ປະທານາທິບໍດີສະຫະລັດອາເມລິກາ Barack Obama ໄດ້ມາຮອດຮ່າໂນ້ຍ ເລີ່ມຕົ້ນການຢ້ຽມຢາມຫວຽດນາມຢ່າງເປັນທາງການແຕ່ວັນທີ 23-25/5/2016 . ນີ້ແມ່ນການຢ້ຽມຢາມຫວຽດນາມເປັນຄັ້ງທຳອິດຂອງປະທານາທິບໍດີອາເມລິກາ Barack Obama ແລະ ນີ້ແມ່ນການຢ້ຽມຢາມຫວຽດນາມຂອງປະທານາທິບໍດີຄົນທີ່ 3 ຂອງອາເມລິການັບຕັ້ງແຕ່ 2 ປະເທດສ້າງການພົວພັນເປັນປົກກະຕິເມືອ່ປີ 1995. ນີ້ແມ່ນການເຄື່ອນໄຫວພົວພັນຕ່າງປະເທດທີ່ພົ້ນເດັ່ນຂອງຫວຽດນາມໃນປີນີ້.
ປະທານາທິບໍດີສະຫະລັດອາເມລິກາ Barak Obama ໄດ້ມາຮອດຮ່າໂນ້ຍ ເລີ່ມຕົ້ນການຢ້ຽມຢາມຫວຽດນາມຢ່າງເປັນທາງການ |
ວັນທີ 12/7/1995, ປະທານາທິບໍດີອາເມລິກາ Bill Clinton ແລະ ທ່ານນາຍົກລັກຖະມົນຕີຫວຽດນາມ ວໍ້ວັນກຽດ ໄດ້ຖະແຫຼງປະກາດ ສ້າງການພົວພັນທາງການທູດລະຫວ່າງ 2 ປະເທດເປັນປົກກະຕິ, ປະອະດີດ ແລະ ໄຂສັງກາດໃໝ່ໃນປະຫວັດສາດຫວຽດນາມ-ອາເມລິກາ. ນັບແຕ່ນັ້ນມາ, ການພົວພັນ ຫວຽດນາມ-ອາເມລິກາໄດ້ມີບັນດາບາດກ້າວອັນຄືບໜ້າທີ່ສຳຄັນໃນຂົງເຂດຕ່າງໆນັບທັງ 2 ຝ່າຍ ແລະ ຫຼາຍຝ່າຍ, ທັງລວງກ້ວາງ ແລະ ລວງເລິກ, ນັບມື້ນັບແທດຈິງກວ່າ.
ບັນດາບາດກ້າວທີ່ຍາວໄກພາຍຫຼັງກວ່າ 20 ປີແຫ່ງການສ້າງການພົວພັນເປັນປົກກະຕິ
ພາຍຫຼັງກວ່າ 20 ປີແຫ່ງການສ້າງການພົວພັນເປັນປົກກະຕິ, ການພົວພັນຫວຽດນາມ-ອາເມລິການັບມື້ນັບເຂົ້າສູ່ແທດຈິງ, ມີປະສິດທິຜົນ ແລະ ເປັນປົກກະຕິ, ບັນລຸໄດ້ບັນດາຄວາມຄືບໜ້າໃໝ່, ແທດຈິງໃນຫຼາຍຂົງເຂດ 2 ຝ່າຍ ແລະ ຫຼາຍຝ່າຍ. ທ່ານເອກອັກຄະລັດຖະທູດຫວຽດນາມປະຈຳອາເມລິກາ ຝ້າມກວາງວິງ ຢືນຢັນວ່າ :
