ທ່ານປະທານາທິບໍດີ ຝລັ່ງ Emmanuel Macron ແລະ ທ່ານປະທານາທິບໍດີ ອາເມລິກາ Joe Biden (ພາບ:Andrew Harnik/ AP)

        ຕາມບັນດານັກໄຈ້ແຍກ ແລະ ວິເຄາະສາກົນແລ້ວ, ຄວາມສຳຄັນຂອງການຢ້ຽມຢາມມາຈາກປັດໄຈເວລາ, ນັ້ນແມ່ນສະພາບການພິເສດທີ່ສຸດ ບໍ່ພຽງແຕ່ສຳລັບການພົວພັນລະຫວ່າງສອງປະເທດເທົ່ານັ້ນ, ຫາກຍັງສຳລັບການພົວພັນສັງລວມຂ້າມມະຫາສະຫມຸດອັກລັງຕິກ ແລະ ຍິ່ງກ່ວານັ້ນອີກ.

        ສະພາບແວດລ້ອມພິເສດ              

        ສຳລັບການຢ້ຽມຢາມຄັ້ງນີ້, ທ່ານປະທານາທິບໍດີ ຝລັ່ງ Emmanuel Macron ກາຍເປັນການນຳຕ່າງປະເທດຄົນທຳອິດໄປຍັງ ວໍຊິງຕັນ ນັບແຕ່ເວລາທ່ານ Joe Biden ຂຶ້ນກຳອຳນາດເປັນການນຳ ອາເມລິກາ ໃນເດືອນ ມັງກອນ 2021.

        ແຕ່ເຖິງຢ່າງໃດກໍ່ຕາມ, ສິ່ງທີ່ຫາງສຽງສົນໃຈທີ່ສຸດນັ້ນແມ່ນໄດ້ດຳເນີນໄປໃນສະພາບການໂລກມີການຜັນແປສັບສົນ ແລະ ສະພາບການພົວພັນຂ້າມມະຫາສະໝຸດອັກລັງຕິກ ເວົ້າລວມ, ການພົວພັນ ອາເມລິກາ - ຝລັ່ງ ເວົ້າສະເພາະ, ຍັງບໍ່ທັນມີສະຖຽນລະພາບຄືນໃໝ່ເທື່ອ. ເດືອນ ກັນຍາ 2021, ຝລັ່ງ ມີປະຕິກິລິຍາຢ່າງຮຸນແຮງ, ໃນນັ້ນມີການຮຽກຕົວເອກອັກຄະລັດຖະທູດ ປະຈຳ ວໍຊິງຕັນ ກັບເມືອປະເທດເພື່ອປຶກສາ, ພາຍຫຼັງ ອາເມລິກາ ປະກາດຂໍ້ຕົກລົງຂາຍກ່ຳປັ່ນດຳນ້ຳນິວເຄຼຍໃຫ້ແກ່ອົດສະຕາລີ ໃນຂອບເຂດສະຫະພັນ AUKUS (ເຊິ່ງລວມມີ: ອົດສະຕາລີ, ລາຊະອານາຈັກ ອັງກິດ ແລະ ອາເມລິກາ). ໃນເຫດການນັ້ນ, ອົດສະຕາລີ ໄດ້ຍົກເລີກສັນຍາຊື້ກ່ຳປັ່ນດຳນ້ຳຂອງ ຝລັ່ງ ທີ່ມີມູນຄ່ານັບສິບຕື້ USD, ເພື່ອຫັນໄປຊີ້ກ່ຳປັ່ນດຳນ້ຳຂອງ ອາເມລິກາ ແລະ ອັງກິດ. ເດືອນຕຸລາຜ່ານມາ, ຄວາມເຄັ່ງຕຶງໃນການພົວພັນລະຫວ່າງສອງປະເທດສຳພັນທະມິດຍາວນານສືບຕໍ່ເກີດຂຶ້ນ, ໃນຂະນະທີ່ທ່ານປະທານາທິບໍດີ ຝລັ່ງ Emmanuel Macron ໄດ້ຕຳໜິຕິຕຽນ ອາເມລິກາ ສຳລັບເລື່ອງຂ້າຍອາຍແກັດໃຫ້ແກ່ ເອີລົບ ດ້ວຍລາຄາສູງທົບຫຼາຍເທົ່າເມື່ອທຽບໃສ່ຕະຫຼາດພາຍໃນ.

