(vovworld)- ປະທານາທິບໍດີ ເວເນຊູເອລາ, ທ່ານ Nicolas Maduro Moros ພວມດຳເນີນການຢ້ຽມຢາມ ຫວຽດນາມ ຢ່າງເປັນທາງການ ໃນເວລາ 2 ວັນ. ເວເນຊູເອລາ ແລະ ຫວຽດນາມ ມີການພົວພັນທີ່ເປັນມູນເຊື້ອມາແຕ່ດົນນານ, ສະນັ້ນ ການຢ້ຽມຢາມຫວຽດນາມຄັ້ງນີ້ຂອງ Nicolas Maduro Moros ຈະສ້າງຂີດໝາຍໃຫມ່ ອັນດີງາມໃນການພົວພັນລະຫວ່າງສອງປະເທດ, ເຮັດໃຫ້ນ້ຳໃຈມິດຕະພາບ ແລະ ການພົວພັນຄູ່ຮ່ວມມືຮອບດ້ານລະຫວ່າງ ຫວຽດນາມ ແລະ ເວເນຊູເອລາ ໝັ້ນຄົງ ແລະ ແທດຈິງກວ່າ.
ປະທານາທິບໍດີ ເວເນຊູເອລາ
Nicolas Maduro Moros
ພາບ:internet
|
ໂດຍຕັ້ງຢູ່ພາກພື້ນ ອາເມລິກາໃຕ້, ເວເນຊູເອລາ ເຖິງວ່າຢູ່ຫ່າງໄກກັບຫວຽດນາມເຄິ່ງຫນ່ວຍພິພົບກໍຕາມ ແຕ່ການພົວພັນລະຫວ່າງສອງປະເທດໄດ້ມີການສະຫນິດຕິດພັນມາແຕ່ດົນນານແລ້ວ. ຫວຽດນາມ ແລະ ເວເນຊູເອລາ ສ້າງຕັ້ງສາຍພົວພັນທາງການທູດເມື່ອເດືອນ 12/1989. ໃນສະໄຫມຕໍ່ສູ້ກູ້ຊາດຂອງປະຊາຊົນຫວຽດນາມ, ຂະບວນການສາມັກຄີ ແລະ ສະຫນັບສະຫນູນ ຫວຽດນາມ ໄດ້ພັດທະນາຢ່າງແຮງ ແລະ ກວ້າງຂວາງໃນທົ່ວປະເທດ ເວເນຊູເອລາ. ໃນໄລຍະສ້າງສາ ແລະ ພັດທະນາປະເທດຊາດ, ມີຫລາຍຈຸດຄ້າຍຄືກັນຂອງສອງປະເທດໄດ້ສືບຕໍ່ນຳ ຫວຽດນາມ ແລະ ເວເນຊູເອລາ ສະຫນິດຕິດພັນນຳກັນກວ່າ. ຍາມໃດ ຫວຽດນາມ ກໍເອົາໃຈໃສ່ເຖິງບັນດານະໂຍບາຍປະຕິຮູບສັງຄົມ ມຸ້ງໄປເຖິງຄົນທຸກຍາກ, ມານະພະຍາຍາມປະຕິບັດຄວາມຍຸຕິທຳສັງຄົມຂອງບັນດາການນຳ ເວເນຊູເອລາ. ບັນດາບົດຮຽນຂອງຫວຽດນາມ ໃນວິວັດທະນາການປ່ຽນແປງໃຫມ່ ແລະ ພັດທະນາເສດຖະກິດ ໄດ້ຮັບການຕີລາຄາສູງຈາກ ເວເນຊູເອລາ ແລະ ປາດຖະຫນາຢາກໄດ້ຮັບການແບ່ງປັນນຳກັນ.
ພື້ນຖານກວ່າ 25 ປີແຫ່ງການພົວພັນອັນດີງາມ.
