(vovworld)- ການຮ່ວມມືລະຫວ່າງຫວຽດນາມ ແລະ ສະຫະປະຊາຊາດ ແມ່ນແບບຢ່າງພົ້ນເດັ່ນກ່ຽວກັບການຮ່ວມມືພັດທະນາລະຫວ່າງ ສະຫະປະຊາຊາດກັບບັນດາປະເທດສະມາຊິກກໍ່ຄືກ່ຽວກັບບົດບາດຂອງ ສປຊ ໃນການຊຸກຍູ້ການຮ່ວມມືສາກົນ ເພື່ອແກ້ໄຂບັນດາບັນຫາເສດຖະກິດ, ສັງຄົມ, ວັດທະນະທຳ. ກ່ອນທີ່ສິ້ນສຸດອາຍຸການປະຕິບັດງານ 5 ປີຢູ່ຫວຽດນາມ ໃນຖານະເປັນຜູ້ປະສານງານປະຈຳ ໃນທ້າຍເດືອນ 10 ຜ່ານມາ, ປອ Pratibha Mehta ສະແດງໃຫ້ເຫັນບັນດາຄວາມປະທັບໃຈອັນດີງາມ ກ່ຽວກັບ ຫວຽດນາມ, ກ່ຽວກັບບັນດາຜົນງານແຫ່ງການເຊື່ອມໂຍງເຂົ້າກັບໂລກ ຊື່ງຫວຽດນາມ ບັນລຸໄດ້ ກໍຄືການຮ່ວມມືຢ່າງມີປະສິດທິຜົນລະຫວ່າງຫວຽດນາມ ແລະ ສະຫະປະຊາຊາດໃນໄລຍະຜ່ານມາ.
ທ່ານນາງ Pratibha Mehta ແລະ ທ່ານນາຍົກລັດຖະມົນຕີ
ຫງວຽນຊວນຟຸກ
ພາບ: Talk Vietnam
|
ເກືອບ 40 ປີ ນັບແຕ່ເມື່ອຫວຽດນາມ ເຂົ້າຮ່ວມ ສປຊ ຢ່າງເປັນທາງການ, ການພົວພັນລະຫວ່າງ ຫວຽດນາມ ແລະ ສປຊ ໄດ້ຮັບການພັດທະນາຢ່າງບໍ່ຢຸດຢັ້ງ ຕາມທິດນັບມື້ນັບເລິກເຊິ່ງກວ້າງຂວາງ ແລະ ມີປະສິດທິຜົນ. ບັນດາໂຄງການຂອງ ສປຊ ລ້ວນແຕ່ໃກ້ຊິດຕິດແທດກັບຊີວິດ, ກັບມີການພັດທະນາດ້ານເສດຖະກິດສັງຄົມຂອງຫວຽດນາມ.
ການຮ່ວມມືນັບມື້ນັບຮອບດ້ານ
ຕາມທ່ານນາງ Pratibha Mehta ແລ້ວ, ຫວຽດນາມ ແມ່ນເລື່ອງລາວກ່ຽວກັບຜົນສຳເລັດ. ພາຍຫລັງ 30 ປີແຫ່ງການດຳເນີນກິດຈະການປ່ຽນແປງໃຫມ່, ຫວຽດນາມ ໄດ້ສຳເລັດບັນດາເປົ້າໝາຍສະຫັດສະວັດຂອງ ສປຊ, ປັບປຸງຊີວິດການເປັນຢູ່ໃຫ້ແກ່ຊາວ ຫວຽດນາມ ດີພໍສົມຄວນ, ຮັບປະກັນໃຫ້ປະຊາຊົນແຕ່ລະຄົນລ້ວນແຕ່ໄດ້ຮັບຜົນປະໂຫຍດຈາກຜົນງານຂອງວິວິດການເຊື່ອມໂຍງ. ຈາກປະເທດຖືກຕົກຢູ່ໂດດດ່ຽວ, ຖືກຂວ້ຳບາດພາຍຫລັງສົງຄາມ, ຫວຽດນາມ ນັບມື້ນັບເຊື່ອມໂຍງຢ່າງແຮງເຂົ້າກັບພາກພື້ນ ແລະ ທົ່ວໂລກ, ທີ່ຕັ້ງບົດບາດໃນເວທີສາກົນນັບມື້ນັບເພີ່ມຂຶ້ນ. ພິເສດ 5 ປີຜ່ານມາ ແມ່ນໄລຍະໄດ້ເຫັນປະຈັກຕາການມີຫນ້າຂອງຫວຽດນາມ ຢູ່ຫລາຍກົນໄກຮ່ວມມື ສປຊ.
