(vovworld)-ວັນທີ 17/8, ລາຍການພົບປະຫວຽດນາມ ຄັ້ງທີ 9 ຈະອັດລົງພາຍຫລັງ ເຮັດວຽກມາເປັນເວລາຫລາຍມື້ (ນັບແຕ່ວັນທີ 28/7-17/8). ລາຍການພົບປະໄດ້ດຶງດູດນັກວິທະຍາສາດ 220 ທ່ານ ທີ່ມາຈາກ 30 ປະເທດ ແລະ ເຂດແຄ້ວນໃນໂລກ, ໃນນັ້ນ ມີນັກວິທະຍາສາດ 5 ທ່ານໄດ້ຮັບລາງວັນ Nobel ຟີຊິກສາດ, ນີ້ໄດ້ຮັບຖືວ່າແມ່ນກາລະໂອກາດດີສຳລັບບັນດານັກວິທະຍາສາດ ຫວຽດນາມ ເພື່ອພົບປະ, ແບ່ງປັນຄວາມຮູ້, ບົດຮຽນ ແລະ ບັນດາໂຄງການຄົ້ນຄ້ວາຂອງຕົນ ກັບວົງການນັກວິທະຍາສາດສາກົນ.
ລາຍການພົບປະຫວຽດນາມຄັ້ງທີ 9 ໂດຍສະມາຄົມວິທະຍາສາດພົບປະຫວຽດນາມ ສົມທົບກັບກະຊວງວິທະຍາສາດ ແລະ ເຕັກໂນໂລຊີ, ກະຊວງສຶກສາ- ບຳລຸງສ້າງ, ກະຊວງການຕ່າງປະເທດຫວຽດນາມ ພ້ອມກັບຄະນະກຳມະການປະຊາຊົນແຂວງ ບີ່ງດີ້ງ ຈັດຕັ້ງ. ລາຍການດັ່ງກ່າວດຳເນີນໄປແຕ່ວັນທີ 28/7-17/8 ລວມມີບັນດາການເຄື່ອນໄຫວສຳຄັນ, ໃນນັ້ນ ຈັດກອງປະຊຸມວິທະຍາສາດສາກົນ 4 ຄັ້ງ. ນອກນັ້ນ ຍັງເປີດຊຸດຮຽນວິຊາສະເພາະກ່ຽວກັບຟີຊິກສາດ,ດາລາສາດ. ນີ້ແມ່ນຄວາມມານະພະຍາຍາມອັນໃຫຍ່ຫລວງຂອງສະມາຄົມວິທະຍາສາດພົບປະຫວຽດນາມ ແລະ ສາດສະດາຈານ ເຈີນແທງເວີນ, ຊາວຫວຽດນາມ ອາໄສຢູ່ ຝລັ່ງ, ຊື່ງແມ່ນຜູ້ລິເລີ່ມ ແລະ ຈັດຕັ້ງລາຍການພົບປະ. ສາດສະດາຈານ ເຈີນແທງເວີນ ໃຫ້ຮູ້ວ່າ:
“ສິ່ງທີ່ພວກຂ້າພະເຈົ້າປາດຖະຫນາທີ່ສຸດ ແມ່ນເຮັດແນວໃດພວກເຮົາສ້າງໄດ້ ກົນໄກຢູ່ຫວຽດນາມ ທີ່ສາມາດຊ່ວຍໃຫ້ບັນດານັກວິທະຍາສາດຫນຸ່ມຂອງຫວຽດນາມ ເປັນເອກະລາດກວ່າ, ພາຫະນະອຸປະກອນຫລາຍກວ່າເພື່ອສາມາດຄົ້ນຄ້ວາໃນອະນາຄົດ.”
