(vovworld) - ຍິ່ງຈະຮອດເວລາທີ່ ສາທາລະນະລັດ ປະຊາຊົນ ປະຊາທິປະໄຕເກົາຫຼີ (ສປປເກົາຫຼີ) ຍິງດາວທຽມສັງເກດໜ່ວຍໂລກທີ່ໃສ່ຊື່ວ່າ Kwangmyongsong 3 ເທົາໃດ, ຈຳນວນປະເທດທີ່ຄັດຄ້ານເຫດການດັ່ງກ່າວກໍ່ເພີ່ມຂຶ້ນເທົ່ານັ້ນ, ໃນນັ້ນມີຍີ່ປຸ່ນ, ສເກົາຫຼີ, ອາເມລິກາ. ໂດຍບໍ່ຫົວຊາຕໍ່ເລື່ອງ ສປປເກົາຫຼີ ໄດ້ຢັ້ງຢືນວ່າ, ການຍິງດາວທຽມຄັ້ງນີ້ ແມ່ນເພື່ອຈຸດໝາຍສັນຕິພາບ, ເນື່ອງໃນໂອກາດສະເຫຼີມສະຫຼອງ 100 ປີ ແຫ່ງວັນຄ້າຍວັນເກີດຂອງອະດີດປະທານ ກິມອິນຊຸງ. ການຍິງດາວທຽມ Kwangmyongsong 3 ໄດ້ເຮັດໃຫ້ສະຖານະການການເມືອງຢູ່ໃນໂລກມີຄວາມເຄັ້ງຮ້ອນຍິ່ງຂຶ້ນ.
ລູກສອນໄຟຈະນຳດາວທຽມ Kwangmyongsong-3 ຂຶ້ນວົງໂຄຈອນ
(ພາບ: AFP)
ຕາມວົງການເຈົ້າໜ້າທີ່ ສປປເກົາຫຼີ ແລ້ວ, ດາວທຽມ Kwangmyongsong 3 ທີ່ຍິງຂຶ້ນວົງໂຄຈອນ ດ້ວຍລູກສອນໄຟໄລຍະໄກ Unha – 3 ໃນເດືອນນີ້ ແມ່ນມີນ້ຳໜັກ 91 ໂຕນ, ຈະຖືກຍິງຂຶ້ນຈາກຖານຍິງລູກສອນໄຟແຫ່ງໜຶ່ງຢູ່ທິດເໜືອຂອງ ສປປເກົາຫຼີ ແລະ ຈະມຸ້ງໄປສູ່ທາງທິດໃຕ້. ຄາດວ່າ, ດາວທຽມຈະແຍກສ່ວນບັນຈຸເຊື້ອເພີງໄລຍະໜຶ່ງລົງທະເລເຫຼືອງ ທີ່ຫ່າງຈາກເກາະ Byeonsan ຂອງ ສເກົາຫຼີ ປະມານ 160 ກ.ມ, ຫຼັງຈາກນັ້ນແມ່ນປະຕິບັດການແຍກໄລຍະ 2 ຢູ່ເຂດທີ່ຫ່າງຈາກເກາະ Luzon ຂອງຟິລິບປິນ ໄປທາງທິດຕາເວັນອອກປະມານ 140 ກ.ມ. ສ່ວນລູກສອນໄຟ Unha – 3 ແມ່ນໄດ້ປະກອບລະບົບດັບສູນເອງ. ດັ່ງນັ້ນບໍ່ສົ່ງຜົນສະທ້ອນເຖິງປະເທດອື່ນໆໃນພາກພື້ນ. ພຽງຢາງ ກໍ່ຢັ້ງຢືນວ່າ, ນີ້ແມ່ນດາວທຽມສັນຕິພາບ ເພື່ອແນໃສ່ພັດທະນາວິທະຍາສາດ ເຕັກນິກຂອງ ສປປເກົາຫຼີ ແລະ ການຍິງດາວທຽມຄັ້ງນີ້ແມ່ນໄດ້ຮັບການວາງແຜນມາແຕ່ດົນນານແລ້ວ. ຂະບວນວິວັດທັງໝົດຂອງການຍິງດາວທຽມຈະຮັບປະກັນລັກສະນະຖືກຕ້ອງຕາມກົດໝາຍ ແລະ ໂປ່ງໃສ. ເພື່ອພິສູດໃຫ້ເຫັນວ່າ ແຜນການຍິງດາວທຽມຈະມາເຖິງຂອງຕົນແມ່ນເພື່ອຈຸດປະສົງຮັບໃຊ້ພົນລະເຮືອນນັ້ນ, ສປປເກົາຫຼີ ໄດ້ອະນຸຍາດໃຫ້ນັກຂ່າວຕ່າງປະເທດນັບສິບຄົນມາສູນອາະວະກາດ Tongchang-ri, ເຊິ່ງແມ່ນແຫ່ງທີ່ຈະດຳເນີນການຍິງດາວທຽມສັງເກດໜ່ວຍໂລກຂຶ້ນວົງໂຄຈອນດ້ວຍລູກສອນໄຟ. ນີ້ແມ່ນເທື່ອທຳອິດທີ່ພຽງຢາງ ອະນຸຍາດໃຫ້ວົງການນັກຂ່າວສາກົນໄດ້ສຳພັດກັບສູນອະວະກາດຂອງປະເທດຕົນ. ສປປເກົາຫຼີ ກໍ່ໄດ້ເຊີນອົງການອະວະກາດຂອງຫຼາຍປະເທດມາສັງເກດການຍິງດາວທຽມເຊັນດຽວກັນ.
