(vovworld) - ໂດຍໄດ້ຮັບຄຳເຊື້ອເຊີນຂອງ ພະເຈົ້າມະຫາຊີວິດ ບຮູໄນ Haji Hassanal Bolkiah ແລະ ປະທານາທິບໍດີ ສາທາລະນະລັດ ສະຫະພາບມຽນມາ Thein Sein, ປະທານປະເທດ ເຈືອງເຕີ໋ຊາງ ແລະ ພັນລະຍາ ຈະເດີນທາງໄປຢ້ຽມຢາມທາງລັດຖະກິດ ເຖິງ ບຮູໄນ, ແຕ່ວັນທີ 27 – 29/11/2012 ແລະ ສາທາລະນະລັດ ສະຫະພາບມຽນມາ ແຕ່ວັນທີ 29/11 – 01/12/2012. ການຢ້ຽມຢາມເຫຼົ່ານັ້ນ ເພື່ອແນໃສ່ຢືນຢັນວ່າ ຫວຽດນາມ ຖືການພົວພັນກັບບັນດາປະເທດໃນພາກພື້ນອາຊຽນເປັນສຳຄັນ ແລະ ປາດຖະໜາຢາກນຳການພົວພັນລະຫວ່າງຫວຽດນາມກັບປະເທດເຫຼົ່ານັ້ນເຂົ້າສູ່ລວງເລິກ, ເພື່ອຜົນປະໂຫຍດຂອງແຕ່ລະປະເທດ.
ປະທານປະເທດ ເຈືອງເຕີ໋ຊາງ
(ພາບ: google.com.vn)
ການຢ້ຽມຢາມ ບຮູໄນ ຂອງປະທານປະເທດ ເຈືອງເຕີ໋ຊາງ ດຳເນີນໄປໃນສະຖານະການທີ່ສອງປະເທດສະເຫຼີມສະຫຼອງ 20 ປີ ແຫ່ງວັນສ້າງຕັ້ງການພົວພັນທາງການທູດ (1992-2012). ນັບແຕ່ສ້າງຕັ້ງການພົວພັນທາງການທູດເມື່ອເດືອນ 2/2012. ການພົວພັນລະຫວ່າງສອງປະເທດໄດ້ຮັບການພັດທະນາຢ່າງຈົບງາມ. ສອງຝ່າຍໄດ້ມີການຢ້ຽມຢາມ ແລະ ພົບປະຂັ້ນສູງເປັນປະຈຳ; ທ່ານນາຍົກລັດຖະມົນຕີ ຫງວຽນເຕີ໋ຢຸງ ໄດ້ໄປຢ້ຽມຢາມ ບຮູໄນເມື່ອປີ 2007; ສ່ວນພະເຈົ້າມະຫາຊີວິດ ບຮູໄນ Haji Hassanal Bolkiah ໄດ້ມາຮ່າໂນ້ຍ ເຂົ້າຮ່ວມກອງປະຊຸມສຸດຍອດ ອາຊຽນ 16 ເມື່ອເດືອນ 4/2010 ແລະ ກອງປະຊຸມສຸດຍອດ ອາຊຽນ 17 ເມືອເດືອນ 10/2010; ທ່ານລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ກໍ່ໄດ້ໄປຢ້ຽມຢາມ ບຮູໄນ ຢ່າງເປັນທາງການເມື່ອເດືອນ 2/2012.
ໃນການພົວພັນດ້ານການຄ້າ, ວົງເງິນການຄ້າລະຫວ່າງສອງປະເທດພຽງແຕ່ບັນລຸສອງ, ສາມລ້ານ USD/ປີເທົ່ານັ້ນ. ກ່ຽວກັບການລົງທຶນ, ປະຈຸບັນ, ບຮູໄນ ແມ່ນປະເທດລົງທຶນໃຫຍ່ອັນດັບ 12 ຂອງຫວຽດນາມ ດ້ວຍ 129 ໂຄງການ, ທຶນຈົດທະບຽນແມ່ນ 4,9 ຕຶ້ USD ໄລ່ຮອດໝົດເດືອນ 9/2012. ຫວຽດນາມ ພຽງແຕ່ລົງທຶນ 1ໂຄງການເຂົ້າ ບຮູໄນ ເທົ່ານັ້ນ. ໃນຂົງເຂດການສຶກສາ, ວັດທະນະທຳ, ການທ່ອງທ່ຽວ, ການຮ່ວມມືລະຫວ່າງສອງປະເທດຍັງຈຳກັດຢູ່, ສ່ວນຫຼາຍແມ່ນຜ່ານການຮ່ວມມືຫຼາຍຝ່າຍ. ກ່ຽວກັບການປ້ອງກັນຊາດ, ການຮ່ວມມືລະຫວ່າງສອງປະເທດໃນຊຸມປີມໍ່ໆມານີ້ມີການພັດທະນາດີພໍສົມຄວນ, ແຕ່ພຽງແຕ່ຢູ່ໃນລະດັບແລກປ່ຽນຄະນະຜູ້ແທນທະຫານທຸກຂັ້ນ ເພື່ອແນໃສ່ເພີ່ມທະວີຄວາມເຂົ້າອົກເຂົ້າໃຈ, ສ້າງຄວາມໄວ້ເນື້ອເຊື່ອໃຈ ແລະ ຊອກຮູ້ຄວາມສາມາດຮ່ວມມືຕ່າງຝ່າຍຕ່າງມີຜົນປະໂຫຍດ ລະຫວ່າງກອງທັບສອງປະເທດເທົ່ານັ້ນ. ສອງຝ່າຍໄດ້ລົງນາມໃນບົດບັນທຶກຊ່ວຍຈຳ ກ່ຽວກັບການຮ່ວມມືດ້ານປ້ອງກັນຊາດ, ສ້າງຕັ້ງຫ້ອງການທີ່ປຶກສາດ້ານການທະຫານຢູ່ແຕ່ລະປະເທດ. ສຳຫຼັບການປ້ອງກັນຄວາມສະຫງົບ, ເຖິງວ່າການຮ່ວມມືລະຫວ່າງກະຊວງຕຳຫຼວດຫວຽດນາມ ກັບບັນດາອົງການທີ່ກ່ຽວຂ້ອງຂອງ ບຮູໄນ ໄດ້ຮັບການຮັກສາໄວ້ເປັນປະຈຳ, ແຕ່ສອງຝ່າຍຍັງບໍ່ທັນຜັນຂະຫຍາຍການຮ່ວມມືອັນລະອຽດໄດ້ຫຼາຍ, ສ່ວນຫຼາຍແມ່ນຜ່ານບັນດາເວທີປາໄສຮ່ວມມືຫຼາຍຝ່າຍຄືເວທີປາໄສປ້ອງກັນຄວາມສະຫງົບພາກພື້ນ (ARF), ກອງປະ ຊຸມຕຳຫຼວດສາກົນ (Interpol)…
ສະນັ້ນ, ການຢ້ຽມຢາມທາງລັດຖະກິດ ເຖິງ ບຮູໄນ ຄັ້ງນີ້ຂອງທ່ານ ປະທານປະເທດ ເຈືອງເຕີ໋ຊາງ, ດ້ານໜຶ່ງແມ່ນເພື່ອຢັ້ງຢືນນະໂຍບາຍສະເໝີ ຕົ້ນສະເໝີປາຍຂອງຫວຽດນາມ ທີ່ຖືການພົວພັນມິດຕະພາບ ແລະ ການຮ່ວມມືຫຼາຍດ້ານກັບ ບຮູໄນເປັນສຳຄັນ. ດ້ານອື່ນ, ນີ້ກໍ່ແມ່ນໂອກາດເພື່ອໃຫ້ການນຳສອງທ່ານແລກປ່ຽນທິດທາງຮັດແໜ້ນສາຍພົວພັນມິດຕະພາບ ແລະ ການຮ່ວມມືຫຼາຍດ້ານລະຫວ່າງຫວຽດນາມ - ບຮູໄນ ກວ່າອີກ.
ພາຍຫຼັງຢ້ຽມຢາມ ບຮູໄນ, ທ່ານປະທານປະເທດ ເຈືອງເຕີ໋ຊາງ ຈະດຳເນີນການຢ້ຽມຢາມທາງລັດຖະກິດເຖິງ ສາທາລະນະລັດ ສະຫະພາບມຽນມາ ໃນເວລາ 3 ວັນຄື 29, 30/11 ແລະ 1/12/2012. ການຢ້ຽມຢາມດຳເນີນໄປໃນສະພາບການທີ່ ມຽນມາມີການພັດທະນາສຳຄັນຫຼາຍຢ່າງ. ການຢ້ຽມຢາມຂອງທ່ານປະທານປະເທດ ເຈືອງເຕີ໋ຊາງ ແມ່ນໂອກາດເພື່ອໃຫ້ສອງຝ່າຍແລກປ່ຽນບັນດາມາດຕະການຢ່າງເລິກເຊິ່ງ ແລະ ກວ້າງຂວາງ ແນໃສ່ນຳການພົວພັນລະຫວ່າງຫວຽດນາມ - ມຽນມາ ກ້າວເຂົ້າສູ່ໄລຍະໃໝ່, ໂດຍສະເພາະແມ່ນຊຸກຍູ້ການພົວພັນທາງດ້ານເສດຖະກິດ, ການຄ້າ ແລະ ການລົງທຶນ.
