(vovworld) - ປີສາມັກຄີມິດຕະພາບ ຫວຽດນາມ ແລະ ລາວ 2012 ໄດ້ສິ້ນສຸດລົງຢ່າງຈົບງາມ ພາຍຫລັງຖະແຫລງການຂອງທ່ານປະທານປະເທດ ຫວຽດນາມ ເຈືອງເຕີນຊາງ ແລະ ທ່ານເລຂາທິການໃຫຍ່, ປະທານປະເທດ ລາວ ຈູມມາລີ ໄຊຍະສອນ ທີ່ການປະຊຸມຂ່າວເມື່ອວັນມີ 26/12/2012 ຢູ່ ຮ່າໂນ້ຍ. ທົບທວນຄືນປີ 2012, ດ້ວຍການເຄື່ອນໄຫວທີ່ມີຄວາມໝາຍຫລາຍຢ່າງ ໂດຍມີການເຂົ້າຮ່ວມຂອງບັນດາຂະແຫນງການ, ຂັ້ນຕ່າງໆ ແລະ ປະຊາຊົນທຸກຊັ້ນວັນນະຂອງສອງປະເທດເປັນຈຳນວນຫລວງຫລາຍ ເປັນການປະກອບສ່ວນເພີ່ມພູນຄູນສ້າງ, ປັບປຸງ ແລະ ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ, ບໍລິສຸດຜຸດຜ່ອງລະຫວ່າງສອງປະເທດ ຫວຽດນາມ ແລະ ລາວ.
ທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສກອນ ຢ້ຽມຢາມ ຫວຽດນາມ
ພາບ:internet
|
ກ່ອນອື່ນໝົດ ຕ້ອງຢັ້ງຢືນວ່າ ປີ 2012 ແມ່ນປີທີ່ມີຄວາມໝາຍພິເສດໃນການພົວພັນລະຫວ່າງ ຫວຽດນາມ ແລະ ລາວ, ຊຶ່ງແມ່ນປີທີ່ປະຊາຊົນສອງປະເທດສະເຫລີມສະຫລອງ 50 ປີແຫ່ງວັນສ້າງຕັ້ງສາຍພົວພັນທາງການທູດ, 35 ປີແຫ່ງວັນລົງນາມໃນສົນທິສັນຍາມິດຕະພາບ ແລະ ການຮ່ວມມື. ໃນປີ 2012, ສອງປະເທດໄດ້ຍູ້ແຮງການຮ່ວມມືໃນທຸກຂົງເຂດ ນັບແຕ່ຂົງເຂດການເມືອງ, ເສດຖະກິດຕະຫລອດຮອດວັດທະນະທຳສັງຄົມ. ກ່ຽວກັບດ້ານການເມືອງ, ນອກຈາກການຢ້ຽມຢາມເຊິ່ງກັນ ແລະ ກັນຂອງການນຳຂັ້ນສູງສອງປະເທດແລ້ວ, ຫວຽດນາມ ແລະ ລາວ ໄດ້ສົມທົບກັນຈັດຕັ້ງການເຄື່ອນໄຫວຫລາຍຢ່າງເພື່ອເພີ່ມພູນຄູນສ້າງນ້ຳໃຈມິດຕະພາບທີ່ເປັນມູນເຊື້ອ, ໃນນັ້ນຕ້ອງເວົ້າເຖິງພິທີໂຮມຊຸມນຸມ ສະເຫລີມສະຫລອງ 50 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດຕາມ ລະດັບຊາດ ຊຶ່ງຖືກຈັດຂຶ້ນຢູ່ນະຄອນຫລວງ ຮ່າໂນ້ຍ ແລະ ວຽງຈັນ; ງານພົບປະແລກປ່ຽນມິດຕະພາບປະຊາຊົນ ຫວຽດນາມ ແລະ ລາວ ຄັ້ງທີ 3 ຢູ່ ຫວຽດນາມ, ງານໂຮມຊຸມນຸມສະເຫລີມສະຫລອງວັນມູນເຊື້ອຮ່ວມສຳພັນສູ້ຮົບ ແລະ ການພົວພັນແບບພິເສດ ຫວຽດນາມ ແລະ ລາວ ຢູ່ ບ້ານດົງ ແຂວງ ສະຫວັນນະເຂດ. ສອງປະເທດກໍໄດ້ປຸກລະດົມການເສັງຊອກຮູ້ປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ ໂດຍມີການເຂົ້າຮ່ວມຂອງພະນັກງານ, ປະຊາຊົນທຸກຊັ້ນວັນນະເປັນຈຳນວນຫລວງຫລາຍ. ໃນນັ້ນ ຢູ່ ຫວຽດນາມ ມີບົດຂຽນເຂົ້າຮ່ວມການເສັງກວ່າ 3 ລ້ານບົດ ສະແດງໃຫ້ເຫັນຄວາມຕັດສິນໃຈຂອງປະຊາຊົນສອງປະເທດໃນການຮັກສາ ແລະ ເພີ່ມພູນຄູນສ້າງການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ຫວຽດນາມ ແລະ ລາວ.
