(vovworld) - ວັນທີ 15/10 ແມ່ນວັນສະເຫລີມສະຫລອງ 82 ປີແຫ່ງວັນມູນເຊື້ອວຽກງານຂົນຂວາຍປະຊາຊົນຂອງພັກກອມມູນິດ ຫວຽດນາມ (15/10/1930 - 15/10/2012). 82 ປີຜ່ານມາສາມາດຖອດຖອນໄດ້ບົດຮຽນຫລາຍຢ່າງຈາກວຽກງານ ຂົນຂວາຍປະຊາຊົນ. ບໍ່ວ່າໃນຈຸດເວລາໃດ, ຂົງເຂດໃດ, ຍາມໃດວຽກງານ ຂົນຂວາຍປະຊາຊົນກໍສວມບົດບາດສຳຄັນ,ຊ້ຳບໍ່ໜຳແມ່ນການຕັດສິນ ໄຊຊະນະ ແລະ ປະລາໄຊຂອງການປະຕິວັດ. ທ່ານປະທານໂຮ່ຈິມິນ ຊີ້ແຈງວ່າ: ວຽກງານຂົນຂວາຍປະຊາຊົນອ່ອນແມ່ນເຮັດວຽກຫຍັງກໍອ່ອນ. ວຽກງານຂົນຂວາຍປະຊາຊົນດີເຮັດວຽກໃດກໍສຳເລັດ.
ໃນຊຸມປີຜ່ານມາ, ມີຈຸດເດັ່ນຫລາຍຢ່າງໃນວຽກງານຂົນຂວາຍມະຫາຊົນ. ຢູ່ແຕ່ລະທ້ອງຖິ່ນມີວິທີປະຕິບັດແຕກຕ່າງກັນ, ແຕ່ເພື່ອຈຸດໝາຍລວມ, ເພື່ອສິດຜົນປະໂຫຍດຂອງປະຊາຊົນ, ເພື່ອຄວາມເຫັນດີເຫັນພ້ອມສູງໃນສັງຄົມ. ຢູ່ນະຄອນໂຮ່ຈິມິນ ພະນັກງານເຮັດວຽກງານຂົນຂວາຍປະຊາຊົນຕັ້ງຫມັ້ນເກ້ຍກ່ອມບັນດາເຈົ້າຂອງເຮືອນພັກບໍ່ເພີ່ມຄ່າໄຟຟ້າ, ຄ່ານ້ຳປະປາ, ຊ່ວຍເຫລືອຄົນງານ, ນັກສຶກສາທຸກຍາກກວ່າ 1.200.000 ຄົນ; ຢູ່ ແຂວງ ບ່າເຣ້ຍ ຫວູງເຕົາ ຂົນຂວາຍປະຊາຊົນເກືອບ 10.000 ຄອບຄົວໃນເປົ້າໝາຍຖືກຖອນທີ່ດິນສຳເລັດຜົນ; ຢູ່ນະຄອນ ດາຫນັງ ຂົນຂວາຍປະຊາຊົນເກືອບ 90.000 ຄອບຄົວຍົກຍ້າຍໄປຢູ່ບ່ອນອື່ນສຳເລັດຜົນ. ບໍ່ພຽງແຕ່ເຮັດວຽກງານ ຂົນຂວາຍປະຊາຊົນ ມອບດິນ, ບຸກເບີກຫນ້າພຽງ, ຖອນທີ່ດິນເທົ່ານັ້ນ ຫາກຍັງມີທ້ອງຖິ່ນຫລາຍແຫ່ງມີວິທີປະຕິບັດທີ່ດີເດັ່ນ, ມີຫົວຄິດປະດິດສ້າງ, ເຮັດໃຫ້ປະຊາຊົນມີຄວາມເຊື່ອໝັ້ນຕໍ່ແຜນນະໂຍບາຍຂອງພັກ, ນະໂຍບາຍກົດໝາຍຂອງລັດ, ເຂົ້າຮ່ວມຢ່າງຕັ້ງຫນ້າເຂົ້າໃນຂະບວນການຂອງທ້ອງຖິ່ນ.
