(vovworld)- ເນື້ອໃນຊັກຖາມກ່ຽວຂ້ອງເຖິງຄວາມຮັບຜິດຊອບຂອງຫົວຫນ້າອົງການໃດ, ທ່ານນັ້ນຈະຕອບຄຳຊັກຖາມໂດຍກົງຕາມການຊີ້ນຳຂອງປະທານກອງປະຊຸມ. ທ້າຍວາລະຊັກຖາມ, ທ່ານນາຍົກລັດຖະມົນຕີ ຈະເຮັດແຈ້ງຕື່ມອີກບາງເນື້ອໃນທີ່ມີສ່ວນກ່ຽວຂ້ອງ ແລະ ຕອບຄຳຖາມໂດຍກົງຂອງບັນດາສະມາຊິກສະພາແຫ່ງຊາດ. ນີ້ແມ່ນບັນດາຈຸດຕົ້ນຕໍໃນການເຄື່ອນໄຫວຊັກຖາມ ແລະ ຕອບຄຳຊັກຖາມ ພວມດຳເນີນໄປໃນກອງປະຊຸມສະໄຫມສາມັນເທື່ອທີ 10 ສະພາແຫ່ງຊາດຫວຽດນາມ ຊຸດທີ 13.
ວາລະຊັກຖາມທີ່ກອງປະຊຸມສະໄຫມສາມັນເທື່ອທີ 10
ພາບ:internet
|
ວາລະຊັກຖາມ ແລະ ຕອບຄຳຊັກຖາມ ທີ່ກອງປະຊຸມສະໄຫມສາມັນເທື່ອທີ 10 ສະພາແຫ່ງຊາດຫວຽດນາມຊຸດທີ 13. ເນື້ອໃນຊັກຖາມລວມມີບັນດາໝວດບັນຫາຄື: ຕີລາຄາການກະທົບຂອງມະຕິຂອງສະພາແຫ່ງຊາດຕໍ່ການບໍລິຫານ, ຄຸ້ມຄອງ ຂອງລັດຖະບານ, ບັນດາກະຊວງ ຂະແຫນງການສູນກາງ, ທ້ອງຖິ່ນ ກ່ຽວກັບດ້ານການເມືອງ ເສດຖະກິດ, ວັດທະນະທຳ ສັງຄົມ, ການປ້ອງກັນຊາດ ປ້ອງກັນຄວາມສະຫງົບ, ຕີລາຄາໝາກຜົນແຫ່ງການປະຕິບັດຂອງລັດຖະບານ, ສານປະຊາຊົນສູງສຸດ, ໄອຍະການປະຊາຊົນສູງສຸດ ເມື່ອທຽບໃສ່ຄວາມຮຽກຮ້ອງຕ້ອງການຂອງບັນດາມະຕິຂອງສະພາແຫ່ງຊາດ ແລະ ບັນດາຄຳໝັ້ນສັນຍາຂອງລັດຖະບານ, ບັນດາກະຊວງ, ຂະແຫນງການສູນກາງ ເມື່ອຕອບຄຳຊັກຖາມ ທີ່ບັນດາສະໄຫມປະຊຸມ, ຕີລາຄາບັນດາຂໍ້ຈຳກັດ, ພິເສດ ແມ່ນບັນດາບັນຫາຍັງມີການຫັນປ່ຽນຊັກຊ້າ, ຕ້ອງປະຕິບັດໃນໄລຍະຈະມາເຖິງ. ສຸດທ້າຍ ແມ່ນການເຄື່ອນໄຫວຕິດຕາມກວດກາພາຍຫລັງປະຕິບັດບັນດາມະຕິຂອງສະພາແຫ່ງຊາດ ແລະ ບັນຫາຕ້ອງຖອດຖອນບົດຮຽນເພື່ອຍົກສູງປະສິດທິຜົນການຕິດຕາມກວດກາໃນໄລຍະຈະມາເຖິງ.