ສາດສະດາຈານ ເຈີນແທງເວີນ ຕ້ອນຮັບບັນດານັກວິທະຍາສາດສາກົນ
ພາບ:dantri.com
|
ນອກຈາກບັນດາກອງປະຊຸມວິທະຍາສາດສາກົນແລ້ວ, ເນື້ອໃນສຳຄັນຂອງລາຍການພົບປະຫວຽດນາມຄັ້ງນີ້ ແມ່ນການສ້າງຕັ້ງສູນວິທະຍາສາດ ແລະ ສຶກສາລະຫວ່າງຂະແຫນງສາກົນ, ຊື່ງແມ່ນກຸ່ມປະສົມບັນດາກິດຈະກຳສະຖາປັດຕະຍະກຳ ລວມມີ: ສູນກອງປະຊຸມ, ໂຮງແຮມ, ໂຮງສາຍຮູບຈັກກະວານໃນເນື້ອທີ່ດິນ 20 ເຮັກຕາ ຢູ່ ນະຄອນ ກູຍເຍີນ. ນີ້ແມ່ນສະຖານທີ່ອັນດູມດື່ມເພື່ອໃຫ້ບັນດານັກວິທະຍາສາດຊັ້ນນຳຂອງໂລກມາເຕົ້າໂຮມຢູ່ທີ່ນີ້ ເພື່ອຄົ້ນຄ້ວາ, ແລກປ່ຽນບົດຮຽນ, ປຶກສາຫາລືບັນດາບັນຫາສຳຄັນຂອງວິທະຍາສາດໂລກ. ດຣ ເຈືອງດີງຫຽນ ຖືວ່າ:
“ນີ້ແມ່ນການພົບປະທີ່ສຳຄັນຖືກຈັດຂຶ້ນຢູ່ເຂດດິນແດນພາກກາງຫວຽດນາມ ທີ່ພວມປະສົບກັບຄວາມຫຍຸ້ງຍາກ. ແລະ ການສ້າງຕັ້ງສູນດັງກ່າວ ໄດ້ນຳມາໃຫ້ພາກກາງໄລຍະໃຫມ່. ນັບແຕ່ນີ້ເປັນຕົ້ນໄປ ພາກກາງ ຫວຽດນາມ ມີຄວາມເອກອ້າງທະນົງໃຈວ່າ ຄືດັ່ງນະຄອນຫລວງແຫ່ງວິທະຍາສາດຢ່າງແທດຈິງ, ໃນນັ້ນມີນັກວິທະຍາສາດ, ນັກປາດຫລາຍທ່ານຢູ່ໃນໂລກມາເຕົ້າໂຮມຢູ່ທີ່ນີ້ເພື່ອໂຄສະນາ, ປຶກສາຫາລື ເພື່ອຍົກອອກບັນດາຄຳຕັດສິນສຳຄັນໃຫ້ແກ່ການພັດທະນາຂອງວິທະຍາສາດຫວຽດນາມ ແລະ ໂລກ, ນີ້ແມ່ນສິ່ງທີ່ບໍ່ອາດຫລົງລືມໄດ້.”
