(vovworld) – ສອງເດືອນຕົ້ນປີ 2015, ຫວຽດນາມ ໄດ້ຮັບຮູ້ບັນດາຜົນງານທີ່ຕັ້ງໜ້າໃນການບໍລິຫານເສດຖະກິດມະຫາພາກ. ເພື່ອປະຕິບັດສຳເລັດບັນດາຄາດໝາຍພັດທະນາຂອງທັງປີ ກໍ່ຄືສ້າງຄວາມສະດວກໃຫ້ຊຸມປີຕໍ່ໆໄປ, ລັດຖະບານໄດ້ມອບໜ້າທີ່ຫຼາຍຢ່າງໃຫ້ບັນດາກະຊວງ, ຂະແໜງການ, ທ້ອງຖີ່ນເພື່ອຜັນຂະຫຍາຍ.
ພາບປະກອບ
ປະຕິຮູບລະບຽບການບໍລິຫານ, ປັບປຸງສະພາບແວດລ້ອມແຫ່ງການດຳເນີນທຸລະກິດ ແລະ ຍົກສູງກຳລັງແກ່ງແຍ້ງແຫ່ງຊາດ ແມ່ນບັນດາປັດໃຈຕັດສິນການເຕີບໂຕຢ່າງມີປະສິດທິຜົນ ແລະ ໝັ້ນຄົງ. ຍ້ອນເຫດນັ້ນ, ໃນໄລຍະຈະມາເຖິງ, ບັນດາກະຊວງ, ຂະແໜງການທີ່ກ່ຽວຂ້ອງ, ຕ້ອງສຸມໃສ່ແກ້ໄຂສິ່ງທີ່ຍັງຄົງຄ້າງໃນຂົງເຂດເຫຼົ່ານັ້ນ.
ປັບປຸງສະພາບແວດລ້ອມແຫ່ງການລົງທຶນ
ເລື່ອງປັບປຸງສະພາບແວດລ້ອມແຫ່ງການດຳເນີນທຸລະກິດ, ຍົກສູງກຳລັງແກ່ງແຍ້ງແຫ່ງຊາດ, ແມ່ນໜ້າທີ່ຕິດພັນຢ່າງແໜ້ນແຟ້ນກັບບັນດາໜ້າທີ່ພັດທະນາເສດຖະກິດ - ສັງຄົມ. ເມື່ອທຽບໃສ່ຄວາມຕ້ອງການທີ່ວາງອອກ, ພິເສດແມ່ນໃນປະຈຸບັນ, ຂະນະທີ່ລະບອບກົດໝາຍ, ກົນໄກນະໂຍບາຍ, ລະບຽບການດ້ານບໍລິຫານ, ການປະຕິບັດລັດຖະການ ຍັງມີສິ່ງ ຄົງຄ້າງຫຼາຍຢ່າງ, ເລື່ອງສືບຕໍ່ເອົາໃຈໃສ່ປະຕິບັດບັນດາໜ້າທີ່, ມາດຕະການແກ້ໄຂຕົ້ນຕໍ ເພື່ອປັບປຸງສະພາບແວດລ້ອມແຫ່ງການດຳເນີນທຸລະກິດ ແລະ ຍົກສູງກຳລັງແກ່ງແຍ້ງແຫ່ງຊາດ ຍາມໃດກໍ່ແມ່ນຄວາມຮຽກຮ້ອງຕ້ອງການທີ່ຮີບດ່ວນ. ດັ່ງນັ້ນບັນດາກະຊວງ, ຂະແໜງການ, ທ້ອງຖີ່ນຕ້ອງຖືນີ້ແມ່ນໜຶ່ງໃນບັນດາໜ້າທີ່ຈຸດສຸມ, ຕ້ອງປະຕິບັດເປັນປະຈຳ, ຕ້ອງຍົກອອກບັນດາມາດຕະການແກ້ໄຂ, ຄາດໝາຍປະຕິຮູບລະອຽດ, ເພື່ອຫັນລະບຽບການບໍລິຫານເປັນງ່າຍດາຍ ແລະ ຫຼຸດຜ່ອນເວລາເຮັດລະບຽບການບໍລິຫານ, ພິເສດແມ່ນໃນຂົງເຂດພາສີ, ອາກອນ, ປະກັນສັງຄົມ, ສ້າງຕັ້ງວິສາຫະກິດ… ເລື່ອງປະຕິຮູບດ້ານການບໍລິຫານບໍ່ໄດ້ເວົ້າແບບລ້າໆ, ຫາກຕ້ອງເຮັດດ້ວຍການກະທຳລະອຽດ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ, ເນັ້ນໜັກວ່າ:
“ຂໍ້ກຳນົດພຽງແຕ່ໃນເອກະສານເທົ່ານັ້ນ, ສ່ວນການປະຕິບັດຄືແນວໃດໃຫ້ຖືກຕ້ອງແມ່ນຕ້ອງອີງໃສ່ກົງຈັກການຈັດຕັ້ງ, ມະນຸດ. ພວກເຮົາບໍ່ຮຽກຮ້ອງແບບລວມໆອີກ, ຫາກຕ້ອງສຸມໃສ່ການປະຕິຮູບດ້ານການບໍລິຫານ ເພື່ອສ້າງສະພາບແວດລ້ອມແຫ່ງການດຳເນີນທຸລະກິດສະດວກກວ່າໃຫ້ປະຊາຊົນ ແລະ ວິສາຫະກິດ“.
ແກ້ໄຂຄວາມຫຍຸ້ງຍາກໃຫ້ວິສາຫະກິດ, ຍົກສູງກຳລັງແກ່ງແຍ້ງແຫ່ງຊາດ
ປີ 2015 ແມ່ນປີທີ່ມີຄວາມໝາຍສຳຄັນໃນການປະຕິບັດສຳເລັດບັນດາຄາດໝາຍຂອງແຜນການ 5 ປີ, ທັງແມ່ນປະຖົມປັດໃຈເພື່ອວາງອອກບັນດາຄາດໝາຍເສດຖະກິດ - ສັງຄົມໃຫ້ໄລຍະຕໍ່ໄປ. ບົນຈິດໃຈນັ້ນ, ບັນດາກະຊວງ, ຂະແໜງການ, ທ້ອງຖີ່ນ ຕ້ອງມີການສູ້ຊົນ, ມານະພະຍາຍາມຢ່າງແຮງ ເພື່ອບັນລຸ ແລະ ລື່ນກາຍແຜນການທີ່ໄດ້ວາງອອກໃຫ້ປີ 2015. ກ່ອນອື່ນໝົດແມ່ນຕ້ອງສືບຕໍ່ເອົາໃຈໃສ່ແກ້ໄຂຄວາມຫຍຸ້ງຍາກ, ສ້າງເງື່ອນໄຂສະດວກໃຫ້ວິສາຫະກິດພັດທະນາການຜະລິດ, ດຳເນີນທຸລະກິດ, ເພາະວ່ານີ້ແມ່ນປັດໃຈທີ່ມີຄວາມໝາຍຕັດສິນ. ເລື່ອງແກ້ໄຂຄວາມຫຍຸ້ງຍາກຕ້ອງປະຕິບັດຢ່າງຄົບຊຸດ, ແຕ່ກ່ອນອື່ນໝົດແມ່ນຕ້ອງສຸມໃສ່ປັບປຸງສິ່ງແວດລ້ອມແຫ່ງການລົງທຶນດຳເນີນທຸລະກິດ. ຕາມນັ້ນແລ້ວ, ແຕ່ລະກະຊວງ, ຂະແໜງການຕ້ອງທີການກະທຳ, ມີວຽກງານຢ່າງລະອຽດ ເພື່ອສ້າງການຫັນປ່ຽນຢ່າງແຮງໃນການປັບປຸງສະພາບ ແວດລ້ອມແຫ່ງການລົງທຶນດຳເນີນທຸລະກິດ ແລະ ຍົກສູງກຳລັງແກ່ງແຍ້ງແຫ່ງຊາດ. ນີ້ກໍ່ແມ່ນມາດຕະການທີ່ແທດຈິງເພື່ອແກ້ໄຂຄວາມຫຍຸ້ງຍາກ, ສ້າງຄວາມສະດວກໃຫ້ວິສາຫະກິດຊຸກຍູ້ການຜະລິດ, ດຳເນີນທຸລະກິດ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ, ຊີ້ແຈ້ງວ່າ:
“ພວກເຮົາຕ້ອງປະຕິບັດຫຼາຍວຽກຢ່າງຄົບຊຸດ, ແຕ່ຕ້ອງສຸມໃສ່ເຂົ້າໃນການປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ, ປັບປຸງລະບຽບການເສຍອາກອນ, ພາສີ, ປະກັນໄພ, ທີ່ດິນ, ກໍ່ສ້າງ, ສ້າງຕັ້ງວິສາຫະກິດ, ການລົ້ມລະລາຍຂອງວິສາຫະກິດ. ພວກເຮົາສາມາດແກ່ງແຍ້ງຢ່າງສະເໝີພາບ, ບໍ່ອ່ອນດ້ອຍກວ່າບໍ່ວ່າປະເທດໃດ, ສິ່ງດັ່ງກ່າວຈະສ້າງຄວາມສະດວກຫຼາຍທີ່ສຸດໃຫ້ແກ່ວິສາຫະກິດ“.
ທ່ານນາຍົກລັດຖະມົນຕີ ໃສ່ໃຈວ່າ: ເລື່ອງຜັນຂະຫຍາຍການສ້າງໂຄງປະກອບພື້ນຖານເສດຖະກິດຄືນໃໝ່ຢ່າງຄົບຊຸດ, ພິເສດແມ່ນການສ້າງໂຄງປະກອບລັດວິສາຫະກິດຄືນໃໝ່, ຜ່ານການຍູ້ແຮງການຫັນເປັນຫຸ້ນສ່ວນ ຕິດພັນກັບການຕິດປະກາດໃນຕະຫຼາດຫຼັກຊັບ, ການສ້າງໂຄງປະກອບທະນາຄານຄືນໃໝ່ນັ້ນ, ແນ່ນອນວ່າຮອດທ້າຍປີນີ້ໜີ້ເສຍຈະຫລຸດລົງຕ່ຳກ່ວາລະດັບ 3% ແຕ່ບໍ່ນຳໃຊ້ງົບປະມານແຫ່ງລັດ, ພ້ອມທັງສືບຕໍ່ຮັກສາເສດຖະກິດມະຫາພາກເປັນປົກກະຕິ, ຮັກສາອັດຕາແລກປ່ຽນເງິນຕາ, ກຳໄລເປັນປົກກະຕິ, ຕິດຕາມກວດກາເພື່ອສືບຕໍ່ຫລຸດຜ່ອນອັດຕາດອກເບ້ຍໃຫ້ກູ້ຢືມ ເພື່ອແນໃສ່ສ້າງຄວາມສະດວກໃຫ້ແກ່ວິສາຫະກິດ, ການຜະລິດ, ດຳເນີນທຸລະກິດ.
ໄປຄຽງຄູ່ກັບການແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ, ຫວຽດນາມ ກໍ່ຄວນຍົກສູງກຳລັງຄວາມສາມາດແກ່ງແຍ້ງແຫ່ງຊາດເພື່ອຮອດທ້າຍປີ 2015, ບັນດາຄາດໝາຍກ່ຽວກັບສະພາບແວດລ້ອມແຫ່ງການລົງທຶນຂອງ ຫວຽດນາມ ບັນລຸໄດ້ ແລະ ລື່ນກາຍລະດັບສະເລ່ຍຂອງບັນດາປະເທດ ອາຊຽນ -6 (ເວລາເກັບພາສີອາກອນຍັງເຫຼືອ 121,5 ຊົ່ວໂມງ (ປະຈຸບັນແມ່ນ 247 ຊົ່ວໂມງ), ຈຳນວນວິສາຫະກິດແຈ້ງພາສີເອເລັກໂຕນິກບັນລຸ 95%, ເສຍພາສີ ເອເລັກໂຕນິກຢ່າງໜ້ອຍສຸດແມ່ນ 90%... ເວລາສ້າງຕັ້ງວິສາຫະກິດຫຼາຍສຸດແມ່ນ 6 ວັນ).
