ປີ 2011 ຫວຽດນາມບັນລຸໄດ້ບັນດາຜົນງານທີ່ໜ້າປະທັບໃຈກ່ຽວກັບການລົບລ້າງຄວາມທຸກຍາກ. ຍ້ອນຫລາຍແຫ່ງບັນລຸໄດ້ລະດັບເຕີບໂຕທາງດ້ານເສດຖະກິດ ອັນໄດ້ເຮັດໃຫ້ຄຸນນະພາບຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີພໍສົມຄວນ ໂດຍຜ່ານຫລາຍໂຄງການ, ນະໂຍບາຍໄດ້ຮັບການປະຕິບັດຢ່າງມີປະສິດທິຜົນຄື: ໂຄງການຈຸດໝາຍແຫ່ງຊາດກ່ຽວກັບການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ໂຄງການພັດທະນາເສດຖະກິດສັງຄົມຢູ່ບັນດາຕາແສງປະສົບກັບຄວາມຫຍຸ້ງຍາກເປັນພິເສດ, ເຂດຫ່າງໄກສອກຫລີກ ແລະ ເຂດພູດອຍ ໄລຍະ 2006 - 2010, ໂຄງການຫນູນຊ່ວຍການຫລຸດຜ່ອນຄວາມທຸກຍາກຢ່າງວອ່ງໄວ ແລະ ໝັ້ນຄົງທີ່ມີຕໍ່ 62 ເມືອງທຸກຍາກ, ນະໂຍບາຍຫນູນຊ່ວຍຊົນເຜົ່າທີ່ປະສົບກັບຄວາມຫຍຸ້ງຍາກເປັນພິເສດ (ມະຕິເລກທີ 30a). ບັນດາຜົນງານນັ້ນ ໄດ້ສ້າງຄວາມເຫັນດີເຫັນພ້ອມໃນສັງຄົມ ແລະ ໄດ້ຮັບການຕີລາຄາສູງ ກໍຄືການຮັບຮູ້ຈາກປະຊາຄົມໂລກ.
ໂຄງການລົບລ້າງຄວາມອຶດຫິວຫລຸດຜ່ອນຄວາມທຸກຍາກ
ພາບ:vietbao.vn
ປີ 2011 ເສດຖະກິດຂາດຄວາມເປັນປົກກະຕິ, ໄພເງິນເຟີ້ຢູ່ໃນລະດັບສູງ ບວກກັບຜົນຮ້າຍຢ່າງຫນັກຫນ່ວງຈາກໄພທຳມະຊາດ, ສະນັ້ນ ຊີວິດການເປັນຢູ່ຂອງປະຊາຊົນເວົ້າລວມ ເປັນຕົ້ນແມ່ນຜູ້ທຸກຍາກປະສົບກັບຄວາມຫຍຸ້ງຍາກ. ຕໍ່ຫນ້າສະພາບການຄືດັ່ງກ່າວ, ລັດຖະບານຫວຽດນາມ ໄດ້ປະກາດໃຊ້ມະຕິເລກທີ 11 ກ່ຽວກັບບັນດາມາດຕະການບໍລິຫານການພັດທະນາເສດຖະກິດ ສັງຄົມໃນສະພາບການໃຫມ່, ໃນນັ້ນ ການປະຕິບັດນະໂຍບາຍຄວບຄຸມງົບປະມານ, ຫລຸດຜ່ອນ ແລະ ຊັບຊ້ອນການລົງທຶນຂອງລັດຄືນໃຫມ່ ແຕ່ບຸລິມະສິດສຸມໃສ່ຊີ້ນຳການຮັບປະກັນຊີວິດສັງຄົມ ແລະ ສະຫວັດດີການສັງຄົມ ພ້ອມກັນນັ້ນ ສືບຕໍ່ຜັນຂະຫຍາຍບັນດານະໂຍບາຍຫລຸດຜ່ອນຄວາມທຸກຍາກທີ່ພວມປະຕິບັດຢ່າງມີປະສິດທິຜົນໃນປະຈຸບັນ. ເພາະສະນັ້ນ ໄລ່ຮອດທ້າຍປີ 2011, ອັດຕາສ່ວນຜູ້ທຸກຍາກໃນທົ່ວປະເທດໄດ້ຫລຸດລົງກວ່າ 2% ຍັງເຫລືອພຽງ 14%. ດ້ວຍໝາກຜົນນີ້, ວຽກງານຫລຸດຜ່ອນຄວາມທຸກຍາກໃນປີ 2011 ໄດ້ສຳເລັດຄາດໝາຍທີ່ສະພາແຫ່ງຊາດໄດ້ວາງອອກ. ທ່ານ ໂງເຈື່ອງທີ, ຫົວຫນ້າຫ້ອງການປະສານງານໂຄງການລົບລ້າງຄວາມທຸກຍາກ, ສັງກັດກະຊວງແຮງງານ ທະຫານເສຍອົງຄະ ແລະ ສັງຄົມ ໃຫ້ຮູ້ວ່າ: ນະໂຍບາຍຮັບປະກັນຊີວິດສັງຄົມ ຊຶ່ງລັດຖະບານຫວຽດນາມສຸມໃສ່ໃຫ້ແກ່ປີ 2011 ຄື: ຫນູນຊ່ວຍໃຫ້ແກ່ຄອບຄົວທຸກຍາກ, ຫນູນຊ່ວຍໃຫ້ແກ່ຄອບຄົວມີລາຍຮັບຕ່ຳ, ໃນນັ້ນ ມີຄອບຄົວທຸກຍາກ, ຫນູນຊ່ວຍການປະກັນສຸຂະພາບ, ຫນູນຊ່ວຍຄ່າຮຽນ ແລະ ຍົກເວັ້ນ, ຫລຸດຜ່ອນລາຍຈ່າຍ ແລະຫນູນຊ່ວຍເຮືອນຢູ່ ກໍ່ຄືສືບຕໍ່ໃຫ້ກູ້ຢືມສິນເຊື່ອບຸລິມະສິດສຳຫລັບຄອບຄົວທີ່ທຸກຍາກ, ດ້ວຍຍອດຈຳນວນເງິນເກືອບ 3.300 ຕຶ້ດົ່ງ ໄດ້ສົ່ງຜົນກະທົບອັນຕັ້ງຫນ້າເຖິງວຽກງານຫລຸດຜ່ອນຄວາມທຸກຍາກໃນປີ 2011.
“ປີ 2011 ລັດຖະບານບຸລິມະສິດຈັດແບ່ງແຫລ່ງກຳລັງແຮງເພື່ອສືບຕໍ່ປະຕິບັດບັນດາເນື້ອໃນຕົ້ນຕໍຂອງໂຄງການຫລຸດຜ່ອນຄວາມທຸກຍາກປີ 2006 - 2010 ດ້ວຍລາຍຈ່າຍເພີ່ມຂຶ້ນທົບສອງເທົ່າ ເພື່ອສືບຕໍ່ຫນູນຊ່ວຍ, ລົງທຶນໃຫ້ແກ່ 62 ເມືອງທຸກຍາກໃນທົ່ວປະເທດ.ນອກນັ້ນ ໃນວິວັດການປະຕິບັດໂຄງການຫລຸດຜ່ອນຄວາມທຸກຍາກ ໄດ້ລະດົມທຶນຈາກກອງທຶນ (ວັນເພື່ອຄົນທຸກຍາກ) ດ້ວຍເງິນຈຳນວນກວ່າ 6000 ຕຶ້ດົ່ງ ແລະບັນດາວິສາຫະກິດກໍ່ຫນູນຊ່ວຍໃຫ້ບັນດາເມືອງທີ່ທຸກຍາກກວ່າ 5000 ຕຶ້ດົ່ງ ເພື່ອປະຕິບັດມະຕິເລກທີ 30a. ຂ້າພະເຈົ້າຖືວ່າ ແຫລ່ງ ກຳລັງແຮງບຸລິມະສິດຂອງລັດຖະບານກໍຄືແຫລ່ງເງິນຂົນຂວາຍຂອງສັງຄົມກໍໄດ້ປະກອບສ່ວນຊ່ວຍໃຫ້ເມືອງທຸກຍາກໃນທົ່ວປະເທດ ຫຼຸດຜ່ອນຄວາມຫຍຸ້ງຍາກ. ເມື່ອທຽບໃສ່ປີ 2010, ນີ້ແມ່ນວິທີການໃຫຍ່ຂອງລັດຖະບານກໍຄືຂອງທົ່ວສັງຄົມທີ່ມີຕໍ່ຂົງເຂດຫລຸດຜ່ອນຄວາມທຸກຍາກ.”
