ປີ 2014 ແມ່ນປີທີ່ຂະແໜງການບິນສາກົນໄດ້ເກີດອຸບັດຕິເຫດ, ຄວາມຕິດຂັດ ຫຼາຍຄັ້ງ. ຄາດວ່າ ນັບແຕ່ຕົ້ນປີມາຮອດປະຈຸບັນ, ໄດ້ເກີດເຫດອຸບັດຕິເຫດເຮືອບິນຕົກປະມານ 30 ຄັ້ງໃນທົ່ວໂລກ, ອັນໄດ້ເຮັດໃຫ້ມີຜູ້ເສຍຊີວິດກວ່າ 1000 ຄົນ. ມີບັນດາອຸບັດຕິເຫດແມ່ນຍ້ອນຄວາມຕິດຂັດດ້ານເຕັກນິກ, ຍ້ອນທຳມະຊາດ, ຄວາມເລີນເລີ້, ແຕ່ກໍມີທັງໂສກນາດຕະກຳຍ້ອນມະນຸດກໍ່ຂຶ້ນໂດຍເຈດຕະນາ ຊຶ່ງປະຊາຄົມໂລກໄດ້ກ່າວປະນາມ ແລະ ເອີ້ນວ່າແມ່ນໂທດກຳ.
ອຸບັດຕິເຫດເຮືອບິນທະຫານ AN – 74 TK 300 ຂອງກອງທັບອາກາດລາວຕົກ (ພາບ : KPL)
|
ໃນປະຫວັດຄວາມເປັນມາຂອງ ຂະແໜງການບິນສາກົນນັ້ນ, ຜູ້ຄົນທັງຫຼາຍເຄີຍໄດ້ເຫັນປະຈັກຕາອຸບັດຕິເຫດເຮືອບິນຕົກຫຼາຍຄັ້ງ. ປີ 1972, ແມ່ນປີທີ່ມີຈຳນວນຜູ້ເສຍຊີວິດຫຼາຍສຸດຊຶ່ງກ່ຽວຂ້ອງເຖິງເຮືອບິນ ຄືກວ່າ 3.300 ຄົນ. ມາຮອດປະຈຸບັນ, ອຸບັດຕິເຫດເຮືອບິນຕົກຊຶ່ງຖືກຖືວ່າ ແມ່ນຮ້າຍແຮງທີ່ສຸດໃນປະຫວັດສາດຂອງຂະແໜງການບິນພົນລະເຮືອນ, ນັ້ນແມ່ນອຸບັດຕິເຫດເຮືອບິນ Boeing 747 – 200 ຂອງບໍລິສັດການບິນຍີປຸ່ນຕົກ, ຊຶ່ງໄດ້ເກີດຂຶ້ນເມື່ອວັນທີ 12/8/1985 ອັນໄດ້ເຮັດໃຫ້ຜູ້ໂດຍສານ 520 ຄົນພ້ອມດ້ວຍຈຸບິນ ແລະ ພາລະກອນຮັບໃຊ້ເຮືອບິນຖືກເສຍຊີວິດ. ແຕ່ອຸບັດຕິເຫດເຮືອບິນຕົກໄດ້ເກີດຂຶ້ນຢ່າງລຽນຕິດໃນປີ 2014 ນັບທັງໃນສາຍການບິນຢູ່ພາຍໃນປະເທດ ແລະ ສາກົນຂອງຫຼາຍປະເທດ, ອັນໄດ້ເຮັດໃຫ້ໂລກຕື່ນຕົກໃຈກ່ຽວກັບຄວາມຮ້າຍແຮງ ແລະ ຜົນເສຍຫາຍດ້ານເສດຖະກິດທີ່ຍາກຈະແກ້ໄຂໄດ້. ໂສກນາດຕະກຳເຫຼົ່່ານັ້ນ ອີກເທື່ອໜຶ່ງໄດ້ເປັນການກ່າວເຕື່ອນກ່ຽວກັບບັນຫາຄວາມປອດໄພໃນຂະແໜງການບິນ, ກໍຄືຄວາມໝັ້ນຄົງ, ປອດໄພໃນໂລກ.