ຍູ້ແຮງການເຊື່ອມໂຍງເຂົ້າກັບເສດຖະກິດສາກົນ
ປີ 2015, ຫວຽດນາມ ຈະສືບຕໍ່ເປັນເຈົ້າການເຊື່ອມໂຍງເຂົ້າກັບສາກົນຢ່າງເລິກເຊິ່ງ, ກ້ວາງຂວາງໃນທຸກຂົງເຂດເຊິ່ງຈຸດສຸມແມ່ນເສດຖະກິດ. ເພື່ອປະຕິບັດຈຸດໝາຍນີ້ໃຫ້ໄດ້, ທ່ານນາຍົກລັດຖະມົນຕີ ສະເໜີໃຫ້ທຸກໆກະຊວງ, ຂະແໜງການ ແລະ ທ້ອງຖິ່ນຕ້ອງເປັນເຈົ້າການສ້າງແຜນການເຊື່ອມໂຍງເຂົ້າກັບສາກົນໃນແຕ່ລະຂະແໜງການ, ແຕ່ລະຂົງເຂດ, ຂຸດຄົ້ນທ່າແຮງຂອງບັນດາສັນຍາການຄ້າເສລີ ທີ່ໄດ້ຮັບການລົງນາມ ແລະ ໃກ້ຈະໄດ້ຮັບການລົງນາມເພື່ອຊຸກຍູ້ການພັດທະນາ. ໃນວິວັດການນີ້, ເລື່ອງເປີດຕະຫຼາດ, ແກ້ງແຍ້ງແມ່ນຈຳເປັນ. ທ່ານນາຍົກລັດຖະມົນຕີ ຫງວຽນເຕີນຢູ້ງ, ຊີ້ແຈ້ງວ່າ:
“ພວກເຮົາຕ້ອງໄຈ້ແຍກຢ່າງລະອຽດ, ຂົງເຂດໃດຕ້ອງເປີດເທື່ອລະກ້າວເພື່ອຊຸກຍູ້ການປ່ຽນໃໝ່, ຍົກສູງກຳລັງຄວາມສາມາດແກ້ງແຍ້ງ, ສະມັດຕະພາບ, ກຳລັງແກ້ງແຍ້ງເພື່ອພັດທະນາຕາມເສດຖະກິດການຕະຫຼາດ, ປະຈຸບັນພວກເຮົາຕ້ອງແກ້ງແຍ້ງ. ຂ້າພະເຈົ້າເວົ້າວ່ານີ້ແມ່ນການເຊື່ອມໂຍງຕາມວິວັດທະນາການ, ຄິດໄລ່ຊັ່ງຊາເຖິງຜົນປະໂຫຍດ, ສ່ວນການອາລັກຂາຝ່າຍດຽວພຽງແຕ່ເຮັດໃຫ້ການພັດທະນາຂອງພວກເຮົາຊັກຊ້າໄວ້ເທົ່ານັ້ນ”
ປັບປຸງສະພາບແວດລ້ອມແຫ່ງການລົງທຶນ, ປະຕິຮູບການບໍລິຫານ ແລະ ຍົກສູງກຳລັງຄວາມສາມາດແກ້ງແຍ້ງແຫ່ງຊາດແມ່ນບັນດາຂົງເຂດມີການພົວພັນໜູນຊ່ວຍກັນ, ຕັດສິນໃຈເຖິງການເຕີບໂຕແບບຍືນຍົງຂອງພື້ນຖານເສດຖະກິດ. ເລື່ອງລັດຖະບານ ຫວຽດນາມ ຍູ້ແຮງການປະຕິບັດບັນດາຂົງເຂດນີ້ເປັນຢ່າງດີ ແມ່ນທິດທາງເໝາະສົມ, ປະກອບສ່ວນບັນລຸບັນດາຈຸດໝາຍ, ຄາດໝາຍ, ໜ້າທີ່ເຊິ່ງໄດ້ວາງອອກຢ່າງສູງສຸດ.