(vovworld) - ໂລກຫາກໍ່ສິ້ນສຸດປີ 2016. ຄວາມມືດມົວບາງຢ່າງຖືກອັດໄວ້, ມີບາງແຫ່ງສຽງປືນໄດ້ຢຸດຕິລົງ ແລະ ມີຈຸດທີ່ພົ້ນເດັ່ນບາງຢ່າງໄດ້ເປີດອອກ. ໃນສານອວຍພອນປີໃໝ່ ແລະ ເປັນຂີດໝາຍມື້ທຳອິດທີ່ຮັບດຳລົງຕຳແໜ່ງເປັນເລຂາທິການໃຫຍ່ ສະຫະປະຊາຊາດ, ທ່ານ Atonio Guterres ຖະແຫຼງວ່າ, ປີ 2017 ຈະແມ່ນປີບຸລິມາສິດອັນດັບໜຶ່ງຕໍ່ສັນຕິພາບ. ມວນມະນຸດພວມມີຄວາມມຸ້ງຫວັງວ່າ ປີ 2017 ຈະມີສີສັນສົດໃສຫຼາຍກວ່າ.
ອາດເວົ້າໄດ້ວ່າປີ 2016 ແມ່ນປີທີ່ປະສົບກັບຄວາມຫຍຸ້ງຍາກ. ຫຼາຍປະເທດຕ້ອງປະເຊີນໜ້າກັບການທ້າທາຍຫຼາຍຢ່າງຄື: Brexit, ການເລືອກຕັ້ງທີ່ກໍ່ຄວາມແບ່ງແຍກຢູ່ ອາເມລິກາ ຫຼືການໂຕ້ຖຽງກັນຢູ່ ເອີລົບ ກ່ຽວກັບບັນຫາຄົນເຂົ້າເມືອງ, ຊາວອົບພະຍົບ. ພ້ອມນັ້ນແມ່ນສະພາບຂາດຄວາມສະເໝີພາບນັບມື້ນັບເລິກເຊິ່ງ ຍ້ອນວິວັດທະນາການໂລກາພິວັດ ແລະ ຄວາມກ້າວໜ້າດ້ານເຕັກໂນໂລຢີ, ອັນໄດ້ກໍ່ໃຫ້ເກີດສະພາບຂາດວຽກເຮັດງານທຳ ແລະ ຈິດຕະເສຍຫວັງ, ພິເສດແມ່ນໃນໝູ່ຊາວໜຸ່ມ. ຍ້ອນເຫດນັ້ນ, ຍິ່ງກວ່າເວລາໃດໝົດ, ບັນດາປະເທດຕ້ອງການມີຄວາມສາມັກຄີກັນເພື່ອແກ້ໄຂການທ້າທາຍ. ສານຕົ້ນປີໃໝ່ຂອງບັນດາການນຳໂລກ, ພ້ອມກັບການຫັນປ່ຽນໃນຊີວິດທາງດ້ານການເມືອງສາກົນ ໄດ້ສ້າງຄວາມຫວັງໃໝ່ໃນປີ 2017.
ສະໜາມຫຼວງ ຍຸກສະໄໝຢູ່ ນິວຢອກ ໃນຈຸດເວລາສົ່ງທ້າຍປີເກົ່າ ຕ້ອນຮັບປີໃໝ່
(ພາບ: Reuters)
|
ສາມັກຄີ ແລະ ສັນຕິພາບ: ສານປີໃໝ່
ໃນສານຕ້ອນຮັບປີໃໝ່ ແລະ ເປັນຂີດໝາຍມື້ທຳອິດທີ່ຮັບດຳລົງຕຳແໜ່ງ ເປັນເລຂາທິການໃຫຍ່ ສະຫະປະຊາຊາດ, ທ່ານ Atonio Guterres ຖະແຫຼງຄວາມຕັດສິນໃຈຖືສັນຕິພາບແມ່ນບັນຫາບຸລິມະສິດແຖວໜ້າ. ທ່ານຖືວ່າ, ປີ 2016 ໄດ້ເຫັນປະຈັກຕາຄວາມແຕກຕ່າງກັນຢ່າງໃຫຍ່ຫຼວງໃນການແກ້ໄຂການປະທະກັນ ແລະ ປະຊາຄົມສາກົນພວມຂາດ “ຄວາມສາມາດ“ ເພື່ອສະກັດກັ້ນບັນດາການປະທະກັນດັ່ງກ່າວ. ດັ່ງນັ້ນຈຳເປັນຕ້ອງພັດທະນາ “ພື້ນຖານການທູດເພື່ອສັນຕິພາບ“. ທ່ານເລຂາທິການໃຫຍ່ສະຫະປະຊາຊາດຄົນໃໝ່ ເນັ້ນໜັກວ່າ, ປີ 2017 ຈະແມ່ນປີທີ່ປະຊາຊົນທຸກຄົນ, ລັດຖະບານ ກໍ່ຄືບັນດາການນຳຕ້ອງມີຄວາມມານະພະຍາຍາມຈົນສຸດຄວາມສາມາດຂອງຕົນເພື່ອພ້ອມກັນຜ່ານຜ່າສິ່ງທີ່ແຕກຕ່າງກັນ.
