(vovworld)- ເສີມຂະຫຍາຍປະຊາທິປະໄຕສັງຄົມນິຍົມ, ຮັບປະກັນການປະຕິບັດສິດເປັນເຈົ້າຂອງປະຊາຊົນ ແມ່ນເນື້ອໃນສຳຄັນຂອງຮ່າງເອກະສານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ. ພະນັກງານ, ສະມາຊິກພັກ ແລະ ປະຊາຊົນໃນທົ່ວປະເທດຖືວ່າ: ປະຊາທິປະໄຕ ໄດ້ຮັບການປະຕິບັດຢ່າງຄົບຖ້ວນ, ເຂັ້ມງວດໃນທຸກຂົງເຂດຂອງຊີວິດການເປັນຢູ່ສັງຄົມ, ຮັບປະກັນເພື່ອໃຫ້ປະຊາຊົນ ເຂົ້າຮ່ວມຢູ່ທຸກຂອດຂອງວິວັດການ ວາງອອກບັນດາຄຳຕັດສິນທີ່ກ່ຽວຂ້ອງເຖິງຜົນປະໂຫຍດ, ຊີວິດ ຂອງປະຊາຊົນ ແລະ ຂອງປະເທດຊາດ. ບົດຂຽນຂອງນັກຂ່າວ ມີງເຈີມ, ລ້າຍຮວາ ທີ່ມີຫົວຂໍ້ວ່າ: ປະຊາຊົນໄດ້ເຂົ້າຮ່ວມຕັດສິນບັນດາບັນຫາຂອງປະເທດຊາດ.
ມຸ້ງໄປເຖິງກອງປະຊຸມໃຫຍ່ຄັ້ງທີ 12 ຂອງພັກ
|
ຮ່າງບົດລາຍງານການເມືອງຍື່ນສະເຫນີກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ, ໃນພາກ “ສືບຕໍ່ປ່ຽນໃຫມ່, ຍົກສູງປະສິດທິຜົນວຽກງານຂົນຂວາຍປະຊາຊົນ, ເພີ່ມທະວີການພົວພັນສະຫນິດແຫນ້ນລະຫວ່າງພັກ ແລະ ປະຊາຊົນ” ໄດ້ລະບຸເນື້ອໃນວ່າ: “ຫັນລະບອບແນວທາງ, ນະໂຍບາຍຂອງພັກເປັນນະໂຍບາຍ, ກົດໝາຍໃຫ້ສອດຄ່ອງກັບພຶດຕິກຳ ແລະ ຕອບສະຫນອງຜົນປະໂຫຍດ, ຄວາມມຸ່ງມາດປາດຖະຫນາອັນຊອບທຳຂອງປະຊາຊົນ. ສືບຕໍ່ຫັນການພົວພັນລະຫວ່າງພັກນຳພາ, ລັດຄຸ້ມຄອງ, ປະຊາຊົນເປັນເຈົ້າໃຫ້ເປັນລະອຽດ, ເປັນຕົ້ນແມ່ນເນື້ອໃນ ປະຊາຊົນເປັນເຈົ້າ ແລະ ທິດນຳ: ປະຊາຊົນຮູ້, ປະຊາຊົນປຶກສາຫາລື, ປະຊາຊົນເຮັດ, ປະຊາຊົນກວດກາ, ຕິດຕາມກວດກາ.”
