(vovworld)- ທີ່ກອງປະຊຸມສຳມະນາປະຈຳປີກ່ຽວກັບຄວາມໝັ້ນຄົງຢູ່ທະເລຕາເວັນອອກ ພາຍໃຕ້ຫົວຂໍ້ວ່າ: “ທະເລຕາເວັນອອກ ແລະ ອາຊີ- ປາຊີຟີກ ໃນໄລຍະຂ້າມຜ່ານ, ຊອກຫາບັນດາມາດຕະການເພື່ອແກ້ໄຂການພິພາດ” ຊຶ່ງດຳເນີນໄປຢູ່ ນະຄອນຫລວງ ວໍຊິງຕັນ ສະຫະລັດອາເມລິກາໃນທ້າຍອາທິດຜ່ານມາ, ຄຽງຄູ່ກັບເລື່ອງຢັ້ງຢືນ ຈີນເປີດການປະມູນສາກົນເພື່ອສຳຫລວດ, ຂຸດຄົ້ນນ້ຳມັນອາຍແກສຢູ່ ບໍ່ນ້ຳມັນ 9 ແຫ່ງ ຊຶ່ງນອນໃນເຂດເສດຖະກິດພິເສດຂອງ ຫວຽດນາມ ແມ່ນບໍ່ມີຂໍ້ອ້າງອີງ, ບັນດານັກຮຽນຮູ້ສາກົນ ຍັງຖືວ່າ: ຈີນບໍ່ມີພື້ນຖານເພື່ອຖະແຫລງອະທິປະໄຕຂອງປະເທດນີ້ ບົນ “ເສັ້ນລີ້ນງົວ” ຢູ່ເຂດທະເລຕາເວັນອອກ. ບັນດານັກຮຽນຮູ້ ແລະ ນັກການເມືອງສາກົນກໍເນັ້ນຫນັກວ່າ: ບັນດາປະເທດຢູ່ໃນໂລກບໍ່ສາມາດຮັບຮູ້ຄຳຖະແຫລງທີ່ໄຮ້ເຫດຜົນຂອງຈີນ.
ພາບປະກອບ:internet
|
ຈຸດລວມໃນການສະຫລຸບຂອງນັກຮຽນຮູ້ ແລະ ນັກການເມືອງສາກົນ ຢູ່ກອງປະຊຸມສຳມະນາກ່ຽວກັບຄວາມໝັ້ນຄົງຢູ່ທະເລຕາເວັນອອກຄັ້ງນີ້, ນັ້ນແມ່ນບັນດາຄຳຖະແຫລງ ແລະ ນະໂຍບາຍທີ່ ຈີນພວມປະຕິບັດຢູ່ເຂດທະເລຕາເວັນອອກ ແມ່ນບັນດາວຽກງານບໍ່ມີຂໍ້ອ້າງອີງຢ່າງຈະແຈ້ງ ແລະ ບໍ່ປະຕິບັດຕາມກົດໝາຍສາກົນ. ສາສະດາຈານ Carlyle ຢູ່ວິທະຍາຄານປ້ອງກັນຊາດ ອົດສະຕາລີ ໄດ້ຊີ້ໃຫ້ເຫັນວ່າ: ກ່ຽວກັບດ້ານກົດໝາຍ, ເສັ້ນລີ້ນງົວ ໃນແຜນທີ່ໂດຍ ຈີນ ແຕ້ມເມື່ອປີ 1948, ກ່ອນທີ່ມີສົນທິສັນຍາກົດໝາຍທະເລຂອງສະຫະປະຊາຊາດ, ສະນັ້ນ ແຜນທີ່ນີ້ບໍ່ກ່ຽວຂ້ອງເຖິງສົນທິສັນຍາກົດໝາຍທະເລ. ແລະ ບັນດາຜູ້ຊ່ຽວຊານດ້ານກົດໝາຍສາກົນກໍຮັບຮູ້ວ່າ ວິທີແຕ້ມ ເສັ້ນລີ້ນງົວ ນີ້ບໍ່ສອດຄ່ອງກັບວິທີແຕ້ມແຜນທີ່ສາກົນຕາມມາດຖານ. ເປັນອັນວ່າ ແຕ່ປີ 2009, ເລື່ອງຈີນຖະແຫລງອະທິປະໄຕໃນ ເສັ້ນລີ້ນງົວ ຢູ່ທະເລຕາເວັນອອກ ຕາມແຜນທີ່ໂດຍປະເທດນີ້ແຕ້ມເອງ ບໍ່ສົມເຫດສົມຜົນ. ທ່ານ Marvin Ott ສາສະດາຈານ ມະຫາວິທະຍາໄລ John Hopkins ຖືວ່າ: