(vovworld)-ວັນທີ 11/5, ທ່ານປະທານປະເທດຫວຽດນາມ ເຈືອງເຕີນຊາງ ເລີ່ມຕົ້ນການຢ້ຽມຢາມທາງລັດຖະກິດເຖິງ ສ.ເຊັກໂກ ໃນເວລາ 3 ວັນ ແລະ ໄປຢ້ຽມຢາມ ສ. ອາແຊກໄບຢານ ແຕ່ວັນທີ 13-15/5 ຕາມຄຳເຊີນຂອງທ່ານປະທານາທິບໍດີ ສ.ເຊັກ Milos Zeman ແລະ ປະທານາທິບໍດີ ສ. ອາແຊກໄບຢານ Ilham Alive. ການຢ້ຽມຢາມຂອງທ່ານປະທານປະເທດ ເຈືອງເຕີນຊາງ ສືບຕໍ່ຢືນຢັນນະໂຍບາຍສະເໝີຕົ້ນສະເຫມີປາຍຂອງຫວຽດນາມ ແມ່ນເພີ່ມທະວີການພົວພັນມິດຕະພາບ,ການຮ່ວມມືຫລາຍດ້ານກັບບັນດາປະເທດເພື່ອນມິດທີ່ເປັນມູນເຊື້ອ.
ຜູ້ຕາງຫນ້າບັນດາອົງການຂອງເຊັກໂກຕ້ອນຮັບທ່ານປະທານ
ປະເທດຫວຽດນາມເຈືອງເຕີນຊາງ
ພາບ:vov
|
ສ.ແຊກໂກ ແລະ ສ ອາແຊກໄບຢານ ແມ່ນສອງປະເທດມີການພົວພັນມິດຕະພາບທີ່ເປັນມູນເຊື້ອກັບຫວຽດນາມ. ກ່ອນທີ່ຖະແຫລງການເອກະລາດເມື່ອວັນທີ 30/8/1991, ສ. ອາແຊກໄບຢານ ແມ່ນຂຶ້ນກັບສະຫະພາບ ໂຊວຽດ ແລະ ສະໂລວາເກຍ -ສ.ແຊກໂກ ໃນປະຈຸບັນ ແມ່ນຫນຶ່ງໃນບັນດາປະເທດທຳອິດໃນໂລກຮັບຮູ້ ແລະ ສ້າງຕັ້ງສາຍພົວພັນທາງການທູດກັບຫວຽດນາມເມື່ອປີ 1950. ໃນຫລາຍປີຜ່ານມາ, ການພົວພັນລະຫວ່າງຫວຽດນາມ ແລະ ສອງປະເທດດັ່ງກ່າວ ໄດ້ຮັບການເພີ່ມພູນຄູນສ້າງຢ່າງບໍ່ຢຸດຢັ້ງຈາກການນຳລຸ້ນຕ່າງໆ ແລະ ປະຊາຊົນສອງປະເທດ ແລະ ນັບມື້ນັບພັດທະນາເປີດກວ້າງການຮ່ວມມືໃນຫລາຍຂົງເຂດ.
ນຳການພົວພັນຫວຽດນາມ -ສ.ເຊັກໂກຂຶ້ນສູ່ລະດັບສູງໃຫມ່
ດ້ວຍທີ່ຕັ້ງຍຸດທະສາດຢູ່ ເອີລົບ ກາງ- ເອີລົບ ຕາເວັນອອກ, ເຊັກໂກປະຈຸບັນແມ່ນສະມາຊິກຂອງ ສະຫະພາບເອີລົບ(EU) ແລະ ຫລາຍອົງການສາກົນໃຫຍ່ . ໃນນະໂຍບາຍການຕ່າງປະເທດ, ເຊັກໂກ ເອົາໃຈໃສ່ເປັນພິເສດເຖິງການສ້າງຄວາມສົມດຸ່ນການພົວພັນລະຫວ່າງພາກຕາເວັນອອກ- ຕາເວັນຕົກ ຜ່ານການພັດທະນາກັບບັນດາປະເທດ ອາຊີ, ໃນນັ້ນບຸລິມະສິດການພົວພັນກັບຫວຽດນາມ.