ໃນສານຕົ້ນປີທີ່ເຕັມໄປດ້ວຍຄວາມໝາຍນັ້ນ, ທ່ານປະທານປະເທດຈີນ ສືຈີນຜີງ ຫວັງວ່າ ປະຊາຄົມສາກົນຕ້ອງຜ່ານຜ່າຄວາມຫຍຸ້ງຍາກທີ່ໄດ້ເກີດຂຶ້ນໂດຍໄວ.. ທ່ານກໍ່ສະແດງຄວາມຫວັງວ່າ, ປະຊາຄົມສາກົນຈົ່ງເຄົາລົບຄວາມສຳນຶກທີ່ວ່າ “ປະຊາຄົມຮ່ວມຊາຕາກຳດຽວ“, ແລະ ຮຽກຮ້ອງທຸກຄົນໃນທົ່ວໂລກຈົ່ງຮ່ວມມື້ກໍ່ສ້າງສະພາບແວດລ້ອມສັນຕິພາບ, ວັດທະນາຖາວອນ. ໃນຂະນະນັ້ນ, ທ່ານນາງນາຍົກລັດຖະມົນຕີ ເຢັຍລະມັນ Angela Merkel ໄດ້ຫວນຄືນເຫດບຸກໂຈມຕີຢູ່ Berlin ເມື່ອວັນທີ 19/12 ຜ່ານມາ ແລະ ບັນດາເຫດບຸກໂຈມຕີອື່ນໆທີ່ເລັ່ງໃສ່ປະເທດ ເຢັຍລະມັນ ໂດຍຊາວອົບພະຍົບດຳເນີນ. ເຖິງຢ່າງໃດກໍ່ຕາມ, ທ່ານນາງກໍ່ຢືນຢັນວ່າ, ບໍ່ຖືສິ່ງດັ່ງກ່າວເປັນຄວາມອາຄາດບາດໝາງ, ຫາກຜ່ານນັ້ນສາມາດເຫັນໄດ້ບັນດາຄຸນຄ່າມະນຸດສະທຳ ແລະ ເປີດອົກເປີດໃຈຂອງປະເທດ ເຢັຍລະມັນ ແມ່ນສາມາດເອົາໄຊຊະນະບັນດາພວກອາຄາດບາດໝາງໄດ້. ທ່ານນາງກໍ່ໄດ້ໃຫ້ຄຳໝັ້ນສັນຍາວ່າ, ລັດຖະບານເຢັຍລະມັນຈະປະຕິບັດການປ່ຽນແປງທີ່ຈຳເປັນທຸກຢ່າງກ່ຽວກັບດ້ານກົດໝາຍ ແລະ ນະໂຍບາຍ ເພື່ອປັດເຂ່ຍຊ່ອງວ່າງດ້ານຄວາມປອດໄພ ພາຍຫຼັງເຫດບຸກໂຈມຕີດ້ວຍລົດບັນທຸກຢູ່ Berlin ໃນປີ 2017.
ທີ່ປຶກສາແຫ່ງລັດ ທັງເປັນລັດຖະມົນຕີການຕ່າງປະເທດ ມຽນມາ ໄດ້ຢັ້ງຢືນວ່າຈະສ້າງພື້ນຖານສັນຕິພາບຍາວນານໃນທົ່ວປະເທດໃນປີ 2017. ລັດຖະບານ ມຽນມາ ຈະນຳປະເທດຊາດກັບຄືນສູ່ເສັ້ນທາງແຫ່ງສັນຕິພາບ, ດ້ວຍຄວາມມານະພະຍາຍາມຂອງປະຊາຊົນ ແລະ ການຊ່ວຍເຫຼືອຂອງເພື່ອນມິດສາກົນ. ການນຳ ສ. ເກົາຫຼີ ກໍ່ໃຫ້ຄຳໝັ້ນສັນຍາເປີດກ້ວາງການຮ່ວມມືກັບ ອາເມລິກາ, ຍີ່ປຸ່ນ, ຈີນ ແລະ ລັດເຊຍ ເພື່ອສ້າງພື້ນຖານສັນຕິພາບຢູ່ພາກພື້ນ.