ເສີມຂະຫຍາຍປະຊາທິປະໄຕເພື່ອສ້າງກຸ່ມກອ້ນມະຫາສາມັກຄີ
ທ່ານ ຫງວຽນຕຸກ, ກຳມະການຄະນະປະທານ ຄະນະກຳມະການສູນກາງແນວໂຮມປະເທດຊາດຫວຽດນາມ ຖືວ່າ: ລັດຖະທຳມະນູນປີ 2013 ຂອງຫວຽດນາມ ໄດ້ຕັ້ງບັນຫາປະຊາທິປະໄຕ ແລະ ສິດທິມະນຸດແມ່ນມີທີ່ຕັ້ງສຳຄັນ. ຈາກນັ້ນ ມີຫລາຍແຜນນະໂຍບາຍ, ມະຕິຂອງພັກກ່ຽວກັບປະຊາທິປະໄຕ ໄດ້ຮັບການປຶກສາຫາລື ແລະໄດ້ຫັນເປັນກົດໝາຍ. ສະພາແຫ່ງຊາດ ໄດ້ປະກາດໃຊ້ກົດໝາຍຫລາຍສະບັບ ເພື່ອຮັບປະກັນສິດປະຊາທິປະໄຕຂອງປະຊາຊົນ. ຄຽງຄູ່ກັນນັ້ນ ມີຮ່າງກົດໝາຍຫລາຍສະບັບ ກໍກ່ຽວຂ້ອງເຖິງບັນຫາປະຊາທິປະໄຕພວມໄດ້ຮັບການພິຈາລະນາຍື່ນສະເຫນີຕໍ່ສະພາແຫ່ງຊາດໃນກອງປະຊຸມຄັ້ງທີ 10 ຈະມາເຖິງ ຄື: ກົດໝາຍວ່າດ້ວຍສະມາຄົມ, ກົດໝາຍວ່າດ້ວຍການເຫລື້ອມໃສສາສະຫນາ, ກົດໝາຍວ່າດ້ວຍສື່ມວນຊົນ (ສະບັບປັບປຸງ), ກົດໝາຍວ່າດ້ວຍການໄດ້ຮັບຂໍ້ມູນຂ່າວ… ທ່ານ ຫງວຽນຕຸກ ຖືວ່າ:
“ອາດຈະເວົ້າໄດ້ວ່າ ບັນດາສະມາຊິກສະພາແຫ່ງຊາດນັບມື້ນັບສະແດງຄຳເຫັນຂອງປະຊາຊົນ. ມີຫລາຍກໍລະນີ ພັກໄດ້ຮັບເອົາຄຳເຫັນປະກອບຂອງປະຊາຊົນ ແລະ ປັບປຸງມະຕິຂອງພັກຄືນໃຫ້ສອດຄ່ອງກັບທິດນຳຂອງພັກ ແຕ່ຕ້ອງຕິດພັນກັບຈິດໃຈຂອງປະຊາຊົນ.”
ທ່ານ ຫງວຽນທາຍຮ່ວາ, ອະດີດຮອງຫົວຫນ້າຄະນະໂຄສະນາສຶກສາ ຄະນະພັກແຂວງ ບັກຢາງ ຖືວ່າ: ບັນຫາເສີມຂະຫຍາຍສິດເປັນເຈົ້າຂອງປະຊາຊົນທີ່ໄດ້ວາງອອກແມ່ນສອດຄອ່ງກັບວິວັດການພັດທະນາຂອງປະເທດຊາດ.
“ຢາກເສີມຂະຫຍາຍຄວາມສາມັກຄີທົ່ວປວງຊົນ ຍາມໃດກໍຕ້ອງເຄົາລົບປະຊາຊົນ, ຄົບລົບສິດເປັນເຈົ້າຂອງປະຊາຊົນ. ຢາກປະຕິບັດປະຊາທິປະໄຕ ຕ້ອງເສີມຂະຫຍາຍກຳລັງແຮງຂອງປະຊາຊົນ, ໃນກຳລັງແຮງຂອງປະຊາຊົນ ຄວາມສາມັກຄີແມ່ນກຳລັງຫນູນ.”