ນັບແຕ່ ເມື່ອສ້າງຕັ້ງການພົວພັນທາງການທູດຢ່າງເປັນທາງການໃນປີ 1989, ສອງຝ່າຍ ໄດ້ຮັກສາການແລກປ່ຽນບັນດາຄະນະຜູ້ແທນຂັ້ນສູງເປັນປະຈຳ, ສ້າງຄວາມໄວ້ເນື້ອເຊືື່ອໃຈດ້ານການເມືອງຢ່າງສູງ. ສະມາຄົມມິດຕະພາບ ຫວຽດນາມ- ເວເນຊູເອລາ ໄດ້ຮັບການສ້າງຕັ້ງຂຶ້ນເມື່ອປີ 2006 ເນື່ອງໃນໂອກາດການຢ້ຽມຢາມຫວຽດນາມ ຢ່າງເປັນທາງການຂອງປະທານາທິບໍດີ ເວເນຊູເອລາ Hugo Chavez. ເດືອນ 5/ 2007, ສອງຝ່າຍເຫັນດີຍົກການພົວພັນລະຫວ່າງສອງປະເທດຂຶ້ນສູ່ລະດັບການພົວພັນຄູ່ຮ່ວມມືຮອບດ້ານ. ທ່ານ Jorge Rondon Uzcategui, ເອກອັກຄະລັດຖະທູດ ເວເນຊູເອລາ ປະຈຳຫວຽດນາມ ຢືນຢັນວ່າ:
“ດ້ວຍວິໄສທັດທີ່ຍາວໄກຂອງປະທານາທິບໍດີ ເວເນຊູເອລາ Hugo Chavez ກ່ຽວກັບນະໂຍບາຍດ້ານການທູດ, ເວເນຊູເອລາ ຖື ຫວຽດນາມ ແມ່ນຄູ່ຮ່ວມມືທີ່ໄວ້ເນື້ອເຊື່ອໃຈໃນການສ້າງສາ ແລະ ພັດທະນາເສດຖະກິດປະເທດຊາດ ແລະ ແມ່ນພັນທະມິດຍຸດທະສາດໃນຂອບເຂດສາກົນ ເພື່ອສ້າງໂລກຫລາຍຂົ້ວກ່ຽວກັບຄວາມສາມັກຄີ ແລະ ຂອບເຂດການຮ່ວມມື ລະຫວ່າງບັນດາປະເທດພວມພັດທະນາ.”
ບົນພື້ນຖານຄວາມໄວ້ເນື້ອເຊື່ອໃຈດ້ານການເມືອງຢ່າງສູງ, ຫວຽດນາມ ແລະ ເວເນຊູເອລາ ໄດ້ຜັນຂະຫຍາຍຫລາຍໂຄງການຮ່ວມມືທີ່ມີປະສິດທິຜົນ. ນັ້ນແມ່ນ ບັນດາໂຄງການຮ່ວມມືທີ່ພົ້ນເດັ່ນຄື: ບໍລິສັດຮ່ວມທຸລະກິດ ນ້ຳມັນອາຍແກສ Petro Macareo ລະຫວ່າງ ບໍລິສັດໃຫຍ່ສຳຫລວດນ້ຳມັນອາຍແກສຫວຽດນາມ (PVEP) ຂຶ້ນກັບກຸ່ມບໍລິສັດນ້ຳມັນອາຍແກສ ແຫ່ງຊາດ ຫວຽດນາມ (Petro VietNam) ກັບບໍລິສັດໃຫຍ່ນ້ຳມັນ ເວເນຊູເອລາ- ສາຂາຂອງກຸ່ມບໍລິສັດນ້ຳມັນແຫ່ງຊາດ Petroleos de Venezuela (PDVSA), ໂຄງການຮ່ວມທຸລະກິດຜະລິດຊອບແວ ແລະ ເຕັກໂນໂລຊີຂໍ້ມູນຂ່າວສານ, ໂຄງການຮ່ວມທຸລະກິດຜະລິດດອກໄຟເຍືອງທາງ, ດອກໄຟ, ໂຄງການກໍ່ສ້າງພື້ນຖານໂຄງລ່າງຂົນສົ່ງທະເລ, ໂຄງການກໍ່ສ້າງເຮືອນຢູ່.
