(vovworld)- ໃນປະເພດຮູບເງົາເອກະສານຂອງຂະແຫນງຮູບເງົາຫວຽດນາມ ກ່ຽວກັບຫົວເລື່ອງປະທານໂຮ່ຈິມີນ, ຜູ້ກຳກັບການສະແດງ ບູ່ຍດີງຮາກ ເຄີຍຖືກເວົ້າເຖິງ ເມື່ອທ່ານ ພ້ອມກັບເພື່ອນຮ່ວມງານ ຜະລິດຮູບເງົາກ່ຽວກັບປະທານໂຮ່ຈິມີນ ໄດ້ 4 ຊຸດ. ໃນໂອກາດສະເຫລີມສະຫລອງ 45 ປີ ແຫ່ງວັນປະທານໂຮ່ຈິມີນ ເຖິງແກ່ມໍລະນະກຳ, ເຊີນທ່ານຮັບຟັງ ຜູ້ກຳກັບການສະແດງ ບູຍດີງຮາກ ແບ່ງປັນອະນຸສອນເມື່ອຜະລິດຮູບເງົາກ່ຽວກັບປະທານໂຮ່ຈິມີນ.
ປະທານໂຮ່ຈິມີນ
ພາບເອກະສານ:dangcongsan.vn
|
ໂດຍໄດ້ຮັບການກຳເນີດເມື່ອ ປີ 1934 ຢູ່ ບ້ານ ຮ່ຽນກວານ, ເມືອງ ຕາມນົງ ແຂວງ ຟູທໍ້ ແລະ ເລີ່ມຕົ້ນການເຄື່ອນໄຫວໃນຂົງເຂດຮູບເງົາແຕ່ປີ 1953 ມາຮອດປະຈຸບັນ, ນັກສິລະປິນປະຊາຊົນ ບູ່ຍດີງຮາກ ເປັນກຽດໄດ້ຮັບລາງວັນທີຫນຶ່ງ 10 ລາງວັນ ທີ່ງານມະໂຫລານຮູບເງົາສາກົນ ແລະ ຫວຽດນາມ, ໃນນັ້ນບັນດາຮູບເງົາໄດ້ຮັບລາງວັນນັ້ນ, ລ້ວນແຕ່ຕິດພັນກັບຮູບເງົາກ່ຽວກັບປະທານໂຮ່ຈິມີນ. ຜູ້ກຳກັບການສະແດງ ບູ່ຍດີງຮາກ ແບ່ງປັນວ່າ: ນອກຈາກຄວາມຮັກແພງປະທານໂຮ່ຈິມີນແລ້ວ, ສິ່ງທີ່ເລັ່ງລັດທ່ານຜະລິດບັນດາຮູບເງົາກ່ຽວກັບເພີ່ນນັ້ນ ແມ່ນເລີ່ມມາຈາກຄວາມຮັບຮູ້, ຄວາມເຄົາລົບນັບຖື ແລະ ເປັນຕົ້ນແມ່ນບັນດາອະນຸສອນທີ່ບໍ່ອາດຫລົງລືມໄດ້ເມື່ອເຂົ້າທຳນຽບປະທານປະເທດສາຍຮູບເງົາ ແລະ ໄດ້ພົບປະກັບເພີ່ນ.
ຮູບເງົາເລື່ອງທຳອິດທີ່ທ່ານຜະລິດກ່ຽວກັບປະທານໂຮ່ຈີມີນ ນັ້ນແມ່ນ “ບົດເພງຍ້ອງຍໍລຸງໂຮ່”. ຮູບເງົານີ້ໄດ້ຮັບການຜະລິດພາຍຫລັງດຳເນີນກອງປະຊຸມໃຫຍ່ຄັ້ງທີ 4 ຂອງພັກເມື່ອປີ 1976, ໂດຍເລີ່ມມາຈາກຄຳຍ້ອງຍໍປະທານໂຮ່ຈິມີນ ຂອງບັນດາຜູ້ແທນສາກົນ. ຮອດປີ 1980, ກົງກັບໂອກາດສະເຫລີມສະຫລອງ 90 ປີແຫ່ງວັນຄ້າຍວັນເກີດປະທານໂຮ່ຈິມີນ, ຜູ້ກຳກັບການສະແດງ ບູ່ຍດີງຮາກ ໄດ້ຜະລິດສຳເລັດຮູບເງົາ “ ຫງວຽນອາຍກວັກ ກັບເລນີນ” ແລະ “ເສັ້ນທາງກັບເມືອປະເທດ”. ຜູ້ກຳກັບການສະແດງ ບູ່ຍດີງຮາກ ແບ່ງປັນວ່າ: ສຳລັບຮູບເງົາ “ເສັ້ນທາງກັບເມືອປະເທດ”. ກອງຜະລິດຮູບເງົາ ມີໂອກາດໄດ້ໄປເຖິງບັນດາສະຖານທີ່ເຊິ່ງປະທານໂຮ່ຈິມີນໄດ້ໄປຜ່ານໃນໄລຍະທາງແຫ່ງການເຄື່ອນໄຫວປະຕິວັດທີ່ຫຍຸ້ງຍາກລຳບາກໃນຕະ ຫລອດເກືອບ 2 ທົດສະວັດ. ສ່ວນຮູບເງົາ “ຫງວຽນອາຍກວັກ ກັບເລນີນ” ແມ່ນສຸມໃສ່ການເຄື່ອນໄຫວຂອງເພິ່ນໃນໄລຍະເວລາສັ້ນໆ, ຈາກລະດູແລ້ງປີ 1923 ຮອດລະດູໃບໄມ້ຫລົ່ນປີ 1924. ເວລານັ້ນ ປະທານໂຮ່ຈິມີນ ເປັນຄັ້ງທຳອິດໄປເຖິງສະຫະພາບໂຊຫວຽດເກົ່າ ແລະ ເຂົ້າຮ່ວມການເຄ່ືອນໄຫວກອມມູນິດສາກົນ. ກອງຜະລິດຮູບເງົາ ໄດ້ວາດພາບຮູບພາບຊາຍຫນຸ່ມ ຫງວຽນອາຍກວັກ ເມື່ອອາຍຸ 33 ປີ ແຕ່ສະແດງໃຫ້ເຫັນຈຸດພິເສດຂອງປະທານໂຮ່ຈິມີນ, ຈາກກິລິຍາທ່າທາງດ້ານວັດທະນະທຳ, ອາລົມຈິດຄວາມຮັກແພງມະນຸດຕະຫລອດຮອດຈີນຕະນາການການເມືອງ.
“ເມື່ອຜະລິດບັນດາຮູບເງົາກ່ຽວກັບປະທານໂຮ່ຈິມີນ, ຂ້າພະເຈົ້າເປັນຫ່ວງທີ່ສຸດ ເພາະວ່າ ນີ້ແມ່ນຫົວເລື່ອງໃຫຍ່. ສະນັ້ນ ເມື່ອຜະລິດຮູບເງົານີ້, ທຳອິດຕ້ອງໄປຊອກຫາບັນດາເອກະສານ, ຊອກຫາບັນດາຕົວພະຍານປະຫວັດສາດ. ສຳລັບຮູບເງົາ “ຫງວຽນອາຍກວັກ ກັບເລນີນ”, ທຳອິດ ພວກຂ້າພະເຈົ້າຕ້ອງຊອກໃຫ້ໄດ້ບັນດາເອກະສານຮູບເງົາ ເພື່ອພິສູດໃຫ້ເຫັນ ມື້ທຳອິດທີ່ປະທານໂຮ່ຈິມີນໄປເຖິງປະເທດ ໂຊຫວຽດ ເກົ່າ. ຍ້ອນວ່າ ສິ່ງນີ້ແມ່ນສຳຄັນທີ່ສຸດ ບໍ່ພຽງແຕ່ຮັບໃຊ້ການຜະລິດຮູບເງົາ ເທົ່ານັ້ນ ຫາກຍັງຮັບໃຊ້ໃຫ້ການຂຽນປະຫວັດສາດຂອງການປະຕິວັດຫວຽດນາມ, ກ່ຽວກັບຊີວິດແລະ ການເຄື່ອນໄຫວຂອງປະທານໂຮ່ຈິມີນ ອີກດ້ວຍ. ”
ແລະ ສຸດທ້າຍ ບັນດາຜູ້ຜະລິດຮູບເງົາກໍຊອກໄດ້ຫນັງສືຜ່ານແດນຂອງປະທານໂຮ່ຈິມີນ ທີ່ໄດ້ນຳໃຊ້ເມື່ອໄປເຖິງ ສະຫະພາບໂຊຫວຽດເກົ່າ.
