ປະເທດ ອາເມລິກາ ພວມຢຶນຢູ່ຕໍ່ໜ້າຈຸດເວລາທີ່ສຳຄັນ, ການໝັ້ນໝາຍຈະເປີດໜ້າປະຫວັດສາດໃໝ່ຍ້ອນວ່າພາຍຫຼັງການເລືອກຕັ້ງໃນວັນທີ 8/11, ສະຫະລັດ ອາເມລິກາ ຈະມີປະທານາທິບໍດີຄົນໃໝ່, ເປັນເຈົ້າຂອງຜູ້ທີ 45 ຂອງທຳນຽບຂາວ. ປະເທດ ອາເມລິກາ ຈະໄດ້ຕ້ອນຮັບປະທານາທິບໍດີຍິງຜູ້ທຳອິດໃນປະຫວັດສາດ, ຜູ້ສະໝັກຮັບເລືອກຕັ້ງຂອງພັກປະຊາທິປະໄຕ Hillary Clinton ຫຼື ນັກທຸລະກິດເສດຖີເງິນຕື້ Donald Trump ຂອງພັກສາທາລະນະ? ຄຳຖາມນີ້ຈະມີຄຳຕອບພາຍຫຼັງມີໝາກຜົນເບື້ອງຕົ້ນຂອງການນັບບັດເລືອກຕັ້ງ.
.jpg)
ຜູ້ມີເລືອກຕັ້ງໄປປ່ອນບັດຢູ່ San Diego, ນະຄອນ San Diego.
(ພາບ:Reuters)
|
ການເລືອກຕັ້ງຄັ້ງນີ້ໄດ້ຮັບການຕີລາຄາວ່າແມ່ນຂ້ຽວຂາດທີ່ສຸດໃນປະຫວັດສາດຂອງພື້ນຖານການເມືອງ ອາເມລິກາ. ຍ້ອນວ່າ, ນີ້ແມ່ນຄັ້ງທຳອິດ, ທີ່ປະເທດ ອາເມລິກາ ມີຜູ້ສະໝັກຮັບເລືອກຕັ້ງ 2 ຄົນມີທັດສະນະກົງກັນຂ້າມ ກ່ຽວກັບນະໂຍບາຍພາຍໃນປະເທດ, ຕ່າງປະເທດ. ບໍ່ພຽງແຕ່ເທົ່ານັ້ນ, ຜູ້ສະໝັກຮັບເລືອກຕັ້ງທັງ 2 ທ່ານນີ້ລ້ວນແຕ່ມີຄຳກ່າວຫາທີ່ກ່ຽວຂ້ອງເຖິງຄວາມຫຍຸ້ງເຫຍືອງສ່ວນຕົວອີກ.
Hillary Clinton, Donald Trump – ສອງຄົນທີ່ມີທັດສະນະກົງກັນຂ້າມ
ອາດສາມາດເຫັນໄດ້ວ່າ, ໃກ້ຈະເຖິງວັນເລືອກຕັ້ງ, ຊ່ອງຫວ່າງກ່ຽວກັບອັດຕາສ່ວນຜູ້ສະໜັບສະໜູນສຳລັບຜູ້ສະໝັກຮັບເລືອກຕັ້ງ 2 ທ່ານນັບມື້ນັບໄດ້ຮັບການຮັດແຄບເຂົ້າ. ສິ່ງດັ່ງກ່າວໄດ້ສະແດງໃຫ້ເຫັນວ່າບໍ່ມີຜູ້ສະໝັກຮັບເລືອກຕັ້ງຜູ້ໃດມີທ່າໄດ້ປຽບກ່ວາຫຼາຍ.
