(vovworld) – ພາຍຫຼັງ ກວ່າ 1 ເດືອນ ທີ່ດຳເນີນການເຈລະຈາ ຕ່າງໆ ເພື່ອສ້າງການພົວພັນ ກູບາ - ສະຫະພາບເອີລົບ (ອີຢູ) ເປັນປົກປະຕິ. ວັນທີ 12/4, ທ່ານລັດຖະມົນຕີການຕ່າງປະເທດຝລັ່ງ Laurent Fabius ໄດ້ມີການຢ້ຽມຢາມກູບາ. ເຖິງວ່າການຢ້ຽມຢາມດຳເນີນໃນເວລາພຽງສອງ, ສາມຊົ່ວໂມງເທົ່ານັ້ນ, ແຕ່ໄດ້ສ້າງເປັນຂີດໝາຍທີ່ດີໃນການພົວພັນສອງປະເທດ ພາຍຫຼັງຖືກຢຸດສະງັກມາເປັນເວລາ 3 ທົດສະວັດ.
ລັດຖະມົນຕີການຕ່າງປະເທດກູບາຕ້ອນຮັບລັດຖະມົນຕີການຕ່າງປະເທດຝລັ່ງມາຢ້ຽມຢາມກູບາ
(ພາບ: AP)
ການຢ້ຽມຢາມກູບາ ຄັ້ງຫຼ້າສຸດຂອງລັດຖະມົນຕີການຕ່າງປະເທດຝລັ່ງ ແມ່ນໃນປີ 1983. ພ້ອມກັບບັນດາສະມາຊິກອື່ນໆໃນ ອີຢູ, ຝລັ່ງໄດ້ຢຸດຕິການພົວພັນຄູ່ຮ່ວມມືກັບກູບາແຕ່ປີ 2003. ໃນການຢ້ຽມຢາມກູບາ ຄັ້ງນີ້, ສອງຝ່າຍໄດ້ປຶກສາຫາລືກ່ຽວກັບທຸກຂົງເຂດຮ່ວມມື, ນັບແຕ່ດ້ານການເມືອງ, ເສດຖະກິດ, ວັດທະນະທຳ, ການສຶກສາ…
ຜົນງານແທດຈິງໃນບັນດາເນື້ອຮ່ວມມືສອງຝ່າຍ
ການຢ້ຽມຢາມກູບາຂອງທ່ານລັດຖະມົນຕີການຕ່າງປະເທດຝລັ່ງ Laurent Fabius ໄດ້ຊ່ວຍໃຫ້ຝລັ່ງສົ່ງສານທີ່ສຳຄັນຫຼາຍຢ່າງ. ກ່ຽວກັບທາງດ້ານການເມືອງ, ພາຍຫຼັງການພົບປະນອກແຜນການລະຫວ່າງລັດຖະ ມົນຕີການຕ່າງປະເທດຝລັ່ງ ກັບທ່ານປະທານກູບາ Raul Castro, ແລະ ການພົບປະເຈລະຈາກັບຜູ້ຮ່ວມຕຳແໜ່ງກູບາ Bruno Rodriguez. ທ່ານລັດຖະມົນຕີການຕ່າງປະເທດຝລັ່ງ Laurent Fabius ຢືນຢັນວ່າກູບາ ໄດ້ໄປຖືກທິດໃນວິວັດການປະຕິຮູບ. ທ່ານກໍ່ໄດ້ຍ້ອງຍໍບົດບາດຂອງກູບາ ໃນວິວັດການເຈລະຈາສັນຕິພາບລະຫວ່າງລັດຖະບານໂກລົມເບຍ ແລະ ກຳລັງປະກອບອາວຸດປະຕິວັດໂກລົມເບຍ (FAEC), ການປະກອບສ່ວນຂອງກູບາ ໃນຜົນສຳເລັດຂອງກອງປະຊຸມສຸດຍອດປະຊາຄົມບັນດາປະເທດອາເມລິກາລາຕີນ ແລະ ກາຮີເບ (CELAC) ເມື່ອເດືອນ 1 ຜ່ານມາຢູ່ລາຮາວານ. ທ່ານລັດຖະມົນຕີການຕ່າງປະເທດຝລັ່ງ ກໍ່ເຕື້ອງເຖິງເລື່ອງປາຣີ ໄດ້ມານະພະຍາຍາມເກ້ຍກ່ອມອາເມລິກາ ຍຸບເລີກຄຳສັ່ງຂວ້ຳບາດສຳລັບກູບາ .
