(vovworld) - ສະພາແຫ່ງຊາດຊຸດທີ 13 ພວມດຳເນີນກອງປະຊຸມສະໄໝສາມັນເທື່ອສຸດທ້າຍຂອງອາຍຸການ 5 ປີ. ໃນ 5 ປີຜ່ານມາ, ການເຄື່ອນໄຫວຂອງສະພາແຫ່ງຊາດໄດ້້ສ້າງຂີດໝາຍຫຼາຍຢ່າງ ແລະ ໄດ້ຮັບການຮັບຮູ້ຈາກຜູ້ມີສິດເລືອກຕັ້ງວ່າ ແມ່ນສະພາແຫ່ງຊາດທີ່ຂະຫຍັນຂັນແຂງ, ປ່ຽນໃໝ່, ຕອບສະໜອງຄວາມຕ້ອງການຂອງພຶດຕິກຳຕົວຈິງໃນການດຳລົງຊີວິດຢ່າງທັນການ, ປະກອບສ່ວນຢ່າງຕັ້ງໜ້າເຂົ້າໃນພາລະກິດສ້າງສາ ແລະ ປົກປັກຮັກສາປະເທດຊາດ, ກໍ່ຄືການເຊື່ອມໂຍງເຂົ້າກັບສາກົນ.
(ພາບປະກອບ)
ໃນອາຍຸການຂອງສະພາແຫ່ງຊາດຊຸດທີ 13, ສະພາແຫ່ງຊາດ ໄດ້ມີຜົນງານຫຼາຍຢ່າງ, ເປັນຂີດໝາຍໃນການສ້າງລັດຖະທຳມະນູນ, ສ້າງກົດໝາຍ; ການຕິດຕາມກວດກາສູງສຸດ. ສະພາແຫ່ງຊາດກໍ່ໄດ້ສ້າງຂີດໝາຍດ້ວຍການເຄື່ອນໄຫວພົວພັນຕ່າງປະເທດ. ເມື່ອຕີລາຄາສັງລວມກ່ຽວກັບອາຍຸການຂອງສະພາແຫ່ງຊາດຊຸດທີ 13. ທ່ານ ເຈິ່ນຢູລິກ, ສະມາຊິກ ສະພາແຫ່ງຊາດ, ນະຄອນ ໂຮ່ຈີມິນ, ຖືວ່າ:
“ສະພາແຫ່ງຊາດຊຸດທີ 13 ມີການປ່ຽນໃໝ໋ຢ່າງແຮງກວ່າ, ປະຊາທິປະໄຕກວ່າໃນການປຶກສາຫາລື ແລະ ວາງອອກລັດຖະນະໂຍບາຍ; ມີຄວາມຮັບຜິດຊອບຕໍ່ຜູ້ມີສິດເລືອກຕັ້ງໃນການປະຕິບັດໜ້າທີ່ກວ່າ; ແລະ ໄດ້ຮັບຄວາມໄວ້ເນື້ອເຊື່ອໃຈຈາກຜູ້ມີສິດເລືອກຕັ້ງຫຼາຍກວ່າ“.
ຂີດໝາຍໃນການສ້າງກົດໝາຍ
ໃນອາຍຸການ 5 ປີ, ສະພາແຫ່ງຊາດບໍ່ພຽງແຕ່ປະຕິບັດສຳເລັດກົດໝາຍດ້ວຍຈຳນວນສະຖິຕິເທົ່ານັ້ນ, ຫາກຍັງຍົກສູງຈິດໃຈປົກປ້ອງສິດຂອງມະນຸດອີກດ້ວຍ. ຜົນງານພົ້ນເດັ່ນຂອງອາຍຸການຊຸດທີ 13 ແມ່ນສະພາແຫ່ງຊາດໄດ້ເຮັດຫຼ້ອນໜ້າທີ່ປະກາດໃຊ້ລັດຖະທຳມະນູນປີ 2013 ແລະ ຫັນເປັນລະອຽດລັດຖະທຳມະນູນໃນກົດໝາຍຕ່າງໆ. ລັດຖະທຳມະນູນປີ 2013 ແມ່ນລັດຖະທຳມະນູນແຫ່ງໄລຍະປ່ຽນແປງໃໝ່ດ້ານເສດຖະກິດ ແລະ ການເມືອງຢ່າງຮອບດ້ານ, ຄົບຊຸດ, ຕອບສະໜອງຄວາມຮຽກຮ້ອງຕ້ອງການຂອງພາລະກິດສ້າງສາ, ປົກປັກຮັກສາປະເທດຊາດ ແລະ ການເຊື່ອມໂຍງເຂົ້າກັບສາກົນ.