ສອງຝ່າຍກໍຕັ້ງຫນ້າສົມທົບກັນຊຸກຍູ້ການຮ່ວມມືເສດຖະກິດ ດ້ວຍການຈັດຕັ້ງງານວາງສະແດງ, ກອງປະຊຸມສຳມະນາ, ເວທີປາໄສສົ່ງເສີມການຄ້າ, ການລົງທຶນ, ການທ່ອງທ່ຽວ; ຫວຽດນາມ ສົມທົບກັບຝ່າຍລາວ ຈັດຕັ້ງກອງປະຊຸມຮ່ວມມືພັດທະນາການຄ້າຢູ່ເຂດຊາຍແດນ ຫວຽດນາມ ແລະ ລາວ ຄັ້ງທີ 8, ນຳເຂົ້າເຄື່ອນໄຫວໂຄງການຈຳນວນຫນຶ່ງ, ກິດຈະກຳຮ່ວມມືເສດຖະກິດ, ວັດທະນະທຳ ທີ່ມີຄວາມໝາຍລະຫວ່າງສອງປະເທດຄື: ເຂດອະນຸສອນສະຖານປະທານໂຮ່ຈິມິນຢູ່ ແຂວງ ຄຳມວ້ນ, ຫໍວັດທະນະທຳແຂວງ ສະຫວັນນະເຂດ… ບັນດາການເຄື່ອນໄຫວດັ່ງກ່າວເປັນການປະກອບສ່ວນຍົກວົງເງິນການຄ້າລະຫວ່າງສອງປະເທດໃຫ້ຂຶ້ນເຖິງເກືອບ 1 ຕື້ USD ໃນປີ 2012. ປະຈຸບັນ ຫວຽດນາມ ມີ 440 ໂຄງການລົງທຶນຢູ່ລາວ ດ້ວຍຈຳນວນເງິນລົງທຶນກວ່າ 5 ຕື້ USD, ນອນໃນຫນ່ວຍປະເທດນຳຫນ້າໃນຈຳນວນ 58 ປະເທດລົງທຶນຢູ່ລາວ.
ການຮ່ວມມືໃນຂົງເຂດສັງຄົມກໍເປັນຂີດໝາຍພິເສດ ດ້ວຍພະນັກງານ ລາວມາຮຳ່ຮຽນຢູ່ ຫວຽດນາມ ເກືອບ 6.500 ຄົນ ແລະ ພະນັກງານ, ນັກສຶກສາ ຫວຽດນາມ ໄປຄົ້ນຄ້ວາ, ຮຳ່ຮຽນ ຢູ່ ລາວ ເກືອບ 500 ຄົນ.
ອາດຈະເວົ້າໄດ້ວ່າ ປີສາມັກຄີມິດຕະພາບ ຫວຽດນາມ - ລາວ ໄດ້ກາຍເປັນປີເຕັມໄປດ້ວຍຄວາມປະທັບໃຈໃນການພົວພັນລະຫວ່າງ ຫວຽດນາມ ແລະ ລາວ. ເມື່ອຕີລາຄາກ່ຽວກັບການຮ່ວມມືລະຫວ່າງ ຫວຽດນາມ ແລະ ລາວ, ທ່ານເລຂາທິການໃຫຍ່, ປະທານປະເທດ ລາວ ຈູມມາລີ ໄຊຍະສອນ ໄດ້ຢືນຢັນວ່າ:
“ສາຍພົວພັນລະຫວ່າງ ຫວຽດນາມ ແລະ ລາວ ນັບມື້ນັບພົ້ນເດັ່ນໃນພາກພື້ນ ແລະ ໃນເວທີສາກົນໃນໄລຍະໃຫມ່. ສອງປະເທດຕ້ອງພ້ອມກັນເພື່ອການພັດທະນາ. ຫວຽດນາມ ພັດທະນາກໍຄືປະເທດລາວ ພັດທະນາ. ສອງປະເທດພວກເຮົາແມ່ນປະເທດບ້ານໃກ້ເຮືອນຄຽງ ມີເສັ້ນຊາຍແດນຮ່ວມ, ມີມູນເຊື້ອສາມັກຄີມາແຕ່ດົນນານ ໂດຍປະທານໂຮ່ຈິມິນ ແລະ ປະທານໄກສອນ ພົມວິຫານ ກໍ່ຕັ້ງ ແລະ ເພີ່ມພູນຄູນສ້າງ.”
