ວັນທີ 7/4, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ເດີນທາງຢ້ຽມຢາມປະເທດ ສາທາລະນະລັດປະຊາຊົນຈີນ ແຕ່ວັນທີ 7 ຫາວັນທີ 10/4 ຕາມຄຳເຊີນຂອງທ່ານເລຂາທິການໃຫຍ່ ພັກກອມມູນິດຈີນ, ປະທານປະເທດຈີນ ສີຈິນຜິງ . ການຢ້ຽມຢາມກໍເປັນການປະກອບສ່ວນຊຸກຍູ້ການພົວພັນລະຫວ່າງ 2 ປະເທດໃຫ້ພັດທະນາເປັນປົກກະຕິ ແລະ ສົດໃສ.
![ປັບປຸງການພົວພັນ ຫວຽດນາມ-ຈີນເປັນປົກກະຕິ ແລະ ພັດທະນາຢ່າງສົດໃສ - ảnh 1](https://photo-cms-vovworld.zadn.vn/w730/uploaded/vovworld/bcgmbuiq/2015_04_07/trungquoc.jpg)
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ເດີນທາງຢ້ຽມຢາມປະເທດ ສາທາລະນະລັດປະຊາຊົນຈີນຢ່າງເປັນທາງການ |
ຫວຽດນາມ ແລະ ຈີນ ແມ່ນ 2 ປະເທດບ້ານໃກ້ເຮືອນຄຽງ ທີ່ມີການພົວພັນມາແຕ່ດົນນານ. ກ່ອນນີ້ 65 ປີ, ຄືໃນວັນທີ 18/1/1950 , ປະເທດ ສາທາລະນະລັດປະຊາຊົນຈີນ ຊຶ່ງແມ່ນລັດທຳອິດໃນໂລກໄດ້ສ້າງຕັ້ງການພົວພັນທາງການທູດກັບສາທາລະນະລັດປະຊາທິປະໄຕຫວຽດນາມ, ປະຈຸບັນແມ່ນປະເທດສາທາລະນະລັດສັງຄົມນິຍົມຫວຽດນາມ, ອັນໄດ້ສ້າງຫຼັກໝາຍປະຫວັດສາດທີ່ສຳຄັນໃນສາຍພົວພັນລະຫວ່າງ 2 ປະເທດ. ໃນຕະຫຼອດ 65 ປີທີ່ຜ່ານມາ, ການພົວພັນລະຫວ່າງ 2 ປະເທດໄດ້ຜ່ານການທົດສອບນາໆປະການ, ແຕ່ນ້ຳໃຈມິດຕະພາບ ແລະ ການຮ່ວມມືຍາມໃດກໍຖືເປັນໄລກອນ.
ໃນຈຸດເວລາທີ່ 2 ປະເທດສ້າງການພົວພັນເປັນປົກກະຕິເມື່ອປີ 1991 ນັ້ນ, ຍາກທີ່ຈະວາດນຶກໄດ້ວ່າ ພາຍຫຼັງພຽງ 23 ປີ, ຄືໃນປີ 2014ດ ຍອດວົງເງິນການຄ້າຫວຽດນາມ ແລະ ຈີນໄດ້ເພີ່ມຂຶ້ນກວ່າ 1.500 ເທົ່າ(ບັນລຸກວ່າ 55 ຕື້ USD ເມື່ອທຽບໃສ່ລະດັບ 32 ລ້ານ USD ໃນປີ 1991 ). ໄລຍະ 10 ປີມານີ້, ຈີນໄດ້ເປັນຄູ່ຄ້າລາຍໃຫຍ່ຢ່າງຕໍ່ເນື່ອງຂອງຫວຽດນາມ, ກາຍເປັນຕະຫຼາດສົ່ງອອກໃຫຍ່ອັນດັບ 2 ຂອງຫວຽດນາມ, ຮອງຈາກ ອາເມລິກາ. 2 ຝ່າຍໄດ້ເຊັນແຜນກຳນົດສັງລວມພັດທະນາໄລຍະ 5 ປີແຫ່ງການຮ່ວມມືດ້ານເສດຖະກິດການຄ້າ ຫວຽດນາມ ແລະ ຈີນໄລຍະ 2012-2016 ເນື່ອງໃນໂອກາດ ທ່ານເລຂາທິການໃຫຍ່ ພັກກອມມູນິດຫວຽດນາມ ຫງວຽນຟູ້ຈ້ອງ ຢ້ຽມຢາມຈີນເມື່ອເດືອນ 10 / 2011. ໃນການຢ້ຽມຢາມຫວຽດນາມຂອງທ່ານນາຍົກລັດຖະມົນຕີຈີນ ຫຼີເຄີ້ສຽງ ເມື່ອປີ 2013, 2 ຝ່າຍໄດ້ເຫັນດີເປັນເອກະສັນກັນ ຊຸກຍູ້ການຮ່ວມມືດ້ານເສດຖະກິດ-ການຄ້າດ້ວຍຈຸດສຸມ ແມ່ນຮ່ວມມືສ້າງບາງໂຄງການທີ່ດີເດັ່ນ, ມີຂອບຂະໜາດໃຫຍ່ທາງດ້ານພື້ນຖານໂຄງລ່າງ, ເຊື່ອມຕໍ່ທາງຄົມມະນາຄົມ; ສືບຕໍ່ນຳໃຊ້ບັນດາມາດຕະການຮັບປະກັນການຊຸກຍູ້ການພົວພັນດ້ານການຄ້າໃຫ້ພັດທະນາຢ່າງສົມດຸນ, ສົດໃສ, ສຳເລັດກ່ອນກຳນົດ ຄາດໝາຍວົງເງິນການຄ້າບັນລຸ 60 ຕື້ USD ໃນປີ 2015, ບັນລຸ ຄາດໝາຍ 100 ຕື້ USD ໃນປີ 2017. ຈາກຕົວເລກ 0, ການລົງທຶນຂອງຈີນມາຮອດປະຈຸບັນ, ໄດ້ບັນລຸຍອດທຶນຈົດທະບຽນເກືອບ 8 ຕື້ USD , ອັນໄດ້ນຳຈີນຢືນອັນດັບທີ 9 ໃນຍອດຈຳນວນກວ່າ 100 ປະເທດ ແລະ ເຂດແຄ້ວນທີ່ລົງທຶນເຂົ້າຫວຽດນາມ.
ຫວຽດນາມມີນັກສຶກສາກວ່າ 13.000 ຄົນພວມຮ່ຳຮຽນຢູ່ຈີນ ແລະ ຈີນກໍມີນັກສຶກສານັບພັນຄົນຄົນພວມຮ່ຳຮຽນຢູ່ ຫວຽດນາມ. ການຮ່ວມມືດ້ານການປ້ອງກັນຊາດ ປ້ອງກັນຄວາມສະຫງົບ, ວັດທະນະທຳ, ກິລາ, ສາທາລະນະສຸກ, ວິທະຍາສາດເຕັກນິກ…..2 ປະເທດກໍໄດ້ບັນລຸບັນດາໝາກຜົນທີ່ໜ້າຊື່ນຊົມ. ພ້ອມກັນນັ້ນ, ບັນດາການເຄື່ອນໄຫວພົວພັນແລກປ່ຽນມິດຕະພາບລະຫວ່າງປະຊາຊົນ 2 ປະເທດ, ເປັນຕົ້ນແມ່ນລະຫວ່າງບັນດາທ້ອງຖິ່ນເຂດຊາຍແດນ, ລະຫວ່າງໄວໜຸ່ມລຸ່ນຕ່າງໆຂອງ 2 ປະເທດ ໄດ້ຖືກຈັດຕັ້ງເປັນປະຈຳດ້ວຍຂອບຂະໜາດໃຫຍ່ ປະກອບສ່ວນເພີ່ມທະວີຄວາມເຂົ້າອົກເຂົ້າໃຈ ແລະ ນ້ຳໃຈມິດຕະພາບລະຫວ່າງປະຊາຊົນ 2 ປະເທດ. ມາຮອດປະຈຸບັນ, 2 ປະເທດໄດ້ຈັດງານມະໂຫລານຊາວໜຸ່ມຫວຽດນາມ ແລະ ຈີນ 2 ຄັ້ງຢູ່ແຂວງກວາງສີ, ງານມະໂຫລານມິດຕະພາບປະຊາຊົນຫວຽດນາມ ແລະ ຈີນ 2 ຄັ້ງ, ເວທີປາໄສປະຊາຊົນຫວຽດນາມ ແລະ ຈີນ 6 ຄັ້ງ ແລະ ການພົບປະແລກປ່ຽນມິດຕະພາບຊາວໜຸ່ມຫວຽດນາມ ແລະ ຈີນ 14 ຄັ້ງ.
