ກອງປະຊຸມວຽກງານການຕ່າງປະເທດຄັ້ງທີ 29 ຊຶ່ງແມ່ນເຫດການທີ່ສຳຄັນຂອງຂະແໜງການຕ່າງປະເທດຫວຽດນາມຊຶ່ງຖືກຈັດຂຶ້ນ 2 ປີເທື່ອໜຶ່ງ, ໄດ້ຖືກໄຂຂຶ້ນຢູ່ນະຄອນຫຼວງຮ່າໂນ້ຍເມື່ອວັນທີ 22/8. ໂດຍຖືກຈັດຂຶ້ນພາຍຫຼັງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ, ໃນສະພາວະທີ່ສະພາບແວດລ້ອມທັງຢູ່ພາຍໃນ ແລະ ຕ່າງປະເທດມີກາລະໂອກາດ ແລະ ສິ່ງທ້າທາຍຫຼາຍຢ່າງ, ກອງປະຊຸມວຽກງານການຕ່າງປະເທດຄັ້ງທີ 29 ໄດ້ຮັບການກຳນົດວ່າ ກອງປະຊຸມແຫ່ງການປ່ຽນແປງໃໝ່ທາງດ້ານຈີນຕະນາການ, ແບບວິທີ, ກຳນົດແນວທາງການຕ່າງປະເທດໃໝ່, ນຳປະເທດຊາວກ້າວເຂົ້າສູ່ໄລຍະພັດທະນາໃໝ່, ພິເສດແມ່ນການຮັກສາອະທິປະໄຕ ແລະ ຜືນແຜ່ນດິນອັນຄົບຖ້ວມຢ່າງໝັ້ນຄົງ.
ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມຝ້າມບິງມິນ ກ່າວຄຳເຫັນທີ່ກອງປະຊຸມ |
ກອງປະຊຸມວຽກງານການຕ່າງປະເທດຄັ້ງທີ 29 ມີຫົວຂໍ້ວ່າ : “ ຍົກສູງປະສິດທິຜົນວຽກງານການຕ່າງປະເທດ ແລະ ເຊື່ອມໂຍງເຂົ້າກັບສາກົນ - ປະຕິບັດແນວທາງການຕ່າງປະເທດຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມຢ່າງມີໄຊ”. ກອງປະຊຸມແມ່ນເພື່ອແນໃສ່ຕີລາຄາວິວັດທະນາການປະຕິບັດແນວທາງການຕ່າງປະເທດໃນໄລຍະທີ່ຜ່ານມາ, ພິເສດແມ່ນໃນອາຍຸການ 5 ປີທີ່ຜ່ານມາ, ພ້ອມກັນນັ້ນ ກໍກຳນົດໜ້າທີ່ຕົ້ນຕໍຂອງຂະແໜງການຕ່າງປະເທດໃນໄລຍະທີ່ຈະມາເຖິງ, ປ່ຽນແປງໃໝ່ທາງດ້ານຈີນຕະນາການຢ່າງຮອບດ້ານໃນການເຄື່ອນໄຫວການຕ່າງປະເທດ, ພິເສດແມ່ນຈີນຕະນາການທາງດ້ານການທູດຮັບໃຊ້ການພັດທະນາ.
ວຽກງານການຕ່າງປະເທດປະກອບສ່ວນຢ່າງຕັ້ງໜ້າເຂົ້າໃນການປະຕິບັດບັນດາເປົ້າໝາຍພັດທະນາເສດຖະກິດ-ສັງຄົມ
ຫວນຄືນໄລຍະທາງທີ່ໄດ້ຜ່ານໄປ, ພາຍຫຼັງ 30 ປີແຫ່ງການປ່ຽນແປງໃໝ່, ເປັນຕົ້ນແມ່ນໃນອາຍຸການກອງປະຊຸມໃຫຍ່ຄັ້ງທີ 11 ຂອງພັກກອມມູນິດຫວຽດນາມ (2011-2015), ອາດຈະຢືນຢັນວ່າ ບໍ່ມີຍາມໃດທີ່ການພົວພັນທາງການທູດຂອງຫວຽດນາມພັດໄດ້ເປີດກ້ວາງຄືໃນປະຈຸບັນ. ພ້ອມກັນນັ້ນ, ການສືບຕໍ່ປັບປຸງ ແລະ ພັດທະນາການພົວພັນກັບບັນດາປະເທດເພື່ອນມິດທີ່ເປັນມູນເຊື້ອນັ້ນ, ການຕ່າງປະເທດຫວຽດນາມໃນໄລຍະທີ່ຜ່ານມາ, ໄດ້ສຳເລັດການສ້າງຂອບເຂດການພົວພັນຄູ່ຮ່ວມມືກັບປະເທດເກືອບທັງໝົດທີ່ມີຜົນສະທ້ອນຢ່າງໃຫຍ່ຫຼວງໃນພາກພື້ນ ແລະ ໃນໂລກ, ອັນໄດ້ນຳມາເຊິ່ງຜົນປະໂຫຍດທາງດ້ານເສດຖະກິດ, ການຄ້າ, ການລົງທຶນ, ການເມືອງ, ການປ້ອງກັນຊາດ ປ້ອງກັນຄວາມສະຫງົບ, ວັດທະນະທຳນັບມື້ນັບຫຼາຍຂຶ້ນ. ມາຮອດປະຈຸບັນ, ຫວຽດນາມມີການພົວພັນທາງດ້ານເສດຖະກິດ, ການຄ້າກັບ 224 ປະເທດ ແລະ ເຂດແຄ້ວນ. ໃນໄລຍະ 5 ປີ 2011-2015 ຍອດລະດັບຈໍລະຈອນການຄ້າຂາຍແລກປ່ຽນສິນຄ້າ, ການບໍລິການບັນລຸກວ່າ 1.400 ຕື້ USD , ຫຼາຍທົບ 2 ເທົ່າເມື່ອທຽບໃສ່ໄລຍະ 2006-2010. ຍອດເງິນລົງທຶນໂດຍກົງຂອງຕ່າງປະເທດ FDI ບັນລຸເກືອບ 60 ຕື້ USD, ເພີ່ມຂຶ້ນກວ່າ 33%ເມື່ອທຽບໃສ່ໄລຍະ 5 ປີ 2006-2010. ແລະ ກໍໃນໄລຍະ 5 ປີທີ່ຜ່ານມາ, ຂະແໜງການຕ່າງປະເທດຫວຽດນາມໄດ້ຂົນຂວາຍ 36 ຄູ່ຮ່ວມມືໃໝ່ຕື່ມອີກ, ອັນໄດ້ຍົກຍອດຈຳນວນຄູ່ຮ່ວມມືທີ່ຮັບຮູ້ຂໍ້ກຳນົດດ້ານເສດຖະກິດຕະຫຼາດຢູ່ຫວຽດນາມຂຶ້ນເຖິງ 59 ຄູ່ຮ່ວມມື. ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມຝ້າມບິງມິນໃຫ້ຂ້ໍສັງເກດວ່າ :
“ ໃນໄລຍະທີ່ຜ່ານມາ, ຫວຽດນາມໄດ້ເຊື່ອມໂຍງນັບມື້ນັບຕັ້ງໜ້າ. ຈາກແຜນນະໂຍບາຍໃນເບື້ອງຕົ້ນແມ່ນການເຊື່ອມໂຍງດ້ານເສດຖະກິດ, 5 ປີທີ່ຜ່ານມາ, ພວກເຮົາໄດ້ເຊື່ອມໂຍງຢ່າງຮອບດ້ານໃນທຸກໆຂົງເຂດ. ບໍ່ພຽງແຕ່ລົງນາມໃນສັນຍາການຄ້າເສລີຫຼາຍສະບັບເທົ່ານັ້ນ, ຫາກຍັງເຂົ້າຮ່ວມບັນດາຂົງເຂດຮ່ວມມືດ້ານປ້ອງກັນຊາດ ປ້ອງກັນຄວາມສະຫງົບອີກດ້ວຍ, ຄືເປັນຄັ້ງທຳອິດໄດ້ເຂົ້າຮ່ວມບັນດາການເຄື່ອນໄຫວຮັກສາສັນຕິພາບແຫ່ງ ສ.ປ.ຊ. ນອກຈາກນັ້ນ ຍັງສວມບົດບາດເຂົ້າໃນກົນໄກຂອງບັນດາອົງການສາກົນ ຄືສະພາສິດທິມະນຸດແຫ່ງ ສ.ປ.ຊ, ອາຊຽນ… ”
ພ້ອມກັນນັ້ນ, ວຽກງານການຕ່າງປະເທດຍັງປະກອບສ່ວນສຳຄັນເຂົ້າໃນໜ້າທີ່ຮັກສາອະທິປະໄຕຜືນແຜ່ນດິນ, ທະເລ, ໝູ່ເກາະ, ການປ້ອງກັນຄວາມສະຫງົບແຫ່ງຊາດ. ຕໍ່ໜ້າບັນດາການຜັນແປທີ່ສັບສົນຢູ່ທະເລຕາເວັນອອກ, ການຕ່າງປະເທດໄດ້ນຳໃຊ້ບັນດາມາດຕະການດ້ານການເມືອງ, ການທູດ, ການພົວພັນຕ່າງປະເທດຢ່າງເຖິງຖອງ ແລະ ມີໄຫວພິບ, ເດັດດຽວຕໍ່ສູ້ເພື່ອປົກປັກຮັກສາອະທິປະໄຕ, ຜືນແຜ່ນດິນຢ່າງຄົບຖ້ວນ, ພ້ອມກັນນັ້ນ ກໍຍາດແຍ່ງທຸກກາລະໂອກາດເພື່ອຫຼຸດຜ່ອນຄວາມເຄັ່ງຕຶງ, ຟື້ນຟູຄວາມເຊື້ອໝັ້ນ, ຊຸກຍູ້ການຮ່ວມມືມິດຕະພາບ, ມານະພະຍາຍາມເຈລະຈາເພື່ອຊອກຫາວິທີການແກ້ໄຂໂດຍພື້ນຖານ, ຍາວນານ.