ໂດຍເປັນຜູ້ສະໝັກຮັບເລືອກຕັ້ງຂອງພັກປະຊາທິປະໄຕ, ທັງເປັນອະດີດນັກການເມືອງທີ່ເຄີຍດຳລົງຕຳແໜ່ງເປັນລັດຖະມົນຕີການຕ່າງປະເທດ ອາເມລິກາ, ທ່ານນາງ Clinton ຍາມໃດກໍ່ມີແຜນນະໂຍບາຍຢ່າງສະເໝີຕົ້ນສະເໝີປາຍນັ້ນແມ່ນສືບຕໍ່ເດີນຕາມແຜນນະໂຍບາຍບໍລິຫານຂອງອຳນາດການປົກຄອງຂອງທ່ານປະທານາທິບໍດີ Barack Obama ໃນຕະຫຼອດວິວັດທະນາການແຫ່ງການຂົນຂວາຍຫາສຽງເລືອກຕັ້ງ, ຄື: ເພີ່ມທະວີການຄວບຄຸມປືນ, ລູກປືນ, ເປີດກ້ວາງໂຄງການສົ່ງເສີມສຸຂະພາບຂອງທົ່ວປວງຊົນ (Obamacare), ປ້ອງກັນປະຊາຄົມຊາວມຸດສະລິມເຂົ້າເມືອງຜ່ານການຮຽກຮ້ອງການປະຕິຮູບກົດໝາຍວ່າດ້ວຍການເຂົ້າເມືອງ, ໃນນັ້ນ ມີວິວັດການສະໜອງສິດພົນລະເມືອງໃຫ້ບັນດາຜູ້ທີ່ພວມອາໄສຢູ່ ອາເມລິກາ ຢ່າງຜິດກົດໝາຍພ້ອມທັງສະໜັບສະໜູນການບໍ່ເນລະເທດຄົນເຂົ້າເມືອງທີ່ຜິດກົດໝາຍນັບລ້ານຄົນ. ໃນຂົງເຂດພົວພັນຕ່າງປະເທດ, ໂດຍແມ່ນນັກການທູດມີປະສົບການ, ທ່ານນາງ Clinton ມີແຜນນະໂຍບາຍເພື່ອເພີ່ມທະວີການພົວພັນກັບບັນດາປະເທດ ພັນທະມິດທີ່ມີມາແຕ່ດົນນານ ແລະ ສ້າງບັນດາການພົວພັນໃໝ່. ຕາມທ່ານນາງແລ້ວ, ເລື່ອງເປີດກ້ວາງ ແລະ ເຮັດໃຫ້ບັນດາຄຳໝັ້ນສັນຍາສາກົນເລິກເຊິ່ງກ່ວາອີກ ແມ່ນວິທີດີທີ່ສຸດເພື່ອປົກປ້ອງສິດຜົນປະໂຫຍດອັນຍາວນານ ກໍ່ຄືຍົກສູງທີ່ຕັ້ງບົດບາດຂອງ ອາເມລິກາ ໃນເວທີສາກົນ.
