(vovworld)- ວັນທີ 22/5 ຈະມາເຖິງ, ຢູ່ຫວຽດນາມ ໄດ້ດຳເນີນການເລືອກຕັ້ງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທຸກຂັ້ນ ອາຍຸການ 2016- 2021. ນີ້ແມ່ນບັ້ນດຳເນີນຊີວິດດ້ານການເມືອງ - ນິຕິທຳ, ປະຊາທິປະໄຕຢ່າງເລິກເຊິ່ງ ແລະ ກວ້າງຂວາງ. ຜູ້ມີສິດເລືອກຕັ້ງຈະປະຕິບັດສິດເປັນເຈົ້າຂອງຕົນຜ່ານການເລືອກຕັ້ງໂດຍກົງ ເພື່ອເລືອກເຟັ້ນບັນດາຜູ້ທີ່ມີຄວາມເກັ່ງກ້າສາມາດ, ມີຄຸນສົມບັດ, ສຸດຈິດສຸດໃຈເພື່ອຄວາມຮັບຜິດຊອບສ້າງສາປະເທດຊາດໃຫ້ນັບມື້ນັບຮັ່ງມີສວຍງາມກວ່າ.
ທ່ານນາງຫງວຽນທິບິກງອກ, ຮອງປະທານຄະນະກຳມະການ
ປະຊາຊົນນະຄອນຮ່າໂນ້ຍ ແລກປ່ຽນຄຳເຫັນກັບຜູ້ມີສິດເລືອກຕັ້ງ
ເມືອງ ແທງຊວນ- ຮ່າໂນ້ຍ
(ພາບ:hanoi)
|
ການເລືອກຕັ້ງສະມາຊິກສະພາແຫ່ງຊາດຊຸດທີ XIV ແລະ ສະມາຊິກສະພາປະຊາຊົນທຸກຂັ້ນ ອາຍຸການ 2016 -2021 ແມ່ນບັນຫາຊື່ງປະຊາຊົນໃນທົ່ວປະເທດພວມສົນໃຈ, ໃນນັ້ນ ມາດຕະຖານກ່ຽວກັບລະດັບຄວາມຮູ້ຄວາມສາມາດ, ຄຸນນະທາດດ້ານການເມືອງຂອງຜູ້ສະໝັກຮັບເລືອກຕັ້ງແມ່ນສິ່ງທີ່ຜູ້ມີສິດເລືອກຕັ້ງຖືເປັນສຳຄັນທີ່ສຸດ.
ມີຄວາມສົນໃຈເປັນພິເສດເຖິງໂຄງການດຳເນີນງານຂອງຜູ້ສະໝັກຮັບເລືອກຕັ້ງ
ທ່ານ ດີງຊວນເງີ້ຍ, ຜູ້ມີສິດເລືອກຕັ້ງເມືອງ ບາດີງ ຮ່າໂນ້ຍ ແບ່ງປັນວ່າ: ຄວາມມຸ້ງມາດປາດຖະຫນາຂອງຜູ້ມີສິດເລືອກຕັ້ງໃນການເລືອກຕັ້ງດຳເນີນໃນວັນທີ 22/5 ຈະມາເຖິງ ແມ່ນຊອກໄດ້ຜູ້ທີ່ມີຄຸນສົມບັດ, ມີຄວາມເກັ່ງກ້າສາມາດ, ສະຫນິດຕິດພັນຢ່າງແຫນ້ນແຟ້ນກັບປະຊາຊົນ, ຮັບຟັງຄວາມມຸ້ງມາດປາດຖະຫນາຂອງປະຊາຊົນ, ສະເຫນີບັນດາຂໍ້ສະເຫນີແນະ ເພື່ອໃຫ້ການນຳທຸກຂັ້ນຕອບສະຫນອງຄວາມມຸ້ງມາດປາດຖະຫນາຂອງປະຊາຊົນ. ທ່ານ ດີງຊວນເງີ້ຍ ໃຫ້ຮູ້ວ່າ:
“ສະມາຊິກສະພາແຫ່ງຊາດ ຕ້ອງໃກ້ຊິດຕິດແທດກັບປະຊາຊົນ, ມີລະດັບຄວາມຮູ້ ຮັບເອົາຄຳເຫັນຂອງປະຊາຊົນ ເພື່ອສ່ອງແສງຕໍ່ສະພາແຫ່ງຊາດຢ່າງຊັດເຈນ. ບັນດາຜູ້ສະໝັກຮັບເລືອກຕັ້ງ ຕ້ອງມີໂຄງການດຳເນີນງານ, ລາຍງານຕໍ່ຫນ້າປະຊາຊົນຢ່າງຈະແຈ້ງ.”
