັນສັນຍາ ສ້າງການພົວພັນເປັນປົກກະຕິລະຫວ່າງສອງຝ່າຍ, ເຊິ່ງເອີ້ນວ່າ “ສັນຍາຮ່ວມມື ແລະ ເຈລະຈາດ້ານການເມືອງ“, ເພື່ອແນໃສ່ເປີດຊ່ອງທາງໃຫ້ແກ່ການພົວພັນທາງດ້ານເສດຖະກິດ ແລະ ການຄ້າຢ່າງເລິກເຊິ່ງ ແລະ ກວ້າງຂວາງກວ່າ. ຂໍ້ຕົກລົງດັ່ງກ່າວແມ່ນການປ່ຽນແປງດ້ານການທູດທີ່ມີຄວາມໝາຍທີ່ສຸດ ນັບແຕ່ອີຢູຍົກເລີກຄຳສັ່ງຂວ້ຳບາດກູບາ ເມື່ອປີ 2008.
ເປີດຊ່ອງທາງໃຫ້ແກ່ການສ້າງການພົວພັນເປັນປົກກະຕິລະຫວ່າງສອງຝ່າຍ
ທ່ານເອກອັກຄະລັດຖະທູດອີຢູ ປະຈຳກູບາ Herman Portocarero, ຖືເລື່ອງອີຢູ ດຳເນີນການເຈລະຈາກັບກູບາ ແມ່ນບາດກ້າວທີ່ມີລັກສະນະຕັດສິນ ແລະ ຖືວ່າຄວາມເຂົ້າໃຈເຊິ່ງກັນ ແລະ ກັນ ຈະສ້າງຜົນປະໂຫຍດໃຫ້ທັງສອງຝ່າຍ. ທ່ານເອກອັກຄະລັດຖະທູດ Portocarero ເນັ້ນໜັກວ່າ, ອີຢູ ເອົາໃຈໃສ່ເຖິງເລື່ອງມີໜ້າໃນວິວັດການປ່ຽນແປງເສດຖະກິດຢູ່ກູບາ ແລະ ດ້ວຍສັນຍາຮ່ວມມື ແລະ ເຈລະຈາດ້ານການເມືອງນັ້ນ, ອີຢູ ຈະຊອກຫາການພົວພັນທີ່ຂະຫຍັນຂັນເຄື່ອນກັບປະເທດນີ້.
ບໍ່ແມ່ນວ່າມາຮອດປະຈຸບັນອີຢູ ຈຶ່ງຢາກສ້າງການພົວພັນຄືນໃໝ່ກັບກູບາ. ຄວາມຈິງແລ້ວ, ການພົວພັນລະຫວ່າງອີຢູ ກັບກູບາ ເລີ່ມເຊື່ອມຕໍ່ແຕ່ປີ 2008 ແລ້ວ ພາຍຫຼັງທີ່ກູບາ ປ່ອຍຕົວບັນດາຜູ້ຕ້ານລັດຖະບານ. ນັບແຕ່ນັ້ນ, ອີຢູ ໄດ້ຊ່ວຍເຫຼືອກູບາປະມານ 110 ລ້ານໂດລາສະຫະລັດເພື່ອ ພັດທະນາ. ເດືອນ 11/2012, ອີຢູ ໄດ້ເຫັນດີດຳເນີນການເຈລະຈາຂໍ້ຕົກລົງສອງຝ່າຍກັບກູບາ ແລະ ຕົ້ນເດືອນ 2/2014, ບັນດາເຈົ້າໜ້າທີ່ອີຢູ ຖະແຫຼງວ່າ ພັນທະມິດພ້ອມແລ້ວທີ່ຈະປັບປຸງການພົວພັນກັບກູບາ ເພື່ອແນໃສ່ເປີດກວ້າງຂອບເຂດການຮ່ວມມືລະຫວ່າງສອງຝ່າຍ.
ສາສະດາຈານ Joaquin Roy, ຜູ້ອຳນວຍການສູນອີຢູ ຢູ່ Miami, ຖືວ່າ, ເຖິງວ່າຫຼັກການ “ຫຼັກໝັ້ນລວມ“ ຍັງຄົງຕົວນັບແຕ່ປີ 1996 ກໍ່ຕາມ, ແຕ່ຄວາມຈິງແລ້ວ, ມີຫຼາຍປະເທດສະມາຊິກອີຢູ ຍັງຄົງຮ່ວມມືທາງດ້ານການຄ້າ, ການລົງທຶນ, ໜູນຊ່ວຍການພັດທະນາກັບກູບາ ຢູ່.