ກ່ຽວກັບຊາຍແດນ ແລະ ເຂດນ້ຳແດນດິນ, 2 ຝ່າຍໄດ້ລົງນາມໃນຂໍ້ຕົກລົງກ່ຽວກັບບັນດາຫຼັກການພື້ນຖານແກ້ໄຂບັນດາບັນຫາຊາຍແດນ ແລະ ເຂດນ້ຳແດນດິນ ແລະ ຂໍ້ຕົກລົງກ່ຽວກັບບັນດາຫຼັກການພື້ນຖານຊີ້ນຳແກ້ໄຂບັນຫາບົນທະເລ ຫວຽດນາມ ແລະ ຈີນ.
ບັນດາການພົບປະແລກປ່ຽນຂັ້ນສູງຖືກຈັດຂຶ້ນເປັນປະຈຳດ້ວຍຫຼາຍຮູບຫຼາຍແບບ, ມີໄຫວພີບ. ນີ້ແມ່ນກຳລັງຊຸກຍູ້ທີ່ສຳຄັນ ແນໃສ່ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ , ມີຄຸນປະໂຫຍດກຳນົດທິດໃຫ້ແກ່ການພັດທະນາການພົວພັນຮ່ວມມືທີ່ແທດຈິງ, ອັນໄດ້ສ້າງເງື່ອນໄຂເພື່ອໃຫ້ 2 ຝ່າຍສາມາດແກ້ໄຂການຂັດແຍ້ງ, ຄວາມບໍ່ລົງລອຍກັນເທື່ອລະກ້າວ. 2 ປະເທດໄດ້ລົງນາມໃນສັນຍາ ແລະ ເອກະສານຮ່ວມມືຫຼາຍສະບັບ, ອັນໄດ້ສ້າງພື້ນຖານ ແລະ ເປັນກອບກົດໝາຍໃຫ້ແກ່ການພົວພັນຮ່ວມມືຍາວນານລະຫວ່າງ 2 ຝ່າຍ.
ການພົວພັນລະຫວ່າງພັກກອມມູນິດຫວຽດນາມ ແລະ ພັກກອມມູນິດຈີນໄດ້ຮັບການຍູ້ແຮງ ຊຶ່ງຈຸດທີ່ສະຫວ່າງສະໄຫວແມ່ນບັນດາກອງປະຊຸມສຳມະນາທິດສະດີ ແນໃສ່ແລກປ່ຽນບົດຮຽນ ກໍຄືພຶດຕິກຳຕົວຈິງກ່ຽວກັບການກໍ່ສ້າງພັກ, ຄຸ້ມຄອງລັດ. ມາຮອດປະຈຸບັນ, 2 ຝ່າຍໄດ້ຈັດ ກອງປະຊຸມສຳມະນາ 10 ຄັ້ງກ່ຽວກັບທິດສະດີລະຫວ່າງ 2 ພັກ. ການນຳຂັ້ນສູງຂອງ 2 ພັກ, 2 ລັດ ກໍໄດ້ປະຕິບັດກົນໄກສ້າງຕັ້ງສາຍໂທລະສັບດ່ວນນັບແຕ່ປີ 2012 ແລະ ມາຮອດປະຈຸບັນ, ເລຂາທິການໃຫຍ່ 2 ທ່ານໄດ້ມີການເຈລະຈາທາງໂທລະສັບ 3 ຄັ້ງເພື່ອແລກປ່ຽນບັນດາບັນຫາກ່ຽວກັບການພົວພັນລະຫວ່າງ 2 ພັກ , 2 ລັດ.