ກ່ຽວກັບຂົງເຂດເສດຖະກິດ, ທ່ານ Laurent Fabius ໄດ້ຢືນຢັນເຖິງຫຼາຍຂົງເຂດ ເຊິ່ງທັງສອງປະເທດສາມາດຮ່ວມມືນຳກັນເຊັ່ນ: ພະລັງ ງານ, ການທ່ອງທ່ຽວ, ກະສີກຳ. ຫວ່າງແລ້ວນີ້, ຝລັ່ງ ໄດ້ແຕ່ງຕັ້ງຜູ້ຕາງໜ້າລັດຖະບານເຂົ້າຮ່ວມງານຕະຫຼາດນັດສາກົນກ່ຽວກັບການທ່ອງທ່ຽວຢູ່ລາຮາວານ ໃນເດືອນ 5 ຈະມາເຖິງ. ທ່ານກໍ່ໄດ້ເຕື້ອງເຖິງການຮ່ວມມືໃນຂົງເຂດການສຶກສາ ແລະ ວັດທະນະທຳ.
ອາດເວົ້າໄດ້ວ່າທັງກູບາ ແລະ ຝລັ່ງ ລ້ວນແຕ່ມີຜົນປະໂຫຍດເມື່ອເຊື່ອມຕໍ່ການພົວພັນນຳກັນ. ຕາມວົງການນັກສັງເກດການແລ້ວ, ບັນດາປະເທດໃກ້ຄຽງຂອງກູບາ ແມ່ນປະເທດທີ່ຝລັ່ງມີອິດທິພົນດ້ານການເມືອງ, ວັດທະນະທຳໜ້ອຍສຸດ, ທັງແມ່ນຕະຫຼາດທີ່ການມີໜ້າຂອງວິສາຫະກິດ ຝລັ່ງຍັງຈຳກັດຢູ່. ໃນຂະນະນັ້ນ, ກູບາ ພວມຍູ້ແຮງວິວັດການປະຕິຮູບ, ພິເສດແມ່ນໃນຂົງເຂດເສດຖະກິດ ແລະ ແມ່ນປະເທດທີ່ມີທີ່ຕັ້ງສຳຄັນພໍສົມຄວນຢູ່ພາກພື້ນ. ຍ້ອນເຫດນັ້ນ, ເມື່ອຊຸກຍູ້ການພົວພັນກັບກູບາ ຈະຊ່ວຍໃຫ້ຝລັ່ງເພີ່ມອິດທິພົນ, ສຳພັດກັບຄວາມສາມາດບົ່ມຊ້ອນໃນການ ຮ່ວມມືດ້ານການເມືອງ ແລະ ເສດຖະກິດ, ການຄ້າຢູ່ທັງພາກພື້ນ, ນອກນັ້ນອາດຈະມີບົດບາດຫຼາຍກວ່າໃນການກຳນົດທິດທາງ ແລະ ຕັດສິນລະດັບການພົວພັນຮ່ວມມືລະຫວ່າງ ອີຢູ ກັບກູບາ ອີກ.
ສ່ວນກູບາ ມີຄວາມຕ້ອງການປັບປຸງການພົວພັນກັບອີຢູ ເວົ້າລວມ ແລະ ກັບແຕ່ລະສະມາຊິກຂອງກຸ່ມເວົ້າສະເພາະ, ພ້ອມທັງຫຼຸດພົ້ນອອກຈາກຜົນສະທ້ອນຈາກຄຳສັ່ງຂວ້ຳບາດຂອງອາເມລິກາເທື່ອລະກ້າວ, ສ້າງເງື່ອນໄຂສະດວກໃຫ້ແກ່ການເຊື່ອມໂຍງກັບພາກພື້ນ ແລະ ສາກົນ.
