ໃນສູນທອນພົດຂ່່ຳນັບຊົມເຊີຍໄຊຊະນະ. ທ່ານ Donald Trump ໄດ້ຖະແຫຼງວ່າ ນີ້ແມ່ນຈຸດເວລາທີ່ທຸກໆຄົນ ຕ້ອງຫຍັບເຂົ້າໃກ້ກັນ. ແລະ ຍິ່ງກວ່າເວລາໃດໝົດ, ປະເທດອາເມລິກາ ຕ້ອງສາມັກຄີກັນເພື່ອຟື້ນຟູທີ່ຕັ້ງ ເປັນປະເທດມະຫາອຳນາດເບີໜື່ງຂອງໂລກ.
ບັນດານະໂຍບາຍພາຍໃນແລະການຕ່າງປະເທດຈະໄດ້ຮັບການປະຕິບັດ.
ເມື່ອຫວນຄືນຕະຫຼອດໄລຍະທາງແຫ່ງການຂົນຂວາຍຫາສຽງເລືອກຕັ້ງ, ທ່ານ Donald Trump ໄດ້ໄປທຸກແຫ່ງຂອງອາເມລິກາ, ທ່ານໄດ້ຢືນຢັນຄວາມຫວັງອັນແຮງກ້າຂອງຕົນ ແມ່ນກາຍເປັນປະທານາທິບໍດີອາເມລິກາ ແລະ ຍົກອອກບັນດາຂໍ້ຄວາມຕັດສິນທີ່ສຳຄັນ ເພື່ອສາມາດປ່ຽນແປງປະເທດອາເມລິກາ. ຕາມທຸກສິ່ງ, ທຸກຢ່າງທີ່ທ່ານ Donald Trump ໄດ້ໝັ້ນໝາຍ ເມື່ອກາຍເປັນປະທານາທິບໍດີ, ປະເທດອາເມລິກາ ຈະກ້າວເຂົ້າສູ່ເສັ້ນທາງບຸກທະລຸ ດ້ວຍບັນດານະໂຍບາຍກະໂດດຂັ້ນ. ນັ້ນແມ່ນບັນຫາຕ້ານການເຂົ້າເມືອງ, ສ້າງວຽກເຮັດງານທຳຕື່ມອີກໃຫ້ແກ່ 25 ລ້ານຄົນ ໃນຮອບເວລາ 10 ປີ. ທ່ານ Donald Trump ຍັງໝັ້ນໝາຍຫຼຸດຜ່ອນອາກອນລາຍໄດ້ວິສາຫະກິດລົງເຫຼືອພຽງ 15% ເມື່ອທຽບໃສ່ 35% ໃນປະຈຸບັນ. ທ່ານ Donald Trump ຍັງໝັ້ນໝາຍລົງທຶນກໍ່ສ້າງພື້ນຖານໂຄງລ່າງ, ຫຼຸດຜ່ອນການຂາດດຸນດ້ານການຄ້າ. ກ່ຽວກັບບັນດາສັນຍາການຄ້າເສລີ ທ່ານຖະແຫຼງວ່າ, ບໍ່ວ່າຂໍ້ຕົກລົງການຄ້າສະບັບໃດແມ່ນຕ້ອງປ້ອງກັນບັນດາຂະແໜງອຸດສາຫະກຳອາເມລິກາ.
ກ່ຽວກັບແນວທາງການຕ່າງປະເທດ, ທ່ານ Donald Trump ໄດ້ສະແດງໃຫ້ເຫັນແຈ້ງຫຼັກໝັ້ນທີ່ວ່າ ນະໂຍບາຍການຕ່າງປະເທດຂອງອາເມລິກາ ພຽງສຸມໃສ່ຜົນປະໂຫຍດ ໃຫ້ແກ່ປະເທດອາເມລິກາ. ທ່ານ Donald Trump ໄດ້ປັບປຸງບັນດາສັນຍາການຄ້າ 2 ຝ່າຍ ແລະ ຫຼາຍຝ່າຍ, ບໍ່ແຊກແຊງເຂົ້າວຽກງານພາຍໃນຂອງປະເທດອື່ນໆ, ພ້ອມທັງປົວແປງການພົວພັນກັບລັດເຊຍ.