“ ການພົວພັນລະຫວ່າງ 2 ປະເທດໄດ້ມີບັນດາບາດກ້າວພັດທະນາຢ່າງກະໂດດຂັ້ນ. ທີ 1, ການພົວພັນດ້ານການຄ້າ 2 ຝ່າຍໄດ້ບັນລຸມູນຄ່າ 45 ຕື້ USD, ຫຼາຍທົບ 90 ເທົ່າເມື່ອທຽບໃສ່ກ່ອນນີ້ 20 ປີ. ທີ 2, ໃນອາຍຸການຂອງປະທານາທິບໍດີອາເມລິກາ Barack Obama, 2 ປະເທດໄດ້ສ້າງຂອບເຂດການພົວພັນຍາວນານເປັນຮູບປະທຳ, ຊຶ່ງແມ່ນຂອບເຂດຄູ່ຮ່ວມມືຮອບດ້ານທີ່ໄດ້ຮັບການລົງນາມເມື່ອປີ 2013 ແລະ ພິເສດແມ່ນການຢ້ຽມຢາມອາເມລິກາຄັ້ງປະຫວັດສາດຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງເມື່ອປີ 2015 ຊຶ່ງໄດ້ຮັບຮອງເອົາຖະແຫຼງການວິໄສທັດກ່ຽວກັບການພົວພັນລະຫວ່າງ 2 ປະເທດ. ນີ້ແມ່ນພື້ນຖານ ແລະ ແມ່ນໂອກາດເພື່ອຊຸກຍູ້ການພົວພັນລະຫວ່າງ 2 ປະເທດໃຫ້ແຂງແຮງຍິ່ງຂຶ້ນ ”
ຫວຽດນາມ ແລະ ອາເມລິກາໄດ້ມີບັນດາບາດກ້າວລະອຽດໃນການຮ່ວມມືແກ້ໄຂບັນດາບັນຫາໂດຍສົງຄາມປະໄວ້, ກໍຄືບັນດາບັນຫາກ່ຽວຂ້ອງເຖິງສັນຕິພາບ, ສະຖຽນລະພາບ, ການຮ່ວມມື, ພັດທະນາໃນພາກພື້ນ ແລະ ໃນໂລກ. ເດືອນ 6/2016 ກະຊວງປ້ອງກັນປະເທດຂອງ 2 ປະເທດໄດ້ເຊັນຖະແຫຼງການວິໄສທັດກ່ຽວກັບການພົວພັນດ້ານປ້ອງກັນຊາດລະຫວ່າງ 2 ປະເທດຫວຽດນາມ-ອາເມລິກາດ້ວຍ 5 ເນື້ອໃນຮ່ວມມືຊຶ່ງລວມມີ: ເພີ່ມທະວີການທາບທາມດ້ານນະໂຍບາຍ, ແກ້ໄຂຜົນຮ້າຍຢ້ອນຫຼັງຈາກສົງຄາມ, ຮັກສາສັນຕິພາບຂອງ ສ.ປ.ຊ; ແກ້ໄຂຜົນຮ້າຍຈາກໄພທຳມະຊາດ, ຊອກຫາກູ້ໄພກູ້ຊີບ, ຊ່ວຍບັນເທົາທຸກ ແລະ ປ້ອງກັນຄວາມໝັ້ນຄົງຢູ່ທະເລບົນພື້ນຖານເຄົາລົບກົດໝາຍສາກົນ ແລະ ກົດໝາຍຂອງແຕ່ລະຝ່າຍ. ການຮ່ວມມືທາງດ້ານການສຶກສາ ແລະ ກໍ່ສ້າງແມ່ນປັດໄຈສຳຄັນໃນການພົວພັນລະຫວ່າງ 2 ປະເທດ.
ຫວຽດນາມ-ອາເມລິກາກໍໄດ້ເພີ່ມທະວີການສົມທົບກັນໃນຂອບເຂດບັນດາອົງການຈັດຕັ້ງ, ເວທີປາໄສຫຼາຍຝ່າຍຊຶ່ງທັງ 2 ປະເທດເປັນສະມາຊິກຄື: ສະຫະປະຊາຊາດ, ເວທີປາໄສພາກພື້ນອາຊຽນ, ກອງປະຊຸມຂັ້ນສູງອາຊີຕາເວັນອອກ, ເວທີປາໄສເສດຖະກິດອາຊີ-ປາຊີຟິກ, ກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດອາຊຽນ ແລະ ບັນດາຄູ່ຮ່ວມມື, ໃນນັ້ນມີບັນຫາຄວາມໝັ້ນຄົງດ້ານການເດີນເຮຶອ, ທະເລຕາເວັນອອກ, ປັຍປຸງຄວາມສາມັກຄີ ແລະ ເຊີດຊູບົດບາດໃຈກາງຂອງອາຊຽນ, ຜັນຂະຫຍາຍຄູ່ຮ່ວມມືຍຸດທະສາດອາເມລິກາ-ອາຊຽນ… 2 ຝ່າຍສືບຕໍ່ດຳເນີນການສົນທະນາຫາລືປະຈຳປີກ່ຽວກັບສິດທິມະນຸດ ດ້ວຍຈິດໃຈກົງໄປກົງມາ, ສ້າງສັນ, ບໍ່ປະໃຫ້ບັນຫາທີ່ຄົງຄ້າງ, ແຕກຕ່າງກັນເປັນສິ່ງກີດຂວາງການພັດທະນາການພົວພັນລະຫວ່າງ 2 ປະເທດ.
ການຢ້ຽມຢາມສ້າງບາດກ້າວຫັນປ່ຽນໃໝ່ໃຫ້ແກ່ການພົວພັນ ຫວຽດນາມ-ອາເມລິກາໃນໄລຍະທີ່ຈະມາເຖິງ
ໜຶ່ງໃນບັນດາຫົວເລື່ອງທີ່ໄດ້ຮັບຄວາມສົນໃຈໃນການຢ້ຽມຢາມຂອງ ປະທານາທິບໍດີອາເມລິກາ Barack Obama ຄັ້ງນີ້, ແມ່ນບັນດາການຜັນແປທີ່ເຄັ່ງຕຶງໃນມໍ່ໆມານີ້ຢູ່ທະເລຕາເວັນອອກ, ປະທານາທິບໍດີອາເມລິກາ Barack Obama ນັບແຕ່ກ່ອນເປັນຕົ້ນມາ ໄດ້ສະແດງທັດສະນະຢ່າງຈະແຈ້ງໃນບັນຫາອະທິປະໄຕຜືນແຜ່ນດິນ ແລະ ສິດເສລີໃນການເດີນເຮືອບົນເສັ້ນທາງທະເລທີ່ສຳຄັນອັນດັບໜຶ່ງໃນໂລກນີ້. ເພາະສະນັ້ນ, ນີ້ຈະແມ່ນເນື້ອໃນທີ່ນຳມາປຶກສາຫາລືລະຫວ່າງ ປະທານາທິບໍດີອາເມລິກາ Barack Obama ແລະ ບັນດາການນຳຫວຽດນາມ. ທ່ານເອກອັກຄະລັດຖະທູດຫວຽດນາມປະຈຳອາເມລິກາ ຝ້າມກວາງວິງຖືວ່າ :
“ ພວກຂ້າພະເຈົ້າຖືວ່າ ການຮັບປະກັນສັນຕິພາບ, ສະຖຽນລະພາບ, ຄວາມໝັ້ນຄົງ-ປອດໄພໃນການເດີນທະເລ, ຮັບປະກັນບໍ່ໃຫ້ຝ່າຍໃດເຮັດໃຫ້ສະພາບການສັບສົນຂຶ້ນ, ຝືນກັບກົດໝາຍສາກົນ ແລະ ສົນທິສັນຍາກ່ຽວກັບກົດໝາຍວ່າດ້ວຍທະເລ ຊຶ່ງແມ່ນບັນດາເນື້ອໃນຊຶ່ງບໍ່ພຽງແຕ່ຫວຽດນາມເທົ່ານັ້ນ, ຫາກຍັງແມ່ນຄວາມສົນໃຈຮ່ວມຂອງທັງພາກພື້ນ,ໃນນັ້ນອາຊຽນກໍມີສຽງເວົ້າໃນບັນຫານີ້”
