(vovworld)-ພາຍຫລັງຄະນະບໍລິຫານງານສູນກາງພັກກອມມູນິດຫວຽດນາມ ປະກາດໃຊ້ມະຕິກອງປະຊຸມຄັ້ງທີ 4 ຄະນະບໍລິຫານງານສູນກາງພັກຊຸດທີ 11 (ເອີ້ນຫຍໍ້ວ່າ: ກອງປະຊຸມສູນກາງຄັ້ງທີ 4) ພາຍໃຕ້ຫົວເລື່ອງ: “ບາງບັນຫາຮີບດ່ວນກ່ຽວກັບການກໍ່ສ້າງພັກໃນປະຈຸບັນ”, ບັນດາອົງຄະນະພັກຢູ່ທ້ອງຖິ່ນຕ່າງໆພວມຕັ້ງຫນ້າຜັນຂະຫຍາຍມະຕິດັ່ງກ່າວ. ຫາງສຽງຖືວ່າ ເລື່ອງຜັນຂະຫຍາຍການປະຕິບັດມະຕິແມ່ນບັ້ນດຳເນີນຊີວິດການເມືອງສຳຄັນໃນພັກ.
ຢູ່ນະຄອນ ໂຮ່ຈິມີນ, ໃນເວລາພຽງສອງວັນທີ່ດຳເນີນກອງປະຊຸມຊາບຊືມມະຕິ ກອງປະຊຸມສູນກາງຄັ້ງທີ 4, ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ຮັບເອົາກວ່າ 300 ຄຳເຫັນໂດຍຖືວ່າ: ບັ້ນຮ່ຳຮຽນມະຕິ ກອງປະຊຸມສູນກາງ ຄັ້ງທີ 4 ຄັ້ງນີ້ແມ່ນສະແດງໃຫ້ເຫັນທັດສະນະເຫັນດີເຫັນພ້ອມສູງໃນທົ່ວອົງຄະນະພັກນະຄອນໂຮ່ຈິມີນ ກ່ຽວກັບວຽກງານກໍ່ສ້າງພັກ. ເລື່ອງຜັນຂະຫຍາຍການຮ່ຳຮຽນມະຕິສູນກາງຄັ້ງທີ 4 ຂອງນະຄອນໄດ້ຍົກໃຫ້ເຫັນບັນດາວິທີການໃຫມ່ເມື່ອທຽບໃສ່ ກ່ອນນີ້ໃນວຽກງານກໍ່ສ້າງພັກ ແລະ ມີລັກສະນະຄວາມເປັນໄປໄດ້ສູງ. ທ່ານ Nguyen Van Phung ປະທານສະມາຄົມຊາວກະສິກອນ ນະຄອນ ໂຮ່ຈິມີນ ໃຫ້ຮູ້ວ່າ:
“ຄືດັ່ງທ່ານເລຂາຄະນະພັກໄດ້ເວົ້າວ່າ: ເຖິງວ່າຍາກກໍຕ້ອງເຮັດ, ກໍຕ້ອງຜັນຂະຫຍາຍເພື່ອສະແດງໃຫ້ເຫັນວ່າອົງຄະນະພັກນະຄອນມີຄວາມຕັດສິນໃຈ, ຂ້ຽວຂາດ. ແທນທີ່ກ່ອນນີ້ພວກເຮົາດຳເນີນການສຳຫລວດກວດກາໃນແຕ່ລະປີ, ປະຈຸບັນຕ້ອງສຳຫລວດກວດກາບັນດາບັນຫາຮີບດ່ວນ, ທີ່ຈຳເປັນ. ພິເສດ ແມ່ນ 19 ຂໍ້ຫ້າມສຳລັບສະມາຊິກພັກ, ຖ້າພວກເຮົາປະຕິບັດບັນຫານີ້ເປັນຢ່າງດີ ສະມາຊິກພັກຈະເຕີບໂຕຫລາຍກວ່າ, ມີສະຕິຄວາມຮັບຮູ້ດີກວ່າ, ມີບົດບາດຫລາຍກວ່າໃນຊີວິດການເປັນຢູ່ ແລະ ໄດ້ຮັບຄວາມຮັກແພງເຊື່ອໝັ້ນຈາກໝູ່ມະຫາຊົນ, ແລະ ປະຊາຊົນ ຫລາຍກວ່າ, ຜ່ານນັ້ນ ປັບປຸງອົງການຈັດຕັ້ງ, ບົດບາດຂອງພັກກອມມູນິດຫວຽດນາມໃຫ້ນັບມື້ນັບດີກວ່າເກົ່າ.”
