(vovworld) - ວັນທີ 21/11, ທ່ານປະທານປະເທດ ເຈີ່ນດ້າຍກວາງ ພ້ອມກັບຄະນະຜູ້ແທນຂັ້ນສູງ ຫວຽດນາມ ໄດ້ຢ້ຽມຢາມທາງລັດຖະກິດ ອີຕາລີ ແລະ ຢ້ຽມຢາມສຳນັກ ວານຕີກັງ. ການຢ້ຽມຢາມຈະແກ່ຍາວຮອດວັນທີ 25/11. ນີ້ແມ່ນການຢ້ຽມຢາມມີຄວາມໝາຍພິເສດໃນການປັບປຸງການພົວພັນຄູ່ຮ່ວມມືຍຸດທະສາດລະຫວ່າງ ຫວຽດນາມ - ອີຕາລີ, ພ້ອມທັງສ້າງພື້ນຖານໃຫ້ແກ່ການພົວພັນທາງດ້ານການທູດລະຫວ່າງ ຫວຽດນາມ ແລະ ວານຕີກັງ ໃຫ້ໝັ້ນຄົງ, ໜັກແໜ້ນໃນໄລຍະຈະມາເຖິງກ່ວາອີກ.
ທ່ານປະທານປະເທດ ເຈີ່ນດ້າຍກວາງ
(ພາບປະກອບ)
|
ໂດຍນອນໃນທາງພາກໃຕ້ຂອງ ເອີລົບ, ອີຕາລີ ເປັນປະເທດທີ່ມີປະຫວັດສາດມາແຕ່ດົນນານ, ຕິດພັນກັບປະຫວັດສາດໂລມັນບູຮານ. ປະຈຸບັນ, ພື້ນຖານເສດຖະກິດທີ່ຫຼາຍຮູບຫຼາຍແບບດ້ວຍຫຼາຍຂະແໜງອຸດສາຫະກຳທີ່ກ້າວໜ້າ, ອີຕາລີ ພວມຢືນອັນດັບທີ 9 ຢູ່ໃນໂລກ. ນອກຈາກບັນດາຄູ່ຮ່ວມມືທີ່ເປັນມູນເຊື້ອແລ້ວ, ອີຕາລີ ພວມສຸມໃສ່ຍູ້ແຮງການຮ່ວມມື, ແລກປ່ຽນດ້ານການຄ້າກັບບັນດາພື້ນຖານເສດຖະກິດຫາກໍ່ພົ້ນເດັ່ນຂອງ ອາຊີ, ເຊິ່ງລວມມີ: ຈີນ, ອິນເດຍ ແລະ ບັນດາປະເທດ ອາຊຽນ, ໃນນັ້ນມີ ຫວຽດນາມ.
ຜັນຂະຫຍາຍກຳລັງແຮງໃນການພົວພັນຄູ່ຮ່ວມມືຍຸດທະສາດ
ຫວຽດນາມ ແລະ ອີຕາລີ ສ້າງຕັ້ງການພົວພັນການທູດຢ່າງເປັນທາງການນັບແຕ່ວັນທີ 23/3/1973. ການພົວພັນທາງດ້ານການເມືອງນັບແຕ່ຕົ້ນຊຸມປີ 90 ໄດ້ຮັບການປັບປຸງ ແລະ ພັດທະນາຢ່າງຈະແຈ້ງ. ອີຕາລີ ເປັນປະເທດ ເອີລົບ ຕາເວັນຕົກ ທຳອິດ ທີ່ໄດ້ຕັ້ງໜ້າໃນການສະໜັບສະໜູນເລື່ອງເພີ່ມທະວີການພົວພັນຮ່ວມມືລະຫວ່າງ ຫວຽດນາມ ແລະ ສະຫະພາບ ເອີລົບ, ໃນບັນດາເວທີປາໄສສາກົນຂະໜາດໃຫຍ່ ກໍ່ຄືເລື່ອງສ້າງການພົວພັນເປັນປົກກະຕິລະຫວ່າງ ຫວຽດນາມ ແລະ ບັນດາອົງການການເງິນ, ການຄ້າ, ເງິນຕາສາກົນແຕ່ຕົ້ນຊຸມປີ 90. ສອງປະເທດຮັກສາການແລກປ່ຽນຄະນະຜູ້ແທນຂັ້ນສູງເປັນປະຈຳ. ໃນການພົບປະຄັ້ງຕ່າງໆ, ການນຳຂັ້ນສູງ ອີຕາລີ ຍາມໃດກໍ່ຢັ້ງຢືນຄວາມຕັດສິນໃຈຊຸກຍູ້ການພົວພັນຮ່ວມມືຫຼາຍດ້ານກັບ ຫວຽດນາມ, ຖື ຫວຽດນາມ ເປັນປະເທດບຸລິມະສິດພັດທະນາໃນການພົວພັນຢູ່ພາກພື້ນ ອາຊີ ຕາເວັນອອກສ່ຽງໃຕ້ ແລະ ເປັນຈຸດນັດພົບຂອງບັນດາວິສາຫະກິດ ອີຕາລີ ນັບແຕ່ນີ້ຮອດປີ 2020. ຕົ້ນປີ 2013, ສອງປະເທດສ້າງຕັ້ງການພົວພັນຄູ່ຮ່ວມມືຍຸດທະສາດເນື່ອງໃນໂອກາດການຢ້ຽມຢາມສັນຕະວະໄມຕີທາງລັດຖະກິດເຖິງ ອີຕາລີ ຂອງທ່ານເລຂາທິການໃຫຍ່ ຫງວຽນຟູ໋ຈ້ອງ ຢ່າງເປັນທາງການ.
ການພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ ໃນຊຸມປີຜ່ານມາສືບຕໍ່ໄດ້ຮັບການປັບປຸງ ແລະ ເພີ່ມທະວີໃນທຸກດ້ານ, ໃນນັ້ນເລື່ອງຮັກສາບັນດາການຢ້ຽມຢາມ ແລະ ການແລກປ່ຽນຄະນະຂັ້ນສູງເປັນປະຈຳ. ໃນການຮ່ວມມືດ້ານເສດຖະກິດ, ການແລກປ່ຽນການຄ້າ ແລະ ການລົງທຶນ, ວົງເງິນການຄ້າສອງສົ້ນເພີ່ມຂຶ້ນຢ່າງຕໍ່ເນື່ອງໃນຊຸມປີຜ່ານມາ. ຖ້າຫາກໃນປີ 2013, ວົງເງິນການຄ້າ 2 ສົ້ນລະຫວ່າງ ຫວຽດນາມ ແລະ ອີຕາລີ ບັນລຸ 3,3 ຕື້ USD, ຮອດປີ 2015 ບັນລຸ 4,3 ຕື້ USD.
ມາຮອດປະຈຸບັນ, ອີຕາລີ ມີ 77 ໂຄງການລົງທຶນທີ່ຍັງມີຜົນສັກສິດຢູ່ ຫວຽດນາມ ດ້ວຍຍອດຈຳນວນທຶນແມ່ນ 360 ລ້ານ USD, ຢືນອັນດັບທີ 31/112 ປະເທດ ແລະ ເຂດແຄ້ວນລົງທຶນຢູ່ ຫວຽດນາມ. ໃນບັນດາຂົງເຂດທີ່ ອີຕາລີ ລົງທຶນເຂົ້າ ຫວຽດນາມ ເປັນຕົ້ນແມ່ນໃນບັນດາຂະແໜງຄື: ອຸດສາຫະກຳປຸງແຕ່ງ, ຜະລິດ, ເກັບໜັງ, ກໍ່ສ້າງ, ເຕົານ້ຳຮ້ອນ, ຜະລິດເຫຼັກກ້າ. ພິເສດ, ລັດຖະບານ ອີຕາລີ ໄດ້ຈະ ຫວຽດນາມ ເຂົ້າບັນຊີລາຍຊື່ 10 ຕະຫຼາດຫາກໍ່ພົ້ນເດັ່ນບຸລິມະສິດໃນການພັດທະນາການພົວພັນດ້ານການຄ້າ ແລະ ການລົງທຶນ.
ຄຽງຄູ່ກັນນັ້ນ, ການຮ່ວມມືດ້ານວັດທະນະທຳ ແລະ ການສຶກສາລະຫວ່າງ ຫວຽດນາມ - ອີຕາລີ ມີບັນດາບາດກ້າວພັດທະນາສະຖຽນລະພາບ ແລະ ໝັ້ນຄົງເຂັ້ມແຂງ. ແຕ່ລະປີ, ກະຊວງການຕ່າງປະເທດ ອີຕາລີ ລ້ວນແຕ່ສະຫງວນໃຫ້ ຫວຽດນາມ ທຶນສຶກສາຂັ້ນປະລິຍາຕີ ແລະ ປະລິຍາໂທ ດ້ານພາສາ ອີຕາລີ. ລັດຖະບານ ອີຕາລີ ໄດ້ສົມທົບກັບ UNESCO ຊ່ວຍເຫຼືອ ຫວຽດນາມ ບູລະນະປະຕິສັງຂອນເຂດປູຊະນີຍະສະຖານ ໝີເຊີນ ດ້ວຍຍອດຈຳນວນເງິນກ່ວາ 435.000 USD. ນອກນັ້ນ, ບັນດາຝ່າຍກໍ່ຈັດຕັ້ງບັນດາການເຄື່ອນໄຫວສັບປະດາ, ເດືອນວັດທະນະທຳເພື່ອເປີດກ້ວາງການພົວພັນແລກປ່ຽນ, ເພີ່ມທະວີຄວາມເຂົ້າອົກເຂົ້າໃຈລະຫວ່າງປະຊາຊົນ 2 ປະເທດ.