ໃນຂະນະນັ້ນ, ເສດຖີເງິນຕື້ Donald Trump, ດ້ວຍບັນດາຖະແຫຼງການທີ່ກໍ່ຄວາມ “ຕົກສະເງີ້“ ເມື່ອຢືນຢັນບັນດາມາດຕະການຕ່າງໆເຊັ່ນ: ເພີ່ມອັດຕາພາສີສຳລັບຄົນຮັ່ງມີເພື່ອຮັບປະກັນຊີວິດສັງຄົມ, ການລົງທຶນໃຫ້ແກ່ຂົງເຂດການສຶກສາ, ການແພດ ເພື່ອຜົນປະໂຫຍດອັນຍາວນານ. ພ້ອມກັນນັ້ນ, ທ່ານກໍ່ຮຽກຮ້ອງໃຫ້ບັນດາປະເທດພັນທະມິດຕ້ອງສົ່ງເງິນຄືນໃຫ້ ອາເມລິກາ ເພື່ອຮັບປະກັນຄວາມປອດໄພ. ໃນບັນຫາອົບພະຍົບ, ທ່ານ Trump ຍັງຄົງຮັກສາທັດສະນະສົ່ງຊາວອົບພະຍົບຢ່າງຜິດກົດໝາຍກັບຄືນປະເທດ, ກໍ່ສ້າງຮົ້ວປ້ອງກັນຄວາມສະຫງົບຢູ່ລຽບຕາມເຂດຊາຍແດນກັບ Mexico… ໂດຍແມ່ນເສດຖີເງິນຕື້, ທ່ານຢືນຢັນວ່າ, ບຸລິມາສິດແຖວໜ້າແມ່ນພັດທະນາເສດຖະກິດ, ເຮັດໃຫ້ປະເທດ ອາເມລິກາ ມີຄວາມເຂັ້ມແຂງແຮງກ້າຄືນໃໝ່, ດ້ວຍບັນດານະໂຍບາຍຄື: ອາລັກຂາດ້ານການຄ້າ, ຄັດຄ້ານການຄ້າເສລີ ພ້ອມກັບບັນດາສັນຍາການຄ້າທີ່ມີຢູ່ແລ້ວ, ທ່ານປະກາດວ່າ, ຈະປຶກສາຫາລືຄືນບັນດາມາດຕາຂອງສັນຍາການຄ້າເສລີ ອາເມລິກາເໜືອ (NAFTA) ແລະ ຖອນອອກຈາກສັນຍາຄູ່ຮ່ວມມືຂ້າມປາຊິຟິກ (TPP), ລົບລ້າງຂໍ້ກຳນົດຂອງສະຫະລັດເຖິງ 70%, ຫຼຸດຜ່ອນພາສີອາກອນວິສາຫະກິດລົງເຫຼືອພຽງ 15%.
ຍ້ອນຄວາມແຕກຕ່າງກັນກ່ຽວກັບທັດສະນະປະຕິບັດນະໂຍບາຍລະຫວ່າງຜູ້ສະໝັກຮັບເລືອກຕັ້ງສອງທ່ານ ໄດ້ເຮັດໃຫ້ການຫາສຽງເລືອກຕັ້ງປີນີ້ດຳເນີນໄປຢ່າງຂ້ຽວຂາດ ແລະ ຍາກທີ່ຈະຄາດຄະເນລ່ວງໜ້າໄດ້.
ຄວາມມານະພະຍາຍາມຍາດເອົາບັດສະໜັບສະໜູນຈາກຜູ້ຕາງໜ້າຜູ້ມີສິດເລືອກຕັ້ງ
ໄລ່ມາຮອດຈຸດເວລານີ້ມີຜູ້ມີສິດເລືອກຕັ້ງປະມານ 40 ລ້ານຄົນ ໄດ້ໄປປ່ອນບັດເລືອກຕັ້ງກ່ອນກຳນົດເວລາ, ແລະ ການຢັ່ງຫາງສຽງຄັ້ງຕ່າງໆໄດ້ສະແດງໃຫ້ເຫັນວ່າ ບໍ່ມີຄວາມຜິດໂຕນກັນປານໃດລະຫວ່າງຜູ້ສະໝັກຮັບເລືອກຕັ້ງສອງທ່ານ. ເປັນອັນວ່າ, ຄວາມສົນໃຈທັງໝົດແມ່ນສຸມໃສ່ການເຄື່ອນໄຫວເລືອກຕັ້ງຢູ່ລັດຕ່າງໆທີ່ບໍ່ທັນຮູ້ຜົນແຫ່ງການເລືອກຕັ້ງຢ່າງຈະແຈ້ງເຊັ່ນ: Florida, Maine, Nebraska, New