ປະທານໂຮ່ຈິມີນ ເຂົ້າຮ່ວມການປູກຕົ້ນໄມ້ກັບປະຊາຊົນ
ພາບເອກະສານ:internet
|
ໃນໂອກາດສະເຫລີມສະຫລອງ 100 ປີແຫ່ງວັນຄ້າຍວັນເກີດຂອງປະທານໂຮ່ຈິມີນ (ປີ 1990), ຜູ້ກຳກັບການສະແດງ ບູ່ຍດີງຮາກ ເລີ່ມຕົ້ນການຜະລິດຮູບເງົາ “ໂຮ່ຈິມີນ - ຮູບພາບມະນຸດຜູ້ຫນຶ່ງ”. ຜູ້ກຳກັບການສະແດງ ບູ່ຍດີງຮາກ ໃຫ້ຮູ້ວ່າ:
“ກ່ຽວກັບຮູບເງົາ “ໂຮ່ຈິມີນ - ຮູບພາບມະນຸດຜູ້ຫນຶ່ງ”, ພວກຂ້າພະເຈົ້າ ບໍ່ລົງເລິກພັນລະນາຜູ້ນຳໂຮ່ຈິມີນ ພ້ອມກັບບັນດາການເຄື່ອນໄຫວດ້ານການເມືອງ ຄືດັ່ງຮູບເງົາ 2 ຊຸດກ່ອນນີ້ ຫາກພວກຂ້າພະເຈົ້າພັນລະນາຮູບພາບຂອງມະນຸດຜູ້ຫນື່ງ ດ້ວຍແນວຄວາມຄິດ, ອາລົມຈິດ, ຈິດໃຈ ແລະ ກິລິຍາທ່າທາງຂອງເພີ່ນ… ເພື່ອສະແດງໃຫ້ເຫັນບຸກຄະລິກຕະພາບປະທານໂຮ່ຈິມີນ.”
ເພື່ອຜະລິດຮູບເງົາ “ໂຮ່ຈິມີນ - ຮູບພາບຂອງມະນຸດຜູ້ຫນຶ່ງ”, ຜູ້ກຳກັບການສະແດງບູ່ຍດີງຮາກ ພ້ອມດ້ວຍຜູ້ຮ່ວມງານ ຕ້ອງເບິ່ງຮູບເອກະສານຫລາຍໝື່ນແມັດ ເພື່ອຊອກຫາບັນດາຮູບພາບອັນລຳ້ຄ່າ ກ່ຽວກັບປະທານໂຮ່ຈິມີນ. ທ່ານ ບູ່ຍດີງຮາກ ແບ່ງປັນວ່າ:
“ເວລາຜະລິດຮູບເງົາກ່ຽວກັບປະທານໂຮ່ຈີມີນ, ເມື່ອຄົ້ນເຫັນຮູບພາບໃຫມ່ກ່ຽວກັບເພີ່ນ, ພວກຂ້າພະເຈົ້າຮູ້ສຶກດີໃຈປຽບເໝືອນວັນບຸນ. ພວກຂ້າພະເຈົ້າຕື້ນຕັນໃຈທີ່ສຸດ ເມື່ອຊອກເຫັນຮູບພາບປະທານໂຮ່ຈິມີນ ຢູ່ໃນຫນັງສືພິມແປວໄຟຂອງລັດເຊຍ. ດ້ວຍບົດຂຽນຂອງນັກກະວີ ລັດເຊຍ Mandettan ເມື່ອປີ 1923 ທີ່ວ່າ: ຫງວຽນອາຍກວັກ ໄດ້ສະແດງໃຫ້ເຫັນພື້ນຖານວັດທະນະທຳ, ບໍ່ແມ່ນວັດທະນະທຳເອີລົບເທົ່ານັ້ນ ຫາກຍັງແມ່ນພື້ນຖານວັດທະນະທຳໃນອະນາຄົດອີກດ້ວຍ. ”
ຜູ້ກຳກັບການສະແດງ ບູ່ຍດີງຮາກ
photo:internet
|
ຜູ້ກຳກັບການສະແດງ ບູ່ຍດີງຮາກ ແບ່ງປັນວ່າ: ຂ້າພະເຈົ້າ ຍັງສືບຕໍ່ຄົ້ນຄິດເຖິງການຜະລິດຮູບເງົາປະທານໂຮ່ຈິມີນ, ເພາະເຖິງວ່າຈະພະຍາຍາມຄືແນວໃດກໍບໍ່ສາມາດພັນລະນາ, ສ່ອງແສງຄວາມຍິ່ງໃຫຍ່, ສູງສົ່ງ ແຕ່ພັດທຳມະດາສາມັນ ແລະ ຄ່ຽມຄົມຂອງຜູ້ນຳທີ່ປີຊາສາມາດຂອງຊາດໄດ້ໝົດ. ຜູ້ກຳກັບການສະແດງ ບູ່ຍດີງຮາກ ຍາມໃດກໍນຶກຄິດວ່າ: ຊີວິດຂອງປະທານໂຮ່ຈິມີນ, ຄຸນສົມບັດປະຕິວັດ ແລະ ແບບຢ່າງຂອງເພີ່ນ ນັ້ນແມ່ນຫົວເລື່ອງປະດິດແຕ່ງທີ່ບໍ່ມີວັນສິ້ນສຸດສຳລັບ ທ່ານ ແລະ ເພື່ອນຮ່ວມງານ.