ເສີມຂະຫຍາຍສິດເປັນເຈົ້າຂອງປະຊາຊົນໃນທຸກຂົງເຂດ
ກ່ຽວກັບບັນດາມາດຕະການເພື່ອສືບຕໍ່ເສີມຂະຫຍາຍປະຊາທິປະໄຕ ຕິດພັນກັບການປະຕິບັດວິໄນ, ຂໍ້ກຳນົດກົດລະບຽບ, ຮັບປະກັນການປະຕິບັດສິດເປັນເຈົ້າຂອງປະຊາຊົນ, ມີພະນັກງານ, ສະມາຊິກພັກຫລາຍທ່ານ ກໍສະແດງຄວາມເຫັນດີເຫັນພ້ອມຢ່າງສູງ ດ້ວຍຮ່າງບົດລາຍງານການເມືອງທີ່ຍື່ນສະເຫນີກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ເມື່ອຖືວ່າ: ທຸກແນວທາງ, ແຜນນະໂຍບາຍຂອງພັກ, ນະໂຍບາຍ, ກົດໝາຍຂອງລັດ ລ້ວນແຕ່ເລີ່ມມາຈາກຄວາມມຸ່ງມາດປາດຖະຫນາ, ສິດ ແລະ ຜົນປະໂຫຍດອັນຊອບທຳຂອງປະຊາຊົນ ແລະ ປະຊາຊົນໄດ້ເຂົ້າຮ່ວມການປະກອບຄຳເຫັນ. ທ່ານ ຈ້ຽວດືກແທງ, ສະມາຊິກພັກຢູ່ ນະຄອນ ຮ່າຢາງ ຖືວ່າ: ເພື່ອປະຕິບັດປະຊາທິປະໄຕ, ເສີມຂະຫຍາຍສິດເປັນເຈົ້າຂອງປະຊາຊົນ, ລັດ ຕ້ອງຮັບຮູ້ຢ່າງຖືກຕ້ອງ, ຄົບຖ້ວນກ່ຽວກັບສິດເປັນເຈົ້າຂອງປະຊາຊົນ, ສ້າງລະບົບນະໂຍບາຍ, ກົດໝາຍ, ກົນໄກປະຕິບັດປະຊາທິປະໄຕ, ສ້າງບັນດາປັດໄຈ, ປະຖົມປັດໄຈເສດຖະກິດສັງຄົມ ເພື່ອປະຕິບັດປະຊາທິປະໄຕ. ສິ່ງສຳຄັນທີ່ສຸດ ນັ້ນແມ່ນ ປະຊາທິປະໄຕຕ້ອງໄດ້ຮັບການປະຕິບັດເປັນຢ່າງດີຢູ່ຂັ້ນຮາກຖານ ເພືື່ອໃຫ້ປະຊາຊົນເສີມຂະຫຍາຍສິດເປັນເຈົ້າຂອງຕົນ.
“ນີ້ແມ່ນແຜນນະໂຍບາຍອັນຖືກຕ້ອງ ແຕ່ຕ້ອງເຮັດແນວໃດ ເປັນຕົ້ນຢູ່ບັນດາອົງການພັກຂັ້ນຮາກຖານ ຕ້ອງມີມາດຕະການ, ວິທີເຮັດເພື່ອເສີມຂະຫຍາຍສິດເປັນເຈົ້າຂອງປະຊາຊົນ. ພິເສດ ໃນບັນດາຂົງເຂດພັດທະນາເສດຖະກິດ, ວັທະນະທຳ ຕ້ອງເຄົາລົບຄຳເຫັນຂອງປະຊາຊົນ ແລະ ມີມາດຕະການຈັດຕັ້ງການຮັບເອົາຄຳເຫັນຂອງປະຊາຊົນເພື່ອໃຫ້ປະຊາຊົນໄດ້ເຂົ້າຮ່ວມການປະກອບຄຳເຫັນຂອງຕົນຢູ່ໃນຂອດທຳອິດ. ພ້ອມກັນນັ້ນ ເພື່ອໃຫ້ປະຊາຊົນຕິດຕາມກວດກາໝາກຜົນປະຕິບັດບັນດາໂຄງການ, ຈຸດໝາຍຂອງພັກທີ່ໄດ້ວາງອອກ.”
ເສີມຂະຫຍາຍປະຊາທິປະໄຕສັງຄົມນິຍົມ ແລະ ຮັບປະກັນສິດເປັນເຈົ້າຂອງປະຊາຊົນ ແມ່ນແນໃສ່ປັບປຸງຄວາມໄວ້ເນື້ອເຊື່ອໃຈຂອງປະຊາຊົນຕໍ່ພັກ, ເພີ່ມທະວີກຸ່ມກອ້ນມະຫາສາມັກຄີທົ່ວປວງຊົນ ແລະ ສາຍພົວພັນສະຫນິດແຫນ້ນລະຫວ່າງພັກ ກັບປະຊາຊົນ, ເຕົ້າໂຮມ, ຂົນຂວາຍປະຊາຊົນປະຕິບັດບັນດາແຜນນະໂຍບາຍຂອງພັກ ແລະ ນະໂຍບາຍກົດໝາຍຂອງລັດ, ເສີມຂະຫຍາຍກຳລັງແຮງອັນໃຫຍ່ຫລວງຂອງປະຊາຊົນ, ສ້າງເປັນຂະບວນການປະຕິວັດຢ່າງກວ້າງຂວາງໃນການສ້າງສາ ແລະ ປົກປັກຮັກສາປະເທດຊາດ.