ມີຫົວເລື່ອງທີ່ສຳຄັນອີກອັນໜຶ່ງທີ່ໄດ້ຮັບການເຕື້ອງເຖິງໃນການຢ້ຽມຢາມຄັ້ງນີ້ ນັ້ນແມ່ນອະນາຄົດຂອງສັນຍາຄູ່ຮ່ວມມືຂ້າມປາຊີຟິກ TPP ຊຶ່ງທັງ ຫວຽດນາມ ແລະ ອາເມລິກາເປັນສະມາຊິກເຂົ້າຮ່ວມ. ສັນຍານີ້ພວມລໍ່ຖ້າສະພາແຫ່ງຊາດອາເມລິກາຮັບຮອງເອົາ. ຕອບສຳພາດນັກຂ່າວ VOV ກ່ອນການຢ້ຽມຢາມຄັ້ງນີ້, ທ່ານ John Mc-Cain ສະມາຊິກສະພາສູງອາເມລິກາ ຖືວ່າ :
“ ຂ້າພະເຈົ້າມີຄວາມເປັນຫ່ວງວ່າ ຍາກທີ່ ສະພາແຫ່ງຊາດອາເມລິກາຮັບຮອງເອົາໃນປີນີ້. ແຕ່ຂ້າພະເຈົ້າເຊື່ອໝັ້ນວ່າ ປະທານາທິບໍດີຜູ້ສືບທອດຂອງອາເມລິກາ, ເຖິງວ່າຈະແມ່ນຜູ້ໃດ, ສັງກັດພັກໃດກໍຕາມ, ກໍລ້ວນແຕ່ຖືເປັນສຳຄັນວິວັດທະນາການ ສ້າງການພົວພັນກັບຫວຽດນາມເປັນປົກກະຕິ ແລະ ຖືວ່ານີ້ແມ່ນບາດກ້າວເດີນບໍ່ພຽງແຕ່ສຳລັບການພົວພັນ 2 ຝ່າຍເທົ່ານັ້ນຫາກຍັງສຳລັບການຮຳບາດແຜສົງຄາມອີກດ້ວຍ ”
ໃນການຢ້ຽມຢາມຫວຽດນາມຄັ້ງນີ້, ປະທານາທິບໍດີອາເມລິກາ Barack Obama ຖະແຫຼງປະກາດຍົກເລີກຄຳສັ່ງຂວ້ຳບາດດ້ານອາວຸດໃຫ້ແກ່ຫວຽດນາມ. ເລື່ອງອາເມລິກາຍົກເລີກຄຳສັ່ງຂວ້ຳບາດດ້ານອາວຸດນັ້ນ ກໍເປັນຫຼັກຖານຢັ້ງຢືນສິ່ງໜຶ່ງວ່າ ພາຍຫຼັງ 20 ປີ, ສິ່ງກີດຂວາງສຸດທ້າຍກໍໄດ້ຮັບການຍົກເລີກເພື່ອໃຫ້ 2 ປະເທດສ້າງການພົວພັນເປັນປົກກະຕິ.
ການຢ້ຽມຢາມຫວຽດນາມຢ່າງເປັນທາງການຂອງ ປະທານາທິບໍດີອາເມລິກາ Barack Obama ຄັ້ງນີ້ກໍເປັນການປະກອບສ່ວນປັບປຸງເພີີ່ມທະວີການພົວພັນຄູ່ຮ່ວມມືຮອບດ້ານຫວຽດນາມ-ອາເມລິກາ. ດ້ວຍເຈດຕະນາດີຂອງທັງ 2 ຝ່າຍ, ດ້ວຍຈິດໃຈ “ ປະອະດີດໄວ້, ມຸ່ງໄປສູ່ອະນາຄົດ” ແລະ ບັນດາໝາກຜົນແຫ່ງການຮ່ວມມືທີ່ປະທັບໃຈພາຍຫຼັງ 20 ປີແຫ່ງການ ສ້າງການພົວພັນເປັນປົກກະຕິ, ການພົວພັນຫວຽດນາມ-ອາເມລິກາຈະມີບັນດາບາດກ້າວຫັນປ່ຽນໃໝ່ພາຍຫຼັງການຢ້ຽມຢາມຫວຽດນາມຄັ້ງນີ້ຂອງປະທານາທິບໍດີອາເມລິກາ Barack Obama.