ປ່ຽນໃຫມ່ກ່ຽວກັບຮູບການ
ທີ່ກອງປະຊຸມສະໄຫມສາມັນເທືື່ອທີ 10 ນີ້, ສະພາແຫ່ງຊາດ ບໍ່ເລືອກເຟັ້ນຜູ້ຕອບຄຳຊັກຖາມລະອຽດ ກໍຄືບໍ່ຊັກຖາມຕາມໝວດບັນຫາຄືກ່ອນນີ້. ພາຍຫລັງໄດ້ຮັບຟັງບົດລາຍງານຂອງລັດຖະບານ ພ້ອມກັບບັນດາອົງການກ່ຽວຂ້ອງກ່ຽວກັບການປະຕິບັດບັນດາມະຕິຂອງສະພາແຫ່ງຊາດກ່ຽວກັບການຊັກຖາມ, ການຕິດຕາມກວດກາຫົວເລື່ອງສະເພາະ ນັບແຕ່ຕົ້ນອາຍຸການມາຮອດປະຈຸບັນ, ບັນດາສະມາຊິກສະພາແຫ່ງຊາດຈະປຶກສາຫາລື, ຊັກຖາມກ່ຽວກັບບັນດາເນື້ອໃນທີ່ຕົນເອງສົນໃຈ. ເນື້ອໃນຊັກຖາມແມ່ນມຸ່ງໄປເຖິງເລື່ອງເຮັດແຈ້ງຄວາມຮັບຜິດຊອບຂອງບັນດາລັດຖະມົນຕີ, ຫົວຫນ້າຂະແຫນງການ ກ່ຽວກັບບັນດາວຽກງານບັນລຸໄດ້ກໍຄືບໍທັນບັນລຸໄດ້ ໃນທັງອາຍຸການ. ເປັນອັນວ່າ, ສ່ວນຊັກຖາມຈະດຳເນີນສຳລັບບໍ່ວ່າສະມາຊິກລັດຖະບານທ່ານໃດ ພາຍຫລັງສະມາຊິກສະພາແຫ່ງຊາດ ຕັ້ງຄຳຖາມ. ກ່ຽວກັບສິ່ງດັ່ງກ່າວ, ທ່ານ ຫງວຽນແຫ້ງຟຸກ, ຫົວຫນ້າຫ້ອງວ່າການສະພາແຫ່ງຊາດ ໃຫ້ຮູ້ວ່າ:
“ບົນພື້ນຖານບັນດາຂໍ້ຄົງຄ້າງຂອງການປະຕິບັດ ມະຕິ 8 ສະບັບໃນບັນດາສະໄຫມປະຊຸມຄັ້ງກ່ອນ, ສະມາຊິກສະພາແຫ່ງຊາດ ອາດຈະຖາມບັນດາລັດຖະມົນຕີ, ຫົວຫນ້າຂະແຫນງໃນບໍ່ວ່າເນື້ອໃນໃດ. ສະນັ້ນ ບັນດາລັດຖະມົນຕີ ຕ້ອງກະກຽມທຸກເນື້ອໃນ ແລະ ຕ້ອງອະທິບາຍລະອຽດຕໍ່ສະພາແຫ່ງຊາດ ກ່ຽວກັບສາຍເຫດ ທີ່ພາໃຫ້ການປະຕິບັດບັນດາບັນຫາທີ່ຜູ້ມີສິດເລືອກຕັ້ງຍົກອອກມາ ແຕ່ບໍ່ ບັນລຸໄດ້ຕາມ ຄວາມຮຽກຮ້ອງຕ້ອງການ. ພາຍຫລັງການຊັກຖາມສຳເລັດ, ສະພາແຫ່ງຊາດ ຈະມີມະຕິ ສົ່ງໃຫ້ສະພາແຫ່ງຊາດຊຸດຕໍ່ໄປ ເພື່ອສືບຕໍ່ເລັ່ງລັດ, ຕິດຕາມກວດກາການປະຕິບັດບັນດາຂໍ້ຄົງຄ້າງຂອງສະພາແຫ່ງຊາດຊຸດທີ 13. ນີ້ແມ່ນເນື້ອໃນໃຫມ່ ຊື່ງແຕ່ກອ່ນມາຮອດປະຈຸບັນ ສະພາແຫ່ງຊາດ ບໍ່ທັນປະຕິບັດເທື່ອ.”