ພ້ອມກັບການເຕົ້າໂຮມຂອງບັນດານັກວິທະຍາສາດໂລກ ແລະ ຫວຽດນາມ, ໃນນັ້ນ ມີ ນັກວິທະຍາສາດສາກົນ 5 ທ່ານທີ່ຍາດໄດ້ລາງວັນ Nobel ຟີຊິກສາດ, ຜົນສຳເລັດໃຫຍ່ສຸດຂອງລາຍການພົບປະຄັ້ງນີ້ ແມ່ນເປີດກາລະໂອກາດໃຫມ່ໃຫ້ແກ່ວົງການນັກຄົ້ນຄ້ວາວິທະຍາສາດທີ່ຍັງຫນຸ່ມແຫນ້ນຂອງຫວຽດນາມ. ບັນດາເນື້ອໃນຂອງລາຍການພົບປະໄດ້ສະຫນອງໃຫ້ບັນດານັກວິທະຍາສາດຫວຽດນາມ, ພິເສດແມ່ນບັນດານັກຮຽນ, ນັກສຶກສາຈະໄດ້ຮັບຄວາມຮູ້ໃຫມ່ຫລາຍຢ່າງ. ເພື່ອນ ບຸ່ຍວັນໂຝ, ນັກຄົ້ນຄ້ວາຂອງຫວຽດນາມ ຢູ່ ມະຫາວິທະຍາໄລ Osaka ຍີ່ປຸ່ນ ເວົ້າວ່າ:
“ລາກຍານພົບປະຄັ້ງນີ້ໄດ້ນຳມາເຊິ່ງຜົນປະໂຫຍດຫລາຍຢ່າງໃຫ້ແກ່ຂ້າພະເຈົ້າ. ນອກຈາກວິຊາຮຽນແລ້ວ, ພວກນ້ອງຍັງຮູ້ຈັກໄດ້ຫລາຍບັນຫາທີ່ກ່ຽວຂ້ອງເຖິງການຄົ້ນຄ້ວາຂອງຂ້າພະເຈົ້າ. ນີ້ແມ່ນກາລະໂອກາດດີທີ່ສຸດ”
ນັບແຕ່ປີ 1993 ມາຮອດປະຈຸບັນ, ລາຍການພົບປະດັ່ງກ່າວຖືກຈັດຂຶ້ນຢູ່ ຫວຽດນາມເປັນ 8 ຄັ້ງແລ້ວ. ຜົນສຳເລັດຂອງລາຍການພົບປະຫວຽດນາມ ຄັ້ງທີ 9 ແມ່ນຊ່ວຍໃຫ້ຂະແຫນງວິທະຍາສາດຫວຽດນາມ ຊຸກຍູ້ຫລາຍຂົງເຂດຄົ້ນຄ້ວາພື້ນຖານໃນຂົງເຂດຟີຊິກນິວເຄຼຍ, ຟີຊິກດາລາສາດ ແລະ ການຄົ້ນຄ້ວາໝູນໃຊ້… ໃນ 20 ປີຜ່ານມາ. ທ່ານ ຫງວຽນກວນ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ຫວຽດນາມ ໃຫ້ຮູ້ວ່າ:
“ພວກເຮົາ ສືບຕໍ່ເອົາໃຈໃສ່ເຖິງວິທະຍາສາດເຕັກໂນໂລຊີ, ບັນດາຂະແຫນງວິທະຍາສາດໝູນໃຊ້ ແຕ່ບໍ່ປະລະການຄົ້ນຄ້ວາພື້ນຖານ. ນອກຈາກ ພວກຂ້າພະເຈົ້າສ້າງບັນດາກົນໄກ, ນະໂຍບາຍເພື່ອຫນູນຊ່ວຍໃຫ້ແກ່ບັນດານັກວິທະຍາສາດແລ້ວ, ໄລຍະຈະມາເຖິງ ລັດຖະບານ ກໍພິຈາລະນາ, ອະນຸມັດບັນດາໂຄງການຈຸດສຸມແຫ່ງຊາດກ່ຽວກັບການພັດທະນາຟີຊິກສາດ ແລະ ຈະມີການລົງທຶນຢ່າງເໝາະສົມໃຫ້ແກ່ຂົງເຂດຄົ້ນຄ້ວາພື້ນຖານຈຳນວນຫນຶ່ງ.”
ລາຍການພົບປະຫວຽດນາມ ຄັ້ງທີ 9 ອັດລົງ ໄດ້ເປີດກາລະໂອກາດໃຫມ່ໃຫ້ແກ່ວິທະຍາສາດຫວຽດນາມ. ນັບແຕ່ນີ້ເປັນຕົ້ນໄປ ພາກກາງຫວຽດນາມ ຈະແມ່ນສູນກາງຂອງບັນດາເຫດການວິທະຍາສາດໃຫຍ່, ຊ່ວຍໃຫ້ວົງການນັກວິທະຍາສາດຫວຽດນາມ ຕິດພັນຢ່າງແຫນ້ນແຟ້ນກັບປະຊາຄົມວິທະຍາສາດໂລກກວ່າເກົ່າ.