ເລີ່ມແຕ່ວັນທີ 2/1, ຮ່າງປັບປຸງລັດຖະທຳມະນູນປີ 1992 ໄດ້ຖືກຍົກອອກມາເພື່ອເອົາຄຳເຫັນຈາກປະຊາຊົນ. ຕາມນັ້ນແລ້ວ, ປະຊາຊົນທຸກຊັ້ນວັນນະຢູ່ພາຍໃນປະເທດ ແລະ ຊາວຫວຽດນາມ ອາໄສຢູ່ຕ່າງປະເທດ, ບັນດາອົງການຈັດຕັ້ງຢູ່ສູນກາງ ແລະ ທ້ອງຖິ່ນລ້ວນແຕ່ສາມາດປະກອບຄຳເຫັນປັບປຸງ 8 ເນື້ອໃນຂອງລັດຖະທຳມະນູນປີ 1992, ໃນນັ້ນມີບັນດາເນື້ອໃນສຳຄັນຄື: ລະບອບການເມືອງ, ສິດທິມະນຸດ, ສິດ ແລະ ພັນທະພື້ນຖານຂອງພົນລະເມືອງ, ປົກປັກຮັກສາປະເທດຊາດ.
ເ
ປັບປຸງລັດຖະທຳມະນູນ: ຕ້ອງມີກົນໄກຄວບຄຸມສິດອຳນາດ
(ພາບ:tienphong.vn)
ຄຳສັ່ງຂອງກົມການເມືອງໂດຍທ່ານເລຂາທິການໃຫ່ຍຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ເຊັນປະກາດໃຊ້ເມື່ອວັນທີ 28/12 ແລະ ມະຕິຕົກລົງຂອງສະພາແຫ່ງຊາດໂດຍທ່ານປະທານສະພາແຫ່ງຊາດຫງວຽນຊິງຮຸ່ງ ເຊັນປະກາດໃຊ້ໃນວັນດຽວກັນລ້ວນແຕ່ຢັ້ງຢືນວ່າ: ເລື່ອງດຳເນີນການເອົາຄຳເຫັນຈາກປະຊາຊົນກ່ຽວກັບຮ່າງປັບປຸງລັດຖະທຳມະນູນປີ 1992 ແມ່ນບັ້ນດຳເນີນຊີວິດການເມືອງສຳຄັນ, ກ້ວາງຂວາງໃນທົ່ວພັກ, ທົ່ວປວງຊົນ ແລະ ທັງລະບົບການເມືອງ. ສິ່ງດັ່ງກ່າວໄດ້ເສີມຂະຫຍາຍສິດເປັນເຈົ້າ, ພູມປັນຍາ, ຄວາມສຸດຈິດສຸດໃຈຂອງປະຊາຊົນ, ຍົກສູງສະຕິຄວາມຮັບຮູ້ ແລະ ຄວາມຮັບຜິດຊອບຂອງແຕ່ລະສ່ວນບຸກຄົນ, ອົງການຈັດຕັ້ງທີ່ມີຕໍ່ເລື່ອງປັບປຸງລັດຖະທຳມະນູນ, ປະຕິບັດລັດຖະທຳມະນູນ, ກົດໝາຍ ແລະ ປະກອບສ່ວນສ້າງສາລັດແຫ່ງອຳນາດນິຕິບັນຍັດສັງຄົມນິຍົມຫວຽດນາມ.
ບັນດາສະມາຊິກສະພາແຫ່ງຊາດເຫັນດີເປັນເອກະສັນສູງ
ກ່ຽວກັບຄວາມຈຳເປັນຕ້ອງປັບປຸງລັດຖະທຳມະນູນ
(ພາບ:vietnam.vn)
ຕາມທ່ານຟານຈຸງລີ ຫົວໜ້າກຳມາທິການກົດໝາຍຂອງສະພາແຫ່ງຊາດຫວຽດນາມ, ຫົວໜ້າຄະນະຮຽບຮຽງລັດຖະທຳມະນູນແລ້ວ, ຮ່າງປັບປຸງລັດຖະທຳມະນູນປີ 1992 ແມ່ນສິ່ງຍອດຍິ່ງຂອງວິວັດການອອກແຮງງານ, ການເຂົ້າຮ່ວມຂອງບັນດາຜູ້ຊ່ຽວຊານ, ນັກວິທະຍາສາດແຕ່ຂັ້ນສູນກາງຕະຫຼອດຮອດທ້ອງຖິ່ນໂດຍຜ່ານບັນດາບັ້ນສະຫລຸບການປະຕິບັດລັດຖະທຳມະນູນ ແລະ ການຮັບເອົາຄຳເຫັນ, ພິເສດແມ່ນຮັບເອົາຄຳເຫັນຂອງສະມາຊິກສະພາແຫ່ງຊາດທີ່ສະໄໝປະຊຸມຫວ່າງແລ້ວນີ້. ທ່ານຟານຈຸງລີ ກໍ່ຢືນຢັນວ່າ, ຄຳເຫັນຂອງປະຊາຊົນຈະໄດ້ຮັບການສັງລວມຢ່າງຄົບຖ້ວນ, ຊັນເຈນ ແລະ ຄົ້ນຄ້ວາຮັບເອົາຄຳເຫັນ, ອະທິບາຍຢ່າງເຂັ້ມງວດເພື່ອສ້າງຮ່າງປັບປຸງລັດຖະທຳມະນູນປີ 1992 ສຳເລັດ. ຮອງສາດສະດາຈານ, ດຣຫງວຽນວຽດທົງ ກຳມະການຄະນະຮຽບຮຽງປັບປຸງລັດຖະທຳມະນູນປີ 1992 ໃຫ້ຮູ້ວ່າ: ເລື່ອງຮັບເອົາຄຳເຫັນຢ່າງກ້ວາງຂວາງຂອງປະຊາຊົນທຸກຊັ້ນວັນນະແມ່ນວິທີເພື່ອຢັ້ງຢືນສິດອຳນາດຂອງປະຊາຊົນຄືດັ່ງທາດແທ້ຂອງລັດຖະທຳມະນູນ:
“ໃນຕົວຈິງແລ້ວ, ລັດຖະທຳມະນູນປີ 1946 ໂດຍປະທານໂຮ່ຈິມິນຊີ້ນຳຮຽບຮຽງໄດ້ກຳນົດວ່າ:, ປະຊາຊົນມີສິດສະເໜີປັບປຸງລັດຖະທຳມະນູນ. ມາດຕາທີ 2 ຂອງລັດຖະທຳມະນູນໃນປະຈຸບັນຢັ້ງຢືນວ່າ: ສິດອຳນາດທຸກຢ່າງຂອງລັດແມ່ນຂຶ້ນກັບປະຊາຊົນ. ການຢັ້ງຢືນດັ່ງກ່າວແມ່ນຊັນເຈນທີ່ສຸດ. ປະຊາຊົນບໍ່ພຽງແຕ່ປະຕິບັດສິດອຳນາດຂອງລັດຜ່ານສະພາແຫ່ງຊາດ, ສະພາປະຊາຊົນເທົ່ານັ້ນ, ຫາກປະຊາຊົນຍັງປະຕິບັດສິດອຳນາດຂອງລັດຜ່ານອົງການຈັດຕັ້ງອື່ນໆອີກດ້ວຍ“.
ຕາມຄະນະຮຽບຮຽງລັດຖະທຳມະນູນປີ 1992 ແລ້ວ, ປະຊາຊົນໄດ້ປະກອບຄຳເຫັນໂດຍກົງຫລືເປັນລາຍລັກອັກສອນຝາກໄປຍັງບັນດາອົງການສຳນັກງານ; ປຶກສາຫາລືທີ່ບັນດາກອງປະຊຸມ, ກອງປະຊຸມສຳມະນາ, ພົບປະເຈລະຈາ, ຜ່ານເວັບໄຊຂອງສະພາແຫ່ງຊາດ ແລະ ບັນດາພາຫະນະສື່ມວນຊົນ. ບັນດາສະຖາບັນ, ມະຫາວິທະຍາໄລ, ແນວໂຮມປະເທດຊາດ, ບັນດາອົງການຈັດຕັ້ງການເມືອງ-ສັງຄົມ, ອົງການຈັດຕັ້ງການເມືອງສັງຄົມ-ວິຊາຊີບ, ອົງການຈັດຕັ້ງສັງຄົມ-ວິຊາຊີບ ແລະ ບັນດາອົງການສັງຄົມອື່ນກໍ່ຈະຮັບເອົາຄຳເຫັນຂອງປະຊາຊົນ. ຕາມທ່ານຫວູ໋ຈ້ອງກິມ ຮອງປະທານທັງເປັນເລຂາທິການໃຫ່ຍຄະນະກຳມະການສູນກາງແນວໂຮມປະເທດຊາດຫວຽດນາມ ແລ້ວ, ແນວໂຮມປະເທດຊາດຫວຽດນາມ ຈະຜັນຂະຫຍາຍແຜນການຮັບເອົາຄຳເຫັນປະກອບຈາກປະຊາຊົນເຂົ້າໃນຮ່າງປັບປຸງລັດຖະທຳມະນູນປີ 1992 ດ້ວຍບັນດາຮູບການທີ່ອຸດົມສົມບູນຄື: ຈັດກອງປະຊຸມສຳມະນາ, ການພົບປະເຈລະຈາຄັ້ງຕ່າງໆດ້ວຍຫຼາຍຫົວເລື່ອງ, ເນື້ອໃນ, ຂົນຂວາຍປະຊາຊົນທຸກຊັ້ນວັນນະ, ບັນດາຜູ້ຊົງຄຸນວຸດທິ, ນັກປັນຍາຊົນ, ຜູ້ມີຍົດຖາບັນດາສັກ, ຊາວຫວຽດນາມ ອາໄສຢູ່ຕ່າງປະເທດໄດ້ປະກອບຄຳເຫັນເຂົ້າໃນເນື້ອໃນທັງໝົດຂອງຮ່າງລັດຖະທຳມະນູນປີ 1992 ສະບັບປັບປຸງຢ່າງກົງໄປກົງມາ
ເລື່ອງດຳເນີນການຮັບເອົາຄຳເຫັນປະກອບຈາກປະຊາຊົນກ່ຽວກັບຮ່າງ ປັບປຸງລັດຖະທຳມະນູນປີ 1992 ຊື່ງແກ່ຍາວແຕ່ວັນທີ 2/1-31/3/2013 ໄດ້ຮັບຄວາມມຸ້ງຫວັງວ່າແມ່ນບັ້ນດຳເນີນຊີວິດດ້ານການເມືອງ-ກົດໝາຍສຳຄັນ, ກ້ວາງຂວາງໃນໝູ່ປະຊາຊົນ, ເພື່ອໃຫ້ທຸກຄົນພ້ອມກັນເຂົ້າຮ່ວມການສ້າງລັດແຫ່ງອຳນາດນິຕິບັນຍັດສັງຄົມນິຍົມຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ.