ການສູ້ຮົບຕ້ານອົງການລັດອິດສະລາມ IS ໂດຍອ້າງຊື່ເອງຢູ່ຊີຣີ ພວມມີບາດລ້ຽວຂະນະທີ່ກອງທັບຊີຣີສືບຕໍ່ຍາດໄດ້ໄຊຊະນະຢູ່ສະໜາມຮົບ. ບໍ່ພຽງແຕ່ສາມາດຢຶດຄອງບັນດາບໍລິເວນທີ່ສຳຄັນເທົ່ານັ້ນ, ເຫດການນີ້ໄດ້ເປັນຂີດໝາຍການຕ່າວປີ້ນສະພາບການບົນສະໜາມຮົບຕ້ານ IS ນັບແຕ່ເມື່ອລັດເຊຍແຊກແຊງຢ່າງແຂງແຮງດ້ວຍກຳລັງທະຫານເຂົ້າຊີຣີ, ການນຳສູງສຸດບາງຄົນຂອງກຸ່ມທະຫານກະບົດຢູ່ຊີຣີກໍໄດ້ຖືກເສຍຊີວິດ. ການຜັນແປທັງໝົດເຫຼົ່ານັ້ນພວມເຮັດໃຫ້ສະພາບການສູ້ຮົບຢູ່ຊີຣີປ່ຽນແປງໄປຕາມທິດອື່ນ.
ກອງທັບລັດຖະບານ ຊີຣິ (ພາບ: Reuters)
ພາຍຫຼັງທີ່ໄດ້ຢຶດຄອງນະຄອນເກົ່າ Palmyra ຄືນໃໝ່, ກອງທັບຊີຣີ ໄດ້ຢຶດຄອງເທດສະບານເມືອງ Qariatein ຊຶ່ງແມ່ນເຮືອນຮັງໃຫຍ່ຂອງກຸ່ມກໍ່ການຮ້າຍ IS ໃນແຂວງ Homs ທາງພາກໃຕ້ຊີຣີ. ນີ້ກໍແມ່ນຂົງເຂດທີ່ IS ນຳໃຊ້ເປັນຖານທີ່ໝັ້ນບັນຈຸເຄື່ອງລຳລຽງໃຫ້ແກ່ກຳລັງຢູ່ Palmyra. ກ່ອນໜ້ານັ້ນ 1 ວັນ, ກອງທັບຊີຣີ ໄດ້ຢຶດຄອງນະຄອນ Palmyra ຄືນໃໝ່ຢ່າງສົມບູນພາຍຫຼັງທີ່ກຳລັງ IS ເລືອກເອົາວິທີຖອນກຳລັງແທນທີ່ສືບຕໍ່ສູ້ຮົບ.
ກອງທັບຊີຣີຍາດເອົາທ່າເປັນເຈົ້າການບົນສະໜາມຮົບ
ການປົດປ່ອຍນະຄອນ Palmyra ແມ່ນການໂມ້ງບາດຄ້ອນໜັກໃສ່ຄວາມສາມາດດ້ານພະລາທິການ ແລະ ການລຳລຽງຂອງ IS ຍ້ອນວ່າຢູ່ແຫ່ງນີ້ໄດ້ຮັບຖືວ່າ ແມ່ນທາງຜ່ານໃນການລຳລຽງຂົນສົ່ງເຄື່ອງຂອງໃຫ້ກຳລັງກໍ່ການຮ້າຍ. ນະຄອນ Palmyra ໄດ້ຮັບການຮັບຮອງຈາກອົງການ UNESCO ວາ່ ແມ່ນມໍລະດົກໂລກ. ການຢຶດຄອງນະຄອນ Palmyra ຄືນໃໝ່ໄດ້ເປັນຂີດໝາຍບາດກ້າວອັນໃຫຍ່ຫຼວງບົນສະໜາມຮົບສຳລັບກອງທັບຊີຣີ, ນັບຕັ້ງແຕ່ເຂົາເຈົ້າເລີ່ມຕ່າວປີ້ນສະພາບການຍ້ອນມີການແຊກແຊງດ້ານການທະຫານຂອງລັດເຊຍເມື່ອເດືອນ 9/2015. ໄຊຊະນະຢູ່ນະຄອນເກົ່າ Palmyra ໄດ້ຮັບການຕີລາຄາວ່າ ຈະສາມາດເປີດທາງໃຫ້ແກ່ກອງທັບຊີຣີບຸກເຂົ້າເຮືອນຮັງຂອງພວກກໍ່ການຮ້າຍໃນແຂວງ Raqqa ກໍຄືໃນນະຄອນ Dei ez –Zor ພາກຕາເວັນອອກຂອງຊີຣີ.
ບັນດາຜູ້ຊ່ຽວຊານດ້ານການທະຫານໄດ້ໄຈ້ແຍກບັນດາຜົນສຳເລັດຂອງການຕ້ານ IS ຂອງກຳລັງທະຫານຊີຣີ ທີ່ບັນລຸໄດ້ນັ້ນ ແມ່ນຍ້ອນມີບັນດາການບຸກໂຈມຕີໃສ່ຖານທີ່ໝັ້ນຂອງ IS ຢ່າງມີປະສິດທິຜົນຂອງກອງທັບອາກາດລັດເຊຍ. ເປັນທີ່ຈະແຈ້ງແລ້ວວ່າ ບັນດາກຸ່ມກໍ່ການຮ້າຍ ຍາກທີ່ຈະສາມາດຕ້ານຢັນຕໍ່ກຳລັງແຮງປະສົມຂອງກຳລັງກອງທັບລັດເຊຍ ແລະ ຊີຣີໄດ້.