ຊຸມວັນທີ່ສະຫຍອງຂວັນທີ່ສຸດຂອງຂະແໜງການບິນສາກົນປີ 2014
ວັນທີ 8/3/2014 , ເຮືອບິນ Boeing 777 ເລກໝາຍ MH 370 ຂອງບໍລິສັດການບິນມາເລເຊຍໄດ້ຫາຍຕົວແບບລຶກລັບ ຂະນະທີ່ພວມບິນຈາກກົວລາລຳເປີໄປຍັງປັກກິງ. ເຫດການຫາຍສາບສູນນີ້ ແມ່ນເລື່ອງບໍ່ເຄີຍເກີດມາໃນປະຫວັດສາດຂອງ ຂະແໜງການບິນທັນສະໄໝ. ຫຼາຍປະເທດໄດ້ຮ່ວມແຮງຮ່ວມໃຈມານະພະຍາຍາມຊອກຫາຊາກເຮືອບິນຢູ່ທົ່ວເຂດນ່ານຟ້າ ແລະ ເຂດນ່ານທະເລທີ່ກ້ວາງໃຫຍ່, ອັນໄດ້ເຮັດໃຫ້ສິ້ນເປືອງເງິນທຶນເຖິງນັບຮອ້ຍລ້ານ USD ແລະບັ້ນຊອກຫາເຮືອບິນ Boeing 777 ເລກໝາຍ MH 370 ໄດ້ກາຍເປັນບັ້ນຊອກຫາເຮືອບິນສິ້ນເປືອງເງິນທຶນຫຼາຍກ່ວາໝູ່ໃນປະຫວັດສາດ, ແຕຮ່ອງຮອຍ ແລະ ຊາຕະກຳຂອງຜູ້ໂດຍສານ 227 ຄົນພ້ອມດ້ວຍຈຸບິນ ແລະ ພາລະກອນຮັບໃຊ້ເຮືອບິນ 12 ຄົນຍັງຄົງບໍ່ໄດ້ຂ່າວເທື່ອ.
ວັນທີ 17/5/2014, ໄດ້ເກີດອຸບັດຕິເຫດເຮືອບິນທະຫານ AN – 74 TK 300 ຂອງກອງທັບອາກາດລາວຕົກ. ໃນເຮືອບິນລຳນີ້ມີເຈົ້າໜ້າທີ່ 19 ຄົນຂອງປະເທດນີ້ພວມເດີນທາງໄປແຂວງຊຽງຂວາງເພື່ອເຂົ້າຮ່ວມພິທີສະເຫຼີມສະຫຼອງ 55 ປີແຫ່ງວັນປົດປ່ອຍທົ່ງໄຫຫີນ, ອັນໄດ້ເຮັດໃຫ້ເຈົ້າໜ້າທີຂັ້ນສູງ 4 ທ່ານຂອງລາວເສຍຊີວິດ. ເດືອນ 7/2014 ຖືກຖືວ່າແມ່ນເດືອນທີ່ຂະແໜງການບິນສາກົນປະສົບຄວາມຊວຍທີ່ສຸດຂະນະທີ່ມີຂ່າວຮ້າຍຢ່າງຕໍ່ເນື່່ອງ. ວັນທີ 7/7 ເຮືອບິນຝຶກຊ້ອມລຳໜຶ່ງຂອງເຫຼົ່າທັບປ້ອງກັນອາກາດສັງກັດກອງທັບອາກາດຫວຽດນາມໄດ້ປະສົບອຸບັດຕິເຫດຕົກ ອັນໄດ້ເຮັດໃຫ້ນັກຮົບ 18 ຄົນຖືກເສຍຊີວິດໃນທັນທີ່. ຫຼັງຈາກນັ້ນ ອາທິດໜຶ່ງ, ໃນຂະນະທີ່ພວມປະຕິບັດໜ້າທີ່ຝຶກຊ້ອມຢູ່ເຂດພາກໃຕ້ນະຄອນຫຼວງພະນົມເປັນ, ເຮືອບິນທະຫານລຳໜຶ່ງຂອງກຳປູເຈຍກໍປະສົບກັບອຸບັດຕິເຫດຕົກ ອັນໄດ້ເຮັດໃຫ້ 5 ຄົນຖືກເສຍຊີວິດ ແລະ 1 ຄົນຮັບບາດເຈັບສາຫັດ. ວັນທີ 17/7, ເຮືອບິນເອລີກອບແຕ ດັບເພິ່ງລຳໜຶ່ງຂອງ ສ.ເກົາຫຼີສືບຕໍ່ປະສົບອຸບັດຕິເຫດຕົກ ອັນໄດ້ເຮັດໃຫ້ທັງ 5 ຄົນໃນເຮືອບິນຖືກເສຍຊີວິດ. ວັນທີ 23/7 ເຮືອບິນພົນລະເຮືອນລຳໜຶ່ງຂອງໄຕ້ຫວັນຖືກປະສົບອຸບັດຕິເຫດຕົກຍອ້ນທຳມະຊາດ ອັນໄດ້ເຮັດໃຫ້ 51 ຄົນຖືກເສຍຊີວິດ ແລະ 7 ຄົນໄດ້ຮັບບາດເຈັບ.