“5 ປີຜ່ານມາ, ຫວຽດນາມ ໄດ້ເຄື່ອນໄຫວຢ່າງຕັ້ງຫນ້າທີ່ສຸດ ແລະ ນັບມື້ນັບເຊື່ອມໂຍງຢ່າງເລິກເຊິ່ງເຂົ້າໃນບັນດາບັນຫາຂອງ ສປຊ, ຫວຽດນາມ ໄດ້ເຂົ້າຮ່ວມ ສະພາສິດທິມະນຸດ ສປຊ ອາຍຸການ 2014 – 2016, ເປັນສະມາຊິກຂອງສະພາເສດຖະກິດສັງຄົມ ສປຊ ECOSOC 2014 – 2016, ເຂົ້າຮ່ວມບັນດາກຳລັງຮັກສາສັນຕິພາບ ຢູ່ ຊູດານ ແລະ ສ້າງຕັ້ງສູນຮັກສາສັນຕິພາບ. ຂ້າພະເຈົ້າຄິດວ່າ ນັ້ນແມ່ນການພິສູດໃຫ້ເຫັນການຮ່ວມມື ລະຫວ່າງ ສປຊ ແລະ ຫວຽດນາມ ນັບມື້ນັບຮອບດ້ານກວ່າ”
ການພັດທະນາຂອງການພົວພັນລະຫວ່າງຫວຽດນາມ ແລະ ສປຊ ອາດຈະແບ່ງເປັນຫລາຍໄລຍະ. ພິເສດ ໃນ 5 ປີຜ່ານມາ, ສປຊ ໄດ້ຜັນຂະຫຍາຍຫລາຍໂຄງການຢູ່ຫວຽດນາມ, ເປັນຕົ້ນແມ່ນການສຸມໃສ່ແກ້ໄຂບັນດາຄວາມຕ້ອງການຂອງປະເທດມີລາຍຮັບປານກາງຕ່ຳ, ຫນູນຊ່ວຍການປະຕິຮູບດ້ານນະໂຍບາຍ. ແບ່ງປັນຄວາມປະທັບໃຈກ່ຽວກັບຫວຽດນາມໃນໄລຍະຮ່ວມເດີນທາງນັ້ນ, ທ່ານນາງ Pratibha Mehta ຢືນຢັນວ່າ:
“ຖ້າຫວນຄືນໄລຍະ 5 ປີຜ່ານມາ, ຂ້າພະເຈົ້າຄິດວ່າ ຈຸດພົ້ນເດັ່ນແມ່ນການປະຕິຮູບລັດຖະທຳມະນູນ. ໃນການປະຕິຮູບລັດຖະທຳມະນູນ, ມີສິ່ງຫນຶ່ງທີ່ຫນ້າຊື່ນຊົມ ນັ້ນແມ່ນການສ່ອງແສງຕີລາຄາຈາກສັງຄົມ. ລັດຖະທຳມະນູນ ໄດ້ເອົາລົງອິນເຕີແນດ ເພື່ອຮັບເອົາຄຳເຫັນຈາກປະຊາຊົນ. ນອກນັ້ນ ລັດຖະທຳມະນູນ ຫວຽດນາມ ໄດ້ຍູ້ແຮງບັນຫາສິດທິມະນຸດ. ແລະ ອີກບັນຫາຫນຶ່ງແມ່ນການປ່ຽນແປງທັດສະນະໃນຊຸມປີຜ່ານມາກ່ຽວກັບບັນຫາການປ່ຽນແປງຂອງດິນຟ້າອາກາດ ແລະ ການເຕີບໂຕຂຽວ, ພິເສດແມ່ນມະຕິກອງປະຊຸມໃຫຍ່ຂອງພັກກອມມູນິດຫວຽດນາມ ກ່ຽວກັບປ່ຽນແປງໃຫ້ເຫັນຂອງດິນຟ້າອາກາດ, ການສະແດງຄຳໝັ້ນສັນຍາໃຫຍ່ສຸດໃນບັນຫານີ້.”