ພ້ອມກັບການຮັບຮອງເອົາລັດຖະທຳມະນູນສະບັບໃໝ່, ໃນອາຍຸການຜ່ານມາ, ສະພາແຫ່ງຊາດໄດ້ສຸມໃສ່ວຽກງານສ້າງກົດໝາຍດ້ວຍຈຳນວນຫຼາຍທີ່ສຸດ, ພິຈາລະນາ, ປັບປຸງ, ເພີ່ມເຕີມ ຫຼືປະການໃຊ້ບັນດາປະມວນກົດໝາຍໃຫຍ່, ບັນດາກົດໝາຍສຳຄັນສ່ວນຫຼາຍ, ສຳເລັດລະບົບກົດໝາຍກ່ຽວກັບການກໍ່ສ້າງລັດແຫ່ງອຳນາດນິຕິບັນຍັດສັງຄົມນິຍົມ ໂດຍພື້ນຖານ. ບັນດາກົດໝາຍ, ລັດຖະບັນຍັດ ໄດ້ສ້າງພື້ນຖານນິຕິກຳຢ່າງຄົບຊຸດໃຫ້ແກ່ການປ່ຽນແປງໃໝ່, ຕອບສະໜອງຄວາມຮຽກຮ້ອງຕ້ອງການເຊື່ອມໂຍງເຂົ້າກັບສາກົນຢ່າງເລິກເຊິ່ງກວ້າງຂວາງ. ທ່ານ ເລມິງທົງ, ຮອງເລຂາທິການໃຫຍ່ຂອງສະພາແຫ່ງຊາດ, ໃຫ້ຮູ້ວ່າ:
“ສະພາແຫ່ງຊາດຊຸດທີ 13 ໄດ້ສ້າງຂີດໝາຍຫຼາຍຢ່າງເມື່ອຮັບຮອງເອົາລັດຖະທຳມະນູນປີ 2013, ແລະ ບັນດາກົດໝາຍສຳຄັນທີ່ຕິດພັນກັບກົງຈັກລັດ ຕິດພັນກັບສິດທິມະນຸດ, ສິດຂອງພົນລະເມືອງ, ຕາມມາດຕະຖານຂອງລັດແຫ່ງອຳນາດນິຕິບັນຢັດ. ອາດເວົ້າໄດ້ວ່າ, ສະພາແຫ່ງຊາດຊຸດທີ 13 ແມ່ນສະພາແຫ່ງຊາດທີ່ໄດ້ຮັບຮອງເອົາກົດໝາຍດ້ວຍຈຳນວນຫຼາຍທີ່ສຸດ, ດ້ວຍ 107 ກົດໝາຍ ແລະ ມະຕິຫຼາຍສະບັບອີກ. ມັນເປັນຂີດໝາຍແຫ່ງບາດກ້າວເຕີບໃຫຍ່ຂອງສະພາແຫ່ງຊາດຫວຽດນາມ, ນັ້ນແມ່ນສະພາແຫ່ງຊາດທີ່ຖືເອົາຜົນປະໂຫຍດຂອງປະຊາຊົນເປັນກົກເຄົ້າໃຫ້ກົດໝາຍຕ່າງໆ“.
ຂັ້ນຕອນສ້າງກົດໝາຍກໍ່ມີການປົວແປງ, ປ່ຽນໃໝ່ຫຼາຍຢ່າງ ຕາມທິດຍົກສູງຄຸນນະພາບ, ເພີ່ມລັກສະນະເປັນເຈົ້າການ, ແໜ້ນແຟ້ນ, ຈະແຈ້ງ, ລະອຽດໃນເອກະສານດ້ານກົດໝາຍ. ເລື່ອງໄຈ້ແຍກນະໂຍບາຍ, ຕີລາຄາການກະທົບກ່ອນທີ່ສ້າງຮ່າງກົດໝາຍໄດ້ຮັບຖືເປັນສຳຄັນ..
