(vovworld)- ໃນສະພາບການຫວຽດນາມ ຍູ້ແຮງການສ້າງໂຄງປະກອບພື້ນຖານເສດຖະກິດຄືນໃຫມ່, ເລື່ອງປ່ຽນໃຫມ່ນະໂຍບາຍ, ວິທີດຶງດູດເງິນລົງທຶນໂດຍກົງຂອງຕ່າງປະເທດ(ຫລື FDI) ພວມແມ່ນຄຳຮຽກຮ້ອງຕ້ອງການຈຳເປັນທີ່ສຸດ. ວຽກງານນີ້ ພວມໄດ້ຮັບການປະຕິບັດຢ່າງຄົບຊຸດ, ຕັ້ງຫນ້າ ນັບທັງຂັ້ນສູນກາງ ແລະ ທ້ອງຖິ່ນ. ການກຳນົດທິດດຶງດູດທຶນ FDI ໃນໄລຍະຈະມາເຖິງ ມີຈຸດທີ່ແຕກຕ່າງກັນຫລາຍເມື່ອທຽບໃສ່ກ່ອນນີ້ ນັ້ນແມ່ນ ບໍ່ແມ່ນ ຈຳນວນເງິນລົງທຶນ ຈະດຶງດູດໄດ້ເທົ່າໃດ ຫາກແມ່ນຄຸນນະພາບ,ຂົງເຂດການລົງທຶນ, ຄວາມສາມາດປ່ອຍ ເງິນລົງທຶນ.
ພາບປະກອບ:internet
|
ດຶງດູດບັນດາໂຄງການ FDI ມີການຄັດເລືອກ.
ຕາມທ່ານ ຫງວຽນວັນຈູງ, ຮອງລັດຖະມົນຕີກະຊວງແຜນການ ແລະ ການລົງທຶນຫວຽດນາມແລ້ວ, ປະຈຸບັນ, ຫວຽດນາມ ດຶງດູດທຶນ FDI ມີການຄັດເລືອກ ຕາມທິດເໝາະສົມກັບໄລຍະພັດທະນາໃຫມ່ກວ່າ. ລະອຽດ, ຫວຽດນາມ ສຸມໃສ່ດຶງດູດບັນດາໂຄງການບໍ່ກໍ່ມົນລະພິດເຖິງສິ່ງແວດລ້ອມ, ມີຄຸນນະພາບເຕັກໂນໂລຊີສູງ, ນຳໃຊ້ພະລັງງານ, ຊັບພະຍາກອນ ຫນ້ອຍ ແລະ ຄຸນນະພາບແຫລ່ງຊັບພະຍາກອນມະນຸດຖືກເພີ່ມຂຶ້ນ. ພ້ອມກັນນັ້ນ ຫວຽດນາມ ກໍສຸມໃສ່ດຶງດູດບັນດາໂຄງການໃຫຍ່,ມີລະດັບແຜ່ຂະຫຍາຍເພື່ອດຶງດູດບັນດາໂຄງການລົງທຶນອື່ນ.
ພ້ອມກັນນັ້ນ, ຫວຽດນາມ ກໍເພີ່ມທະວີສົ່ງເສີມການຮ່ວມສຳພັນລະຫວ່າງບັນດາບໍລິສັດຕ່າງປະເທດ ກັບບັນດາວິສາຫະກິດພາຍໃນປະເທດໃນບັນດາຂົງເຂດ, ຂະແຫນງອາຊີບ, ໂຄງການລະອຽດ ເພື່ອສ້າງການແຜ່ຂະຫຍາຍຢ່າງຕັ້ງຫນ້າກັບພື້ນຖານເສດຖະກິດ. ທ່ານ ຫງວຽນວັນຕວານ, ຮອງປະທານສະຫະສະມາຄົມວິສາຫະກິດມີເງິນລົງທຶນຂອງຕ່າງປະເທດໃຫ້ຮູ້ວ່າ:
“ວິສາຫະກິດຫວຽດນາມ ສ່ວນຫລາຍ ສະຫນອງພຽງເຄື່ອງອາໄລ່, ວັດຖຸດິບ. ຕາມການສຳຫລວດຂອງພວກຂ້າພະເຈົ້າແລ້ວ, ບັນດາວິສາຫະກິດຕ່າງປະເທດ ຢາກມີອຸດສາຫະກຳສຳຮອງຢູ່ຫວຽດນາມ . ຄຽງຄູ່ກັນນັ້ນ, ອົງການຄຸ້ມຄອງລັດ ຕ້ອງມີນະໂຍບາຍບຸລິມະສິດ ແລະ ບຸກທະລຸ, ຊ້ຳບໍ່ຫນຳ ລັດວິສາຫະກິດຄວນເຂົ້າຮ່ວມວິວັດການຮ່ວມສຳພັນນີ້.”