ຈີນພວມທຸ້ມເທກຳລັງເຫື່ອແຮງ, ຊ້ຳບໍ່ໜຳນັບທັງອິດທິພົນຊື່ສຽງຂອງຕົນເພື່ອອະທິບາຍຄຳຖະແຫລງອະທິປະໄຕບໍ່ມີລັກສະນະຖືກຕ້ອງຕາມກົດໝາຍ. ຕາມທ່ານ Marvin Ott ແລ້ວ, ຈີນ ຍົກອອກຖະແຫລງການດັ່ງກ່າວ ໄດ້ເຮັດໃຫ້ບັນດາປະເທດບໍ່ມີການເລືອກເຟັ້ນແຕ່ຢ່າງໃດ, ພຽງແຕ່ສະແດງຄວາມບໍ່ເຫັນດີເຫັນພ້ອມ ແລະ ສິ່ງດັ່ງກ່າວແມ່ນສ້າງໄພອັນຕະລາຍ. ສາສະດາຈານ Mavin Ott ເນັ້ນຫນັກວ່າ:
“ບັນດາທະນາຍຄວາມ, ບັນດານັກຮຽນຮູ້ທີ່ມາຈາກປະເທດຕ່າງໆ, ບໍ່ວ່າຜູ້ໃດກໍຮູ້ຈັກເຖິງຖະແຫລງການດັ່ງກ່າວ ກໍລ້ວນແຕ່ມີຄວາມເຊື່ອໝັ້ນວ່າ ເສັ້ນລີ້ນງົວ 9 ຕອນ ຂອງຈີນ ບໍ່ຖືກຕ້ອງກັບກົດໝາຍສາກົນ, ສິ່ງດັ່ງກ່າວພຽງແຕ່ກໍ່ຄວາມວຸ້ນວາຍ. ດ້ວຍຄຳຖະແຫລງອະທິປະໄຕສຳລັບເຂດທະເລຕາເວັນອອກຜ່ານ ເສັ້ນລີ້ນງົວ , ໝາຍຄວາມວ່າ ເຂດນີ້ແມ່ນຂຶ້ນກັບຈີນ ບໍ່ມີປະເທດໃຫຍ່ໃດຢູ່ໃນໂລກສາມາດສະຫນັບສະຫນູນຕໍ່ຄຳຮຽກຮ້ອງດັ່ງກ່າວ. ອາເມລິກາ ບໍ່ສາມາດສະຫນັບສະຫນູນ, ອິນເດຍ ກໍເຊັນດຽວກັນບໍ່ສະຫນັບສະຫນູນ, ປະຊາຄົມເອີລົບ, ອົດສະຕາລີ, ຍີ່ປຸ່ນ ກໍ່ບໍ່ສະຫນັບສະຫນູນຕໍ່ຄຳຖະແຫລງດັ່ງກ່າວຂອງຈີນ.”
ທ່ານ Joe Lieberman ສະມາຊິກສະພາສູງອາເມລິກາ ກ່າວຄຳເຫັນທີ່
ກອງປະຊຸມສຳມະນາກ່ຽວກັບຄວາມໝັ້ນຄົງຢູ່ເຂດທະເລຕາເວັນອອກ
ພາບ: internet
|
ທ່ານ Liberman ສະມາຊິກສະພາສູງ, ປະທານ ກຳມາທິການຄວາມໝັ້ນຄົງພາຍໃນ ແລະ ບັນດາບັນຫາຂອງລັດຖະບານ ອາເມລິກາ ຖືວ່າ:ຈີນຈະນັບມື້ນັບຖືກຕົກຢູ່ໂດດດ່ຽວໃນພາກພື້ນກໍຄືຢູ່ໃນໂລກ ຖ້າຫາກຈີນສືບຕໍ່ປະຕິບັດບັນດານະໂຍບາຍຂອງປະເທດນີ້ຢູ່ທະເລຕາເວັນອອກ. ສະມາຊິກສະພາສູງ Liberman ຊີ້ແຈງວ່າ:
“ບັນດາຄຳຮຽກຮ້ອງອະທິປະໄຕຂອງຈີນ ຢູ່ ເຂດທະເລຕາເວັນອອກ ແມ່ນເກີນຂອບເຂດ ນັ້ນແມ່ນການກະທຳເກາະຜິດທຳອິດຊ່ຶ່ງເຮັດໃຫ້ຫລາຍປະເທດຈຳຕ້ອງມີການກະທຳ, ນັ້ນແມ່ນເຫດຜົນເປັນຫຍັງຂ້າພະເຈົ້າມີຄວາມຫວັງວ່າ ຈີນ ຄວນຢຸດຕິການກະທຳນີ້ ແລະ ບໍ່ຄວນມີການກະທຳໃດອີກຈຶ່ງຈະສາມາດຊ່ວຍແກ້ໄຂບັນດາການພິພາດດັ່ງກ່າວໄດ້.”