ການພົວພັນລະຫວ່າງ ຫວຽດນາມ ແລະ ເຊັກໂກ ໃນຫລາຍປີຜ່ານມາໄດ້ພັດທະນາຢ່າງຕັ້ງຫນ້າໃນຫລາຍຂົງເຂດ. ສອງຝ່າຍ ແລກປ່ຽນຄະນະຜູ້ແທນທຸກຂັ້ນເປັນປະຈຳ, ສົມທົບກັນສະຫນັບສະຫນູນເຊິ່ງກັນ ແລະ ກັນທີ່ບັນດາເວທີປາໄສສາກົນ. ວົງເງິນການຄ້າສອງສົ້ນລະຫວ່າງຫວຽດນາມ ແລະ ເຊັກໂກ ບັນລຸລະດັບເຕີບໂຕສູງ, ປີ 2014 ບັນລຸກວ່າ 300 ລ້ານ USD. ປີ 2012, ເຊັກໂກ ໄດ້ປະກາດຍຸດທະສາດສົ່ງອອກແຫ່ງຊາດ 2012-2020, ໃນນັ້ນ ຈັດຫວຽດນາມ ຊື່ງແມ່ນປະເທດຫນຶ່ງດຽວໃນອາຊຽນ ເຂົ້າບັນຊີລາຍຊື່ 12 ປະເທດບຸລິມະສິດ. ກ່ຽວກັບການຮ່ວມມືລົງທຶນ, ມາຮອດປະຈຸບັນ ເຊັກໂກ ມີ 36 ໂຄງການລົງທຶນເຂົ້າຫວຽດນາມ ດ້ວຍຍອດຈຳນວນທຶນຈົດທະບຽນ 64 ລ້ານ USD, ຢືນອັນດັບທີ 42 ໃນຈຳນວນ 101 ປະເທດ ແລະ ເຂດແຄ້ວນລົງທຶນຢູ່ຫວຽດນາມ. ບັນດາຂົງເຂດລົງທຶນຂອງ ເຊັກໂກ ສ່ວນຫລາຍແມ່ນສຸມໃສ່ຂົງເຂດອະສັງຫາລິມະຊັບ, ອຸປະກອນໄຟຟ້າ, ວັດສະດຸກໍ່ສ້າງ.. ບັນດາຂົງເຂດຮ່ວມມືລົງທຶນມີແງ່ຫວັງ ນັ້ນແມ່ນພະລັງງານ, ຄົມມະນາຄົມ, ກົນຈັກ… ເຊັກໂກ ເຂົ້າຮ່ວມບັນດາກອງປະຊຸມສາກົນອຸປະຖຳໃຫ້ແກ່ຫວຽດນາມ ເປັນປະຈຳ, ມາຮອດປະຈຸບັນ ໄດ້ປະກອບຈຳນວນເງິນ 18 ລ້ານ USD. ເຊັກໂກ ກໍໄດ້ເຂົ້າຮ່ວມການຊ່ວຍເຫລືອຫລ້າໃຫ້ຫລາຍໂຄງການຮັບໃຊ້ຊີວິດການເປັນຢູ່ຂອງປະຊາຊົນ, ບັນດາຂົງເຂດສາທາລະນະສຸກ, ສິ່ງແວດລ້ອມຢູ່ຫວຽດນາມ. ປະຈຸບັນ ລັດຖະບານ ເຊັກໂກ ສືບຕໍ່ສະຫນອງທຶນສຶກສາໃຫ້ນັກສຶກສາ ແລະ ນັກຄົ້ນຄ້ວາຫວຽດນາມ ແລະ ໄດ້ແລກປ່ຽນຮ່າງບົດບັນທຶກຊ່ວຍຈຳກ່ຽວກັບການຮ່ວມມືທ່ອງທ່ຽວລະຫວ່າງ ກະຊວງວັດທະນະທຳ ກິລາ ແລະ ທ່ອງທ່ຽວຫວຽດນາມ ກັບກະຊວງພັດທະນາເຂດຂອງ ເຊັກໂກ.
ປະຈຸບັນ, ຢູ່ ເຊັກໂກ ມີຊາວຫວຽດນາມກວ່າ 60.000 ຄົນພວມດຳລົງຊີວິດ ແລະ ພິເສດ ວັນທີ 3/7/2013, ລັດຖະບານ ເຊັກໂກ ໄດ້ຕົກລົງເພີ່ມເຕີມຜູ້ຕາງຫນ້າຊາວ ເຊັກໂກ ເຊື້ອຊາດຫວຽດນາມ ເຂົ້າສະພາຊົນເຜົ່າສ່ວນຫນ້ອຍ, ຜ່ານນັ້ນ ກໍຮັບຮອງ ຊາວ ເຊັກໂກ ເຊື້ອຊາດ ຫວຽດນາມ ແມ່ນຊົນເຜົ່າສ່ວນຫນ້ອຍຂອງ ເຊັກໂກ.