ຕິດຕາມກວດກາການຫັນປ່ຽນຢ່າງແຮງໃນການປະຕິບັດກົດໝາຍ
ການເຄື່ອນໄຫວຕິດຕາມກວດກາຂອງສະພາແຫ່ງຊາດມີການປ່ຽນໃໝ່ຫຼາຍຢ່າງ, ສ້າງການຫັນປ່ຽນຢ່າງແຮງໃນການເຄື່ອນໄຫວຂອງກົງຈັກລັດ, ຈາກສູນກາງລົງຂັ້ນຮາດຖານ. ຂອບເຂດຕິດຕາມກວດກາຂອງສະພາແຫ່ງຊາດແມ່ນຫຼາຍຮູບຫຼາຍແບບ, ຈາກບັນຫາເສດຖະກິດມະຫາພາກ ເຖິງບັນດາບັນຫາຊີວິດສັງຄົມອັນຮີບເຮັ່ງ. ກ່ຽວກັບການຊັກຖາມ, ທ່ານ ຫງວຽນຊິງຮຸ່ງ, ປະທານສະພາແຫ່ງຊາດຖືວ່າ:
“ການເຄື່ອນໄຫວຊັກຖາມຂອງສະພາແຫ່ງຊາດມີການປ່ຽນໃໝ່ຫຼາຍຢ່າງ, ເອົາໃຈໃສ່ເຖິງຄຸນນະພາບ, ຍົກສູງຈິດໃຈສ້າງສັນ, ລັກສະນະປະຊາທິປະໄຕ, ເປີດເຜີຍ, ເຈລະຈາ ແລະ ສະຕິຮັບຜິດຊອບ, ກໍ່ຄືການຕຳນິຕິຊົມຕົນເອງຂອງຜູ້ຖືກຊັກຖາມ. ພິເສດ, ທີ່ກອງປະຊຸມສາມັນເທື່ອທີ 10, ສະພາແຫ່ງຊາດໄດ້ດຳເນີນການຊັກຖາມບັນດາຜູ້ເປັນຫົວໜ້າ ອົງການແຫ່ງລັດໃນການປະຕິບັດບັນດາມະຕິຂອງສະພາແຫ່ງຊາດກ່ຽວກັບການຕິດຕາມກວດກາຫົວເລື່ອງສະເພາະ, ກ່ຽວກັບການຊັກຖາມ, ຕອບຄຳຊັກຖາມນັບແຕ່ຕົ້ນອາຍຸການ. ອາດເວົ້າໄດ້ວ່າ, ສະພາແຫ່ງຊາດໄດ້ໃກ້ຊິດຕິດແທດກັບເລື່ອງປະຕິບັດມະຕິຂອງສະພາແຫ່ງຊາດ“.
ໃນອະຍຸການ, ສະພາແຫ່ງຊາດໄດ້ຕາງໜ້າປະຊາຊົນທົ່ວປະເທດປະຕິບັດສິດຕິດຕາມກວດກາສູງສຸດ 2 ຄັ້ງໃນການຕີລາຄາຄວາມໄວ້ວາງໃຈສຳລັບບັນດາຕຳແໜ່ງການນຳທີ່ຫຼັກແຫຼ່ງແກ່ນສານ ໂດຍສະພາແຫ່ງຊາດເລືອກຕັ້ງ ແລະ ໃຫ້ສັດຕະຍາບັນ.
