(vovworld)- ນາຍົກລັດຖະມົນຕີ ຫວຽດນາມ ຫາກໍຮັບຮອງເອົາແຜນຮ່າງສັງລວມ ຫັນປ່ຽນວິທີສຳພັດການຕີລາຄາສະພາບຄວາມທຸກຍາກໂດຍອີງໃສ່ຈາກລາຍຮັບ (ຫລືເອີ້ນວ່າສົ້ນດຽວ) ໄປສູ່ການຕີລາຄາຄວາມທຸກຍາກໂດຍອີງໃສ່ລາຍຮັບພ້ອມກັບລະດັບຂາດແຄນຄວາມຕ້ອງການໂດຍພື້ນຖານຂອງມະນຸດ(ຫລາຍສົ້ນ) ຈະໄດ້ນຳໃຊ້ໃນໄລຍະ 5 ປີຈະມາເຖິງ. ແຜນຮ່າງດັ່ງກ່າວໄດ້ຮັບຄວາມຫວັງວ່າ ຈະຮັບປະກັນລະດັບຄອງຊີບຢູ່ໃນລະດັບທີ່ຈຳເປັນ ແລະ ໄດ້ສຳພັດກັບບັນດາບໍລິການສັງຄົມໂດຍພື້ນຖານໃຫ້ປະຊາຊົນທຸກຄົນ, ແມ່ນບາດລ້ຽວໃນການປ່ຽນແປງນະໂຍບາຍຫລຸດຜ່ອນຄວາມທຸກຍາກ ແລະ ພັດທະນາເສດຖະກິດສັງຄົມໃນໄລຍະຕໍ່ໄປ.
ພາບປະກອບ:internet
|
ລະດັບທຸກຍາກຫລາຍສົ້ນ ລວມມີບັນດາບໍລິການພື້ນຖານກ່ຽວກັບລະດັບການສຶກສາຂອງຜູ້ໃຫຍ່, ສະພາບການໄປໂຮງຮຽນຂອງເດັກນ້ອຍ, ການນຳໃຊ້ບໍລິການສາທາລະນະສຸກ, ປະກັນສຸຂະພາບ, ຄຸນນະພາບເຮືອນຢູ່, ເນື້ອທີ່ເຮືອນຢູ່ສະເລ່ຍໃສ່ຫົວຄົນ, ແຫລ່ງນ້ຳສະອາດ……. ດ້ວຍວິທີສຳພັດນີ້, ອັດຕາສ່ວນຄອບຄົວທຸກຍາກຫລາຍສົ້ນຂອງຫວຽດນາມ ຈະຂຶ້ນເຖິງ 12% ແລະ ອັດຕາສ່ວນຈຳນວນຄອບຄົວໃກ້ຈະຖືກຈັດເຂົ້າໃນຄອບຄົວທຸກຍາກແມ່ນປະມານ 6%.
ສຳພັດກັບມາດຕະຖານຂອງໂລກ
ໃນໄລຍະຜ່ານມາ ລັດຖະບານຫວຽດນາມ ໄດ້ຜັນຂະຫຍາຍ ແລະ ປະກາດໃຊ້ຫລາຍນະໂຍບາຍລະອຽດ ເພື່ອຫນູນຊ່ວຍຜູ້ທຸກຍາກຄື: ນະໂຍບາຍໃຫ້ກູ້ຢືມທຶນ, ຫນູນຊ່ວຍດ້ານສາທາລະນະສຸກ, ການສຶກສາ, ເຮືອນຢູ່, ນ້ຳສະອາດ. ໃນນັ້ນ ຈຸດສຸມແມ່ນໂຄງການ 30 A ຫນູນຊ່ວຍ 62 ເມືອງທຸກຍາກ ລົງທຶນກໍ່ສ້າງພື້ນຖານໂຄງລ່າງທີ່ຈຳເປັນ, ກິດຈະກຳຊົນລະປະທານ, ຄົມມະນາຄົມຮັບໃຊ້ຊີວິດການເປັນຢູ່ຂອງປະຊາຊົນຢູ່ເຂດຊາວຊົນເຜົ່າທີ່ປະສົບກັບຄວາມຫຍຸ້ງຍາກ, ຊ່ວຍໃຫ້ຜູ້ທຸກຍາກພັດທະນາການຜະລິດ, ຍົກສູງຊີວິດການເປັນຢູ່ໃຫ້ດີກວ່າ. ຈາກຄວາມຈິງແຫ່ງການຜັນຂະຫຍາຍບັນດາໂຄງການຫລຸດຜ່ອນຄວາມທຸກຍາກ, ລັດຖະບານ ໄດ້ເຫັນວ່າ ເພື່ອຫລຸດຜ່ອນຄວາມທຸກຍາກແບບຍືນຍົງ ຄວນປ່ຽນແປງວິທີຕີລາຄາຄວາມທຸກຍາກ. ທ່ານນາງ ຟ້າມທິຫາຍຈ່ວຽນ, ລັດຖະມົນຕີວ່າການກະຊວງແຮງງານ ທະຫານເສຍອົງຄະ ແລະ ສັງຄົມ ໃຫ້ຮູ້ວ່າ:
“ຕາມມາດຖານຂອງໂລກ, ມາດຖານທຸກຍາກບໍ່ພຽງແຕ່ມີສະບຽງອາຫານພຽງພໍເທົ່ານັ້ນ ຫາກຕ້ອງມີເງື່ອນໄຂຊົມໃຊ້ບັນດາບໍລິການທີ່ຈຳເປັນ. ສະນັ້ນ ຫວຽດນາມ ປະຕິບັດມາດຖານທຸກຍາກຫລາຍສົ້ນໄລຍະ 2016-2020, ລວມມີລະດັບລາຍຮັບສູງກວ່າລະດັບລາຍຮັບປະຈຸບັນ ແລະ ຄິດໄລ່ເຖິງເລື່ອງເພື່ອຊ່ວຍໃຫ້ຜູ້ທຸກຍາກຕ້ອງໄດ້ຊົມໃຊ້ບັນດາບໍລິການພື້ນຖານຄື: ສາທາລະນະສຸກ, ການສຶກສາ, ນ້ຳສະອາດ, ໄດ້ຮັບຂໍ້ມູນຂ່າວ..ໄລຍະປະຕິບັດແມ່ນເລີ່ມຕົ້ນແຕ່ວັນທີ 1/1/2016 ເປັນຕົ້ນໄປ.”
ການຫັນປ່ຽນວິທີຕີລາຄາຄວາມທຸກຍາກຈາກສົ້ນດຽວໄປສູ່ຫລາຍສົ້ນຂອງຫວຽດນາມ ແມ່ນເໝາະສົມກັບເປົ້າໝາຍພັດທະນາແບບຍືນຍົງ ຊື່ງ ສປຊ ໄດ້ຮັບຮອງເອົາ. ບໍ່ພຽງແຕ່ຄືແນວນັ້ນ, ວິທີຕີລາຄານີ້ຈະຊ່ວຍໃຫ້ປະຊາຊົນຫລາຍຄົນໄດ້ຮັບຜົນປະໂຫຍດ. ທ່ານ ໂງເຈື່ອງທີ, ຫົວຫນ້າຫ້ອງວ່າການແຫ່ງຊາດກ່ຽວກັບການຫລຸດຜ່ອນຄວາມທຸກຍາກ ໄຈ້ແຍກວ່າ:
“ກ່ອນນີ້ ເມື່ອສ້າງນະໂຍບາຍ, ຫວຽດນາມອີງໃສ່ມາດຖານລາຍຮັບເພື່ອຕີລາຄາ ແລະ ຄອບຄົວໃດມີລາຍຮັບຕ່ຳກວ່າລະດັບນັ້ນ ຈະແມ່ນຄອບຄົວທຸກຍາກ. ເຖິງຢ່າງໃດກໍຕາມ ວິທີຕີລາຄານັ້ນບໍ່ທັນຊັດເຈນ ເພາະວ່າ ມະນຸດບາງເທື່ອບໍ່ແມ່ນຂາດແຄນເງິນ ຫາກບໍ່ໄດ້ຊົມໃຊ້ບັນດາບໍລິການອື່ນ. ສະນັ້ນ ນາຍົກລັດຖະມົນຕີ ຕົກລົງ ໄລຍະຈະມາເຖິງ ຕ້ອງປະຕິບັດນັບທັງວິທີຕີລາຄາຄວາມທຸກຍາກຈາກລາຍຮັບ ແລະ ລະດັບຂາດແຄນບັນດາຄວາມຕ້ອງການສັງຄົມໂດຍພື້ນຖານ.”