ປີ 2017 ນຳມາຄວາມຫວັງໃໝ່ຫຼາຍຢ່າງ
ພາຍໃຕ້ສາຍຕາຂອງບັນດານັກສັງເກດການທີ່ໜ້າປະເອີບໃຈ, ໂລກໃນປີ 2017 ຈະໄດ້ເຫັນປະຈັກຕາທ່າອ່ຽງຮ່ວມມືຫຼາຍກ່ວາລະຫວ່າງປະເທດຕ່າງໆ, ເພື່ອການພັດທະນາ ແລະ ສັນຕິພາບລວມຂອງພາກພື້ນ ແລະ ຢູ່ໃນໂລກ. ໃນຈຳນວນນັ້ນ, ສາຍພົວພັນລະຫວ່າງບັນດາປະເທດໃຫຍ່ໄດ້ຮັບຖືວ່າແມ່ນສຳຄັນ, ຍ້ອນມັນໄດ້ສ້າງຄວາມລະບຽບຮຽບຮ້ອຍໃນການພົວພັນສາກົນ. 175 ປະເທດພາຄີ ສປຊ ກໍ່ພ້ອມກັນລົງນາມໃນຂໍ້ຕົກລົງ ປາຣີ ກ່ຽວກັບການປ່ຽນແປງຂອງດິນຟ້າອາກາດ. ຫຼັງຈາກນັ້ນ ອາເມລິກາ, ຈີນ, ອີຢູ ແລະ ຫຼາຍປະເທດອື່ນໆ ກໍ່ໄດ້ໃຫ້ສັດຕະຍາບັນແກ່ຂໍ້ຕົກລົງນີ້ເປັນການ, ເປີດບັນດາຄວາມຫວັງໃຫ້ປີ 2017 ແລະ ຊຸມປີຕໍ່ໄປໃນການປົກປັກຮັກສາສະພາບແວດລ້ອມ, ປົກປ້ອງໜ່ວຍໂລກ. ປີ 2017 ແມ່ນປີບານພັບຂອງທ່ານ Antonio Guterres, ເລຂາທິການໃຫຍ່ ສປຊ ຄົນໃໝ່. ດ້ວຍຄວາມຊຳນານເປັນຫົວໜ້າອົງການກໍ່ຊ່ວຍຊາວຫຼົບໄພ ພ້ອມກັບຄຸນນະທາດດ້ານການທູດມາເປັນເວລາຫຼາຍປີ, ໃນຖານະຕຳແໜ່ງໃໝ່, ປະຊາຄົມສາກົນໄດ້ຕັ້ງຄວາມເຊື່ອໝັ້ນວ່າ ທ່ານ Guterres ຈະແມ່ນຄົນກາງເກ່ຍບັນດາບັນຫາເຄັ່ງຮ້ອນຂອງໂລກ, ແກ້ໄຂບັນດາບັນຫາຫຼົບໄພ, ອົບພະຍົບຢ່າງຄັກແນ່ ແລະ ຄ່ອຍໆສິ້ນສຸດບັນດາສະຖານທີ່ເກີດການປະທະກັນໃນທົ່ວໂລກ. ໂດຍບໍ່ຫົວຊາຕໍ່ບັນດາການເຄື່ອນໄຫວເຄັ່ງຕຶງນີ້, ການພົວພັນທາງການທູດໃນທ້າຍປີ 2016 ໄດ້ມີບັນດາການກະທຳທີ່ສະແດງໃຫ້ເຫັນວ່າ ການພົວພັນລັດເຊຍ - ອາເມລິກາ ພາຍໃຕ້ອາຍຸການຂອງທ່ານປະທານາທິບໍດີ Donald Trump ຈະດີຂຶ້ນ ແລະ ຄ່ອຍໆຫລຸດຜ່ອນຄວາມເຄັ່ງຕຶງ. ການພົວພັນລະຫວ່າງ ຈີນ ແລະ ຟີລິບປິນ, ພວມຫຍັບມໍ່ເຂົ້າກັນ, ໂດຍບໍ່ຫົວຊາຕໍ່ບັນດາການປະທະກັນລະຫວ່າງ 2 ປະເທດຢູ່ທະເລຕາເວັນອອກ. ຂໍ້ຕົກລົງຢຸດຍິງຢູ່ ຊີຣີ ສະບັບໜຶ່ງໂດຍ ລັດເຊຍ ແລະ ຕວກກີ ເປັນຄົນກາງໄກເກ່ຍ…
ສັນຍານທັງໝົດເຫລົ່ານີ້ ພ້ອມກັບບັນດາຄຳໝັ້ນສັນຍາຈາກບັນດາການນຳແຖວໜ້າໃນໂລກ ໄດ້ນຳມາເຊິ່ງຄວາມໄວ້ເນື້ອເຊື່ອໃຈສ່ວນໃດສ່ວນໜຶ່ງໃນປີ 2017. ໂລກພ້ອມກັນຄວາມຫວັງຕໍ່ປີ 2017 ຈະມີບັນດາສິ່ງທີ່ດີງາມ, ສຽງປືນ ແລະ ສຽງລະເບີດຈະຄ່ອຍໆຫລຸດລົງຢູ່ບັນດາສະຖານທີ່ພວມມີການປະທະກັນໃນໂລກ, ສາມັນຊົນຈະບໍ່ຖືກນອງເລືອດ ແລະ ນ້ຳຕາອີກ.