ວົງເງິນແລກປ່ຽນດ້ານການຄ້າລະຫວ່າງ ຫວຽດນາມ ແລະ ເວເນຊູເອລາ ຮັກສາທ່າເຕີບໂຕ, ເປັນຕົ້ນ ໃນໄລຍະ 3 ປີມໍ່ໆມານີ້. ຄະນະກຳມະການລະຫວ່າງ ລັດຖະບານສອງປະເທດໄດ້ດຳເນີນກອງປະຊຸມເປັນສອງຄັ້ງ ແລະ ລົງນາມໃນເອກະສານຮ່ວມມືໃນທຸກຂົງເຂດ 5 ສະບັບຄື: ພະລັງງານ, ນ້ຳມັນອາຍແກສ, ກະສິກຳ ປ່າໄມ້ ແລະ ການປະມົງ, ຖະແຫລງຂ່າວສື່ສານ, ວັດທະນະທຳ, ການສຶກສາ, ກິລາ, ທ່ອງທ່ຽວ. ທີ່ກອງປະຊຸມຈັດຂຶ້ນໃນເດືອນ 3/2015 ຜ່ານມາ, ສອງຝ່າຍເຫັນດີສືບຕໍ່ວາງຈຸດສຸມການຮ່ວມມືສອງຝ່າຍເຂົ້າໃນບັນດາຂົງເຂດເສດຖະກິດ, ພະລັງງານ, ນ້ຳມັນອາຍແກສ ແລະ ກະສິກຳ, ຊຸກຍູ້ການລົງທຶນຂອງຫວຽດນາມເຂົ້າ ເວເນຊູເອລາ ໃນບັນດາຂົງເຂດ: ອຸດສາຫະກຳປະດິດສ້າງ ແລະຕິດຕັ້ງ, ໄຟຟ້າ ແລະ ເຄື່ອງໄຟຟ້າໃຊ້ໃນຄອບຄົວ, ການກໍ່ສ້າງ.
ກ່ຽວກັບການຮ່ວມມືຫລາຍຝ່າຍ, ຫວຽດນາມ ແລະ ເວເນຊູເອລາ ຍາມໃດກໍສະຫງວນການສະຫນັບສະຫນູນໃຫ້ກັນ. ເວເນຊູເອລາ ສະຫນັບສະຫນູນ ຫວຽດນາມເຂົ້າເປັນສະມາຊິກ ອົງການການຄ້າ ໂລກ (WTO) ແລະ ຮັບຮູ້ຂໍ້ກຳນົດກົດລະບຽບການຕະຫລາດຂອງຫວຽດນາມ, ສະຫນັບສະຫນູນ ຫວຽດນາມ ກາຍເປັນສະມາຊິກ ບໍ່ປະຈຳການສະພາຄວາມໝັ້ນຄົງ ສປຊ (ຊຸດທີ 2008-2009) ແລະ ກາຍເປັນສະມາຊິກສະພາສິດທິມະນຸດ ສປຊ ອາຍຸການ 2015-2016. ຍາມໃດຫວຽດນາມ ກໍເອົາໃຈໃສ່ສະຫນັບສະຫນູນພາລະກິດສ້າງສາ ແລະ ພັດທະນາປະເທດຊາດຂອງ ເວເນຊູເອລາ.