ສູ້ຊົນປະຕິບັດສຳເລັດໃນປີທຳອິດ
ຄາດວ່າ ໃນປີ 2016, ງົບປະມານແຫ່ງລັດ ຈະຕ້ອງເບີກຈ່າຍປະມານ 15.000 ຕື້ດົງ ເພື່ອຫນູນຊ່ວຍຈຳນວນຄອບຄົວທຸກຍາກ ແລະ ຄອບຄົວໃກ້ຈະຖືກຈັດເຂົ້າໃນບັນຊີລາຍຊື່ຄອບຄົວທຸກຍາກ ເມື່ອທຽບໃສ່ປີນີ້. ນາຍົກລັດຖະມົນຕີ ສະເຫນີກະຊວງການເງິນ ກະກຽມແຫລ່ງກຳລັງເພື່ອປະຕິບັດສຳເລັດມາດຖານທຸກຍາກຫລາຍສົ້ນໃນປີທຳອິດປະຕິບັດ. ໄປຄຽງຄູ່ກັບການຮັບປະກັນແຫລ່ງທຶນ ນັ້ນແມ່ນສຳຫລວດກວດກາເພື່ອປັບປຸງນະໂຍບາຍຫລຸດຜ່ອນຄວາມທຸກຍາກຕາມທິດຫລຸດຜອ່ນນະໂຍບາຍຫນູນຊ່ວຍລ້າ, ເພີ່ມນະໂຍບາຍໃຫ້ກູ້ຢືມ, ຈັດແບ່ງເປົ້າໝາຍຄອບຄົວທຸກຍາກ. ທ່ານນາງ ຟ້າມທິຫາຍຈ່ວຽນ ໃຫ້ຮູ້ວ່າ:
“ກະຊວງແຮງງານທະຫານເສຍອົງຄະ ແລະ ສັງຄົມ ເປັນເສນາທິການໃຫ້ ລັດຖະບານ ສຳຫລວດກວດຄືນບັນດານະໂຍບາຍສຳລັບຜູ້ທຸກຍາກ, ບົນພື້ນຖານນັ້ນ ຈັດແບ່ງຄືນຄວາມຮັບຜິດຊອບຂອງແຕ່ລະຂະແຫນງໃນແຕ່ລະຂົງເຂດ.ເຮັດຄືແນວນັ້ນ ແຫລ່ງກຳລັງຈະສຸມໃສ່ເປົ້າໝາຍທຸກຍາກ, ທ້ອງຖິ່ນຍັງປະສົບກັບຄວາມຫຍຸ້ງຍາກເພື່ອປະຕິບັດຄາດຫມາຍຫລຸດຜ່ອນຄວາມທຸກຍາກ.”
ຫວຽດນາມ ບັນລຸໄດ້ຄາດໝາຍຫລຸດຜ່ອນຄວາມທຸກຍາກກ່ອນກຳນົດເວລາ 2 ປີເມື່ອທຽບໃສ່ຄຳໝັ້ນສັນຍາກັບປະຊາຄົມໂລກ. ຫວຽດນາມ ແມ່ນຫນຶ່ງໃນຈຳນວນ 6 ປະເທດ ປະຕິບັດເປົ້າໝາຍສະຫັດສະຫວັດສຳເລັດໄວກວ່າໝູ່ ກ່ຽວກັບການຫລຸດຜ່ອນຄວາມທຸກຍາກ. ດ້ວຍການຫັນປ່ຽນວິທີຕີລາຄາກ່ຽວກັບຄວາມອຶດຫິວທຸກຍາກຈາກສົ້ນດຽວໄປສູ່ຫລາຍສົ້ນໃນໄລຍະ 5 ປີ, ໝາກຜົນການຫລຸດຜ່ອນຄວາມທຸກຍາກຂອງຫວຽດນາມ ຈະໝັ້ນຄົງກວ່າ, ສ້າງປະຖົມປັດໄຈເພື່ອສຳເລັດບັນດາຄາດໝາຍຫນູນຊ່ວຍສັງຄົມ.