ທີ່ກອງປະຊຸມພົບປະກັບຜູ້ມີສິດເລືອກຕັ້ງຄັ້ງຕ່າງໆພວມດຳເນີນໃນບໍລິເວນທົ່ວປະເທດ, ຜູ້ມີສິດເລືອກຕັ້ງມີຄວາມສົນໃຈເປັນພິເສດເຖິງໂຄງການດຳເນີນງານຂອງບັນດາຜູ້ສະໝັກຮັບເລືອກຕັ້ງ. ທ່ານ ຟ້າມຮູຍທູ້, ຜູ້ມີສິດເລືອກຕັ້ງ ເມືອງ ດົງດາ ຮ່າໂນ້ຍ ຖືວ່າ:
“ຢາກຮູ້ວ່າ ສະມາຊິກສະພາແຫ່ງຊາດ ມີກຳລັງຄວາມສາມາດຫລືບໍ່ ຕ້ອງຮັບຟັງແຜນດຳເນີນງານຂອງເຂົາເຈົ້າເປັນຄືແນວໃດໃນການປະກອບສ່ວນກໍ່ສ້າງບ້ານເກີດເມືອງນອນ. ສິ່ງສຳຄັນ ເຂົາເຈົ້າເຮັດຄືແນວໃດຈຶ່ງມີປະສິດທິຜົນ. ປະຈຸບັນ ປະຊາຊົນເຄີຍຕິດຕາມວິວັດການເຄື່ອນໄຫວຂອງສະມາຊິກສະພາແຫ່ງຊາດກ່ອນນີ້ ພ້ອມທັງຊອກຮູ້ວ່າ ລະດັບຄວາມຮູ້, ຖານະນາມຂອງສະມາຊິກສະພາແຫ່ງຊາດແມ່ນເໝາະສົມກັບຕົວແທນຂອງປະຊາຊົນແລ້ວຫລືບໍ່ ເວລານັ້ນຈຶ່ງປ່ອນບັດ. ຄວາມມຸ້ງມາດປາດຖະຫນາຂອງປະຊາຊົນ ແມ່ນຢາກໃຫ້ປະເທດຊາດພັດທະນາເສດຖະກິດ, ຮັກສາສະຖຽນລະພາບດ້ານການເມືອງສັງຄົມ, ປົກປັກຮັກສາປະເທດຊາດ, ເຂດທະເລໝູ່ເກາະ, ຕ້ານການສໍ້ລາດບັງຫລວງ ແລະ ເສີມຂະຫຍາຍປະຊາທິປະໄຕ.”
ຄຽງຄູ່ກັບບັນດາກອງປະຊຸມພົບປະກັບຜູ້ມີສິດເລືອກຕັ້ງ ເພື່ອໃຫ້ສະມາຊິກສະພາແຫ່ງຊາດລາຍງານໂຄງການດຳເນີນງານ, ຜູ້ມີສິດເລືອກຕັ້ງປາດຖະຫນາຢາກມີຊ່ອງຂໍ້ມູນຫລາຍກວ່າເພື່ອເຂົ້າໃຈກ່ຽວກັບຜູ້ສະໝັກຮັບເລືອກຕັ້ງ. ທ່ານ ຟ້າມວັນທຽມ, ຜູ້ມີສິດເລືອກຕັ້ງເມືອງ ແທງຊວນ ຖືວ່າ: ຂໍ້ມູນຂ່າວຊີວະປະຫວັດຍໍ້ຂອງບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນທຸກຂັ້ນ ຄວນສະຫນອງໂດຍໄວເພື່ອໃຫ້ຜູ້ມີສິດເລືອກຕັ້ງຄົ້ນຄ້ວາ, ແລກປ່ຽນຄຳເຫັນ:
“ຂ້າພະເຈົ້າຢາກໃຫ້ເອົາບັນຊີລາຍຊື່ສະມາຊິກສະພາແຫ່ງຊາດ, ສະມາຊິກສະພາປະຊາຊົນໄດ້ຮັບການປະກາດໂດຍໄວຢູ່ບັນດາສະຖານທີ່ປ່ອນບັດເລືອກຕັ້ງເພື່ອໃຫ້ປະຊາຊົນຄົ້ນຄ້ວາ ຈຸດດີຈຸດອ່ອນຂອງເຂົາເຈົ້າ ກ່ອນ. ບົນພື້ນຖານນັ້ນ ການປ່ອນບັດຈະມີຄວາມຊັດເຈນກວ່າ, ມີປະສິດທິຜົນກວ່າ.”