ໂດຍບໍ່ຫົວຊາຕໍ່ການອະທິບາຍ ແລະ ເຈດຕະນາດີຂອງ ສປປເກົາຫຼີ , ຫຼາຍປະເທດໄດ້ສະແດງຄວາມວິຕົກກັງວົນຕໍ່ແຜນການນີ້, ໃນນັ້ນ ອາເມລິກາ, ຍີ່ປຸ່ນ, ສເກົາຫຼີ ໄດ້ຄັດຄ້ານຢ່າງຮຸນແຮງ. ບັນດາປະເທດເຫຼົ່ານີ້ຖືວ່າ, ຄວາມຈິງຂອງການຍິງລູກສອນໄຟນຳວິຖີໄລຍະໄກ, ແມ່ນການລະເມີດມະຕິຂອງສະພາຄວາມໝັ້ນຄົງ ສປຊ. ຍ້ອນເຫດນັ້ນ, ລັດຖະມົນຕີການຕ່າງປະເທດອາເມລິກາ ທ່ານນາງ Hillary Clinton ໄດ້ເວົ້າວ່າ, ຄຳປະກາດດັ່ງກ່າວແມ່ນມີລັກສະນະເກາະຜິດ, ພ້ອມທັງຮຽກຮ້ອງໃຫ້ພຽງຢາງ ປະຕິບັດມະຕິຂອງສະພາຄວາມໝັ້ນຄົງ ສປຊ ທີ່ຫ້າມປະເທດນີ້ບໍ່ໄດ້ຍິງລູກສອນໄພນຳວິຖີ. ທ່ານນາງ Hillary Clinton ຢັ້ງຢືນວ່າ, ການກະທຳຍິງລູກສອນໄຟຄືດັ່ງກ່າວ ແມ່ນການຂົ່ມຂູ່ເຖິງຄວາມສະຫງົບປອດໄພໃນພາກພື້ນ. ອາເມລິກາ ກໍ່ຕົກລົງຢຸດຕິແຜນການຊ່ວຍເຫຼືອມະນຸດສະທຳທັນຍາຫານ 240 000 ໂຕນ ໃຫ້ແກ່ ສປປເກົາຫຼີ , ນີ້ແມ່ນຂໍ້ຕົກລົງທີ່ສອງປະເທດບັນລຸໄດ້ເມື່ອເດືອນ 2 ຜ່ານມາ. ວັນທີ 9/4, ອາເມລິກາ ໃຫ້ຮູ້ວ່າ, ເຂົາເຈົ້າພວມຊຸກຍູ້ຈີນ ກໍ່ຄວາມດັນ ເພື່ອໃຫ້ ສປປເກົາຫຼີ ຢຸດຕິເລື່ອງຍິງລູກສອນໄຟຕາມແຜນການທີ່ໄດ້ວາງອອກ. ໂດຍມີທັດສະນະດຽວກັນກັບອາເມລິກາ, ລັດຖະບານສເກົາຫຼີ ກໍ່ຖືເຫດການດັ່ງກ່າວແມ່ນການກະທຳເພື່ອແນໃສ່ພັດທະນາລູກສອນໄຟນຳວິຖີໄລຍະໄກ. ຍີ່ປຸ່ນກໍ່ຢັ້ງຢືນວ່າ, ບໍ່ວ່າການຍິງລູກສອນໄຟນຳວິຖີໃດໆຂອງພຽງຢາງ ກໍ່ລ້ວນແຕ່ແມ່ນການລະເມີດມະຕິຂອງສະພາຄວາມໝັ້ນຄົງ ສປຊ.