ຜົນປະໂຫຍດທາງດ້ານເສດຖະກິດ ແມ່ນກຳລັງໜູນຊຸກຍູ້ການຮ່ວມມື
ຕາມວົງການນັກສັງເກດການແລ້ວ, ຍ້ອນຄິດໄລ່ເຖິງຜົນປະໂຫຍດນັ້ນ ໄດ້ເຮັດໃຫ້ອີຢູ ຕ້ອງປັບປຸງນະໂຍບາຍກັບກູບາ, ໃນສະພາບການທີ່ປະເທດນີ້ນັບມື້ນັບເປີດປະຕູ ແລະ ໄດ້ຮັບຜົນງານບາງຢ່າງໃນວິວັດການປະຕິຮູບເສດຖະກິດ - ສັງຄົມ. ຍັງມີທິດທາງໃໝ່ເຊິ່ງລັດຖະບານກູບາພວມປະຕິບັດ ນັ້ນແມ່ນກະກຽມເປີດປະຕູເຂດພັດທະນາພິເສດຢູ່ທ່າກຳ່ປັ່ນ Mariel ແນໃສ່ ດຶງດູດແຫຼ່ງທຶນຈາກຕ່າງປະເທດ, ເພື່ອຜະລິດສິນຄ້າຮັບໃຊ້ການສົ່ງອອກ, ຊຸກຍູ້ການພັດທະນາເສດຖະກິດປະເທດຊາດ. ພ້ອມກັນນັ້ນ, ກົດໝາຍວ່າດ້ວຍການລົງທຶນຕ່າງປະເທດສະບັບໃໝ່, ທີ່ມີລັກສະນະເປີດອົກເປີດໃຈກວ່າຄາດວ່າຈະໄດ້ຮັບການຮັບຮອງເອົາທ້າຍໄຕມາດທີ 1/2014. ບັນດາມາດຕະການເສດຖະກິດໃໝ່ນີ້ຄາດວ່າຈະສ້າງໂອກາດດຳເນີນທຸລະກິດ ກໍ່ຄືຊຸກຍູ້ການພັດທະນາເສດຖະກິດໃຫ້ແກ່ປະເທດນີ້. ທ່ານເອກອັກຄະລັດຖະທູດອີຢູ ປະຈຳກູບາ Herman Portocarero, ຍັງຕີລາຄາສູງບົດບາດຂອງກູບາໃນການເຊື່ອມໂຍງກັບພາກພື້ນອາເມລິກາລາຕີ ຜ່ານປະຊາຄົມບັນດາປະເທດເຂດ Caribe ແລະ ອາເມລິກາລາຕີນ (CELAC).
ກ່ຽວກັບການແລກປ່ຽນການຄ້າ, ຕາມການສະຖິຕິແລ້ວ, ເອີລົບແມ່ນຄູ່ແຂງໃຫຍ່ອັນດັບ 2 ຂອງກູບາ (ຖັດຈາກ Venezela). ສິນຄ້າສົ່ງອອກຂອງທະວີບນີ້ໄປຍັງກູບາ ໄດ້ຂຶ້ນເຖິງ 2 ຕື້ ເອີໂຣ, ໃນນັ້ນປະມານ 20% ແມ່ນສິນຄ້າສົ່ງອອກຈາກອີຢູ. ໃນສະພາບວິກິດການໜີ້ສາທາລະນະ, ການຫວ່າງງານທີ່ແຜ່ລາມຢ່າງກວ້າງຂວາງຢູ່ອີຢູນັ້ນ, ເລື່ອງຊອກຫາຕະຫຼາດຈຳໜ່າຍສິນຄ້າແມ່ນສິ່ງທີ່ຈຳເປັນສຳລັບອີຢູ.
ເລື່ອງກູບາເຫັນດີດຳເນີນການເຈລະຈາເພື່ອສ້າງການພົວພັນເປນປົກກະຕິກັບອີຢູ ຈະຊ່ວຍໃຫ້ບັນດາປະເທດມະຫາອຳນາດດ້ານເສດຖະກິດນີ້ສວຍໃຊ້ກາລະໂອກາດຮ່ວມມືພັດທະນາເສດຖະກິດ, ການຄ້າຢູ່ປະເທດທີ່ມີຄວາມສາມາດບົ່ມຊ້ອນນີ້, ກົງກັນຂ້າ, ກູບາ ກໍ່ໄດ້ຮັບຜົນປະໂຫຍດຫຼາຍຢ່າງຈາກການປັງປຸງການພົວພັນກັບອີຢູ ເພື່ອຍົກສູງທີ່ຕັ້ງ ຂອງຕົນໃນເວທີສາກົນ.