ໃນຂະນະນັ້ນ ທ່ານ Pham Ngoc Han ສະມາຊິກອົງຄະນະພັກ, ຮອງຫົວຫນ້າພະແນກສຶກສາ ແລະ ບຳລຸງສ້າງນະຄອນ ໂຮ່ຈິມີນ ເວົ້າວ່າ:
“ບັ້ນຮ່ຳຮຽນມະຕິສູນກາງຄັ້ງທີ 4 ແມ່ນບັ້ນດຳເນີນຊີວິດທີ່ມີຊີວິດຊີວາ ຊຶ່ງພວກເຮົາຄິດວ່າທົ່ວພັກ, ທົ່ວກອງທັບ ແລະ ທົ່ວປວງຊົນ ລ້ວນແຕ່ມີຄວາມປິຕິຊົມຊື່ນ. ຂ້າພະເຈົ້າເອງເຫັນວ່າ ນັ້ນແມ່ນບັນຫາສຳຄັນຫລາຍ ເພາະວ່າເມື່ອປະຕິບັດມະຕິດັ່ງກ່າວ, ສະມາຊິກພັກແຕ່ລະຄົນ ເຖິງວ່າໃນຖານະຕຳແຫນ່ງໃດກໍຕ້ອງສຳຫລວດກວດກາຕົນເອງຄືນໃຫມ່ ແລະ ແນ່ນອນວ່າໃນແນວຄວາມຄິດ, ວຽກງານຂອງຕົນອາດຈະມີການຫັນປ່ຽນຢ່າງກະໂດດຂັ້ນ. ນອກນັ້ນຍັງມີສິ່ງຫນຶ່ງອີກທີ່ພວກຂ້າພະເຈົ້າມີຄວາມພາກພູມໃຈ ນັ້ນແມ່ນຜ່ານບົດປາໄສໄຂກອງປະຊຸມ ແລະ ອັດກອງປະຊຸມຂອງທ່ານເລຂາທິການໃຫຍ່ Nguyen Phu Trong ພວກຂ້າພະເຈົ້າຖືວ່າ: ເລີ່ມແຕ່ການນຳສູງສຸດຂອງພັກໄດ້ມີຄວາມເຂົ້າໃຈຢ່າງເລິກເຊິ່ງຕໍ່ຄວາມມຸ້ງມາດປາດຖະຫນາຂອງປະຊາຊົນ ແລະ ສະມາຊິກພັກ ແນ່ນອນວ່າ ບັນດາຂໍ້ກຳນົດນີ້ຈະໄດ້ຮັບການປະຕິບັດເປັນຢ່າງດີ.”
ສ່ວນຢູ່ນະຄອນຫລວງຮ່າໂນ້ຍ, ແຫ່ງທີ່ອົງຄະນະພັກນະຄອນ ດ້ວຍຈຳນວນສະມາຊິກພັກ 340.000 ຄົນ, ກວມກວ່າ 10% ຍອດຈຳນວນສະມາຊິກພັກໃນທົ່ວປະເທດນັ້ນ. ເລື່ອງຜັນຂະຫຍາຍ ມະຕິສູນກາງຄັ້ງທີ 4 ຢູ່ ຮ່າໂນ້ຍ ຈະປະກອບສ່ວນສຳຄັນໃຫ້ແກ່ໝາກຜົນແຫ່ງການຜັນຂະຫຍາຍຂອງທົ່ວພັກ ແລະ ສ້າງການຫັນປ່ຽນຢ່າງຕັ້ງຫນ້າໃນທົ່ວປະເທດ. ເຂົ້າຮ່ວມກອງປະຊຸມຊາບຊືມການຜັນຂະຫຍາຍມະຕິ ກອງປະຊຸມສູນກາງຄັ້ງທີ 4 ຫວ່າງແລ້ວນີ້ ຢູ່ ຮ່າໂນ້ຍ, ທ່ານ Le Xuan Truong ເລຂາຄະນະພັກເມືອງ Tu Liem ຮ່າໂນ້ຍ ໃຫ້ຮູ້ວ່າ:
“ພວກຂ້າພະເຈົ້າຈະສ້າງແຜນການຜັນຂະຫຍາຍຢ່າງລະອຽດໃນທົ່ວອົງຄະນະພັກເມືອງ Tu Liem, ຈະຈັດຕັ້ງກອງປະຊຸມສະມາຊິກພັກຫລັກແຫລ່ງ ແລະ ຕໍ່ໄປແມ່ນຊີ້ນຳໃຫ້ອົງຄະນະພັກຂັ້ນຮາກຖານເພື່ອຊາບຊືມໃຫ້ພະນັກງານ, ສະມາຊິກພັກ ຖືການເພີ່ມທະວີວຽກງານກວດກາ, ຕິດຕາມກວດກາໃນທຸກຂົງເຂດວຽກງານເປັນສຳຄັນ. ເປັນຕົ້ນແມ່ນການກະກຽມໃຫ້ແກ່ການຕຳນິຕິຊົມ ແລະ ປຽບທຽບກັບມາດຕະຖານຂອງສະມາຊິກພັກ ແລະ 19 ຂໍ້ຫ້າມສຳລັບສະມາຊິກພັກເພື່ອພົວພັນຕິດຕໍ່, ສຳຫລວດກວດກາໃນການຜັນຂະຫຍາຍປະຕິບັດມະຕິສູນກາງຄັ້ງທີ 4.”