ເລືອກເຟັ້ນຜູ້ມີຄຸນສົມບັດ, ມີຄວາມເກັ່ງກ້າສາມາດ
ຜູ້ມີສິດເລືອກຕັ້ງໃນທົ່ວປະເທດ ປາດຖະຫນາຢາກໃຫ້ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ທຸກຂັ້ນ ແມ່ນຜູ້ມີຄຸນສົມບັດດ້ານການເມືອງຢ່າງໝັ້ນແກ່ນ, ມີຄວາມຈົ່ງຮັກພັກດີ, ສັດຊື່ບໍລິສຸດ, ສຸດຈິດສຸດໃຈຮັບໃຊ້ປະເທດຊາດ ແລະ ປະຊາຊົນ. ບັນດາສະມາຊິກສະພາແຫ່ງຊາດຕ້ອງມີພູມປັນຍາ, ຄວາມເກັ່ງກ້າສາມາດ ເພື່ອສຳເລັດຫນ້າທີ່ ຊື່ງປະຊາຊົນມີຄວາມໄວ້ເນື້ອເຊື່ອໃຈມອບໝາຍໃຫ້. ສະມາຊິກສະພາແຫ່ງຊາດ ຕ້ອງເປັນແບບຢ່າງ, ດ້ວຍການກະທຳລະອຽດ, ໝາກຜົນວຽກງານເພື່ອພິສູດຄຳເວົ້າ ແລະ ຄຳໝັ້ນໝາຍຂອງຕົນຕໍ່ຫນ້າປະຊາຊົນ. ຍິ່ງກວ່ານັ້ນ ສະມາຊິກສະພາແຫ່ງຊາດກໍແມ່ນຜູ້ໃກ້ຊິດຕິດແທດກັບປະຊາຊົນ, ເພື່ອປະຊາຊົນ, ຮັບຟັງຄຳເຫັນຂອງປະຊາຊົນ, ໄດ້ຮັບຄວາມໄວ້ເນື້ອເຊື່ອໃຈ, ຄວາມຮັກແພງຈາກປະຊາຊົນ ແລະ ປະຊາຊົນເປັນຜູ້ເລືອກຕັ້ງ.
ສຳລັບຜູ້ມີສິດເລືອກຕັ້ງ, ການປ່ອນບັດບໍ່ພຽງແຕ່ແມ່ນຄວາມເປັນກຽດ, ຄວາມເອກອ້າງທະນົງໃຈເທົ່ານັ້ນ ຫາກຍັງແມ່ນການຊັ່ງຊາ ເພາະວ່າ ຄັດເລືອກເອົາຜູ້ທີ່ມີຄຸນນະທາດຄືດັ່ງກ່າວບໍ່ແມ່ນສິ່ງງ່າຍດາຍ. ທ່ານ ຫງວຽນດີງເລີບ, ຜູ້ມີສິດເລືອກຕັ້ງເມືອງ ແທງຈີ ຮ່າໂນ້ຍ ຖືວ່າ:
“ພວກຂ້າພະເຈົ້າປາດຖະຫນາວ່າ ສະມາຊິກສະພາແຫ່ງຊາດ ແຕ່ລະຄົນ, ດ້ວຍພູມປັນຍາ, ຄຸນສົມບັດ, ສະແດງໃຫ້ເຫັນຜ່ານບັນດາໂຄງການດຳເນີນງານຢ່າງເໝາະສົມ, ໃກ້ຊິດຕິດແທດກັບສະພາບຕົວຈິງ, ຕ້ອງມີຄວາມຮັບຜິດຊອບໃນການປະຕິບັດໂຄງການນັ້ນ ຖ້າຫາກໄດ້ຮັບການເລືອກຕັ້ງ.”
ການເລືອກຕັ້ງແມ່ນວິທີການປະຕິບັດສິດເປັນເຈົ້າສູງສຸດຂອງປະຊາຊົນ. ຜ່ານການເລືອກຕັ້ງ, ປະຊາຊົນໄດ້ສະແດງໃຫ້ເຫັນທີ່ຕັ້ງເປັນເຈົ້າຕົນເອງ. ອັດຕາສ່ວນບັດສະຫນັບສະຫນູນສູງ, ຕົວແທນຜູ້ມີສິດເລືອກຕັ້ງຍິ່ງມີຄວາມເຊື່ອໝັ້ນດ້ວຍຕົນເອງກວ່າ, ຍິ່ງມີຄວາມຮັບຜິດຊອບຕໍ່ສັງຄົມ ແລະ ຕໍ່ປະຊາຊົນກວ່າ.