ໄລ່ຮອດເດືອນ 9/2012, ວົງເງິນການຄ້າສອງສົ້ນຫວຽດນາມ - ມຽນມາ ບັນລຸເກືອບ 160 ລ້ານ USD, ເພີ່ມຂຶ້ນ 29% ເມື່ອທຽບໃສ່ໄລຍະດຽວກັນຂອງປີ 2011. ເຖິງວ່າສອງຝ່າຍໄດ້ມີຄວາມມານະພະຍາຍາມຫຼາຍຢ່າງຄື: ເປີດສາຍການບິນໂດຍກົງ, ຊຸກຍູ້ການຈັດຕັ້ງງານຕະຫຼາດນັດການຄ້າຢູ່ແຕ່ລະປະເທດ ເພື່ອແນໃສ່ສ້າງເງື່ອນໄຂໃຫ້ສິນຄ້າມາສູ່ປະຊາຊົນສອງປະເທດ, ເວົ້າລວມແລ້ວ, ການພົວພັນທາງດ້ານເສດຖະກິດ, ການຄ້າ, ການລົງທຶນລະຫວ່າງສອງປະເທດຍັງພັດທະນາຢ່າງຊັກຊ້າ, ບໍ່ທັນຕອບສະໜອງຄວາມສາມາດບົ່ມຊ້ອນຂອງສອງປະເທດ. ຫວຽດນາມ ແລະ ມຽນມາ ພວມຊຸກຍູ້ການຮ່ວມມືແຮກຊ່ຽວລະຫວ່າງບັນດາແຂວງ, ນະຄອນຂອງສອງປະເທດ, ເພື່ອແນໃສ່ຍູ້ແຮງການຮ່ວມມືທາງດ້ານເສດຖະກິດລະຫວ່າງທ້ອງຖີ່ນຕ່າງໆ, ໃນບັນດາຂົງເຂດທີ່ມີທ່າແຮງຂອງແຕ່ລະຝ່າຍ. ເຖິງວ່າໄດ້ລົງນາມໃນສັນຍາ ແລະ ຂໍ້ຕົກລົງຮ່ວມມືຫຼາຍສະບັບແລ້ວກໍ່ຕາມ, ແຕ່ໝາກຜົນແຫ່ງການຮ່ວມມືລະຫວ່າງຫວຽດນາມ - ມຽນມາ ຍັງຄົງຈຳກັດຢູ່. ແລະ ບໍ່ທັນຜັນຂະຫຍາຍໄດ້ຫຼາຍເທື່ອ. ສອງຝ່າຍຮ່ວມມືຕົ້ນຕໍຜ່ານຮູບການແລກປ່ຽນຄະນະຜູ້ຊ່ຽວຊານ, ແບ່ງປັນບົດຮຽນ. ກ່ຽວກັບຂົງເຂດປ່າໄມ້, ປະຈຸບັນ, ກຸມບໍລິສັດຢາງພາລາຫວຽດນາມ ພວມຄົ້ນຄ້ວາ, ຜັນຂະຫຍາຍແຜນຮ່າງປູກຢາງພາລາ 200.000 ເຮັກຕາ ຢູ່ມຽນມາ. ແຕ່ມາຮອດປະຈຸບັນ, ທັງສອງຝ່າຍຍັງບໍ່ທັນລົງນາມໃນຂໍ້ຕົກລົງຮ່ວມມືລົງທຶນໄດ້, ຍ້ອນບໍ່ທັນເປັນເອກະພາບກ່ຽວກັບສະຖານທີ່ປະຕິບັດແຜນຮ່າງນີ້ໄດ້. ສອງຝ່າຍໄດ້ລົງນາມໃນສັນຍາຮ່ວມມືທ່ອງທ່ຽວເມື່ອປີ 1994, ແຕ່ການຜັນຂະຫຍາຍກໍ່ຖືກຈຳກັດ. ຈຳນວນນັກທ່ອງທ່ຽວສອງປະເທດໄປມາຢ້ຽມຢາມເຊິ່ງກັນ ແລະ ກັນຍັງໜ້ອຍຢູ່.
ດັ່ງນັ້ນໃນການຢ້ຽມຢາມທາງລັດຖະກິດເຖິງ ສາທາລະນະລັດ ສະຫະພາບມຽນມາ ຄັ້ງນີ້ຂອງທ່ານປະທານປະເທດ ເຈືອງເຕີ໋ຊາງ, ການນຳຂັ້ນສູງສອງປະເທດ ຈະແລກປ່ຽນບັນດາມາດຕະການທີ່ແທດຈິງ, ປະຕິບັດຄວາມຕັດສິນໃຈຂອງການນຳສອງປະເທດ, ຊຸກຍູ້ການຮ່ວມມືໃນຫຼາຍຂົງເຂດ… ທ່ານປະທານປະເທດ ເຈືອງເຕີ໋ຊາງ ແລະ ບັນດາການນຳມຽນມາກໍ່ຈະແລກປ່ຽນກ່ຽວກັບບັນດາບັນຫາສາກົນ ແລະ ພາກພື້ນທີ່ຕ່າງຝ່າຍຕ່າງມີຄວາມສົນໃຈ. ການຢ້ຽມຢາມຈະປະກອບສ່ວນເພີ່ມທະວີການພົວພັນມິດຕະພາບທີ່ເປັນມູນເຊື້ອ, ແລະ ການຮ່ວມມືຫຼາຍດ້ານລະຫວ່າງຫວຽດນາມ - ມຽນມາ ໃຫ້ກ້າວຂຶ້ນສູ່ບາດກ້າວພັດທະນາໃໝ່.