ຜັນຂະຫຍາຍບັນດາມາດຕະການຈາກສູນກາງລົງຮອດທ້ອງຖິ່ນຢ່າງຄົບຊຸດ
ນັບແຕ່ໄລຍະ 6 ເດືອນທ້າຍປີ 2013, ລັດຖະບານຫວຽດນາມ ໄດ້ປະກາດໃຊ້ມະຕິກ່ຽວກັບການກຳນົດທິດຍົກສູງປະສິດທິຜົນການດຶງດູດ, ນຳໃຊ້ ແລະ ຄຸ້ມຄອງການລົງທຶນໂດຍກົງຂອງຕ່າງປະເທດໃນໄລຍະຈະມາເຖິງ. ບົນຈິດໃຈນັ້ນ, ກະຊວງແຜນການ ແລະ ການລົງທຶນ ຜັນຂະຫຍາຍບັນດາມາດຕະການປັບປຸງກອບກົດໝາຍກ່ຽວກັບ FDI ໃຫ້ສົມບູນແບບ, ໃນນັ້ນ ຈຸດສຸມແມ່ນປັບປຸງກົດໝາຍວ່າດ້ວຍວິສາຫະກິດ, ພິຈາລະນາກົນໄກແບ່ງຂັ້ນໃນການດຶງດູດ ແລະ ຄຸ້ມຄອງ FDI, ພິຈາລະນາການເຄື່ອນໄຫວສົ່ງເສີມການລົງທຶນຄືນໃຫມ່. ນອກນັ້ນ ຫວຽດນາມ ກໍສຸມທຸກ ແຫລ່ງກຳລັງເພື່ອສາມາດດຶງດູດບັນດາໂຄງການໃຫຍ່. ທ່ານ ຫງວຽນວັນຈູງ, ຮອງລັດຖະມົນຕີກະຊວງແຜນການ ແລະ ການລົງທຶນໃຫ້ຮູ້ວ່າ:
“ຢູ່ຂັ້ນສູນກາງ ແລະ ທ້ອງຖິ່ນ ໄດ້ມີການປ່ຽນແປງລະບຽບການຕາມລຳດັບ ເພື່ອໃຫ້ນັກລົງທຶນສຳພັດກັບເອກະສານນິຕິກຳ, ຫນັງສືອະນຸຍາດລົງທຶນ. ສະພາແຫ່ງຊາດ ກໍໄດ້ຮັບຮອງເອົາກົດໝາຍວ່າດ້ວຍອາກອນລາຍຮັບວິສາຫະກິດ, ໃນນັ້ນ ສົ່ງເສີມໂຄງການລົງທຶນ. ທີສອງ, ນັບແຕ່ວັນທີ 1/1/2014 ເປັນຕົ້ນໄປ, ອາກອນວິສາຫະກິດກໍຫລຸດລົງ. ກອ່ນນີ້ ມີແຕ່ໃຫ້ບຸລິມະສິດໂຄງການລົງທຶນເຂົ້າເຂດເສດຖະກິດເທົ່ານັ້ນ, ປະຈຸບັນ ສະພາແຫ່ງຊາດອະນຸຍາດສົ່ງເສີມໂຄງການລົງທຶນເຂົ້າເຂດອຸດສາຫະກຳ. ສ່ົງເສີມໂຄງການມີນຳໃຊ້ເຕັກໂນໂລຊີສູງ, ບໍ່ກໍ່ມົນລະພິດເຖິງສິ່ງແວດລ້ອມ, ນຳໃຊ້ພະລັງງານ,ເນື້ອ ທີ່ດິນຫນ້ອຍ, ເພື່ອຮັບປະກັນຄວາມກົມກຽວໃນການພັດທະນາ.”