ປະທານໂຮ່ຈິມິນ ຢ້ຽມຢາມສະຫະກອນ ຮຸ່ງເຊີນ, ເມືອງດ້າຍຕື, ແຂວງທາຍງວຽນ ໃນລະດຸເກັບກ່ຽວ (ປີ 1954)
ພາບເອກະສານ: ຂ່າວສານຫວຽດນາມ
|
ເຖິງຢ່າງໃດກໍຕາມ, ຕາມບົດລາຍງານຂອງອົງການກວດກາລັດຖະບານ ຍັງມີເກືອບ 70% ໃບຮ້ອງຟ້ອງ, ຮ້ອງທຸກຂອງປະຊາຊົນທີ່ກ່ຽວຂ້ອງເຖິງທີ່ດິນບໍ່ທັນໄດ້ຮັບການແກ້ໄຂຢູ່ຮາກຖານ; ຍັງມີປະຊາຊົນນັບລ້ານເທື່ອຄົນໄປເຖິງສຳນັກງານ ຂອງພັກ, ລັດ ເພື່ອຮ້ອງຟ້ອງ, ຮ້ອງທຸກ.
ເປັນຫຍັງມີລະບົບການເມືອງດຽວ ພາຍໃຕ້ການດັດປັບຂອງລະບົບເອກະສານນິຕິກຳ ແຕ່ປະສິດທິຜົນແຫ່ງການປະຕິບັດຢູ່ແຕ່ລະທ້ອງຖິ່ນແມ່ນແຕກຕ່າງກັນ? ຄວາມຈິງສະແດງໃຫ້ເຫັນວ່າ, ນອກຈາກຂໍ້ຂາດຕົກບົກຜ່ອງກ່ຽວກັບກົນໄກ, ນະໂຍບາຍທີ່ດິນພ້ອມກັບຂໍກຳນົດອື່ນ, ບັນຫາຕົ້ນຕໍແມ່ນມະນຸດ.
ສຳລັບຜູ້ໄດ້ຮັບການຂົນຂວາຍ, ຖ້າຫາກຊັບສົມບັດຖືກຕ້ອງຕາມກົດໝາຍແຕ່ບັງເອີນຖືກເສຍຫາຍ ຫລື ເຫຼືອພຽງສ່ວນໃດຫນຶ່ງ, ແນ່ນອນວ່າ ຜູ້ໃດກໍເສຍດາຍ. ແຕ່ຖ້າຫາກໄດ້ຮັບການອະທິບາຍຢ່າງເຖິງຖອງ, ເໝາະສົມ; ຖ້າຫາກເຫັນວ່າ ສິດ ແລະ ຜົນປະໂຫຍດອັນຊອບທຳຂອງຕົນໄດ້ຮັບການປົກປ້ອງ, ໄດ້ຮັບຄວາມເຄົາລົບ ເຂົາເຈົ້າພ້ອມແລ້ວທີ່ຈະພ້ອມກັບອຳນາດການປົກຄອງແບ່ງປັນຜົນປະໂຫຍດ, ແບ່ງປັນຄວາມຮັບຜິດຊອບ. ເມື່ອປະຊາຊົນເຂົ້າໃຈໄດ້ຈະສ້າງຄວາມຕືນຕົວ, ປັບປຸງຄວາມໄວ້ເນື້ອເຊື່ອໃຈຂອງປະຊາຊົນຕໍ່ພັກ, ລັດ ກັບອຳນາດການປົກຄອງ ແລະ ຖັນແຖວພະນັກງານຂັ້ນຮາກຖານ.