ດາວທຽມ
Kwangmyongsong-
3 ໜັກ91 ໂຕນ
(ພາບ: google.com.vn)
ໃນສອງ, ສາມມື້ມໍ່ໆມານີ້, ການຄັດຄ້ານຂອງຍີ່ປຸ່ນ, ອາເມລິກາ ແລະ ສເກົາຫຼີ ໄດ້ເພີ່ມຂຶ້ນຢ່າງແຮງ, ໃນຂະນະທີ່ກອງທັບປະເທດນີ້ເລີ່ມຜັນຂະຫຍາຍອາວຸດທີ່ທັນສະໄໝຢູ່ພາກພື້ນອາຊີຕາເວັນອອກສຽງເໜືອ. ຢູ່ໂຕກຽວ, ບັນດາລູກສອນໄຟໄດ້ຮັບການຜັນຂະຫຍາຍ, ພ້ອມກັນນັ້ນແມ່ນກ່ຳປັ່ນ Aegis ປະກອບລູກສອນໄຟສະກັດຕີ SM-3 ລວມ 3 ລຳ ກໍ່ຖືກສົ່ງມາເຂດທະເລ ຮົວຕຸງ ເພື່ອຍິງລູກສອນໄຟຂອງ ສປປເກົາຫຼີ ຖ້າຫາກມັນໄດ້ຮັບການຍິງບໍ່ຖືກທິດ ແລະ ຕົກລົງດິນແດນຂອງຍີ່ປຸ່ນ. ສ່ວນອາເມລິກາກໍ່ໄດ້ຜັນຂະຫຍາຍລະບົບ rada ເຄື່ອນທີ່ທີ່ທັນສະໄໝ SBX-1 ຈາກ Hawai, ກຳປັ່ນ Aegis ຂອງກອງທັບເຮືອ ອາເມລິກາກໍ່ໄດ້ອອກຈາກຖານທີ່ໝັ້ນແລ້ວ.
ໂດຍໂຕ້ຕອບຕໍ່ຄວາມດັນທີ່ນັບມື້ນັບເພີ່ມຂຶ້ນຂອງຍີ່ປູ່ນ, ສ ເກົາຫຼີ ແລະ ອາເມລິກາ, ພຽງຢາງ ກໍກ່າວເຕືອນວ່າ: ການຍິງສະກັດດາວທຽມຂອງປະເທດນີ້ແມ່ນການກະທຳກໍ່ສົງຄາມ. ສປປ ເກົາຫຼີ ຈະລົງໂທດຢ່າງເຂັ້ມງວດໂດຍທັນທີ, ດ້ວຍການບຸກໂຈມຕີທີ່ມີລັກສະນະລ້າງຜານ.
ຈຸດເວລາທີ່ ສປປ ເກົາຫຼີ ຍິງດາວທຽມ Kwangmyongsong 3 ໃກ້ໆຈະມາຮອດແລ້ວ (ຄາດວ່ານັບແຕ່ວັນທີ 12 – 16/4), ແລະຄວາມເຄັ່ງຕຶງລະຫວ່າງຝ່າຍຕ່າງໆກໍ່ພວມເພີ່ມຂຶ້ນ. ເຖິງຢ່າງໃດກໍຕາມ, ນັກສັງເກດການຫຼາຍທ່ານຖືວ່າ: ການປະທະກັນຂະໜາດໃຫຍ່ຍາກທີ່ຈະເກີດຂຶ້ນ, ແຕ່ດ້ວຍທ່າອຽງຄືປະຈຸບັນ ໄດ້ສົ່ງຜົນສະທ້ອນບໍ່ດີເຖິງຄວາມມານະພະຍາຍາມຊອກຫາມາດຕະການສັນຕິພາບໃນແຫຼມເກົາຫຼີ ເຊິ່ງຝ່າຍຕ່າງໆ ໄດ້ມະນະພະຍາຍາມກໍ່ສ້າງໃນໄລຍະຜ່ານມາ.