ງານໂຮມຊຸມນຸມສະເຫລີມສະຫລອງ 50 ປີແຫ່ງວັນສ້າງສາຍພົວພັນທາງການທູດ ລະຫວ່າງສອງປະເທດ
ພາບ:internet
|
ປີສາມັກຄີມິດຕະພາບ ຫວຽດນາມ - ລາວ ໄດ້ສິ້ນສຸດລົງ ແຕ່ບັນດາໝາກຜົນບັນລຸໄດ້ໃນປີຜ່ານມາ ເປັນກຳລັງຫນູນສຳຄັນໃນການຊຸກຍູ້ການພົວພັນແບບພິເສດລະຫວ່າງສອງພັກ, ສອງລັດ ແລະ ປະຊາຊົນສອງປະເທດໃຫ້ ພັດທະນາຢ່າງແຂງແຮງ ຄືດັ່ງຄຳຢືນຢັນຂອງທ່ານ ຫງວຽນຟູຈ້ອງ ເລຂາທິການໃຫຍ່ພັກກອມມູນິດ ຫວຽດນາມ ທີ່ງານຊຸມນຸມມິດຕິງສະເຫລີມສະຫລອງ 50 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງສອງປະເທດ.
“ຍີ່ງກວ່າເວລາໃດໝົດ ພວກເຮົາຄວນສືບຕໍ່ປັບປຸງ, ເພີ່ມທະວີ ແລະ ພັດທະນາສາຍພົວພັນສາມັກຄີແບບພິເສດ, ການຮ່ວມມືຮອບດ້ານລະຫວ່າງສອງປະເທດ ຫວຽດນາມ ແລະ ລາວຍິ່ງກວ່າອີກ. ພວກເຮົາໝັ້ນໝາຍ ຈະຮັກສາ ແລະ ປົກປັກຮັກສາສາຍພົວພັນແບບພິເສດ ຫວຽດນາມ - ລາວ ຄືດັ່ງຮັກສາແກ້ວຕາຕົນ, ຕັດສິນໃຈພ້ອມກັບພັກ, ລັດ ແລະ ປະຊາຊົນລາວອ້າຍນ້ອງພັດທະນາ, ເພີ່ມພູນຄູນສ້າງ ແລະ ຊຸກຍູ້ສາຍພົວພັນນີ້ໃຫ້ນັບມື້ນັບເຂົ້າສູ່ລວງເລິກ ແລະ ຖືວ່າ ນີ້ແມ່ນຊັບສົມບັດອັນລ້ຳຄ່າຕ້ອງສືບທອດໃຫ້ຄົນລຸ້ນຫລັງ.”
ດ້ວຍປະຫວັດສາດແຫ່ງການພົວພັນມິດຕະພາບທີ່ເປັນມູນເຊື້ອອັນຈົບງາມ ແລະໄດ້ຮັບການເພີ່ມພູນຄູນສ້າງດ້ວຍບັນດາຜົນສຳເລັດພິເສດໃນປີສາມັກຄີມິດຕະພາບ ຫວຽດນາມ - ລາວ 2012, ການພົວພັນລະຫວ່າງ ຫວຽດນາມ ແລະ ລາວ ຍາມໃດກໍແມ່ນການພົວພັນແບບພິເສດໃນປະຫວັດສາດຂອງໂລກຍຸກປະຈຸບັນ, ແມ່ນຊັບສົມບັດອັນລ້ຳຄ່າຂອງສອງປະເທດ, ແມ່ນປັດໄຈຮັບປະກັນໄຊຊະນະຂອງພາລະກິດສ້າງສາ ແລະ ປົກປັກຮັກສາປະເທດຊາດຂອງປະຊາຊົນສອງປະເທດ ຫວຽດນາມ ແລະ ລາວ./.