ທ່ານນາຍົກລັດຖະມົນຕີຫວຽດນາມ Nguyen Tan Dung ແລະ
ທ່ານນາງ Helle Thorning Schiomidt ນາຍົກລັດຖະມົນຕີແດນມາກ
(ພາບ: internet)
|
(vovworld-) ວັນທີ 8/11, ທ່ານນາງ Helle Thorning Schiomidt ນາຍົກລັດຖະມົນຕີແຫ່ງລາຊະອານາຈັກແດນມາກໄດ້ດຳເນີນບັນດາການເຄື່ອນໄຫວໃນຂອບເຂດການຢ້ຽມຢາມຫວຽດນາມຢ່າງເປັນທາງການຕາມຄຳເຊີນຂອງ ທ່ານນາຍົກລັດຖະມົນຕີຫວຽດນາມ Nguyen Tan Dung .ເຖິງວ່າດຳເນີນການ ຢ້ຽມຢາມໃນເວລາອັນສັ້ນໆກໍຕາມ, ແຕ່ການຢ້ຽມຢາມຂອງທ່ານນາງ Helle Thorning Schiomidt ນາຍົກລັດຖະ ມົນຕີ ຫ່ງລາຊະອານາຈັກແດນມາກຄັ້ງນີ້ ແມ່ນສັນຍານສະແດງໃຫ້ເຫັນການພົວພັນ 2 ຝ່າຍລະຫວ່າງແດນມາກ ແລະ ຫວຽດນາມຊຶ່ງໄດ້ ແລະພວມໄດ້ຮັບການປັບປຸງຢ່າງໝັ້ນຄົງໜັກແໜ້ນ, ພິເສດແມ່ນໃນຂົງເຂດເສດຖະກິດການຄ້າ ແລະ ການລົງທຶນ.
ໃນຂອບເຂດການຢ້ຽມຢາມຫວຽດນາມເປັນເວລາ 2 ວັນ, ນອກຈາກບັນດາການພົບປະເຈລະຈາກັບບັນດາການນຳສູງສຸດຂອງຫວຽດນາມ, ທ່ານນາງ Helle Thorning Schiomidt ນາຍົກລັດຖະມົນຕີແຫ່ງລາຊະອານາຈັກແດນມາກຍັງໄດ້ເຂົ້າຮ່ວມບັນດາກອງປະຊຸມສຳມະນາກ່ຽວກັບການຮ່ວມມືລົງທຶນດຳເນີນທຸລະກິດ ແລະເປັນສັກຂີພິຍານພິທີລົງນາມໃນສັນຍາຮ່ວມມືດ້ານການຄ້າຫຼາຍສະບັບລະຫວ່າງບັນດາບໍລິສັດຂອງຫວຽດນາມ ແລະ ແດນມາກ. ກ່ອນການຢ້ຽມຢາມຂອງ ທ່ານນາງ Helle Thorning Schiomidt, ທ່ານເອກອັກຄະລັດຖະທູດແດນມາກປະຈຳຫວຽດນາມ John Nielsen ໄດ້ຢືນຢັນວ່າ ການມີໜ້າຂອງ ທ່ານນາງ Helle Thorning Schiomidt ນາຍົກລັດຖະມົນຕີແຫ່ງລາຊະອານາຈັກແດນມາກໃນບັນດາການເຄື່ອນໄຫວນີ້ ໄດ້ສະແດງໃຫ້ເຫັນການສະໜັບສະໜູນຂອງນາຍົກລັດຖະມົນຕີແດນມາກເອງ ແລະ ຂອງລັດຖະບານແດນມາກໃນການເພີ່ມທະວີການພົວພັນດ້ານເສດຖະກິດ, ການຄ້າລະຫວ່າງ 2 ປະເທດ. ພິເສດໃນການຢ້ຽມຢາມຄັ້ງນີ້, ທ່ານນາງນາຍົກລັດຖະມົນຕີແດນມາກ Helle Thorning Schiomidt ຍັງສະເໜີ ແລະ ປຸກລະດົມບັ້ນເຕີບໂຕຢູ່ຫວຽດນາມຢ່າງເປັນທາງການ ແນໃສ່ກ້າວໄປເຖິງການເຊັນສັນຍາຮ່ວມມືຮອບດ້ານຢູ່ໂກແປນຮາແກນໃນປີໜ້າ.