Hampshire, North Carolina, Ohio, Utah… ດ້ວຍຈຳນວນບັດທັງໝົດຂອງຜູ້ຕາງໜ້າຜູ້ມີສິດເລືອກຕັ້ງ 94 ບັດ. ນີ້ແມ່ນບັນດາລັດທີ່ມີຜູ້ມີສິດເລືອກຕັ້ງຈຳນວນຫຼາຍ ສາມາດສົ່ງຜົນສະທ້ອນເຖິງຜົນສຸດທ້າຍຂອງການເລືອກຕັ້ງ. ຜົນແຫ່ງການສຳຫຼວດຄັ້ງສຸດທ້າຍຂອງ Reuters/Ipsos ເຊິ່ງປະກາດໃນຕອນບ່າຍວັນທີ 7/11, ໃຫ້ເຫັນວ່າ, ທ່ານນາງ Clinton ພວມນຳໜ້າທ່ານ Trump ດ້ວຍອັດຕາ 45% ເມື່ອທຽບໃສ່ 42% ແລະ ຄາດວ່າທ່ານນາງຈະໄດ້ຮັບບັດສະໜັບສະໜູນຈາກຜູ້ຕາງໜ້າຜູ້ມີສິດເລືອກຕັ້ງ 303/270 ບັດ, ເຊິ່ງແມ່ນຈຳນວນບັດທີ່ຈຳເປັນເພື່ອໄດ້ຮັບໄຊຊະນະ, ສ່ວນທ່ານ Trump ອາດຈະໄດ້ຮັບ 235 ບັດ. ເພື່ອໄດ້ຮັບເລືອກຕັ້ງເປັນປະທານາທິບໍດີ, ທ່ານ Trump ຕ້ອງໄດ້ຮັບໄຊຊະນະຢູ່ບັນດາລັດ Florida, Maichigan, North Carolina, Ohio, Pennsylvania, ເຊິ່ງແມ່ນແຫ່ງທີ່ທ່ານນາງ Clinton ພວມນຳໜ້າດ້ວຍປະມານ 3 ຄະແນນ. ຖ້າຜູ້ສະໝັກຮັບເລືອກຕັ້ງຂອງພັກ ສາທາລະນະ ຖືກປະລາໄຊຢູ່ 2 ໃນຈຳນວນ 3 ລັດຄື: Florida, Maichigan ແລະ Pennsylvania, ຜົນສຸດທ້າຍຈະຂຶ້ນກັບທ່ານນາງ Clinton . ພ້ອມກັນນັ້ນ, ທ່ານ Trump ກໍ່ຕ້ອງຮັກສາທ່າໄດ້ປຽບຢູ່ບັນດາລັດຂອງພັກສາທາລະນະ Arizona, ເຊິ່ງແມ່ນແຫ່ງທີ່ຜູ້ສະໝັກຮັບເລືອກຕັ້ງທັງສອງທ່ານພວມມີຄະແນນເທົ່າທຽມກັນ. North Carolina, ແມ່ນໜຶ່ງໃນບັນດາລັດທຳອິດທີ່ປະກາດຜົນການເລືອກຕັ້ງໃນຕອນຄຳ່ວັນທີ 8/11 ອາດຈະສະໜອງຂໍ້ມູນຂ່າວສານປຽບທຽບທີ່ສຳຄັນໃຫ້ແກ່ໝາກຜົນສຸດທ້າຍ. ຜົນແຫ່ງການປ່ອນບັດກ່ອນກຳນົດເວລາຢູ່ລັດນີ້ສະແດງໃຫ້ເຫັນວ່າ, ທ່ານ Trump ໄດ້ຊະນະທ່ານນາງ Clinton ພຽງຢູ່ໃນລະດັບ 47% ເມື່ອທຽບໃສ່ 46%, ດ້ວຍຈຳນວນບັດຂອງຜູ້ຕາງໜ້າຜູ້ມີສິດເລືອກຕັ້ງ 29 ບັດເທົ່ານັ້ນ. ທ່ານນາງ Clinton ພຽງແຕ່ໄດ້ຮັບໄຊຊະນະຢູ່ 1 ໃນຈຳນວນ 3 ລັດຄື: Ohio,Maichigan ແລະ Pennsylvania ເທົ່ານັ້ນແມ່ນສາມາດໄດ້ຮັບໄຊຊະນະຕໍ່ຄູ່ແຂ່ງຂອງຕົນຢູ່ທີ່ນີ້ແລ້ວ.