ຂຸດຄົ້ນຄວາມສາມາດບົ່ມຊ້ອນ, ທ່າແຮງ, ຊຸກຍູ້ການພົວພັນກັບ ສ. ອາແຊກໄບຢານ
ສຳລັບ ອາແຊກໄບຢານ, ສືບທອດມູນເຊື້ອແຫ່ງການຮ່ວມມືອັນດີງາມລະຫວ່າງສອງປະເທດ, ໃນຊຸມປີຍັງເປັນສະມາຊິກຂອງ ໂຊວຽດ, ການພົວພັນລະຫວ່າງຫວຽດນາມ ແລະ ອາແຊກໄບຢານ ພວມໃນທ່າພັດທະນາຢ່າງດີງາມທີ່ສຸດ. ອາແຊກໄບຢານ ໄດ້ຊ່ວຍຫວຽດນາມ ບຳລຸງສ້າງນັກສຶກສາ, ພະນັກງານມີລະດັບຄວາມຮູ້ສູງຫລາຍຄົນ, ເປັນຕົ້ນໃນຂະແຫນງນ້ຳມັນອາຍແກສ. ນີ້ແມ່ນຂົງເຂດມີຄວາມສາມາດບົ່ມຊ້ອນ ຊື່ງຫວຽດນາມ ສາມາດຊຸກຍູ້ການຮ່ວມມືກັບ ອາແຊກໄບຢານ. ສອງປະເທດ ໄດ້ລົງນາມໃນສັນຍາສະບັບຕ່າງໆຄື: ສັນຍາຍົກເວັ້ນວິຊາໃຫ້ພົນລະເມືອງຖື ຫນັງສືຜ່ານແດນການທູດ ແລະ ລັດຖະການ(ລົງນາມເມື່ອເດືອນປີ 2010). ສັນຍາລະຫວ່າງລັດຖະບານໃນຂົງເຂດຮ່ວມມືເສດຖະກິດ ການຄ້າ ແລະ ວິທະຍາສາດເຕັກນິກ(ລົງນາມເມື່ອເດືອນ 5/2014), ສັນຍາລະຫວ່າງລັດຖະບານຫລິກລ້ຽງການເກັບພາສີຊ້ອນ(ລົງນາມເມື່ອເດືອນ 5/2014). ອະນຸສັນຍາຮ່ວມມືລະຫວ່າງສອງກະຊວງການຕ່າງປະເທດ(ລົງນາມເມື່ອເດືອນ 4/2010). ສອງຝ່າຍແລກປ່ຽນຄະນະຜູ້ແທນທຸກຂັ້ນເປັນປະຈຳ, ສົມທົບກັນດຳເນີນງານທີ່ ສປຊ ແລະ ບັນດາເວທີປາໄສສາກົນ. ກ່ຽວກັບການລົງທຶນໃນຊຸມປີມໍ່ໆມານີ້, ກຸ່ມບໍລິສັດນ້ຳມັນອາຍແກສ ຫວຽດນາມ ໄດ້ເປັນເຈົ້າການເປີດຫ້ອງການຜູ້ຕາງຫນ້າປະຈຳ ອາແຊກໄບຢານ ແຕ່ປີ 2011. ການຮ່ວມມືດ້ານເສດຖະກິດ ການຄ້າ ລະຫວ່າງສອງປະເທດ ມີບາດກ້າວພັດທະນາ, ບັນລຸ 422 ລ້ານ USD ໃນປີ 2014. ເຖິງຢ່າງໃດກໍຕາມ, ໃນທ່າອ່ຽງເຊື່ອມໂຍງ ແລະ ຮ່ວມມືນັບມື້ນັບແຂງແຮງ, ບັນດາບາດກ້າວພັດທະນາຜ່ານມາ ເປັນຕົ້ນໃນຂົງເຂດເສດຖະກິດ ການຄ້າ ຍັງບໍ່ທັນສົມກັບຄວາມສາມາດບົ່ມຊ້ອນກໍຄືສາຍພົວພັນດ້ານການເມືອງອັນດີງາມລະຫວ່າງ ຫວຽດນາມ ກັບ ອາແຊກໄບຢານ ແລະ ເຊັກໂກ.
ການຢ້ຽມຢາມທາງລັດຖະກິດເຖິງ ສ. ອາແຊກໄບຢານ ແລະ ສ.ເຊັກໂກຄັ້ງນີ້ ຂອງທ່ານປະທານປະເທດຫວຽດນາມເຈືອງເຕີນຊາງ ເພື່ອປັບປຸງ ແລະ ເພີ່ມທະວີການພົວພັນມິດຕະພາບ, ການຮ່ວມມືຫລາຍດ້ານກັບສອງປະເທດດັ່ງກ່າວ. ໃນການຢ້ຽມຢາມ, ທ່ານປະທານປະເທດ ເຈືອງເຕີນຊາງ ໄດ້ແລກປ່ຽນກັບການນຳສອງປະເທດກ່ຽວກັບສະພາບການພັດທະນາເສດຖະກິດສັງຄົມຂອງກັນກໍຄືບົດຮຽນພັດທະນາເສດຖະກິດແບບຍືນຍົງ, ແລກປ່ຽນບັນດາມາດຕະການຊຸກຍູ້ການຮ່ວມມືໃນຫລາຍຂົງເຂດເຂົ້າສູ່ລວງເລິກ, ປະສິດທິຜົນ, ສ້າງເງື່ອນໄຂສະດວກໃຫ້ປະຊາຄົມຊາວຫວຽດນາມອາໄສຢູ່ປະເທດປະຈຳຖີ່ນ. ການຢ້ຽມຢາມແນ່ນອນວ່າ ຈະເປີດຫນ້າປະຫວັດສາດໃຫມ່ໃນການພົວພັນຮ່ວມມືມິດຕະພາບລະຫວ່າງ ຫວຽດນາມ ກັບ ສ.ເຊັກໂກ ແລະ ສ. ອາແຊກໄບຢານ.