ໃນຍຸດທະສາດຫລຸດຜ່ອນຄວາມທຸກຍາກຢູ່ຫວຽດນາມ, ວຽກງານຈຳກັດບໍ່ໃຫ້ຄວາມທຸກຍາກເກິດຂຶ້ນຄືນໃຫມ່ ແມ່ນຫນຶ່ງໃນບັນດາເນື້ອໃນສຳຄັນຊື່ງໄດ້ຮັບຄວາມເອົາໃຈໃສ່ຈາກລັດຖະບານ. ວຽກງານຫນູນຊ່ວຍເປົ້າໝາຍທຸກຍາກໃນທົ່ວປະເທດເກືອບ 2.5 ລ້ານຄົນ, ຫນູນຊ່ວຍໃຫ້ແກ່ການສອນວິຊາຊີບ ແລະ ສ້າງວຽກເຮັດງານທຳຢ່າງເໝາະສົມເພື່ອໃຫ້ຄອບຄົວທຸກຍາກສ້າງລາຍຮັບ ບວກກັບການປະຕິບັດບັນດານະໂຍບາຍຫນູນຊ່ວຍຜູ້ທຸກຍາກເປັນຢ່າງດີຄື: ນະໂຍບາຍສາທາລະນະສຸກ, ການສຶກສາ, ສິນເຊື່ອ, ເຮືອນຢູ່ ... ນັ້ນແມ່ນບັນດາປັດໃຈອັນຕັ້ງຫນ້າເພື່ອຈຳກັດສະພາບເກີດຄວາມທຸກຍາກຄືນໃຫມ່ໃນປີຜ່ານມາ. ຄຽງຂ້າງນັ້ນ, ມະຕິຂອງລັດຖະບານກ່ຽວກັບການກຳນົດທິດຫລຸດຜ່ອນຄວາມທຸກຍາກແບບຍື່ນຍົງ ໄລຍະ 2011 - 2020 ໄດ້ສຸມໃສ່ບຸລິມະສິດໃຫ້ເຂດທີ່ປະສົບກັບຄວາມຫຍຸ້ງຍາກ, ນັ້ນແມ່ນບັນດາເມືອງທຸກຍາກ, ຕາແສງປະສົບກັບຄວາມຫຍຸ້ງຍາກເປັນພິເສດຢູ່ເຂດພູດອຍ, ເຂດຊົນເຜົ່າ, ຕາແສງຢູ່ເຂດຊາຍແດນ, ບ້ານ, ໝູ່ບ້ານທີ່ປະສົບກັບຄວາມຫຍຸ້ງຍາກເປັນພິເສດ, ເຂດໝູ່ເກາະ .... ໄດ້ຮັບການຜັນຂະຫຍາຍປະຕິບັດ ປະກອບສ່ວນຊຸກຍູ້ການປົວແປງຊີວິດການເປັນຢູ່ຂອງ ປຊຊ ຢູ່ເຂດທີ່ປະສົບກັບຄວາມຫຍຸ້ງຍາກ ເພື່ອຮັດແຄບຊ່ອງຫວ່າງ ລະຫວ່າງຜູ້ຮັ່ງມີ ກັບຜູ້ທຸກຍາກ ລະຫວ່າງເຂດຊຸມຊົນ, ລະຫວ່າງບັນດາເຂດໃນທົ່ວປະເທດ. ທ່ານຮ່ວາງຈີທຶກ ປະທານຄະນະກຳມະການ ປຊຊ ແຂວງ ເຊີນລາ ໃຫ້ຮູ້ວ່າ:
“ ຂ້າພະເຈົ້າຖືວ່າ ນີ້ແມ່ນນະໂຍບາຍສຳຄັນທີ່ສຸດ, ມີຄວາມໝາຍ, ເປັນຕົ້ນແມ່ນໃນການມຸ້ງໄປເຖິງການຫນູນຊ່ວຍຄອບຄົວທຸກຍາກອຶດຫິວ, ເຂດປະສົບກັບຄວາມຫຍຸ້ງຍາກ. ບັນດານະໂຍບາຍນີ້ໄດ້ຮັບຄວາມສະຫນັບສະຫນູນຈາກປຊຊ ແລະ ໄດ້ລະດົມກຳລັງແຮງສັງລວມຂອງປຊຊທຸກຊັ້ນວັນນະຢູ່ເຂດຊຸມຊົນ ພ້ອມກັນເຂົ້າຮ່ວມການຊ່ວຍເຫລືອບັນດາຄອບຄົວທຸກຍາກ ຄອບຄົວທີ່ມີຄຸນງາມຄວາມດີຕໍ່ການປະຕິວັດ.”
ໃນໄລຍະ 10 ປີ ຜ່ານມາ, ຜົນງານແຫ່ງການລົບລ້າງຄວາມອຶດຫິວຫລຸດຜ່ອນຄວາມທຸກຍາກເຊິ່ງຫວຽດນາມບັນລຸໄດ້ແມ່ນມີການປະກອບສ່ວນຢ່າງມີປະສິດທິຜົນຂອງປະຊາຄົມໂລກ. ທີ່ກອງປະຊຸມ ໃຫ້ຄຳປຶກສາຂອງ ບັນດານັກອຸປະຖຳຊຶ່ງດຳເນີນໄປໃນລະຫວ່າງເດືອນ 12 ຢູ່ ຮ່າໂນ້ຍ, ບັນດາອົງການສາກົນ ໄດ້ຕີລາຄາສູງການກຳນົດທິດຫລຸດຜ່ອນຄວາມທຸກຍາກແບບຍືນຍົງຊຶ່ງລັດຖະບານຫວຽດນາມໄດ້ວາງອອກ ແລະ ຖືວ່າ ນັ້ນແມ່ນພື້ນຖານເພື່ອໃຫ້ບັນດາອົງການສາກົນສ້າງແຜນການຮ່ວມມືກັບລັດຖະບານຫວຽດນາມ ໃນຊຸມປີຈະມາເຖິງ. ເມື່ອເວົ້າເຖິງບັນຫານີ້ ທ່ານ ໂງເຈຶ່ອງທີ ໃຫ້ຮູ້ວ່າ:
“ປະຈຸບັນ, ບັນດາອົງການສາກົນພວມສ້າງແຜນການຫນູນຊ່ວຍການຫລຸດຜ່ອນຄວາມທຸກຍາກຢູ່ຫວຽດນາມ ຮອດປີ 2015. ພວກຂ້າພະເຈົ້າໄດ້ມີໂອກາດແລກປ່ຽນ, ປຶກສາຫາລືກັບບັນດາອົງການ EU, WB, UNDP ແລະ ບັນດາຄູ່ຮ່ວມມືພັດທະນາອື່ນ. ເຂົາເຈົ້າພວມມຸ້ງໄປເຖິງບັນດາມາດຖານຫລຸດຜ່ອນຄວາມທຸກຍາກລວມຢູ່ຫວຽດນາມເພື່ອສ້າງແຜນການເຄື່ອນໄຫວ, ຫນູນຊ່ວຍ, ລົງທຶນຢູ່ບັນດາເຂດທີ່ປະສົບກັບຄວາມທຸກຍາກກວ່າໝູ່ຢູ່ຫວຽດນາມ. ບັນດາອົງການສາກົນ ກໍພວມມຸ້ງໄປເຖິງການຫນູນຊ່ວຍຫວຽດນາມຍົກສູງກຳລັງຄວາມສາມາດ ຫລຸດຜ່ອນຄວາມທຸກຍາກຢ່າງມີປະສິດທິຜົນ, ຫນູນຊ່ວຍດ້ານເຕັກນິກ ເພື່ອໃຫ້ຫວຽດນາມ ຍູ້ແຮງການແບ່ງຂັ້ນ, ມອບສິດໃຫ້ແກ່ຂັ້ນຮາກຖານ, ໃຫ້ແກ່ ປຊຊ ໃນວິວັດການປະຕິບັດຈຸດໝາຍຫລຸດຜ່ອນຄວາມທຸກຍາກ, ພິເສດແມ່ນ ເຂົາເຈົ້າໄດ້ເນັ້ນຫນັກເຖິງລັກສະນະໂປ່ງໃສ ແລະ ເປີດເຜີຍ ໃນການຈັດຕັ້ງປະຕິບັດການຫລຸດຜ່ອນຢູ່ຫວຽດນາມ.”
ໂດຍກຳນົດໄດ້ວ່າ ວິວັດການປະຕິບັດຈຸດໝາຍຫລຸດຜ່ອນຄວາມທຸກຍາກແມ່ນວິວັດການປະຕິບັດຢ່າງຍາວນານ ແມ່ນຫນ້າທີ່ຄວາມຮັບຜິດຊອບຂອງລັດຖະບານກໍຄືຂອງບັນດາຂັ້ນ, ຂະແຫນງການ, ວຽກງານຫລຸດຜ່ອນຄວາມທຸກຍາກໃນປີ 2012 ສືບຕໍ່ໄດ້ຮັບການລົງທຶນຈາກລັດຖະບານ, ໃນນັ້ນ ເລ່ັງໃສ່: ການປະຕິບັດໂຄງການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ສ້າງພື້ນຖານໂຄງລ່າງໃຫ້ແກ່ບັນດາເຂດທຸກຍາກ, ຕາແສງທຸກຍາກ ພ້ອມກັນນັ້ນ ກໍຍົກລະດັບ, ບູລະນະບັນດາເສັ້ນທາງຄົມມະນາຄົມເຊື່ອມຕໍ່ເຂດທຸກຍາກ, ຕາແສງທຸກຍາກກັບເຂດອື່ນ, ສ້າງເງື່ອນໄຂສະດວກໃຫ້ເຂດທຸກຍາກ, ເຂດປະສົບກັບຄວາມຫຍຸ້ງຍາກພັດທະນາ. ໄປຄຽງຄູ່ກັບການກໍ່ສ້າງພື້ນຖານໂຄງລ່າງ, ສືບຕໍ່ສ້າງແຫລ່ງກຳລັງທີ່ຈຳເປັນເພື່ອໃຫ້ຊຸມຊົນຢູ່ບັນດາເຂດທຸກຍາກ, ຕາແສງທຸກຍາກຍູ້ແຮງການຜະລິດ, ພັດທະນາວິຊາຊີບ, ເພີ່ມລາຍຮັບ ຍົກລະດັບຄ່າຄອງຊີບຂອງບັນດາຄອບຄົວໃຫ້ຫລຸດພົ້ນອອກຈາກຄວາມທຸກຍາກເທື່ອລະກ້າວ, ຫລຸດຜ່ອນອັດຕາສ່ວນຄອບຄົວທຸກຍາກໃນປີ 2012 ລົງເຫລືອພຽງ 10 -11%, ຫລີກລ້ຽງສະພາບເກີດຄວາມທຸກຍາກຂຶ້ນຄືນໃຫມ່ໃນທົ່ວປະເທດ./.