ນະຄອນໂຮ່ຈິມີນ ຈັດກອງປະຊຸມຊາບຊືມມະຕິສູນກາງຄັ້ງທີ 4
ພາບ:vnexpress.net
|
ຕາມທ່ານ Le Thanh Hai ກຳມະການກົມການເມືອງ, ເລຂາຄະນະພັກນະຄອນ ໂຮ່ຈີມີນ ແລ້ວ, ເພື່ອສ້າງການຫັນປ່ຽນຢ່າງແຮງກ່ຽວກັບວຽກງານກໍ່ສ້າງພັກ, ຄວນປະຕິບັດ 8 ຫນ້າທີ່ໃນວຽກງານກໍ່ສ້າງພັກເປັນຢ່າງດີ ຊຶ່ງກອງປະຊຸມໃຫຍ່ທົ່ວປະເທດຄັ້ງທີ 11 ຂອງພັກກອມມູນິດຫວຽດນາມ ໄດ້ວາງອອກເປັນຢ່າງດີ ແລະ ຖືວ່າ ນີ້ແມ່ນຫນ້າທີ່ຕົ້ນຕໍ, ຍາວນານ ແລະ ຕ້ອງປະຕິບັດຢ່າງມີປະສິດທິຜົນ ແລະ ເປັນປະຈຳ, ພ້ອມກັນນັ້ນ ຕ້ອງເອົາໃຈໃສ່ຢ່າງສູງສຸດໃນການຊີ້ນຳນຳພາການປະຕິບັດບັນດາບັນຫາຮີບດ່ວນ ຊຶ່ງໄດ້ລະບຸໄວ້ໃນມະຕິສູນກາງຄັ້ງທີ 4 ໃຫ້ເປັນຢ່າງດີ.
“ໃນ 4 ໝວດມາດຕະການຊີ້ນຳຂອງກົມການເມືອງ, ຄະນະບໍລິຫານງານສູນກາງພັກນັ້ນ ໝວດມາດຕະການທີ 1 ແມ່ນຕຳນິຕິຊົມແມ່ນມາດຕະການຈຸດສຸມ. ວິທີເຮັດແມ່ນປະຕິບັດຢູ່ຂັ້ນເທິງສາກ່ອນ, ຫລັງຈາກນັ້ນ ແມ່ນປະຕິບັດຢູ່ຂັ້ນຮາກຖານດ້ວຍຈິດໃຈທີ່ວ່າ ພວກເຮົາຊາບຊືມສະຕິຕຶນຕົວ, ເປັນແບບຢ່າງໃນການປະຕິບັດມະຕິສູນກາງຄັ້ງທີ 4, ພິເສດ ແມ່ນກ່ຽວຂ້ອງເຖິງບັນຫາຕຳນິຕິຊົມ. ”
ສ່ວນທ່ານ Pham Quang Nghi ກຳມະການກົມການເມືອງ, ເລຂາອົງຄະນະພັກນະຄອນ ຮ່າໂນ້ຍ ໄດ້ຢືນຢັນວ່າ ເລື່ອງຜັນຂະຫຍາຍບັ້ນຮ່ຳຮຽນມະຕິກອງປະຊຸມສູນກາງຄັ້ງທີ4 ແມ່ນບັ້ນດຳເນີນຊີວິດການເມືອງທີ່ສຳຄັນ ເພື່ອຍົກສູງລັກສະນະນຳຫນ້າ, ເປັບແບບຢ່າງຂອງຖັນແຖວພະນັກງານຫລັກແຫລ່ງໃນທົ່ວນະຄອນ, ຍູ້ການເສື່ອມເສຍຂອງພະນັກງານ, ສະມາຊິກພັກໃຫ້ຖອຍໄປ, ປະກອບສ່ວນກໍ່ສ້າງພັກໃຫ້ນັບມື້ນັບເຂັ້ມແຂງ ປອດໄສ.
ນັກຂ່າວທູຮວາ