ເນື້ອໃນຊັກຖາມເປັນຫລາຍຮູບຫລາຍແບບ
ການເຄື່ອນໄຫວຊັກຖາມ ແລະ ຕອບຄຳຊັກຖາມທີ່ກອງປະຊຸມສະໄຫມສາມັນເທືີ່ອທີ 10 ສະພາແຫ່ງຊາດຊຸດທີ 13 ບໍ່ລົງເລິກບັນດາບັນຫາລະອຽດໃນປະຈຸບັນ ຫາກພຽງຕີລາຄາຄືນບັນດາການຊັກຖາມ, ການປະຕິບັດຄຳໝັ້ນໝາຍ, ຄຳໝັ້ນສັນຍາຂອງບັນດາສະມາຊິກລັດຖະບານ ນັບແຕ່ຕົ້ນອາຍຸການມາຮອດປະຈຸບັນ. ນີ້ແມ່ນປະລິມານວຽກງານໃຫຍ່, ມີຫລາຍບັນຫາ ແລະ ສອດຄອ່ງກັບບັນດາເນື້ອໃນຊັກຖາມສຸດທ້າຍຂອງອາຍຸການ. ບົນພື້ນຖານບັນດາບົດລາຍງານການເຄື່ອນໄຫວຕິດຕາມກວດກາຫົວເລື່ອງສະເພາະ, ການເຄື່ອນໄຫວຊັກຖາມນັບແຕ່ຕົ້ນອາຍຸການຊຸດທີ 13 ມາຮອດປີ 2015, ສະມາຊິກສະພາແຫ່ງຊາດ ແຕ່ລະທ່ານລ້ວນແຕ່ມີບັນດາ ເນື້ອໃນຮຽກຮ້ອງບັນດາສະມາຊິກລັດຖະບານ. ທ່ານ ຫງວຽນເຕີນຕວນ, ສະມາຊິກສະພາແຫ່ງຊາດ ແຂວງ ແຄງຮ່ວາ ໃຫ້ຮູ້ວ່າ:
“ຂ້າພະເຈົ້າມີຄວາມສົນໃຈພິເສດເຖິງບັນຫາການລົງທຶນພັດທະນາ. ຖ້າຫາກລົງທຶນແບບບໍ່ມີຈຸດສຸມ ຈະບໍ່ນຳມາເຊິ່ງປະສິດທິຜົນ, ຟຸມເຟືອຍງົບປະມານຂອງລັດ. ທີສອງ ບັນດານະໂຍບາຍຮັບປະກັນຊີວິດສັງຄົມ ຖ້າຫາກບໍ່ມີແຫລ່ງງົບປະມານ ຈະຜົນສະທ້ອນເຖິງຜູ້ປະສົບກັບຄວາມຫຍຸ້ງຍາກໃນສັງຄົມ.”
ປ່ຽນໃຫມ່ການຊັກຖາມ ແລະ ຕອບຄຳຊັກຖາມ ໄດ້ ແລະ ພວມໄດ້ຮັບການປະຕິບັດຈາກສະພາແຫ່ງຊາດ ເພື່ອຈຸດປະສົງຍົກສູງຄຸນນະພາບການເຄື່ອນໄຫວຂອງອົງການສະພາແຫ່ງຊາດ ກໍຄືປະສິດທິຜົນການຄຸ້ມຄອງຂະແຫນງການ ພິເສດ ແມ່ນແກ້ໄຂບັນດາຂໍ້ຕິດຂັດຢ່າງທັນການ, ຕອບສະຫນອງຄວາມມຸ່ງຫວັງຂອງຜູ້ມີສິດເລືອກຕັ້ງ. ບັນດາການປ່ຽນໃຫມ່ພົ້ນເດັ່ນໃນວາລະຊັກຖາມ ແລະ ຕອບຄຳຊັກຖາມ ທີ່ກອງປະຊຸມສະໄຫມສາມັນເທື່ອທີ 10 ສະພາແຫ່ງຊາດຊຸດທີ 13 ສະແດງໃຫ້ເຫັນນ້ຳໃຈຄວາມຮັບຜິດຊອບໃນຄວາມມານະພະຍາຍາມປະຕິບັດບົດບາດຫນ້າທີ່ຕິດຕາມກວດກາຂອງສະພາແຫ່ງຊາດ ນັບມື້ນັບມີປະສິດທິຜົນ.