        ແຕ່ວ່າ, ໃນຫຼາຍບັນຫາສາກົນທີ່ເປັນໜ້າສົນໃຈຄືການປະທະກັນລະຫວ່າງ ລັດເຊຍ - ຢູແກຼນ, ບັນຫານິວເຄຼຍ ອີຣານ, ຍຸດທະສາດ ມະຫາສະໝຸດອິນເດຍ - ປາຊີຟິກ ເສລີ ແລະ ເປີດກ້ວາງ..., ສອງປະເທດສຳພັນທະມິດ ອາເມລິກາ - ຝລັ່ງ ເວົ້າສະເພາະ, ສະຫະພັນ ອາເມລິກາ - ເອີລົບ ເວົ້າລວມ, ພວມແບ່ງປັນທັດສະນະທີ່ຄ້າຍຄືກັນ, ພ້ອມທັງຜັນຂະຫຍາຍຫຼາຍການເຄື່ອນໄຫວສົມທົບ ແລະ ຮ່ວມມືຕົວຈິງ. ໃນການປະທະກັນລັດເຊຍ - ຢູແກຼນ, ອາເມລິກາ, ຝລັ່ງ ພ້ອມກັບບັນດາປະເທດ ພັນທະມິດເອີລົບ ໄດ້ເຫັນດີເປັນເອກະພາບການເຄື່ອນໄຫວກັບບັນດາປະເທດພັນທະມິດ ແລະ ຄູ່ຮ່ວມມືອື່ນໆທີ່ຈັດວາງຫຼາຍຄຳສັ່ງລົງໂທດຕ້ານ ມົດສະກູ, ພ້ອມທັງໃຫ້ການຊ່ວຍເຫຼືອກ້ອນໃຫຍ່ດ້ານການເງິນ, ອາວຸດ, ຍຸດທະພັນສູ້ຮົບໃຫ້ແກ່ ຢູແກຼນ. ອາເມລິກາ ແລະ ເອີລົບ ກໍ່ພວມພ້ອມກັນເຂົ້າຮ່ວມເຈລະຈາຟື້ນຟູຂໍ້ຕົກລົງນິວເຄຼຍ ອີຣານ; ການຮ່ວມມືກັບບັນດາປະເທດພັນທະມິດ ປະຕິບັດຍຸດທະສາດ ມະຫາສະໝຸດອິນເດຍ - ປາຊີຟິກ ເສລີ ແລະ ເປີດກ້ວາງ; ແກ້ໄຂບັນຫານິວເຄຼຍໃນແຫຼມ ເກົາຫຼີ; ຊຸກຍູ້ວິວັດທະນາການສັນຕິພາບ ຕາເວັນອອກກາງ...

ການນຳ ຝລັ່ງ ແລະ ອາເມລິກາ ທີ່ການຖະແຫຼງຂ່າວຢູ່ທຳນຽບຂາວ (ພາບ:Ludovic Marin/AFP/ Getty Images)

        ບັນດາເນື້ອໃນທີ່ເປັນໜ້າສົນໃຈ

          ສະພາບດັ່ງກ່າວໄດ້ອະທິບາຍວ່າເປັນຫຍັງການເຈລະຈາໃນການຢ້ຽມຢາມ ອາເມລິກາ ຄັ້ງນີ້ຂອງທ່ານປະທານາທິບໍດີ ຝລັ່ງ ບໍ່ພຽງແຕ່ສຸມໃສ່ບັນຫາສອງຝ່າຍ, ການພົວພັນລະຫວ່າງສອງຟາກຝັ່ງມະຫາສະໝຸດອັກລັງຕິກ ເທົ່ານັ້ນ, ຫາກຍັງກວມເອົາບັນດາບັນຫາສາກົນທີ່ພົ້ນເດັ່ນອີກດ້ວຍ. ໃນນັ້ນ, ເນື້ອໃນການເຈລະຈາສຸດຍອດລະຫວ່າງທ່ານປະທານາທິບໍດີ Emmanuel Macron ແລະ ທ່ານປະທານາທິບໍດີ ອາເມລິກາ Joe Biden ເມື່ອວັນທີ 1 ທັນວາ (ຕາມເວລາ ອາເມລິກາ), ລວມມີໂຄງການນິວເຄຼຍຂອງອີຣານ, ກ່ານເພີ່ມທະວີຜົນສະທ້ອນຂອງ ຈີນ ຢູ່ມະຫາສະໝຸດ ອິນເດຍ - ປາຊີຟີກ, ບັນດາຄວາມວິຕົກວົງວົນກ່ຽວກັບຄວາມໝັ້ນຄົງ ແລະ ສະຖຽນລະພາບຢູ່ພາກພື້ນ Sahel ຂອງ ອາບຟຣີກາ ແລະ ຈຸດສຸມແມ່ນບັ້ນການທະຫານຂອງລັດເຊຍ ຢູ່ ຢູແກຼນ.

