ປັບປຸງຄວາມໄວ້ເນື້ອເຊື່ອໃຈຂອງປະຊາຊົນ ເພື່ອສຳເລັດຫນ້າທີ່ພັດທະນາເສດຖະກິດສັງຄົມ ແລະ ກໍ່ສ້າງພັກ

ວັນຈັນ ທີ 12 ຕຸລາ ຄ.ສ. 2015 | 14:40:07

(vovworld)- ໃນບົດກ່າວປາໄສອັດກອງປະຊຸມຄັ້ງທີ 12, ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11, ທ່ານເລຂາທິການໃຫຍ່ ຫງວຽນຟູຈ້ອງ ຊີ້ແຈ້ງໝາກຜົນກອງປະຊຸມ ຈະປະກອບສ່ວນຢ່າງຕັ້ງຫນ້າເຂົ້າໃນຄວາມສຳເລັດຫນ້າທີ່ພັດທະນາເສດຖະກິດສັງຄົມປີ 2015 ຢ່າງມີໄຊ, ສ້າງສາ ແລະ ປະຕິບັດແຜນການພັດທະນາເສດຖະກິດສັງຄົມປີ 2016 ແລະ ຫລາຍບັນຫາສຳຄັນອື່ນຂອງປະເທດຊາດ. ໃນລາຍການສະຖານະການການເມືອງພາກນີ້ ນັກຂ່າວ ທູຮວາ ຄັດສະເຫນີເນື້ອໃນບົດປາໄສຂອງທ່ານເລຂາທິການໃຫຍ່ ຫງວຽນຟູຈ້ອງ ຜ່ານບົດຂຽນທີ່ມີຫົວຂໍ້ວ່າ: ປັບປຸງຄວາມໄວ້ເນື້ອເຊື່ອໃຈຂອງປະຊາຊົນ ເພື່ອສຳເລັດຫນ້າທີ່ພັດທະນາເສດຖະກິດສັງຄົມ ແລະ ກໍ່ສ້າງພັກ

ປັບປຸງຄວາມໄວ້ເນື້ອເຊື່ອໃຈຂອງປະຊາຊົນ ເພື່ອສຳເລັດຫນ້າທີ່ພັດທະນາເສດຖະກິດສັງຄົມ ແລະ ກໍ່ສ້າງພັກ - ảnh 1

ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ໄດ້ຢືນຢັນ: ຄະນະບໍລິຫານງານສູນກາງພັກ ໄດ້ເຫັນດີຢ່າງສູງ ຮັບຮອງເອົາມະຕິຂອງກອງປະຊຸມ. ທ່ານເລຂາທິການໃຫຍ່ ຊີ້ແຈ້ງ ບັນດາໝາກຜົນຕົ້ນຕໍ ທີ່ບັນລຸໄດ້ ແລະ ເຮັດແຈ້ງບາງບັນຫາເພື່ອເປັນເອກະພາບໃນຄະນະການນຳ, ຊີ້ນຳຜັນຂະຫຍາຍປະຕິບັດມະຕິຂອງກອງປະຊຸມຄັ້ງທີ 12 ຂອງ ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11.

