ວັນທີ 11/9 , ປະເທດອາເມລິກາຈັດຕັ້ງພິທິລະນຶກ 13 ປີແຫ່ງວັນເກີດເຫດວິນາດສະກຳກໍ່ການຮ້າຍທີ່ເຮັດໃຫ້ໂລກສັ່ນສະເທືອນ. ກວ່າທົດສະວັດໄດ້ຜ່ານພົ້ນໄປ, ກະດຽວວ່າ ການສູ້ຮົບຕ້ານໄພກໍ່ການຮ້າຍໂດຍອາເມລິກາປຸກລະດົມໄດ້ຮອດວັນສິ້ນສຸດ ພາຍຫຼັງໄດ້ດັບສູນ Osama Bin Laden ເມື່ອປີ 2011, ແຕ່ປະຈຸບັນ, ປະເທດອາເມລິກາພັດພວມປະເຊີນໜ້າກັບສິ່ງທ້າທາຍໃໝ່ທີ່ເອີ້ນວ່າ ລັດອິດສະລາມ ໂດຍຂະໜານນາມເອງ IS ຊຶ່ງພວມກາຍເປັນໄພອັນຕະລາຍໃໝ່ ແລະ ພາຍຫຼັງເຫດການກໍ່ການຮ້າຍ ວັນທີ 11/9 ເປັນເວລາ 13 ປີ, ປະເທດອາເມລິກາພັດປະເຊີນໜ້າກັບໄພກໍ່ການຮ້າຍອີກຄັ້ງໜຶ່ງ.
ພວກກໍ່ການຮ້າຍໄດ້ຈີ້ເຮືອບິນໂດຍສານ ໂບອິງ ແລະ ຕ່ຳໃສ່ຕຶກແຝດສູນການຄ້າໂລກ
|
ກ່ອນນີ້ 13 ປີເຕັມ ຄືວັນທີ 11/9/2001, ພວກກໍ່ການຮ້າຍ 19 ຄົນໄດ້ຈີ້ເຮືອບິນໂດຍສານ ໂບອິງ 4 ລຳ ແລະ ໄດ້ຕ່ຳໃສ່ທຳນຽບ 5 ແຈ ແລະ ເຮັດໃຫ້ຕຶກແຝດສູນການຄ້າໂລກພັງທະລາຍລົງ, ອັນໄດ້ເຮັດໃຫ້ 3000 ຄົນຖືສັນຊາດກວ່າ 90 ປະເທດທີ່ແຕກຕ່າງກັນຖືກເສຍຊີວິດ. ທົ່ວໂລກໄດ້ຕື່ນຕົກໃຈເມື່ອເຫັນດ້ວຍຕາຕຶກແຝດສູນການຄ້າໂລກລຸກໄໝ້ ແລະ ພັງລົງຢ່າງໄວ. ການບຸກໂຈມຕີແບບ ກໍ່ການຮ້າຍນີ້ໄດ້ໂມ້ງບາດຄ້ອນທີ່ຮ້າຍແຮງໃສ່ປະເທດອາເມລິກາ, ອັນໄດ້ເຮັດໃຫ້ທຸກສິ່ງທຸກຢ່າງໃນສັງຄົມຂອງປະເທດນີ້ປ່ຽນແປງໄປຢ່າງຫຼວງຫຼາຍນັບຕັ້ງແຕ່ວັນນັ້ນເປັນຕົ້ນມາ.
ຕ້ານກໍ່ການຮ້າຍ - ສິ່ງບຸລິມະສິດອັນດັບໜຶ່ງຂອງອຳນາດການປົກຄອງວໍຊິງຕັນ.