ມະຫາເສດຖີ Donald Trump ອາຍຸ 70 ປີ ມີຊື່ສຽງໃນໂລກ ຍ້ອນມີໄຫວພິບໃນການດຳເນີນທຸລະກິດ. ບໍ່ພຽງແຕ່ແມ່ນນັກທຸລະກິດໃຫຍ່ເທົ່ານັ້ນ ທ່ານຍັງແມ່ນດາວດວງໜຶ່ງຂອງຂະແໜງໂທລະຄົມອາເມລິກາ ໃນຖານະເປັນຜູ້ດຳເນີນລາຍການ, ທັງເປັນນັກຜະລິດລາຍການໂທລະພາບ “The Apprentice” ຂອງຊ່ອງໂທລະພາບ NBC. ບໍ່ອາດປະຕິເສດ ທ່ານ Donald Trump ແມ່ນຜູ້ສະໝັກເລືອກຕັ້ງມີທັດສະນະຈະແຈ້ງເປັນພິເສດກ່ຽວກັບນະໂຍບາຍການຕ່າງປະເທດ, ໃນນັ້ນສິ່ງບຸລິມະສິດຂອງທ່ານແມ່ນເຄົາລົບ ແຕ່ຈຳກັດປະທານາທິບໍດີລັດເຊຍ Putin, ຄວບຄຸມຄົນເຂົ້າເມືອງຢ່າງມີປະສິດທິຜົນ ແລະ ສ້າງຄວາມເຂັ້ມແຂງໃຫ້ອາເມລິກາ. ໄຊຊະນະຂອງທ່ານ Donald Trump ໃນສ່ວນໃດສ່ວນໜຶ່ງກໍ່ສາມາດແກ້ໄຂທາງດ້ານຈິດຕະຂອງຊາວອາເມລິກາ ໃນຈຸດເວລາທີ່ປະຊາຊົນຂອງປະເທດນີ້ ພວມຮູ້ສຶກບໍ່ໝັ້ນໃຈ ຍ້ອນແນວທາງການເມືອງທີ່ເປັນມູນເຊື້ອ. ນັ້ນແມ່ນໄພກໍ່ການຮ້າຍ, ສະພາບການໃຊ້ຄວາມຮຸນແຮງ ທີ່ກ່ຽວຂ້ອງເຖິງການຄວບຄຸມປືນເສິກ, ອິດທິພົນຊື່ສຽງໄດ້ຫຼຸດລົງຍ້ອນຖືກຕົກສະໜົມໃນບັນດາການປະທະກັນຢູ່ຕາເວັນອອກກາງ. ເພາະສະນັ້ນ, ອຳນາດການປົກຄອງໃໝ່ ດ້ວຍບັນດາຄຳໝັ້ນໝາຍປ່ຽນແປງນະໂຍບາຍ ອາດຈະນຳມາເຊິ່ງບາດກ້າວບຸກທະລຸ, ຢ່າງໜ້ອຍສຸດແມ່ນພະຍາຍາມຊອກຫາວິທະສຳພັດທີ່ໃໝ່ອ່ຽມ. ດ້ວຍໄຊຊະນະໃນການເລືອກຕັ້ງຄັ້ງນີ້, ທ່ານ Donald Trump ສາມາດຢັ້ງຢືນໄດ້ສິ່ງໜຶ່ງທີ່ວ່າ: ປະຊາຊົນເຊື່ອໝັ້ນທ່ານ ບໍ່ແມ່ນຜູ້ຊັກຈູງອາເມລິກາໄປສູ່ສົງຄາມໄຮ້ເຫດຜົນຢູ່ຕ່າງປະເທດ ແລະ ທ່ານຈະຖືຜົນປະໂຫຍດຂອງຊາວອາເມລິກາ ເໜືອກວ່າສິ່ງໃດໝົດ.
ໜ້າທີ່ອັນສູງສົ່ງຂອງປະທານາທິບໍດີຄົນທີ 45 ຂອງອາມເລິກາ.
ໂດຍໄດ້ກາຍເປັນຜູ້ນຳທຳນຽບຂາວ, ໃນອາຍຸການ 4 ປີຈະມາເຖິງ, ບັນດາສິ່ງທ້າທາຍທີ່ທ່ານ Donald Trump ປະເຊີນໜ້ານັ້ນ ບໍ່ແມ່ນໜ້ອຍ. ປະທານາທິບໍດີຄົນໃໝ່ຂອງອາເມລິກາ ຈະມີໜ້າທີ່ຮັບຜິດຊອບຢ່າງໜັກໜ່ວງ ໃນການຜັນຂະຫຍາຍນະໂຍບາຍການຕ່າງປະເທດຂອງອາເມລິກາ, ແກ້ໄຂການກໍ່ການຮ້າຍ, ບັນດາ ຊີຣີ, ແກ້ໄຂໜີ້ສາທາລະນະ ແລະ ອື່ນໆ. ປະຈຸບັນໜີ້ສາທາລະນະຂອງອາເມລິກາ ແມ່ນ 19.000 ຕື້ USD ເທົ່າກັບ 108% GDP ຂອງອາເມລິກາ. ຄວາມຂາດສະເໝີພາບທາງສັງຄົມ, ການຈຳແນກເຊື້ອຊາດຜິວພັນ, ການຄວບຄຸມປືນເສິກ, ແກ້ໄຂບັນຫາຄົນເຂົ້າເມືອງ ກໍ່ແມ່ນບັນດາບັນຫາທີ່ຜູ້ນຳຄົນໃໝ່ຂອງທຳນຽບຂາວຕ້ອງປະຕິບັດ.
ປະທານາທິບໍດີຄົນໃໝ່ຂອງອາເມລິກາ ຈະຖືກປະກາດຢ່າງເປັນທາງການ ໃນວັນທີ 06/01/2017. ຕາມລັດຖະທຳມະນູນອາເມລິກາ ແລ້ວ, ປະທານາທິບໍດີໄດ້ເລີ່ມຂຶ້ນໃນວັນທີ 20/01 ຂອງປີຕໍ່ໄປ ພາຍຫຼັງການເລືອກຕັ້ງ, ໝາຍຄວາມວ່າ ໃນວັນທີ 20/01/2017. ປະທານາທິບໍດີຄົນໃໝ່ຂອງອາເມລິກາ ຈະເລີ່ມປະຕິບັດໂຄງການດຳເນີນງານຂອງຕົນ ພາຍຫຼັງໄດ້ຮັບການມອບຮັບຈາກປະທານາທິບໍດີຄົນເກົ່າ.