ໂທດກຳເທິ່ງນ່ານຟ້າ
ແຕ່ເບິ່ງຄືວ່າ ອຸບັດຕິເຫດເຮືອບິນຕົກທີ່ຮ້າຍແຮງທີ່ສຸດ, ດຶງດູດຄວາມສົນໃຈຈາກຫາງສຽງຫຼາຍທີ່ສຸດແມ່ນກໍລະນີ ເຮືອບິນ ເລກໝາຍ MH 17 ຂອງບໍລິສັດການບິນມາເລເຊຍຖືກຍິງຕົກຂະນະທີ່ພວມບິນຜ່ານເຂດນ່ານຟ້າ ຢູແກຼນ ອັນໄດ້ເຮັດໃຫ້ 298 ຄົນຖືກເສຍຊີວິດ. ເກືອບເຄິ່ງປີໄດ້ຜ່ານພົ້ນໄປ, ແຕ່ທຸກຄວາມານະພະຍາຍາມທຳການສືບສວນເພື່ອເຜີຍແບຄວາມຈິງພວມຖືກດຳເນີນດ້ວຍຄວາມຊັກຊ້າ, ຫາກສຽງສະແດງຄວາມໂກດແຄ້ນຍ້ອນຕົວການຂອງເຫດຮ້າຍນີ້ ຍັງບໍ່ທັນຖືກນຳຕົວຂຶ້ນສານດຳເນີນຄະດີ.
ໂສກນາດຕະກຳຈະບໍ່ເກີດຂຶ້ນຖ້າຫາກບໍລິເວນທີ່ເຮືອບິນ MH 17 ບິນຜ່ານແມ່ນເຂດສັນຕິພາບ. ສິ່ງນີ້ແມ່ນຖືກຕ້ອງແທ້, ແຕ່ບັນຫາທີ່ຫາງສຽງມີຄວາມເປັນຫ່ວງທີ່ສຸດ, ນັ້ນແມ່ນໃນຍຸກສະໄໝເຕັກໂນໂລຢີຂະຫຍາຍຕົວຄືປະຈຸບັນ, ການຊອກຫາສາຍເຫດຢ່າງຊັດເຈນຂອງອຸບັດຕິເຫດເຮືອບິນຕົກພັດບໍ່ນຳມາເຊິ່ງໝາກຜົນສຸດທ້າຍ. ໃຜຈະແມ່ນຜູ້ທ່ວງເອົາຍຸຕິທຳໃຫ້ແກ່ສາມັນຊົນຜູ້ຮັບເຄາະຮ້າຍ 298 ຄົນ ? ອຸບັດຕິເຫດເຮືອບິນ MH 17 ຕົກ ພັດມີພະຍານຫຼັກຖານຕື່ມອີກກ່ຽວກັບຜົນຮ້າຍຂອງສົງຄາມລະຫວ່າງບັນດາກຸ່ມສະແຫວງຫາຜົນປະໂຫຍດ, ເຜົ່າພັນ ຊຶ່ງສາມັນຊົນຕ້ອງຮັບ, ເພື່ອໃຫ້ມວນມະນຸດອີກເທື່ອໜຶ່ງ ກ່າວຮຽກຮ້ອງໃຫ້ມີສັນຕິພາບ.