ກ່ອນທີ່ເກີດເຫດການກໍ່ການຮ້າຍ ວັນທີ 11/9, ເບິ່ງຄືວ່າປະເທດອາເມລິກາບໍ່ເປັນຫ່ວງນຳລັດທິກໍ່ການຮ້າຍຫຼືລັດທິອິດສະລາມຫົວຮຸນແຮງ ແລະ ບໍ່ຖືວ່າ ນີ້ແມ່ນໜ້າທີ່ບຸລິມະສິດອັນດັບໜຶ່ງ. ແຕ່ພາຍຫຼັງ“ວັນທີ່ມືດມົວ” ນັ້ນ, ທຸກສິ່ງທຸກຢ່າງໃນສັງຄົມຂອງປະເທດນີ້ປ່ຽນແປງໄປ. 13 ປີທີ່ຜ່ານມາ, ປະເທດອາເມລິກາໄດ້ສຸມກຳລັງຢ່າງມະຫາສານໃຫ້ແກ່ ການສູ້ຮົບຕ້ານໄພກໍ່ການຮ້າຍ. ງົບປະມານທີ່ສະຫງວນໃຫ້ແກ່ຂົງເຂດປ້ອງກັນຊາດໄດ້ເພີ່ມຂຶ້ນທົບ 2 ເທົ່າ, ອົງການຮັບຜິດ ຊອບການປ້ອງກັນຄວາມສະຫງົບໄດ້ຮັບການສ້າງຕັ້ງຢ່າງຫຼວງຫຼາຍ, ຂະແໜງການບິນໄດ້ສິ້ນເປືອງເງິນທຶນນັບຕື້ USD ໃນແຕ່ລະປີໃຫ້ແກ່ບັນຫາຮັບປະກັນຄວາມປອດໄພທາງການບິນ. ແລະໃນບັນດາໂຄງການດຳເນີນງານຂອງ ອຳນາດການປົກຄອງວໍຊິງຕັນ, ໄພກໍ່ການຮ້າຍຍາມໃດກໍຖືກຍົກອອກມາປຶກສາຫາລືເປັນປະຈຳ. ບໍ່ພຽງແຕ່ເທົ່ານັ້ນ, ສະພາແຫ່ງຊາດ ອາເມລິກາຍັງມອບຫຼາຍສິດກວ່າໃຫ້ແກ່ກົງຈັກບໍລິຫານ ແລະ ອະນຸຍາດໃຫ້ບັນດາອົງການສຳນັກງານເຫຼົ່ານັ້ນແຊກແຊງເລິກເຂົ້າໃນຊີວິດສ່ວນຕົວຂອງປະຊາຊົນ, ຊຶ່ງລວມທັງການລັກຟັງໂທລະສັບ ກໍຄືລັກອ່ານຈົດໝາຍ, ອິແມວ, ໂທລະສານ....ການກະທຳທີ່ລວງເກີນນີ້ຂອງ ອຳນາດການປົກຄອງວໍຊິງຕັນໄດ້ກໍ່ໃຫ້ເກີດກະແສຟອງປະຕິກິລີຍາຢ່າງຮຸນແຮງໃນໝູ່ມະຫາຊົນ.
ແຕ່ເຖິງຢ່າງໃດກໍດີ, ບໍ່ອາດປະຕິເສດໄດ້ວ່າ, ໃນ 13 ປີທ່ີຜ່ານມາ, ຄວາມມານະພະຍາຍາມຂອງ ອຳນາດການປົກຄອງວໍຊິງຕັນໄດ້ບັນລຸປະສິດທິຜົນສ່ວນໃດສ່ວນໜຶ່ງ. ຍົກຕົວຢ່າງຄື : ມີກົນອຸບາຍ ກໍ່ການຮ້າຍຫຼາຍໆກໍລະນີໄດ້ຖືກຄົ້ນພົບ ແລະ ທັບມ້າງ. ພິເສດແມ່ນການດັບສູນຫົວໂປເຄືອຂ່າຍກໍ່ການຮ້າຍອານເກດະ Osama Bin Laden ເມື່ອປີ 2011 ໄດ້ເປັນຂີດໝາຍທີ່ສຳຄັນໃນການສູ້ຮົບຕ້ານໄພກໍ່ການຮ້າຍຂອງ ອຳນາດການປົກຄອງວໍຊິງຕັນ.