ໃນຂະນະນັ້ນ, ບັນດາທ້ອງຖິ່ນກໍຕັ້ງຫນ້າ, ເປັນເຈົ້າການປ່ຽນແປງວິທີດຶງດູດທຶນ FDI. ຢູ່ ແຂວງ ຮ່ານາມ, ການນຳແຂວງ ໝັ້ນໝາຍບໍ່ປະໃຫ້ເກີດສະພາບຂາດໄຟຟ້າຢ່າງລຽນຕິດໃນ 24 ຊົ່ງໂມງ. ນອກນັ້ນ ແຂວງ ຮ່ານາມ ຍັງສະຫງວນເນື້ອທີ່ດິນສ່ວນຫນຶ່ງ ເພື່ອໃຫ້ວິສາຫະກິດແຫ່ງໃດມີຄວາມຕ້ອງການກໍ່ສ້າງເຮືອນຢູ່ໃຫ້ແກ່ກຳມະກອນ, ພ້ອມທັງຫລຸດຜ່ອນເວລາ, ຫັນລະບຽບການບໍລິຫານໃນການອອກຫນັງສືອະນຸຍາດລົງທຶນໃຫ້ງ່າຍດາຍກວ່າ. ສ່ວນຢູ່ ແຂວງ ບີ່ງເຢືອງ, ຊື່ງແມ່ນທ້ອງຖິ່ນນຳຫນ້າທົ່ວປະເທດໃນການດຶງດູດທຶນ FDI ໃນໄຕມາດທີ 1/2014 ກໍສົ່ງເສີມບັນດາກຸ່ມບໍລິສັດ, ບັນດາວິສາຫະກິດ ໃນຂົງເຂດອຸດສາຫະກຳສູງ. ທ່ານ ມາຍຮຸ່ງຢູງ, ຫົວຫນ້າພະແນກແຜນການ ແລະ ການລົງທຶນ ແຂວງ ບີ່ງເຢືອງ ໃຫ້ຮູ້ວ່າ:
“ເລື່ອງຈຳກັດການລົງທຶນຢູ່ນອກເຂດອຸດສາຫະກຳກໍສົ່ງຜົນສະທ້ອນເຖິງບັນດາໂຄງການລົງທຶນທີ່ກໍ່ມົນລະພິດເຖິງສິ່ງແວດລ້ອມ, ນຳໃຊ້ຄົນງານຫລາຍ. ເຖິງຢ່າງໃດກໍຕາມ, ທາງແຂວງກໍສ່ົງເສີມ ແລະ ສະຫນັບສະຫນູນບັນດານັກລົງທຶນນຳໃຊ້ເຕັກໂນໂລຊີສະອາດລົງທຶນຢູ່ນອກເຂດອຸດສາຫະກຳ, ເປັນຕົ້ນແມ່ນບັນດາເມືອງຢູ່ທາງທິດເຫນືອ, ສ່ວນຢູ່ທາງທິດໃຕ້ ຍັງສືບຕໍ່ບຸລິມະສິດພັດທະນາບໍລິການ. ”
ປີ 2013, ການດຶງດູດເງິນລົງທຶນໂດຍກົງຂອງຕ່າງປະເທດໄດ້ຮັບຖືວ່າແມ່ນຈຸດພົ້ນເດັ່ນຂອງພື້ນຖານເສດຖະກິດຫວຽດນາມ ເມື່ອທຶນ FDI ໄດ້ລື່ນກາຍລະດັບ 20 ຕື້ USD. ປີ 2014, ດ້ວຍການປ່ຽນແປງຫລາຍຢ່າງໃນການດຶງດູດທຶນ FDI, ແຫລ່ງທຶນນີ້ ຈະປະກອບສ່ວນຢ່າງມີປະສິດທິຜົນກວ່າໃຫ້ແກ່ການພັດທະນາເສດຖະກິດຫວຽດນາມ.