ໂດຍມີທັດສະນະເຊັ່ນດຽວກັບບັນດານັກຮຽນຮູ້, ກ່ອນດຳເນີນກອງປະຊຸມສຳມະນາ, ທ່ານ John Mc Cain ສະມາຊິກສະພາສູງອາເມລິກາ ຖືວ່າ ຈີນພວມກາຍເປັນປະເທດມະຫາອຳນາດທາງດ້ານເສດຖະກິດ ສະນັ້ນ ປະເທດນີ້ ພວມຕ້ອງການວັດຖຸດິບເປັນຈຳນວນຫລວງຫລາຍ, ໃນນັ້ນ ມີນ້ຳມັນ. ຈີນເຫັນວ່າ ອາດຈະມີປະລິມານນ້ຳມັນຫລວງຫລາຍຢູ່ເຂດທະເລຕາເວັນອອກ ສະນັ້ນ ໄດ້ເພີ່ມທະວີການຖະແຫລງອະທິປະໄຕຢູ່ເຂດນີ້. ສະມາຊິກສະພາສູງອາເມລິກາ John Mc Cain ຖືວ່າ:
“ໃນໄລຍະຜ່ານມາ, ຈີນ ໄດ້ຖະແຫລງ ເສັ້ນລີ້ນງົວ 9 ຕອນ ແລະ ຈີນຖືວ່າ ເຂດທະເລຕາເວັນອອກແມ່ນຂຶ້ນກັບຜືນແຜນດິນຂອງຈີນ. ນັ້ນແມ່ນຄຳຖະແຫລງບໍ່ຖືກຕ້ອງ. ເຂດທະເລຕາເວັນອອກແມ່ນເຂດນ່ານທະເລສາກົນ. ເພາະສະນັ້ນ ພວກເຮົາທັງໝົດລ້ວນແຕ່ປາດຖະຫນາວ່າຕ້ອງມີການເຈລະຈາໂດຍສັນຕິລະຫວ່າງຈີນ ກັບບັນດາປະເທດໃນພາກພື້ນ ເພື່ອແກ້ໄຂການພິພາດດັ່ງກ່າວໂດຍສັນຕິວິທີ. ໃນໄລຍະມໍ່ໆມານີ້ ໃນພາກພື້ນໄດ້ເກີດການປະທະກັນ, ຄວາມເຄັ່ງຕືງຕ່າງໆ , ບັນດາຄວາມເຄັ່ງຕືງນັ້ນ ຕ້ອງລົບລ້າງ ແລະ ການເຈລະຈາແມ່ນຄຳຕອບໃຫ້ແກ່ບັນຫານີ້.”
ບັນຫາກ່ຽວກັບທະເລຕາເວັນອອກ ບໍ່ພຽງແຕ່ແມ່ນຫົວເລື່ອງເຄັ່ງຮ້ອນເທົ່ານັ້ນ ຫາກນີ້ແມ່ນບັນຫາສະດຸ້ງໄວ ເພາະມັນກ່ຽວຂ້ອງໂດຍກົງເຖິງຜົນປະໂຫຍດຂອງບັນດາປະເທດທີ່ມີຝັ່ງທະເລຢູ່ພາກພື້ນນີ້. ແລະ ກອງປະຊຸມສຳມະນາກ່ຽວກັບຄວາມໝັ້ນຄົງທາງທະເລ ໂດຍສູນຄົ້ນຄ້ວາຍຸດທະສາດ ແລະ ສາກົນ ອາເມລິກາ ຈັດຕັ້ງຂຶ້ນຄັ້ງນີ້ ແມ່ນກາລະໂອກາດເພື່ອໃຫ້ນັກຮຽນຮູ້ທີ່ມາຈາກບັນດາປະເທດໄຈ້ແຍກຢ່າງເລິກເຂິ່ງ ກໍຄືສະແດງໃຫ້ເຫັນທັດສະນະຂອງຕົນກ່ຽວກັບບັນຫານີ້. ທີ່ກອງປະຊຸມສຳມະນາ, ບັນດານັກຄົ້ນຄ້ວາ, ນັກຮຽນຮູ້ສາກົນລ້ວນແຕ່ຖືວ່າ: ບັນດາຄຳຮຽກສິດໂດຍຈີນຍົກອອກ ບໍ່ມີມູນຄວາມຈິງ ແລະ ກໍ່ໄພອັນຕະລາຍ. ໃນຂະນະນັ້ນ ການກະທຳດັ່ງກ່າວຂອງຈີນ ພວມຍູ້ແຮງການເພີ່ມທະວີວຽກງານກວດກາຢູ່ທະເລຕາເວັນອອກ.
ຕາມສາສະດາຈານ Carlyle Thayer ແລ້ວ, ກອງປະຊຸມສຳມະນາ ດັ່ງກ່າວແມ່ນຊ່ວຍໃຫ້ບັນດານັກຮຽນຮູ້ ຈີນ ມີຄວາມເຂົ້າໃຈຕື່ມກ່ຽວກັບບັນດາສິ່ງຜິດພາດ ເມື່ອຈີນຖະແຫລງອະທິປະໄຕຢູ່ເຂດທະເລຕາເວັນອອກ ເພື່ອວ່າເມື່ອກັບຄືນເມືອປະເທດເຂົາເຈົ້າຈະມີຄຳອະທິບາຍຢ່າງຈະແຈ້ງໃຫ້ລັດຖະບານຈີນ ແລະ ປະຊາຊົນ ຮັບຊາບ ກ່ຽວກັບຄຳຖະແຫລງອະທິປະໄຕຂອງຈີນ.