ເຈລະຈາແມ່ນພື້ນຖານກໍ່ສ້າງ ແລະ ພັດທະນາການພົວພັນ ຫວຽດນາມ - ວານຕີວັງ
ໃນການຢ້ຽມຢາມເຖິງ ອີຕາລີ ຄັ້ງນີ້, ທ່ານປະທານປະເທດ ເຈີ່ນດ້າຍກວາງ ກໍ່ຈະໄປຢ້ຽມຢາມສຳນັກ ວານຕີກັງ. ການຢ້ຽມຢາມເພື່ອແນໃສ່ສົ່ງສານທີ່ ຫວຽດນາມ ໄດ້ຢັ້ງຢືນເປັນຫຼາຍຄັ້ງກ່ອນແລ້ວ. ນັ້ນແມ່ນ, ຍາມໃດ ຫວຽດນາມ ກໍ່ຖືການພົວພັນກັບສຳນັກ ວານຕີກັງ ເປັນສຳຄັນ ແລະ ມີແຜນນະໂຍບາຍສືບຕໍ່ວິວັດທະນາການຄູ່ເຈລະຈາໂດຍກົງກັບສຳນັກ ວານຕີກັງ ໂດຍອີງໃສ່ພື້ນຖານບັນດາຫຼັກການເຊິ່ງ 2 ຝ່າຍໄດ້ຕົກລົງນັ້ນແມ່ນເຄົາລົບນັບຖືເຊິ່ງກັນ ແລະ ກັນ, ບໍ່ແຊກແຊງເຂົ້າວຽກງານພາຍໃນຂອງກັນ. ຫວຽດນາມ ປາດຖະໜາວ່າ ສຳນັກ ວານຕີກັງ ມີທັດສະນະສົ່ງເສີມປະຊາຄົມຊາວຄິດ ຫວຽດນາມ ຍາມໃດກໍ່ຕິດພັນກັບປະເທດຊາດ ແລະ ປະຊາຊົນ, ເປັນພື້ນຖານໃຫ້ແກ່ການພັດທະນາການພົວພັນລະຫວ່າງ ຫວຽດນາມ ແລະ ສຳນັກ ວານຕີກັງ.
ໂດຍສັງເກດການພົວພັນ ຫວຽດນາມ - ວານຕີກັງ ໃນໄລຍະຜ່ານມາ, ອາດຈະຢັ້ງຢືນໄດ້ວ່າວິວັດທະນາການເຈລະຈາໄດ້ປະກອບສ່ວນພັດທະນາການພົວພັນ ຫວຽດນາມ - ວານຕີກັງ ການເຈລະຈາບົນພື້ນຖານເຄົາລົບນັບຖືບັນດາຂໍ້ຕົກລົງທີ່ມີຫຼັກການເຊິ່ງ 2 ຝ່າຍຖືເປັນສຳຄັນທີ່ສຸດ, ໄດ້ສ້າງຄວາມເຂົ້າອົກເຂົ້າໃຈເຊິ່ງກັນແລະກັນ ເພື່ອຈາກນັ້ນ 2 ຝ່າຍຈະຊອກຫາບັນດາສິ່ງທີ່ເຫັນດີເຫັນພ້ອມ ແລະ ພ້ອມກັນຊຸກຍູ້ການພົວພັນ 2 ຝ່າຍເພື່ອຜົນປະໂຫຍດລວມຂອງແຕ່ລະຝ່າຍ. ບັນດາການເຈລະຈາສາມາດແກ້ໄຂໄດ້ຫຼາຍ ບັນຫາຄື: ການແຕ່ງຕັ້ງບຸກຄະລາກອນໃຫ້ແກ່ບັນດາໂບດຢູ່ ຫວຽດນາມ, ການສ້າງຕັ້ງແຄ້ວນຊາວຄິດໃໝ່, ເລື່ອງໄປຮຽນຢູ່ຕ່າງປະເທດຂອງບັນດາ ເຈົ້າລັດສີ, ຄູນພໍ່ ແລະ ເລື່ອງສະມາຄົມຄິດທະສາດສະໜາ ຫວຽດນາມ ເຊື້ອເຊີນບັນດາອົງການ ແລະ ສ່ວນບຸກຄົນຊາວຄິດຈາກຕ່າງປະເທດມາ ຫວຽດນາມ ເຄື່ອນໄຫວສາສະໜາ.
ບົນພື້ນຖານການພົວພັນອັນດີງາມນັ້ນ, ການຢ້ຽມຢາມຂອງທ່ານປະທານປະເທດ ເຈີ່ນດ້າຍກວາງ ເຖິງ ອີຕາລີ ແລະ ສຳນັກ ວານຕີກັງ ແນ່ນອນວ່າຈະເປັນບາດກ້າວໃໝ່, ຕັ້ງພື້ນຖານຢ່າງໝັ້ນຄົງ, ໜັກແໜ້ນກ່ວາໃຫ້ແກ່ການພົວພັນລະຫວ່າງ ຫວຽດນາມ ກັບ ອີຕາລີ ແລະ ກັບສຳນັກ ວານຕີກັງ ໃນໄລຍະຈະມາເຖິງ.