vovworld) - ປະທານາທິບໍດີ ອັກຊັງຕີນ ເລີ່ມຕົ້ນການຢ້ຽມຢາມສະຫະພັນລັດເຊຍໃນວັນທີ 22/4. ການຢ້ຽມຢາມນີ້ບໍ່ພຽງແຕ່ເພື່ອຕອບສະໜອງການຢ້ຽມຢາມຂອງປະທານາທິບໍດີ V. Putin ເຖິງ ອັກຊັງຕີນ ເມື່ອເດືອນ 7/2014 ຕາມພິທີການທູດເທົ່ານັ້ນ, ຫາກຍັງມີຄວາມໝາຍອື່ນໆອີກ. ສຳລັບລັດເຊຍ, ເພື່ອກຳນົດທີ່ຕັ້ງເປັນປະເທດມະຫາອຳນາດຄືນໃໝ່ຢູ່ພາກພື້ນອາເມລິກາລາຕີນນັ້ນ, ລັດເຊຍຈະຕ້ອງມີການພົວພັນຢ່າງແໜ້ນແຟ້ນກັບ ອັກຊັງຕີນ, ສຳລັບ ອັກຊັງຕີນ, ການສ້າງການພົວພັນສະໜິດສະໜົມກັບມົດສະກູ, ຈະຊ່ວຍ Buenos Aires ເພື່ອເພີ່ມທະວີກຳລັງແຮງດ້ານການທະຫານໃນການຂັດແຍ້ງໝູ່ເກາະ Malvinas, ເຊິ່ງອັງກິດໄດ້ປະກາດວ່າມີອະທິປະໄຕແລ້ວ.
ປະທານາທິບໍດີ Putin ແລະປະທານາທິບໍດີ Fernandez ທີ່ການພົບປະເມື່ອເດືອນ 7/2014.
(ພາບ:: AFP)
ໃນການຢ້ຽມຢາມທີ່ແກ່ຍາວເປັນເວລາ 2 ວັນ, ປະທານາທິບໍດີ Cristina Fernandez de Kirchne ພ້ອມກັບຄູ່ຕຳແໜ່ງ V. Putin ໄດ້ປຶກສາຫາລືຫຼາຍບັນຫາ, ມາດຕະການຜັນຂະຫຍາຍການຮ່ວມມືໃນຫຼາຍຂົງເຂດຫຼັກແຫຼ່ງເຊິ່ງທັງສອງຝ່າຍລ້ວນແຕ່ມີທ່າແຮງ. ແຕ່ຕາມບັນດານັກສັງເກດການ, ການຮ່ວມມືປ້ອງກັນປະເທດຈຶ່ງແມ່ນຂົງເຂດຕົ້ນຕໍໃນການພົບປະຄັ້ງນີ້ລະຫວ່າງການນຳສອງທ່ານ.
ເພີ່ມທະວີການຮ່ວມມືດ້ານການທະຫານ, ການປ້ອງກັນຊາດ
ຂ່າວຫຼ້າສຸດຈາກກະຊວງປ້ອງກັນປະເທດລັດເຊຍ ໃຫ້ຮູ້ວ່າ, ມົດສະກູ ແລະ Buenos Aires ໄດ້ເຫັນດີເປັນເອກະພາບຕໍ່ບັນດາແຜນການຍົກລະດັບການຮ່ວມມືດ້ານການທະຫານລະຫວ່າງກອງທັບສອງປະເທດໃນສະພາບການໂລກມີການຜັນແປຫຼາຍຢ່າງ. ຂໍ້ຕົກລົງນີ້ບັນລຸໄດ້ໃນການປະຊຸມລະຫວ່າງເຈົ້າໜ້າທີ່ກະຊວງປ້ອງກັນ ປະເທດສອງປະເທດ ຢູ່ນອກກອງປະຊຸມປ້ອງກັນຄວາມສະຫງົບສາກົນຄັ້ງທີ 4 ເຊິ່ງດຳເນີນຢູ່ມົດສະດູເມື່ອສັບປະດາກ່ອນ.