ປັດໃຈສະດວກໃຫ້ວິວັດການເຈລະຈາລະຫວ່າງ ອີຢູ່ - ກູບາ
ນອກຈາກຜົນປະໂຫຍດລວມໃຫ້ທັງສອງຝ່າຍແລ້ວ, ການຢ້ຽມຢາມກູບາ ຂອງທ່ານລັດຖະມົນຕີການຕ່າງປະເທດຝລັ່ງ ກໍ່ເປັນການກະທົບບໍ່ໜ້ອຍເຖິງວິວັດການເຈລະຈາລະຫວ່າງ ອີຢູ - ກູບາ ເພື່ອມຸ່ງໄປເຖິງການເຊັນສັນຍາຮ່ວມມື ແລະ ເຈລະຈາດ້ານການເມືອງ, ແນໃສ່ເປີດຊ່ອງທາງໃຫ້ແກ່ການພົວພັນດ້ານເສດຖະກິດ ແລະ ການຄ້າຢ່າງເລິກເຊິ່ງ ແລະ ກວ້າງຂວາງກວ່າອີກ.
ໃນການຢ້ຽມຢາມກູບາ ຄັ້ງນີ້, ທ່ານລັດຖະມົນຕີການຕ່າງປະເທດຝລັ່ງ ໄດ້ຖະແຫຼງວ່າ, ກູບາສາມາດເກ້ຍກ່ອມທຸກບັນຫາກັບຝລັ່ງໄດ້. ຝລັ່ງແມ່ນປະເທດມະຫາອຳນາດທີ່ສຳຄັນອັນດັບໜຶ່ງຢູ່ເອີລົບ, ດັ່ງນັ້ນທັດສະນະນີ້ຂອງຝລັ່ງ ກໍ່ໄດ້ຮັບຖືວ່າແມ່ນທັດສະນະສ່ວນໜຶ່ງຂອງເອີລົບ.
ຄວາມຈິ່ງສະແດງໃຫ້ເຫັນວ່າ, ການພົວພັນລະຫວ່າງກູບາ - ອີຢູ
ເລີ່ມດຳເນີນແຕ່ປີ 2008, ດ້ວຍການເຈລະຈາໃນຫຼາຍຂົງເຂດ. ຕົ້ນເດືອນ 3/2014, ກູບາ ໄດ້ເຫັນດີກັບຂໍ້ສະເໜີຂອງອີຢູ ກ່ຽວກັບເລື່ອງດຳເນີນການປຶກສາຫາລືສັນຍາການເມືອງສອງຝ່າຍສະບັບໃໝ່. ຖ້າຫາກການປຶກສາຫາລືນີ້ມີຄວາມຄືບໜ້າ, ຄາດວ່າຮອດປີ 2015, ສອງຝ່າຍອາດຈະປຶກສາຫາລືກ່ຽວກັບບັນດາສັນຍາການຄ້າ, ການລົງທຶນ. ຍ້ອນເຫດນັ້ນ, ການຢ້ຽມຢາມ ກູບາ ຢ່າງເປັນທາງການຂອງ ທ່ານລັດຖະມົນຕີການຕ່າງປະເທດຝລັ່ງ ໄດ້ຮັບຖືວ່າແມ່ນບາດກ້າວໃໝ່ ເພື່ອສ້າງພື້ນຖານໃຫ້ແກ່ການປຶກສາຫາລືຄັ້ງຕໍ່ໄປ.
ເລື່ອງທ່ານລັດຖະມົນຕີການຕ່າງປະເທດຝລັ່ງ ດຳເນີນການຢ້ຽມ ຢາມກູບາ ພາຍຫຼັງຢຸດຕິການພົວພັນລະຫວ່າງສອງປະເທດເປັນເວລາ 31 ປີນັ້ນ, ໄດ້ເປັນຂີດໝາຍທີ່ດີໃນການພົວພັນລະຫວ່າງ ກູບາ - ຝລັ່ງ. ສິ່ງດັ່ງກ່າວຍັງສະແດງໃຫ້ເຫັນວ່າ, ບໍ່ພຽງແຕ່ຝລັ່ງເທົ່ານັ້ນ, ຫາກທັງອີຢູ ກໍ່ພວມກຽມພ້ອມໃຫ້ບັນດາບາດກ້າວລະອຽດຕໍ່ໄປເພື່ອແນໃສ່ປັບປຸງການພົວພັນກັບກູບາໃຫ້ດີກວ່າເກົ່າ.