ການປ່ຽນແປງສະພາບການໃນການເຈລະຈາ
ເປັນທີ່ຈະແຈ້ງແລ້ວວ່າ : ໄຊຊະນະບົນສະໜາມຮົບໄດ້ເພີ່ມທະວີທີ່ຕັ້ງບົດບາດຂອງລັດຖະບານຂອງປະທານາທິບໍດີຊີຣີ Bashar al Assad ກ່ອນທີ່ຈະດຳເນີນການເຈລະຈາສັນຕິພາບກ່ຽວກັບຊີຣີ ຊຶ່ງຄາດວ່າຈະຖືກໄຂຂຶ້ນເມື່ອວັນທີ 9/4 ຢູ່ເຊີແນວປະເທດສະວິດ. ແຕ່ດົນນານມາແລ້ວ, ບັນຫາອະນາຄົດຂອງປະທານາທິບໍດີຊີຣີ Bashar al Assad ຍາມໃດກໍເປັນຫົວເລື່ອງກໍ່ການໂຕ້ຖຽງກັນລະຫວ່າງລັດເຊຍ ແລະ ອາເມລິກາ. ໃນຂະນະທີ່ບັນດາການຜັນແປບົນສະໜາມຮົບແມ່ນຄຳຢັ້ງຢືນທີ່ແຂງແຮງໃຫ້ແກ່ຫຼັກໝັ້ນຂອງມົດສະກູກ່ຽວກັບ ອະນາຄົດຂອງປະທານາທິບໍດີຊີຣີ Bashar al Assad ໃນເວທີການເມືອງນັ້ນ, ແຕ່ອາເມລິກາຍັງຄົງຮັກສາທັດສະນະຕໍ່ການສູ້ຮົບຢູ່ຊີຣີ ແມ່ນບໍ່ອາດສິ້ນສຸດລົງໄດ້ເທື່ອເພາະ ປະທານາທິບໍດີຊີຣີ Bashar al Assad ບໍ່ແຕກຕ່າງກັບແມ່ເຫຼັກດຶງດູດພວກກໍ່ການຮ້າຍ ແລະ ກຳລັງທຳສົງຄາມສັກສິດ, ເຂົາເຈົ້າຈະສືບຕໍ່ຕໍ່ສູ້ຖ້າຫາກ ທ່ານ Bashar al Assad ຍັງຄົງດຳລົງຕຳແໜ່ງ. ແຕ່ຕໍ່ໜ້າບັນດາການຜັນແປທີ່ພວມປ່ຽນແປງໃນສະພາບຕົວຈິງປະຈຸບັນ ໄດ້ພາໃຫ້ອາເມລິກາບໍ່ຮຽກຮ້ອງໃຫ້ທ່ານ Bashar al Assad ຕ້ອງລາອອກຈາກຕຳແໜ່ງຄືດັ່ງເງື່ອນໄຂຕັດສິນຊີ້ຂາດຕໍ່ວິວັດການຫັນປ່ຽນດ້ານການເມືອງຢູ່ຊີຣີ. ໃນການຢ້ຽມຢາມລັດເຊຍເມື່ອບໍ່ດົນມານີ້, ໃນການພົບປະຄູ່ຕຳແໜ່ງຂອວລັດເຊຍ, ທ່ານລັດຖະມົນຕີການຕ່າງປະເທດອາເມລິກາ John Kerry ໄດ້ເຫັນດີຕໍ່ທັດສະນະກ່ຽວກັບອະນາຄົດຂອງປະທານາທິບໍດີຊີຣີ Bashar al Assad ແມ່ນບໍ່ຄວນນຳມາປຶກສາຫາລືໃນຈຸດເວລາປະຈຸບັນ ແລະ ຍອມຮັບວ່າ ວິວັດທະນາການການເມືອງຢູ່ຊີຣີພວມມີແງ່ຫວັງດີກວ່າເກົ່າ.
ເປັນທີ່ຈະແຈ້ງແລ້ວວ່າ ການແຊກແຊງຂອງລັດເຊຍ,ກໍໄດ້ເຮັດໃຫ້ຕ່າວປີ້ນສະພາບການຢູ່ສະໜາມຮົບບໍ່ຫຼາຍກໍໜ້ອຍ, ຊ່ວຍກອງທັບຊີຣີຍາດໄດ້ທ່າໄດ້ປຽບໃນພື້ນທີ່ຕົວຈິງ. ການເຈລະຈາເມື່ອວັນທີ 9/4 ທີ່ຈະມາເຖິງຢູ່ເຊີແນວ, ດ້ວຍບັນດາການຜັນແປໃໝ່ບົນເວທີການເມືອງໃນມໍ່ໆມານີ້, ປາດຖະໜາວ່າ ຈະສ້າງບາດລ້ຽວໃໝ່, ຮັດແຄບໄລຍະທາງກ້າວສູ່ສັນຕິພາບຢູ່ປະເທດຊີຮີ. ແຕ່ ແງ່ຫວັງກ່ຽວກັບພື້ນຖານສັນຕິພາບຍາວນານໃຫ້ແກ່ຊີຣີ ເບິ່ງຄືວ່າ ຍັງລຳບາກຢູ່ ຂະນະທີ່ປະເທດນີ້ຍັງພວມຕ້ອງປະເຊີນໜ້າກັບສິ່ງກີດຂວາງຢ່າງໃຫຍ່ຫຼວງນັບທັງດ້ານການທະຫານ ແລະ ການເມືອງ. ປະຈຸບັນຊີຣີ ຍັງມີໄລຍະທາງທີ່ຍາວໄກ ກ່ອນທີ່ປັດເຂ່ຍບັນດາກຸ່ມກໍ່ການຮ້າຍອອກຈາກດິນແດນຊີຣີທັງໝົດ.