ການເຄື່ອນໄຫວພົວພັນຕ່າງປະເທດປະກອບສ່ວນເພີ່ມທະວີການພົວພັນມິດຕະພາບ, ການຮ່ວມມືກັບບັນດາປະເທດໃນໂລກ
ໃນ 5 ປີຜ່ານມາ, ການເຄື່ອນໄຫວພົວພັນກັບຕ່າງປະເທດຫຼາຍຢ່າງຂອງການນຳສະພາແຫ່ງຊາດ, ອົງການຂອງສະພາແຫ່ງຊາດ ແລະ ບັນດາສະມາຊິກສະພາແຫ່ງຊາດ ໄດ້ຮັບການຍູ້ແຮງ, ປະກອບສ່ວນຊຸກຍູ້ການພົວພັນມິດຕະພາບ, ການຮ່ວມມືຫຼາຍດ້ານລະຫວ່າງສະພາແຫ່ງຊາດຫວຽດນາມກັບລັດຖະສະພາປະເທດຕ່າງໆ, ບັນດາອົງການສາກົນ, ນຳສາຍພົວພັນນີ້ໃຫ້ພັດທະນາຢ່າງເລິກເຊິ່ງ, ກວ້າງຂວາງ, ສ້າງສະພາບແວດລ້ອມສາກົນທີ່ສະດວກໃຫ້ແກ່ພາລະກິດສ້າງສາ ແລະ ປົກປັກຮັກສາປະເທດຊາດ. ພິເສດ, ປີ 2015, ເປັນຄັ້ງທຳອິດທີ່ ຫວຽດນາມຈັດຕັ້ງກອງປະຊຸມໃຫຍ່ສະຫະພັນລັດຖະສະພາສາກົນ IPU 132 ສຳເລັດ, ແລະເປັນຄັ້ງທຳອິດທີ່ທ່ານ Ban ki moon ເລຂາທິການໃຫຍ່ ສະຫະປະຊາຊາດ ກ່າວປາໃສຕໍ່ສະພາແຫ່ງຊາດ ຫວຽດນາມ. ທ່ານ ໂງດຶກແມ້ງ, ຮອງຫົວໜ້າກຳມາທິການການຕ່າງປະເທດ ສະພາແຫ່ງຊາດ, ຖືວ່າ:
“ບົດບາດພົ້ນເດັ່ນໃນການເຄື່ອນໄຫວການຕ່າງປະເທດຂອງສະພາແຫ່ງຊາດ ແມ່ນການສ້າງສະພາບສັນຕິພາບ, ສະຖຽນລະພາບ ເພື່ອໃຫ້ປະເທດພັດທະນາ. ພ້ອມກັບວຽກງານການຕ່າງປະເທດຂອງພັກ, ລັດ, ວຽກງານການຕ່າງປະເທດຂອງປະຊາຊົນ, ຂອງສະພາແຫ່ງຊາດ ບໍ່ພຽງແຕ່ປະກອບສ່ວນເພີ່ມທະວີສາຍພົວພັນຮ່ວມມືລະຫວ່າງສະພາແຫ່ງຊາດ ຫວຽດນາມ ກັບລັດຖະສະພາປະເທດຕ່າງໆຢ່າງເລິກເຊິ່ງເທົ່ານັ້ນ, ຫາກໃນບັນດາສະພາວະປະສົບກັບຄວາມຫຍຸ້ງຍາກ, ອະທິປະໄຕແຫ່ງຊາດຖືກນາບຂູ່ນັ້ນ ພວກເຮົາກໍ່ສາມາດແກ້ໄຂສຳເລັດຜົນໄດ້“
ອາຍຸການສະພາແຫ່ງຊາດຊຸດທີ 13 ໃກ້ຈະສິ້ນສຸດແລ້ວ. ໃນ 5 ປີຜ່ານມາ, ດ້ວຍຄວາມມານະພະຍາຍາມຂອງສະມາຊິກສະພາແຫ່ງຊາດແຕ່ລະທ່ານ, ບັນດາອົງການວິຊາການ, ສະພາແຫ່ງຊາດ ໄດ້ສຳເລັດວຽກງານດ້ວຍຈຳນວນຫຼາຍ, ຕອບສະໜອງຄວາມຮຽກຮ້ອງຕ້ອງການຂອງພຶດຕິກຳຕົວຈິງແຫ່ງການດຳລົງຊີວິດຢ່າງທັນການ. ດ້ວຍບັນດາການປ່ຽນໃໝ່ ແລະ ຂີດໝາຍທີ່ສຳຄັນນັ້ນ. ສະພາແຫ່ງຊາດຊຸດທີ 13 ໄດ້ສຳເລັດພາລະໜ້າທີ່ເປັນອົງການສິດອຳນາດແຫ່ງລັດສູງສຸດ ແລະ ເປັນອົງການຕົວແທນສູງສຸດຂອງປະຊາຊົນທົ່ວປະເທດ.