ເສດຖະກິດສັງຄົມບັນລຸໄດ້ໝາກຜົນຕັ້ງຫນ້າ

ຄະນະບໍລິຫານງານສູນກາງພັກ ເປັນເອກະພາບຮັບຮູ້ວ່າ: ສະພາບການເສດຖະກິດສັງຄົມ ໃນ 9 ເດືອນຕົ້ນປີ ສືບຕໍ່ມີບັນດາການຫັນປ່ຽນຢ່າງຕັ້ງຫນ້າ, ບັນລຸໄດ້ຫລາຍໝາກຜົນຮອບດ້ານໃນບັນດາຂົງເຂດ. ພົ້ນເດັ່ນແມ່ນ ເສດຖະກິດສືບຕໍ່ຟື້ນຕົວ, ການເຕີບໂຕສູງກວ່າແຜນການທີ່ວາງອອກ. ເສດຖະກິດມະຫາພາກເປັນປົກກະຕິ, ວັດທະນະທຳ ສັງຄົມ ມີຄວາມກ້າວຫນ້າ, ຮັບປະກັນຊີວິດສັງຄົມ, ສະຫວັດດີການສັງຄົມ ແລະ ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ, ການປະຕິຮູບລະບຽບການບໍລິຫານ, ປັບປຸງສະພາບແວດລ້ອມແຫ່ງການລົງທຶນ ດຳເນີນທຸລະກິດ, ຍົກສູງຄຸນນະພາບການເຕີບໂຕ, ສະມັດຕະພາບແຮງງານ ແລະ ກຳລັງແກ້ງແຍ້ງມີບາດກ້າວໃຫມ່. ບັນດາໝາກຜົນດັ່ງກ່າວໄດ້ປະກອບສ່ວນສຳຄັນເຂົ້າໃນບັນດາຜົນງານລວມຂອງທັງປີ 2015 ແລະ ໄລຍະ 2011- 2015, ປັບປຸງ ແລະ ເຮັດໃຫ້ປະຊາຊົນເພີ່ມຄວາມໄວ້ເນື້ອເຊື່ອໃຈ, ສ້າງບັນຍາກາດເບິກບານມ່ວນຊື່ນເພື່ອກະກຽມ ແລະ ປະຕິບັດຜົນສຳເລັດກອງປະຊຸມໃຫຍ່ອົງຄະນະພັກທຸກຂັ້ນ, ກ້າວໄປເຖິງກອງປະຊຸມໃຫຍ່ທົ່ວປະເທດຄັ້ງທີ 12 ຂອງພັກ. ເພື່ອສາມາດປະຕິບັດຈຸດໝາຍ, ຫນ້າທີ່ຂອງທັງປີ 2015 ຢ່າງມີໄຊ ຄືດັ່ງການຄາດຄະເນ, ທ່ານເລຂາທິການໃຫຍ່ ຫງວຽນຟູຈ້ອງຊີ້ແຈ້ງວ່າ:

“ ຕ້ອງເອົາໃຈໃສ່ເຖິງການຄາດຄະເນ, ຕີລາຄາຢ່າງພາວະວິໄສ, ຮອບດ້ານບັນດາການຜັນແປທາງດ້ານເສດຖະກິດ ສັງຄົມຂອງປະເທດຊາດ, ພາກພື້ນ ແລະ ໂລກ, ການກະທົບຈາກການເຂົ້າຮ່ວມສັນຍາ, ການປະຕິບັດບັນດາສົນທິສັນຍາສາກົນ ໃນປີ 2015-2016 ເປັນຕົ້ນແມ່ນສັນຍາສ້າງປະຊາຄົມເສດຖະກິດ ອາຊຽນ ສຳເລັດໃນທ້າຍປີ 2015 ແລະ ບັນດາສັນຍາການຄ້າເສລີໃຫມ່. ໂດຍຮັບຮູ້ຢ່າງຄົບຖ້ວນ, ຖືກຕ້ອງກັບຄວາມສະດວກ, ກາລະໂອກາດ ກໍຄືຄວາມຫຍຸ້ງຍາກ, ສິ່ງທ້າທາຍ ຊື່ງບັນດາສັນຍານີ້ສາມາດສ້າງຂຶ້ນ ເພື່ອກະກຽມບັນດາເງື່ອນໄຂ ແລະ ມີບັນດານະໂຍບາຍ, ມາດຕະການຮັບມືຢ່າງເໝາະສົມ, ນຳມາເຊິ່ງຜົນປະໂຫຍດທີ່ສຸດໃຫ້ແກ່ພາລະກິດສ້າງສາ ແລະ ປົກປັກຮັກສາປະເທດຊາດ. ເນື້ອໃນຈິດໃຈນີ້ ຕ້ອງເຊື່ອມຊືມ ແລະ ຊາບຊືມຢ່າງເລິກເຊິ່ງ ເມື່ອຫວຽດນາມ ພ້ອມກັບ 11 ປະເທດອື່ນ ບັນລຸໄດ້ຂໍ້ຕົກລົງກ່ຽວກັບສັນຍາຄູ່ຮ່ວມມືຂ້າມປາຊີຟີກ TPP ດ້ວຍຄວາມຫວັງຫລາຍຢ່າງ ແຕ່ສິ່ງທ້າທາຍບໍ່ແມ່ນຫນ້ອຍ.”