ໄພອັນຕະລາຍໃໝ່ທີ່ເອີ້ນວ່າ ລັດອິດສະລາມໂດຍຂະໜານນາມເອງ IS
ເຖິງວ່າໄດ້ບັນລຸບາງໝາກຜົນໃດໜຶ່ງໃນການສູ້ຮົບຕ້ານໄພກໍ່ການຮ້າຍ, ແຕ່ໃນຕົວຈິງ, ປະເທດອາເມລິກາ ບໍ່ມີວັນທີ່ຈະລືມອະດີດຕະການ ແລະ ເງົາມືດກໍ່ການຮ້າຍທີ່ຍັງຄົງປະກົດຕົວໃນທຸກເວລາ. ການຟື້ນຕົວຂອງອັນທີ່ເອີ້ນວ່າລັດ ອິດສະລາມໂດຍຂະໜານນາມເອງ IS ຢູ່ອີຣັກ ແລະ ຊີຣີໃນຮອບເວລາເຄິ່ງປີມານີ້, ອີກຄັ້ງໜຶ່ງພັດຕັ້ງປະເທດອາເມລິກາຢືນຢູ່ຕໍ່ໜ້າໄພອັນຕະລາຍຢ່າງສູງ. ໂດຍແຕກຕ່າງກັບ ເຄືອຂ່າຍກໍ່ການຮ້າຍອານເກດະ ຫຼືກຸ່ມກໍ່ການຮ້າຍອື່ນໆ, ລັດອິດສະລາມໂດຍຂະໜານນາມເອງ IS ມີກຳລັງບົ່ມຊ້ອນການເງິນຢ່າງເຂັ້ມແຂງທີ່ສຸດ. ດ້ວຍຈຳນວນທະຫານຢູ່ຊີຣີປະມານ 50.000 ຄົນ ແລະ ຢູ່ອີຣັກ 10.000 ຄົນ, IS ໄດ້ຢຶດຄອງ ແລະ ຄວບຄຸມຫຼາຍເຂດດິນທີ່ກ້ວາງໃຫຍ່ຈາກອີຣັກເຖິງຊີຣີ. ສິ່ງທີ່ເປັນອັນຕະລາຍກ່ວານັ້ນ, ກຸ່ມກຳລັງກະບົດຫຼາຍກຸ່ມມີສາຍພົວພັນກັບ ເຄືອຂ່າຍກໍ່ການຮ້າຍອານເກດະ ພວມເຂົ້າເປັນສະມາຊິກ IS , ອັນໄດ້ຫັນກຳລັງນີ້ກາຍເປັນ ເຄືອຂ່າຍກໍ່ການຮ້າຍໃນຂອບເຂດທົ່ວໂລກ.
ປະເທດອາເມລິກາສ້າງສຳພັນທະມິດ, ເພີ່ມກຳລັງແຮງຕ້ານໄພກໍ່ການຮ້າຍ
ໂດຍກຳນົດວ່າ ລັດອິດສະລາມ IS ແມ່ນໄພອັນຕະລາຍທີ່ສຸດນັບແຕ່ກ່ອນເປັນຕົ້ນມາ, ກ່ອນທີ່ດຳເນີນພິທິລະນຶກ 13 ປີແຫ່ງວັນເກີດເຫດວິນາດສະກຳກໍ່ການຮ້າຍວັນທີ 11/9 ປີນີ້, ປະທານາທິບໍດີອາເມລິກາ Barak Obama ໄດ້ປະກາດແຜນການຮັບມື ແລະ ດັບສູນລັດອິດສະລາມ IS ຕໍ່ໜ້າມວນຊົນທັງປວງ ແລະ ບັນດານັກສ້າງກົດໝາຍ. ຍຸດທະສາດນີ້ລວມທັງມາດຕະການດ້ານການທະຫານ, ການທູດ ແລະ ເສດຖະກິດ, ພ້ອມທັງເນັ້ນໜັກເຖິງຄວາມສຳຄັນຂອງການຮ່ວມສຳຄັນກັບບັນດາປະເທດໃນໂລກອາຣັບ. ປະຈຸບັນໄດ້ມີກວ່າ 40 ປະເທດກຽມພ້ອມເຂົ້າຮ່ວມສຳພັນທະມິດໂດຍອາເມລິການຳໜ້າ.
ເປັນທີ່ຈະແຈ້ງແລ້ວວ່າ ຈຸດໝາຍເພື່ອໃຫ້ປະເທດອາເມລິກາມີຄວາມສະຫງົບສຸກຍັງຄົງແມ່ນສິ່ງທີ່ຫ່າງໄກຢູ່. ການຟື້ນຕົວຂອງກຳລັງລັດອິດສະລາມໂດຍ ຂະໜານນາມເອງ IS ພວມນຳອາເມລິກາ ແລະ ທົ່ວໂລກກ້າວໄປສູ່ໄລຍະທີ່ເຕັມໄປດ້ວຍຄວາມທົດສອບໃໝ່, ແນ່ນອນວ່າມີຄວາມສັບສົນຫຼາຍຢ່າງ.