ມີຫລາຍສິ່ງທີ່ສ້າງຄວາມປະທັບໃຈຢູ່ຫວຽດນາມ
ໄລຍະ 5 ປີແຫ່ງການປະຕິບັດງານຢູ່ຫວຽດນາມ ໃນຖານະເປັນຜູ້ປະສານງານປະຈຳ, ທ່ານນາງ Pratibha Mehta ມີໂອກາດໄດ້ໄປຢ້ຽມຢາມຫລາຍເຂດແຄ້ວນ, ແຂວງ, ນະຄອນຢູ່ຫວຽດນາມ ແລະ ພ້ອມກັບລັດຖະບານຫວຽດນາມ ຜັນຂະຫຍາຍບັນດາໂຄງການຫນູນຊ່ວຍການປະຕິຮູບບັນດານະໂຍບາຍກ່ຽວຂ້ອງໂດຍກົງເຖິງປະຊາຊົນຄື: ການລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ, ການປະຕິຮູບຕຸລາການ, ປັບປຸງຄຸນນະພາບການບໍລິການດ້ານສາທາລະນະສຸກ, ການສຶກສາ… ເມື່ອແບ່ງປັນບັນດາຄວາມປະທັບໃຈກ່ຽວກັບຫວຽດນາມ, ທ່ານນາງ Pratibha Mehta ເວົ້າວ່າ:
“ມີຫລາຍສິ່ງທີ່ສ້າງຄວາມປະທັບໃຈຢູ່ປະເທດນີ້. ເມື່ອຂ້າພະເຈົ້າເລີ່ມຮັບອາຍຸການປະຕິບັດງານຢູ່ຫວຽດນາມ ໃນປີ 2012, ໃນໄລຍະນັ້ນ ຫວຽດນາມເລີ່ມຕົ້ນຕົກເຂົ້າສູ່ສະພາບວິກິດການດ້ານການເງິນ. ແຕ່ບໍ່ວ່າໃນຈຸດເວລາໃດ ຂ້າພະເຈົ້າກໍເຫັນວ່າ ສິ່ງທີ່ລັດຖະບານຫວຽດນາມ ມີການກະທຳ, ການແກ້ໄຂວິກິດການຢ່າງວ່ອງໄວ. ສິ່ງທີ່ສ້າງຄວາມປະທັບໃຈທີ 2 ຂອງຂ້າພະເຈົ້າ ນັ້ນແມ່ນ ຊາວຫວຽດນາມ. ປະຊາຊົນຫວຽດນາມ ມີຄວາມດຸໝັ່ນ, ອົດທົດ, ສະຫລາດສະຫລຽວ, ກ້າຫານ, ພິເສດແມ່ນໄວຫນຸ່ມ. ຂ້າພະເຈົ້າມີຄວາມປະທັບໃຈຢ່າງແທ້ຈິງຕໍ່ວິທີການຄົ້ນຄິດ, ວິທີການເຮັດວຽກຂອງເຂົາເຈົ້າ ລ້ວນແຕ່ປາດຖະຫນາຢາກປະກອບສ່ວນໃຫ້ແກ່ການພັດທະນາຂອງປະເທດຊາດ.”
ວິວັດການເຊື່ອມໂຍງເຂົ້າກັບໂລກ ໄດ້ນຳມາໃຫ້ ຫວຽດນາມ ຫລາຍກາລະໂອກາດ, ແລະໄດ້ຮັບຖືວ່າແມ່ນພື້ນຖານເພື່ອໃຫ້ຫວຽດນາມ ປະກອບສ່ວນບົດບາດຂອງຕົນເຂົ້າໃນບັນດາເວທີປາໄສ ແລະ ອົງການຈັດຕັ້ງພາກພື້ນ, ທົ່ວໂລກ. ນີ້ກໍແມ່ນພື້ນຖານເພື່ອໃຫ້ຫວຽດນາມ ຊຸກຍູ້ການແລກປ່ຽນການຮ່ວມມື, ການພົວພັນແລກປ່ຽນດ້ານວັດທະນະທຳກັບບັນດາປະເທດອື່ນ. ທ່ານນາງ Pratibha Mehta ຖືວ່າ ໂລກໄດ້ຮູ້ຈັກເຖິງປະເທດຫວຽດນາມ ໃນອະດີດຕະການ ແລະ ປະຈຸບັນ ຫວຽດນາມ ຍັງມີຄຸນຄ່າດ້ານວັດທະນະທຳຫລາຍຢ່າງ ຄວນໄດ້ຮັບການໂຄສະນາຢ່າງກວ້າງຂວາງເພາະວ່າວັດທະນະທຳຫວຽດນາມ ມີສີສັນສະເພາະທີ່ສຸດ. ບັນດາຈຸດສີສັນວັດທະນະທຳນັ້ນ ໄດ້ປະກອບສ່ວນອັນໃຫຍ່ຫລວງ ອັນໄດ້ສ້າງເປັນກຳລັງແຮງຫວຽດນາມ. ສະນັ້ນ ເຖິງວ່າ ຫວຽດນາມ ໄດ້ເຊື່ອມໂຍງຢ່າງແຮງຄືແນວໃດກໍຕາມ ບັນດາຄຸນຄ່າດ້ານວັດທະນະທຳນີ້ ຄວນໄດ້ຮັບການຮັກສາ, ອະນຸລັກ ແລະ ເສີມຂະຫຍາຍ. ທ່ານນາງ Pratibha Mehta ຢືນຢັນວ່າ: ນີ້ກໍແມ່ນຄວາມມານະພະຍາຍາມຂອງ ອົງການ ສປຊ. ສປຊ ຍາມໃດກໍ່ຮ່ວມເດີນທາງກັບ ຫວຽດນາມ ໃນໄລຍະຈະມາເຖິງ.