ກ່ອນໜ້ານັ້ນ, ໃນເດືອນ 7/2014, ປະທານາທິບໍດີລັດເຊຍ V. Putin ໄດ້ມີການພົບປະກັບຄູ່ຕຳແໜ໋ງ Cristina Fernandez de Kirchne ແລະ ປຶກສາຫາລືຫຼາຍບັນຫາ, ໃນນັ້ນເນັ້ນໜັກເຖິງການຮ່ວມມືດ້ານການທະຫານ, ການປ້ອງກັນຊາດ, ຖືນີ້ແມ່ນການຮ່ວມມືທີ່ສຳຄັນໃນໄລຍະໃໝ່. ຕາມນັ້ນແລ້ວ, ມົດສະກູ ໃຫ້ຄຳໝັ້ນສັນຍາກຽມພ້ອມເປີດກວ້າງການຮ່ວມມື ແລະ ບຳລຸງສ້າງເຈົ້າໜ້າທີ່ດ້ານການທະຫານ ຫຼືກອງທັບໃຫ້ບັນດາປະເທດອາເມລິກາລາຕີນ ແລະ ອັກຊັງຕີນ. ສິ່ງສຳຄັນໃນການຢ້ຽມຢາມຄັ້ງນີ້ແມ່ນ, ສອງຝ່າຍໄດ້ເຫັນດີຕໍ່ແຜນການຂອງ ລັດເຊຍ ຂາຍຍົນສູ້ຮົບໄລຍະໄກ Su-24, 12 ລຳໃຫ້ ອັກຊັງຕີນ. ສ່ວນ ອັກຊັງຕີນ ກໍ່ສະໜອງໃຫ້ລັດເຊຍເຂົ້າບະເລ, ຜະລິດຕະພັນທີ່ປຸງແຕ່ງຈາກຊີ້ນ ແລະ ຜະລິດຕະພັນກະເສດອື່ນໆ. ເປັນອັນວ່າ, ການຢ້ຽມຢາມຄັ້ງນີ້, ນອກຈາກຈຸດປະສົງຊຸກຍູ້ການພົວພັນດ້ານການຄ້າສອງຝ່າຍແລ້ວ, ລັດເຊຍ ແລະ ອັກຊັງຕີນ ຍັງຈະເຊັນສັນຍາຊື້ຂາຍອຸປະກອນດ້ານການທະຫານ ແລະ ກາຍເປັນຄູ່ຮ່ວມມືຍຸດທະສາດຂອງກັນໃນຂົງເຂດປ້ອງກັນຊາດ, ປ້ອງກັນຄວາມສະຫງົບອີກດ້ວຍ.
ທັງສອງຝ່າຍຕ່າງມີຜົນປະໂຫຍດ
ການພົວພັນລະຫວ່າງລັດເຊຍ - ອັກຊັງຕີນ ແມ່ນພັດທະນາຕາມທິດທີ່ດີງາມ. ເຖິງຢ່າງໃດກໍ່ຕາມ, ການພົວພັນຍັງຖືກຈຳກັດຢູ່ ແລະ ຕົ້ນຕໍແມ່ນໃນຂົງເຂດການຄ້າ. ຍ້ອນເຫດນັ້ນການພົວພັນອັນດີງາມນີ້ບໍ່ທັນໄດ້ຮັບການໝູນໃຊ້ຢ່າງເຖິງຖອງເພື່ອນຳມາເຊິ່ງຜົນປະໂຫຍດກວ່າອີກໃຫ້ທັງສອງຝ່າຍ.
ແຕ່ໃນສະພາບຝ່າຍຕາເວັນຕົກນຳໃຊ້ຫຼາຍມາດຕະການລົງໂທດ ລັດເຊຍ ນັ້ນ, ໄດ້ເຮັດໃຫ້ປະເທດນີ້ຕ້ອງຊອກຫາ, ເປີດກວ້າງຕະຫຼາດໄປສູ່ອາເມລິກາລາຕີນ. ໂດຍຜ່ານການເພີ່ມທະວີການພົວພັນດ້ານການຄ້າກັບບັນດາປະເທດອາເມລິກາໃຕ້ຄື ອັກຊັງຕີນ, ລັດເຊຍ ຈະບໍ່ສາມາດສົ່ງຜົນສະທ້ອນໃນບັນຫາຢູແກຼມ ອີກ ຍ້ອນຄຳສັ່ງຂວ້ຳບາດ ແລະ ລົງໂທດຂອງເອີລົບ - ອາເມລິກາ. ພ້ອມກັນນັ້ນ, ການເພີ່ມທະວີກຳລັງແຮງດ້ານການທະຫານໃຫ້ ອັກຊັງຕີນ, ກໍ່ແມ່ນວິທີຊຶ່ງ ມົດສະກູ “ຢາກກ່າວເຕືອນ“ ອັງກິດ, ເຊິ່ງແມ່ນປະເທດນຳໜ້າໃນການສະໜັບສະໜູນບັນດາຄຳສັ່ງລົງໂທດ ລັດເຊຍ.
ໃນຂະນະນັ້ນ, ບັນຫາໝູ່ເກາະ Malvinas ກໍ່ແມ່ນບັນຫາສັບສົນໃນການພົວພັນລະຫວ່າງ ອັກຊັງຕີນ ກັບອັງກິດ. ໝູ່ເກາະນີ້ໂດຍ ອັກຊັງຕີນ ປະກາດອະທິປະໄຕ, ແຕ່ພັດຂຶ້ນກັບສິດຄຸ້ມຄອງຂອງອັງກິດນັບແຕ່ປີ 1830. ປີ 1982, ອຳນາດການປົກຄອງ Buenos Aires ໄດ້ດຳເນີນສົງຄາມກັບລອນດອນ ເພື່ອຢືດຄອງໝູ່ເກາະນີ້ຄືນໃໝ່, ແຕ່ພັດຖືກປະລາໄຊ. ນັບແຕ່ນັ້ນມາຮອດປະຈຸບັນ, ການພົວພັນລະຫວ່າງອັງກິດ - Buenos Aires ເຄີຍເກີດບັນຫາ. ຫວ່າງແລ້ວນີ້, ອັກຊັງຕີນ ປະກາດເພີ່ມງົບປະມານດ້ານການທະຫານໃນປີ 2015 ໄດ້ພາໃຫ້ອັງກິດ ວິຕົກກັງວົນທີ່ສຸດ. ຍ້ອນເຫດນັ້ນ, ອັງກິດ ໄດ້ປະກາດມີແຜນການເພີ່ມທະວີງົບປະມານປ້ອງກັນຄວາມສະຫງົບໃຫ້ໝູ່ເກາະອາເມລິກາໃຕ້ນີ້ ເພື່ອຮັບມືກັບຄວາມມານະພະຍາຍາມເພີ່ມທະວີກຳລັງແຮງດ້ານການທະຫານຂອງ Argentine.
ຕໍ່ໜ້າການພົວພັນອັນສະໜິດສະໜົມລະຫວ່າງລັດເຊຍ ກັບບັນດາປະເທດອາເມລິກາໃຕ້, ບໍ່ພຽງແຕ່ອັງກິດ, ຫາກອາເມລິກາ ກໍ່ວິຕົກກັງວົນ. ການຢ້ຽມຢາມສະຫະພັນລັດເຊຍ ໃນຄັ້ງນີ້ຂອງປະທານາທິບໍດີ Argentine ດ້ວຍຈຸດປະສົງຮ່ວມມືດ້ານການປ້ອງກັນຊາດ, ໄດ້ເປັນຂີດໝາຍການກັບຄືນອາເມລິກາໃຕ້ຂອງລັດເຊຍ, ທັງເປັນການທ້າທາຍໃໝ່ໃຫ້ອາເມລິກາ ແລະ ບັນດາປະເທດພັນທະມິດຝ່າຍຕາເວັນຕົກ. ໃນຊຸມມື້ຈະມາເຖິງ, ປະຊາຄົມໂລກອາດຈະເຫັນປະຈັກຕາການຊ່ວງເສັງອາວຸດໃນພາກພື້ນນີ້.