ການພົວພັນສອງຝ່າຍ ຈະສືບຕໍ່ ພັດທະນາແບບຍືນຍົງ
ປີ 2014, ຫວຽດນາມ ແລະ ເວເນຊູເອລາ ສະເຫລີມສະຫລອງ 25 ປີ ແຫ່ງວັນສ້າງຕັ້ງສາຍພົວພັນທາງການທູດ ແລະ ກໍແມ່ນປີເປັນຂີດໝາຍ 50 ປີແຫ່ງການພົບປະລະຫວ່າງ ປະຊາຊົນ ເວເນຊູເອລາ ແລະ ຫວຽດນາມ, ທ່ານ Jorge Rondon Uzcategui ເອກອັກຄະລັດຖະທູດ ເວເນຊູເອລາ ປະຈຳ ຫວຽດນາມ ໄດ້ເນັ້ນຫນັກວ່າ: ຫວຽດນາມແລະ ເວເນຊູເອລາ ໄດ້ສ້າງການພົວພັນພັດທະນາແບບຍືນຍົງ ແລະ ມີປະສິດທິຜົນໃນໄລຍະສັ້ນ ເພາະ ສອງປະເທດ ມີຫລາຍຈຸດຄ້າຍຄືກັນໃນການຕໍ່ສູ້ປົກປັກຮັກສາເສລີພາບກໍຄືຊອກຫາເສັ້ນທາງດີສຸດໃຫ້ຄວາມຈະເລີນຮຸ່ງເຮືອງຂອງປະຊາຊົນ. ສະນັ້ນ ປະຊາຊົນ ສອງປະເທດ ມີຄວາມເຊື່ອໝັ້ນວ່າ ການພົວພັນຄູ່ຮ່ວມມືຮອບດ້ານລະຫວ່າງສອງຊາດຈະນັບມື້ນັບແຫນ້ນແຟ້ນກວ່າ:
“ແງ່ຫວັງໃນການພົວພັນໄລຍະກາງ ແລະ ຍາວ ລະຫວ່າງສອງປະເທດ ແມ່ນເຕັມໄປດ້ວຍຄວາມປະເອີບໃຈ, ຍ້ອນມີແນວຄິດ, ຜົນປະໂຫຍດລວມ ແລະ ຄວາມຈຳເປັນເພື່ອເຮັດໃຫ້ການພົວພັນທາງດ້ານເສດຖະກິດ, ການເງິນ, ພະລັງງານ, ເຕັກນິກ, ວັດທະນະທຳ, ກະສິກຳ ແລະ ບັນດາຂົງເຂດອື່ນ. ພວກຂ້າພະເຈົ້າເຊື່ອໝັ້ນວ່າ ພາຍຫລັງ 25 ປີແຫ່ງວັນສ້າງຕັ້ງສາຍພົວພັນທາງການທູດ, ຫວຽດນາມ ແລະ ເວເນຊູເອລາ ບໍ່ພຽງແຕ່ສະຫນິດຕິດພັນກວ່າໃນຊຸມປີຈະມາເຖິງເທົ່ານັ້ນ ຫາກຍັງສືບຕໍ່ມານະພະຍາຍາມເພື່ອປັບປຸງການພົວພັນຄູ່ຮ່ວມມືຍຸດທະສາດທີ່ໄວ້ເນື້ອເຊື່ອໃຈໃນທຸກຂົງເຂດອີກດ້ວຍ.”
ບົນພື້ນຖານອັນດີງາມນັ້ນ, ການຢ້ຽມຢາມ ຫວຽດນາມ ຢ່າງເປັນທາງການຄັ້ງນີ້ຂອງທ່ານປະທານາທິບໍດີ ເວເນຊູເອລາ Nicola Maduro Moros ຈະສ້າງຂີດໝາຍ ໃຫມ່, ຊຸກຍູ້ການພົວພັນຄູ່ຮ່ວມມືຮອບດ້ານ ຫວຽດນາມ ແລະ ເວເນຊູເອລາ ສືບຕໍ່ພັດທະນາເປັນປົກກະຕິ, ແທດຈິງ ແລະ ມີປະສິດທິຜົນ.