ຂົນຂວາຍປະຊາຊົນກໍ່ສ້າງຊົນນະບົດໃຫມ່
ພາບປະກອບ: internet
|
ສຳລັບຜູ້ເຮັດວຽກງານ ຂົນຂວາຍປະຊາຊົນ. ມີຫລາຍສາຍເຫດເຮັດໃຫ້ ການຂົນຂວາຍປະຊາຊົນບໍ່ທັນບັນລຸໄດ້ຕາມຄວາມຕ້ອງການ, ນັ້ນແມ່ນ ຍ້ອນລະດັບຄວາມຮູ້, ກຳລັງຄວາມສາມາດຂອງຖັນແຖວພະນັກງານເຮັດວຽກງານ ຂົນຂວາຍປະຊາຊົນຍັງຈຳກັດ. ຖ້າຫາກຜູ້ເຮັດວຽກງານ ຂົນຂວາຍປະຊາຊົນເຮັດໃຫ້ປະຊາຊົນເຂົ້າໃຈນະໂຍບາຍກົດໝາຍຂອງລັດ, ຖ້າຫາກອຳນາດການປົກຄອງທອ້ງຖິ່ນລະດົມທັງລະບົບການເມືອງລົງມືປະຕິບັດການຂົນຂວາຍປະຊາຊົນຢ່າງຄ່ອງແຄ້ວ, ຕັ້ງໝັ້ນ; ຖ້າຫາກຕັ້ງໃຈຮັບຟັງຄວາມມຸ່ງມາດປາດຖະຫນາຂອງປະຊາຊົນ, ຖ້າຫາກແກ້ໄຂຢ່າງທັນທີ, ມີຄວາມຮັບຜິດຊອບກັບຂໍ້ຂ້ອງໃຈ, ຄຳສະເຫນີຂອງປະຊາຊົນ ແນ່ນອນວ່າບໍ່ມີການກະທຳລະເມີດກົດໝາຍ, ບໍ່ມີສະພາບການປະຊາຊົນຮັກສາຊັບສົມບັດຢ່າງເດັດຂາດ, ອຳນາດການປົກຄອງນຳໃຊ້ສິດອຳນາດເພື່ອແກ້ໄຂ” ຄືບາງກໍລະນີດເກີດຂຶ້ນໃນໄລຍະມໍ່ໆມານີ້.
ບໍ່ວ່າໃນຈຸດເວລາໃດ ຍາມໃດການຂົນຂວາຍປະຊາຊົນ ກໍສວມບົດບາດສຳຄັນ, ບາງເທື່ອມີຄວາມໝາຍຕັດສິນໃນການປະຕິບັດແຜນນະໂຍບາຍຂອງພັກ, ນະໂຍບາຍກົດໝາຍຂອງລັດ. ບໍ່ພຽງແຕ່ແມ່ນໂຄສະນາ, ຂົນຂວາຍເທົ່ານັ້ນ ວຽກງານ ຂົນຂວາຍປະຊາຊົນຍັງແນໃສ່ເສີມຂະຫຍາຍບັນດາຂໍ້ລິເລີ່ມ, ຫົວຄິດປະດິດສ້າງຈາກມະຫາຊົນອີກດ້ວຍ. ເພາະສະນັ້ນ ຜູ້ເຮັດວຽກງານ ຂົນຂວາຍປະຊາຊົນ ຕ້ອງແມ່ນຜູ້ເຕົ້າໂຮມຄຸນນະທາດຫລາຍຢ່າງ ຫາກບໍ່ແມ່ນຜູ້ໃດກໍມີ.
ໃກ້ຊິດຕິດແທດກັບຮາກຖານ, ຮັບຟັງຄຳເຫັນ, ຄວາມມຸ່ງມາດປາດຖະຫນາຂອງປະຊາຊົນ, ຍົກອອກຂໍ້ສະເຫນີຢ່າງເໝາະສົມ, ສົມເຫດສົມຜົນ, ຜູ້ເຮັດວຽກງານ ຂົນຂວາຍປະຊາຊົນບໍ່ພຽງແຕ່ປະກອບສ່ວນແກ້ໄຂສະພາບຮ້ອງຟ້ອງ, ຂ້າມຂັ້ນຄືໃນໄລຍະຜ່ານມາເທົ່ານັ້ນ ຫາກຍັງປະກອບສ່ວນສຳຄັນ, ສ້າງຄວາມເຫັນດີເຫັນພ້ອມໃນສັງຄົມ, ປະກອບສ່ວນເຂົ້າໃນພາລະກິດພັດທະນາລວມຂອງປະເທດຊາດ.