ເພື່ອຜົນປະໂຫຍດສູງສຸດຂອງປະເທດຊາດ
ບັນດາຜົນງານດ້ານການຕ່າງປະເທດນີ້ ແມ່ນປະຖົມປັດໄຈທີ່ສຳຄັນເພື່ອນຳປະເທດຊາດກ້າວເຂົ້າສູ່ໄລຍະພັດທະນາໃໝ່. ແຕ່ ວິວັດທະນາການເຊື່ອມໂຍງເຂົ້າກັບສາກົນນີ້ ຄຽງຂ້າງບັນດາເງື່ອນໄຂສະດວກຫຼາຍຢ່າງ ກໍພັດພວມໄດ້ຮັບກຳລັງດັນຫຼາຍຢ່າງຕໍ່ບັນຫາວັດທະນະທຳ, ສັງຄົມ ແລະ ສິ່ງແວດລ້ອມຂອງປະເທດຊາດ. ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມໄດ້ກຳນົດແຈ້ງ 2 ການກຳນົດທິດກ່ຽວກັບການຕ່າງປະເທດທີ່ສຳຄັນສຳລັບພາລະກິດສ້າງສາ ແລະ ປົກປັກຮັກສາປະເທດຊາດໃນຫຼາຍປີທີ່ຈະມາເຖິງ, ນັ້ນແມ່ນ “ຍົກສູງປະສິດທິຜົນການເຄື່ອນໄຫວວຽກງານການຕ່າງປະເທດ” ແລະ “ ຜັນຂະຫຍາຍກຳນົດທິດຍຸດທະສາດຢ່າງເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ”. ໂດຍປະຕິບັດຕາມໜ້າທີ່ດັ່ງກ່າວ, ກອງປະຊຸມວຽກງານການຕ່າງປະເທດຄັ້ງທີ 29 ໄດ້ກຳນົດ ເສີມຂະຫຍາຍພູມປັນຍາ ແລະ ບົດຮຽນຂອງທົ່ວຂະແໜງໃນລະດັບສູງສຸດເພື່ອແລກປ່ຽນ, ຊອກຫາທິດທາງ, ມາດຕະການລະອຽດ ແນໃສ່ຊຸກຍູ້ບັນດາຜົນປະໂຫຍດທາງດ້ານຄວາມໝັ້ນຄົງ ແລະ ການພັດທະນາ, ຍົກສູງທີ່ຕັ້ງບົດບາດສາກົນຂອງປະເທດຊາດ. ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດຫວຽດນາມຝ້າມບິງມິນ ໃຫ້ຂ້ໍສັງເກດວ່າ :
“ກອງປະຊຸມວຽກງານການທູດຄັ້ງນີ້ ສຸມໃສ່ປຶກສາຫາລື ເຮັດແນວໃດເພື່ອຍົກອອກບັນດາມາດຕະການເພື່ອປະຕິບັດບັນດາເປົ້າໝາຍສູງສຸດຂອງປະເທດຊາດໃນໄລຍະທີ່ຈະມາເຖິງ. ນັ້ນແມ່ນເຮັດແນວໃດ ສາມາດຮັກສາສະພາບແວດລ້ອມແຫ່ງສັນຕິພາບ, ສະຖຽນລະພາບໂດຍຜ່ານການເພີ່ມທະວີການພົວພັນກັບປະເທດຕ່າງໆ, ເປີດກ້ວາງການພົວພັນກັບບັນດາປະເທດບົນພື້ນຖານຜົນປະໂຫຍດແຫ່ງຊາດ. ເປົ້າໝາຍທີ 2 ແມ່ນເພີ່ມທະວີການເຊື່ອມໂຍງເຂົ້າກັບສາກົນຢ່າງເປັນເຈົ້າການ ແລະ ຕັ້ງໜ້າ. ສືບຕໍ່ປ່ຽນແປງໃໝ່ຈີນຕະນາການຮັບໃຊ້ເສດຖະກິດ, ຮ່ວມເດີນທາງພ້ອມກັບວິສາຫະກິດ ແລະ ປະຊາຊົນໃນການເຊື່ອມໂຍງເຂົ້າກັບສາກົນ ”
ດ້ວຍຈິດໃຈແຫ່ງການປ່ຽນແປງໃໝ່ ແລະ ມີສະຕິຄວາມຮັບຜິດຊອບຢ່າງສູງທີ່ມີຕໍ່ໜ້າທີ່ຊຶ່ງພັກ ແລະ ປະຊາຊົນມອບໝາຍໃຫ້ແກ່ຂະແໜງການຕ່າງປະເທດ, ກອງປະຊຸມວຽກງານການຕ່າງປະເທດຄັ້ງທີ 29 ຈະແມ່ນກອງປະຊຸມແຫ່ງຄວາມຕັດສິນໃຈກະທຳ, ປະກອບສ່ວນຢ່າງຕັ້ງໜ້າເຂົ້າໃນພາລະກິດສ້າງສາ ແລະ ປົກປັກຮັກສາປະເທດຫວຽດນາມສັງຄົມນິຍົມ.