        ກ່ອນທີ່ຈັດການເຈລະຈາສຸດຍອດກັບທ່ານປະທານາທິບໍດີ Joe Biden, ວັນທີ 29 ພະຈິກ, ທ່ານປະທານາທິບໍດີ Emmanuel Macron ມີການພົບປະກັບທ່ານນາງຮອງປະທານາທິບໍດີ ອາເມລິກາ Kamala Harris. ນະທີ່ນີ້, ທ່ານນາງຮອງປະທານາທິບໍດີ ອາເມລິກາ ຢັ້ງຢືນວ່າ: ຝລັ່ງ ແມ່ນປະເທດພັນທະມິດສຳຄັນຂອງ ອາເມລິກາ ແລະ ການຢ້ຽມຢາມນີ້ສະແດງກຳລັງແຮງຂອງການພົວພັນຄູ່ຮ່ວມມືລະຫວ່າງສອງຝ່າຍ. ຈາກນັ້ນ, ພາຍຫຼັງການພົບປະຢູ່ທຳນຽບ 5 ແຈໃນວັນທີ 30 ພະຈິກ, ລະຫວ່າງທ່ານ Lloyd Austin, ລັດຖະມົນຕີກະຊວງປ້ອງກັນປະເທດ ອາເມລິກາ ແລະ ທ່ານ Sebastien Lecornu, ລັດຖະມົນຕີກະຊວງປ້ອງກັນປະເທດ ຝລັ່ງ, ກະຊວງປ້ອງກັນປະເທດ ອາເມລິກາ ໄດ້ອອກຖະແຫຼງການໂດຍຊີ້ແຈ້ງວ່າ: “ສອງຝ່າຍໄດ້ຍົກສູງຄວາມສຳຄັນຂອງການຮັກສາການພົວພັນຮ່ວມມືສອງຝ່າຍ ແລະ ໄດ້ລົງນາມໃນຖະແຫຼງການຮ່ວມກ່ຽວກັບເຈດຈຳນົງຫັນບັນດາຫຼັກການລວມລະຫວ່າງສອງຝ່າຍເປັນລະບົບ. ສອງຝ່າຍກໍ່ໄດ້ປຶກສາຫາລືກ່ຽວກັບການໜູນຊ່ວຍສຳລັບ ຢູແກຼນ, ກຳລັງບົ່ມຊ້ອນຂອງອົງການສົນທິສັນຍາມະຫາສະໝຸດອັກລັງຕິກ ເໜືອ (NATO) ແລະ ການຮ່ວມມືຢູ່ພາກພື້ນມະຫາສະໝຸດອິນເດຍ - ປາຊີຟິກ”.   

        ຕາມມບັນດານັກໄຈ້ແຍກແລ້ວ, ການຢ້ຽມຢາມ ອາເມລິກາ ຄັ້ງນີ້ຂອງທ່ານປະທານາທິບໍດີ ຝລັ່ງ ເປັນຂີດໝາຍບາດກ້າວໃໝ່ໃນວິວັດທະນາການແຫ່ງການປັບປຸງ ແລະ ປັບປຸງການພົວພັນສອງຝ່າຍ ອາເມລິກາ - ຝລັ່ງ ກໍ່ຄືການພົວພັນສັງລວມ ອາເມລິກາ - ເອີລົບ. ຍິ່ງກ່ວານັ້ນ, ຫາງສຽງກໍ່ລໍຄອຍການຢ້ຽມຢາມອາດສາມາດກະທົບທີ່ມີຜົນປະໂຫຍດສຳລັບການແກ້ໄຂການປະທະກັນລັດເຊຍ - ຢູແກຼນ ໃນປະຈຸບັນ, ເມື່ອ ຝລັ່ງ ຢັ້ງຢືນຫຼາຍເທື່ອວ່າໃຫ້ບຸລິມະສິດແກ່ບັນດາຄວາມານະພະຍາຍາມຫລຸດຜ່ອນສົງຄາມ ແລະ ຢຸດຕິການປະທະກັນ. ອາທິດກ່ອນ, ທີ່ປຶກສາຂອງທ່ານປະທານາທິບໍດີ ຝລັ່ງ ບາງທ່ານ ໄດ້ໃຫ້ຮູ້ວ່າ: ພາຍຫຼັງການຢ້ຽມຢາມ ອາເມລິກາ ຄັ້ງນີ້, ທ່ານປະທານາທິບໍດີ Emmanuel Macron ຈະມີການແລກປ່ຽນກັບທ່ານປະທານາທິບໍດີ ລັດເຊຍ Vladimir Putin ໃນໄວໆນີ້ເພື່ອຊຸກຍູ້ທິດກ້າວເດີນດັ່ງກ່າວ./.