ສາຍພົວພັນມິດຕະພາບທີ່ເປັນມູນເຊື້ອ ຫວຽດນາມ ແລະ ຈີນ ໂດຍທ່ານປະທານໂຮ່ຈິມິນ ແລະ ປະທານ ມາວເຈີຕຸງ ພ້ອມກັບການນຳປະຕິວັດລຸ່ນຕ່າງໆ ແລະ ປະຊາຊົນ 2 ປະເທດໄດ້ເພີ່ມພູນຄູນສ້າງຂຶ້ນນັ້ນ, ແມ່ນຊັບສົມບັດອັນລ້ຳຄ່າຂອງ 2 ຊາດ, ຊຶ່ງຮຽກຮ້ອງໃຫ້ 2 ພັກ, 2 ລັດຕ້ອງເຄົາລົບຮັກສາ. ພັກ, ລັດ ແລະ ປະຊາຊົນຫວຽດນາມມີທັດສະນະສະເໝີຕົນສະເໝີປາຍ ຍາມໃດກໍຖະໜຸຖະໜອມ ແລະ ປາຖະໜາພ້ອມກັບພັກ, ລັດ ແລະ ປະຊາຊົນຈີນປັບປຸງນ້ຳໃຈມິດຕະພາບທີ່ເປັນມູນເຊື້ອ ແລະ ສ້າງການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ ແລະ ຈີນໃຫ້ນັບມື້ນັບພັດທະນາ, ປະກອບສ່ວນເພື່ອສັນຕິພາບ, ສະຖຽນລະພາບ ແລະ ວັດທະນາຖາວອນໃນພາກພື້ນ ແລະ ໃນໂລກ.
ການຢ້ຽມຢາມຈີນຢ່າງເປັນທາງການຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງຄັ້ງນີ້ ດຳເນີນໃນໂອກາດທີ່ 2 ປະເທດຈັດຕັ້ງສະເຫຼີມສະຫຼອງ 65 ປີແຫ່ງວັນສ້າງການພົວພັນທາງການທູດ; ພ້ອມກັນນັ້ນ ກໍສືບຕໍ່ຜັນຂະຫຍາຍແນວທາງການຕ່າງປະເທດເປັນເອກະລາດ, ເປັນເຈົ້າຕົນເອງຂອງພັກ ແລະ ລັດຫວຽດນາມ. ການຢ້ຽມຢາມກໍເປັນການປະກອບສ່ວນປັບປຸງດ ຮັກສານ້ຳໃຈມິດຕະພາບ, ຄວາມມີສະຖຽນລະພາບ, ສ້າງທ່າພັດທະນາທີ່ສົດໃສຕື່ມອີກໃຫ້ການພົວພັນ ຫວຽດນາມ ແລະ ຈີນ, ສ້າງເງື່ອນໄຂສະດວກເພື່ອສືບຕໍ່ແກ້ໄຂບັນດາບັນຫາທີ່ຍັງຄົງຄ້າງລະຫວ່າງ 2 ປະເທດ, ປະກອບສ່ວນຮັກສາ, ປັບປຸງສະພາບແວດລ້ອມແຫ່ງສັນຕິພາບ, ສະຖຽນລະພາບເພື່ອ ສ້າງສາ ແລະ ປັກປັກຮັກສາປະເທດຊາດ.