ນາຍົກລັດຖະມົນຕີຫວຽດນາມ ແລະ ແດນມາກເປັນສັກຂີພິຍານພິທີລົງນາມໃນສັນຍາຮ່ວມມືດ້ານການຄ້າຫຼາຍສະບັບລະຫວ່າງບັນດາບໍລິສັດຂອງ 2 ປະເທດ (ພາບ: TTXVN )
|
ຫວນຄືນໄລຍະກ່ວາ 40 ປີຜ່ານມາ, ນັບແຕ່ 2 ປະເທດໄດ້ສ້າງການພົວພັນທາງການທູດເມື່ອເດືອນ11/1971 ແມ່ນອາດຈະເຫັນໄດ້ວ່າ ຍາມໃດຫວຽດນາມ ກໍແມ່ນປະເທດໃຫ້ບຸລິມະສິດໃນນະໂຍບາຍການຕ່າງປະເທດຂອງແດນມາກ ແລະ ແດນມາກບໍ່ພຽງແຕ່ສະໜັບສະໜູນຢ່າງແຂງແຮງການຕໍ່ສູ້ຍາດເອົາເອກະລາດຂອງຫວຽດນາມເທົ່ານັ້ນ, ຫາກຍັງຕັ້ງໜ້າສະໜັບສະໜູນຫວຽດນາມໃນພາລະກິດປ່ຽນແປງໃໝ່ ແລະ ເຊື່ອມໂຍງເຂົ້າກັບສາກົນໃນປະຈຸບັນອີກດ້ວຍ.
ຕາມ ທ່ານເອກອັກຄະລັດຖະທູດແດນມາກປະຈຳຫວຽດນາມ John Nielsen ແລ້ວ, ປະຈຸບັນ, ຫວຽດນາມນອນໃນບັນຊີລາຍຊື່ 10 ຕະຫຼາດທີ່ພວມພົ້ນເດັ່ນຂຶ້ນຊຶ່ງໄດ້ຮັບຄວາມສົນໃຈເປັນພິເສດຈາກບັນດາການນຳ ແດນມາກ ແລະ ປະຊາຄົມວິສາຫະກິດຂອງປະເທດນີ້. ຕາມຕົວເລກສະຖີຕິປີ 2011, ວົງເງິນການຄ້າ 2 ຝ່າຍຫວຽດນາມ ແລະ ແດນມາກບັນລຸ 400 ລ້ານກ່ວາ USD, ເພີ່ມຂຶ້ນຫຼາຍພໍສົມຄວນເມື່ອທຽບໃສ່ຕົວເລກ 300 ລ້ານກ່ວາ USD ໃນປີ 2010. ທາງດ້ານການລົງທຶນ, ປະຈຸບັນ, ແດນມາກພວມຢືນອັນດັບທີ່ 25 ໃນຍອດຈຳນວນ 93 ປະເທດ ແລະ ເຂດແຄ້ວນເຂົ້າມາລົງທຶນຢູ່ຫວຽດນາມ ແລະ ຢືນອັນດັບທີ່ 7 ໃນຈຳນວນບັນດາປະເທດ EU , ດ້ວຍຍອດທຶນຈົດທະບຽນ 620 ລ້ານກ່ວາ USD. ປະຈຸບັນ, ແດນມາກມີວິສາຫະກິດ 130 ກ່ວາແຫ່ງພວມທຳມາຄ້າຂາຍ, ດຳເນີນທຸລະກິດຢູ່ຫວຽດນາມ. ແຕ່ມາຮອດປະຈຸບັນ, ບັນດາວິສາຫະກິດແດນມາກພຽງແຕ່ລົງທຶນເຂົ້າໃນຂົງເຂດ ອຸດສາຫະກຳປຸ່ງແຕ່ງ, ການຜະລິດກົນຈັກ, ອະສັງຫາລິມະຊັບເປັນຕົ້ນຕໍ. ທ່ານເອກອັກຄະລັດຖະທູດແດນມາກປະຈຳຫວຽດນາມ John Nielsen ຖືວ່າ :
“ຂ້າພະເຈົ້າຖືວ່າຄວາມສາມາດບົ່ມຊ້ອນຮ່ວມມືລະຫວ່າງບັນດາວິສາຫະກິດຫວຽດນາມ ແລະ ແດນມາກ ແມ່ນໃຫ່ຍຫຼວງທີ່ສຸດ ຍ້ອນວ່າຫວຽດນາມ ມີທ່າໄດ້ປຽບຫຼາຍຢ່າງໃນການແກ່ງແຍ້ງ ເມື່ອທຽບກັບປະເທດອື່ນໆໃນພາກພື້ນ. ນັ້ນແມ່ນຕະຫຼາດແຮງງານອຸດົມສົມບູນ, ໜຸ່ມແໜ້ນ, ຄ່າແຮງງານຕ່ຳ…ນັ້ນແມ່ນທ່າໄດ້ປຽບຫຼາຍ. ໃນຕົວຈິງແລ້ວ, ບັນດາບໍລິສັດຂອງແດນມາກ ສາມາດນຳມາເຊິ່ງເຕັກໂນໂລຊີໃໝ່, ເຂັດລັບເຕັກໂນໂລຊີ, ການໜູນຊ່ວຍເຄື່ອນໄຫວກ່ຽວກັບການບຳລຸງສ້າງ ແລະ ສະໜອງເຄື່ອງຈັກໃຫ້ແກ່ຕະຫຼາດຫວຽດນາມ“.
ໃນໄລຍະປະຈຸບັນ, ໂດຍສະເພາະແມ່ນໃນສະພາບການທີ່ສອງປະເທດຫາກໍ່ຈັດພິທີສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍພົວພັນທາງການທູດ, ສິ່ງທີ່ການນຳສອງປະເທດລ້ວນແຕ່ຢືນຢັນ ແລະ ແບ່ງປັນຄວາມສົນໃຈລວມນັ້ນແມ່ນເຮັດແນວໃດເພື່ອນຳສາຍພົວພັນລະຫວ່າງຫວຽດນາມ-ແດນມາກ ກ້າວເຂົ້າສູ່ໄລຍະໃໝ່. ກ່ຽວກັບບັນຫານີ້, ທ່ານເອກອັກຄະລັດຖະທູດ John Nielse ແບ່ງປັນວ່າ:
“ຂ້າພະເຈົ້າຖືວ່າ, ບັນດາວິສາຫະກິດຫວຽດນາມ ຄວນສຸມໃສ່ລົງທຶນດ້ານເຕັກໂນໂລຊີ ຍ້ອນວ່າບັນດາວິສາຫະກິດແດນມາກ ມີທ່າແຮງກ່ຽວກັບຂົງເຂດນີ້. ບັນດາວິສາຫະກິດແດນມາກ ສາມາດຊ່ວຍວິສາຫະກິດຫວຽດນາມ ຍົກສູງລັກສະນະແກ່ງແຍ້ງຂອງຕົນເພື່ອມີບັນດາຜະລິດຕະພັນມີຄຸນນະພາບສູງກ່ວາ“.
ປີ 2012 ແລະ ໃນຊຸມປີຕໍ່ໄປ, ສອງຝ່າຍໄດ້ເຫັນດີເປັນເອກະສັນຈະສົມທົບກັນຢ່າງແໜ້ນແຟ້ນເພື່ອປະຕິບັດບັນດາໂຄງການກ່ຽວຂ້ອງເຖິງແຫຼ່ງທຶນ ODA ຊື່ງແດນມາກ ພວມໜູນຊ່ວຍຫວຽດນາມ. ໄລ່ຮອດປະຈຸບັນ, ແດນມາກ ໄດ້ອຸປະຖຳໃຫ້ແກ່ຫວຽດນາມ ດ້ວຍຈຳນວນເງິນປະມານ 1 ຕື້ໂດລາສະຫະລັດ, ໂດຍສຸມໃສ່ບັນດາຂົງເຂດກະສິກຳ, ວັດທະນະທຳ ແລະ ສິ່ງແວດລ້ອມ, ລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ. ແດນມາກ ໝັ້ນໝາຍຈະສືບຕໍ່ສະໜອງທຶນ ODA ໃຫ້ແກ່ຫວຽດນາມ ຮອດທ້າຍປີ 2015, ໃນນັ້ນສຸມໃສ່ຂົງເຂດການຮັບມືກັບການປ່ຽນແປງຂອງດິນຟ້າອາກາດ. ຕາມທ່ານລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມຫວຽດນາມ Nguyen Minh Quang ແລ້ວ, ນີ້ແມ່ນການຕີລາຄາສູງຂອງແດນມາກ ທີ່ມີຕໍ່ການນຳໃຊ້ແຫຼ່ງທຶນ ODA ຢ່າງມີປະສິດທິຜົນຂອງຫວຽດນາມ:
“ລັດຖະບານ ແລະ ບັນດາອົງການທີ່ກ່ຽວຂ້ອງຂອງຫວຽດນາມ ມີຄວາມເອົາໃຈໃສ່ທີ່ສຸດເຖິງໂຄງການ, ການໜູນຊ່ວຍຂອງແດນມາກ. ຫວຽດນາມ ໄດ້ນຳໃຊ້ບັນດາແຫຼ່ງທຶນຂອງແດນມາກ ຢ່າງມີປະສິດທິຜົນທີ່ສຸດ, ຜ່ານນັ້ນໄດ້ສ້າງຄວາມໄວ້ເນື້ອເຊື່ອໃຈຕໍ່ແດນມາກ.“
ບົນພື້ນຖານສາຍພົວພັນອັນດີງາມໃນຕະຫຼອດ 40 ປີຜ່ານມາ, ການຢ້ຽມຢາມຫວຽດນາມ ຂອງທ່ານນາງນາຍົກລັດຖະມົນຕີແດນມາກ Helle Thorning Schmidt ຄັ້ງນີ້ຈະເປີດບັນດາກາລະໂອກາດຮ່ວມມືໃໝ່, ສ້າງກຳລັງໜູນຊຸກຍູ້ການພົວພັນລະຫວ່າງສອງປະເທດສືບຕໍ່ພັດທະນາຢ່າງແຮງກ່ວາອີກໃນໄລຍະຈະມາເຖິງ.