ດ້ວຍສະພາບການໃນປະຈຸບັນ, ຜູ້ສະໝັກຮັບເລືອກຕັ້ງທັງສອງທ່ານ ລ້ວນແຕ່ມີໂອກາດເພື່ອຍາດເອົາໄຊຊະນະໃນການຊ່ວງເສັງເຂົ້າທຳນຽບຂາວ ແລະ ການຄາດຄະເນທັງໝົດຈະມີຄຳຕອບຢ່າງຈະແຈ້ງພາຍຫຼັງມີຜົນເບື້ອງຕົ້ນແຫ່ງການເລືອກຕັ້ງປະທານາທິບໍດີຢູ່ ອາເມລິກາ.
ມານະພະຍາຍາມແຂ່ງຂັນເຂົ້າທຳນຽບຂາວ
ຮອດຈຸດເວລານີ້, ທຸກໆລັດໃນທົ່ວປະເທດ ອາເມລິກາ ພວມດຳເນີນການປ່ອນບັດເລືອກຕັ້ງ. ໃນຈຸດເວລາປະກາດຜົນຂອງການນັບບັດຢູ່ 3 ລັດທຳອິດ, ທ່ານ Trump ນຳໜ້າທ່ານນາງ Clinton. ເຖິງຢ່າງໃດກໍ່ຕາມ, ພາຍຫລັງການນັບບັດພຽງ 2, 3 ຊົ່ວໂມງ, 7 ລັດໄດ້ປະກາດຜົນການນັບບັດໄດ້ສະແດງໃຫ້ເຫັນອັດຕາວຸດວິດລະຫວ່າງຜູ້ສະໝັກເລືອກຕັ້ງ 2 ທ່ານ ດ້ວຍໝາກຜົນທ່ານນາງ Hilary Clinton ມີໄດ້ທ່າໄດ້ປຽບ.
ສິ່ງດັ່ງກ່າວກໍ່ເໝາະສົມກັບການຢັ່ງຫາງສຽງກ່ອນນັ້ນ, ບໍ່ມີຄວາມຜິດດ່ຽງຫຼາຍລະຫວ່າງ ຜູ້ສະໝັກເລືອກຕັ້ງ 2 ທ່ານ. ດັ່ງນັ້ນ, ທຸກໆຄວາມສົນໃຈຈະສຸມໃສ່ເຂົ້າການເຄື່ອນໄຫວເລືອກຕັ້ງຢູ່ລັດ Florida, Maine, Nebraska, New Hampshire, North Carolina, Ohio, Utah… ດ້ວຍຍອດຈຳນວນບັດຂອງ 94 ຜູ້ຕາງໜ້າບັນດາຜູ້ມີສິດເລືອກຕັ້ງ. ນີ້ແມ່ນບັນດາລັດມີຈຳນວນຜູ້ມີສິດເລືອກຕັ້ງຫຼາຍ ແລະ ກໍ່ສົ່ງຜົນສະທ້ອນເຖິງໝາກຜົນສຸດທ້າຍ. ໝາກຜົນຂອງການເລືອກຕັ້ງ, ຄາດວ່າ ເລີ່ມໄດ້ປະກາດຕາມແຕ່ລະລັດ ຊຶ່ງໄດ້ສິ້ນສຸດການປ່ອນບັດ, ໃນວັນທີ 9/11. ທ່ານໃດຈະເປັນຜູ້ນຳຄົນໃໝ່ຂອງທຳນຽບຂາວ ພວມຄ່ອຍໆປະກົດຕົວ.