ທ່ານເລຂາທິການໃຫຍ່ ຫງວຽນຟູຈ້ອງຢືນຢັນ: ດ້ວຍບັນດາໝາກຜົນທີ່ບັນລຸໄດ້ ຫວຽດນາມ ມີພື້ນຖານເພື່ອເຊື່ອໝັ້ນວ່າ ການເຕີບໂຕເສດຖະກິດໃນປີ 2016 ສາມາດບັນລຸສູງກວ່າປີ 2015, ສ້າງທ່ວງທ່າໃຫ້ການພັດທະນາຢ່າງວ່ອງໄວ ແລະ ໝັ້ນຄົງກວ່າໃນຊຸມປີຕໍ່ໄປ. ທ່ານເລຂາທິການໃຫຍ່ ຮຽກຮ້ອງ ຕ້ອງວາງແຜນການພັດທະນາເສດຖະກິດ ສັງຄົມປີ 2016 ໃນແຜນການສັງລວມກ່ຽວກັບການພັດທະນາເສດຖະກິດ ສັງຄົມ ໄລຍະ 5 ປີ 2016-2020 ແລະ ຜັນຂະຫຍາຍປະຕິບັດມະຕິກອງປະຊຸມໃຫຍ່ຄັ້ງທີ 12 ຂອງພັກ.

ວຽກງານບຸກຄະລາກອນໄດ້ຮັບການກະກຽມຢ່າງລອບຄອບຖິ່ຖ້ວນ

ທ່ານເລຂາທິການໃຫຍ່ ຫງວຽນຟູຈ້ອງ ຊີ້ແຈ້ງວ່າ: ຄະນະບໍລິຫານງານສູນກາງພັກ ຕີລາຄາສູງອະນຸກຳມະການບຸກຄະລາກອນ ແລະ ກົມການເມືອງ ໄດ້ກະກຽມບົດລາຍງານກ່ຽວກັບບຸກຄະລາກອນ ຄະນະບໍລິຫານງານສູນກາງພັກຊຸດທີ 12, ບົດລາຍງານກ່ຽວກັບວຽກງານກະກຽມບຸກຄະລາກອນກົມການເມືອງ, ຄະນະເລຂາສູນກາງ ແລະ ບັນດາຕ່ຳແຫນ່ງຫລັກແຫລ່ງ ຈາກກອງປະຊຸມໃຫຍ່ຄັ້ງທີ 6 ມາຮອດປະຈຸບັນ ແລະ ບາງບັນຫາສຳຄັນອື່ນໃນການກະກຽມບຸກຄະລາກອນກົມການເມືອງ, ຄະນະເລຂາສູນກາງ ແລະບັນດາຕຳແຫນ່ງຫລັກແຫລ່ງນັບແຕ່ນີ້ ຮອດກອງປະຊຸມໃຫຍ່ຄັ້ງທີ 12 ຂອງພັກ ຢ່າງລອບຄອບຖິ່ຖ້ວນ, ລະອຽດ. ທ່ານເລຂາທິການໃຫຍ່ ຫງວຽນຟູຈ້ອງ ເນັ້ນຫນັກວ່າ:

“ບົນພື້ນຖານທິດທາງ ແລະ ຂັ້ນຕອນວຽກງານບຸກຄະລາກອນ, ໝາກຜົນສະເຫນີບຸກຄະລາກອນຕ້ອງຜ່ານ 2 ຄັ້ງ, ສູນກາງ ໄດ້ປຶກສາຫາລືຢ່າງມີປະຊາທິປະໄຕ, ພິຈາລະນາຢ່າງພາວະວິໄສ, ທ່ຽງທຳ, ຮອບດ້ານ ກ່ຽວກັບການຄາດຄະເນບັນຊີລາຍຊື່ບຸກຄະລາກອນໃຫມ່ ເປັນຄັ້ງທຳອິດໄດ້ຮັບການສະເຫນີເຂົ້າຮ່ວມຄະນະບໍລິຫານງານສູນກາງພັກຊຸດທີ 12 ແລະ ບັນດາວິທີການເລືອກເຟັ້ນ, ພ້ອມທັງໄຈ້ແຍກ, ຕີລາຄາ, ປະກອບຫລາຍຄຳເຫັນຢ່າງເລິກເຊິ່ງ, ສຸດຈິດສຸດໃຈ, ເພີ່ມເຕີມເຂົ້າໃນບັນດາບົດລາຍງານ ແລະ ວິທີການບຸກຄະລາກອນ. ຄະນະບໍລິຫານງານສູນກາງພັກ ເປັນເອກະພາບກັບບົດລາຍງານຂອງກົມການເມືອງ ແລະ ປຶກສາຫາລື, ສະເຫນີຫລາຍຄຳເຫັນກ່ຽວກັບມາດຖານພິຈາລະນາກໍລະນີພິເສດ ສຳລັບກຳມະການສູນກາງ ແລະ ກຳມະການກົມການເມືອງ, ຄະນະເລຂາສູນກາງພັກຊຸດທີ 11 ໄດ້ຮັບການເລືອກຕັ້ງຄືນໃຫມ່ໃນຊຸດທີ 12, ມາດຕະຖານລະອຽດຂອງແຕ່ລະຕຳແຫນ່ງ, ກ່ຽວກັບວິທີການເລືອກເຟັ້ນບັນດາຕຳແຫນ່ງການນຳຫລັກແຫລ່ງ.”

ທ່ານເລຂາທິການໃຫຍ່ ຫງວຽນຟູຈ້ອງ ກໍຊີ້ແຈ້ງ: ຄວາມຈຳເປັນຕ້ອງເສີມຂະຫຍາຍບົດບາດຂອງອົງຄະນະພັກທຸກຂັ້ນໃນການເລືອກຕັ້ງສະມາຊິກສະພາແຫ່ງຊາດ ຊຸດທີ 14 ແລະ ສະມາຊິກສະພາປະຊາຊົນທຸກຂັ້ນ ອາຍຸການ 2016-2021. ທ່ານເລຂາທິການໃຫຍ່ ຫງວຽນຟູຈ້ອງ ຍັງຖືວ່າ ການຈັດຕັ້ງປະຕິບັດມະຕິຂອງກອງປະຊຸມສູນກາງພັກຄັ້ງນີ້ ຈະປະກອບສ່ວນຢ່າງຕັ້ງຫນ້າເຂົ້າໃນການປະຕິບັດຫນ້າທີ່ພັດທະນາເສດຖະກິດສັງຄົມປີ 2015 ຢ່າງມີໄຊ, ສ້າງ ແລະ ປະຕິບັດແຜນການພັດທະນາເສດຖະກິດສັງຄົມປີ 2016, ຮັບປະກັນຜົນສຳເລັດກອງປະຊຸມໃຫຍ່ຄັ້ງທີ 12 ຂອງພັກ ແລະ ການເລືອກຕັ້ງ ສະພາແຫ່ງຊາດຊຸດທີ 14, ເລືອກຕັ້ງ ສະພາປະຊາຊົນທຸກຂັ້ນອາຍຸການ 2016-2021.