(vovworld) - ວັນທີ 9/5, ກອງປະຊຸມໃຫຍ່ຄັ້ງທີ 7 ຂອງພັກແຮງງານ ສປປ ເກົາຫຼີ ໄດ້ອັດລົງດ້ວຍການເລືອກຕັ້ງທ່ານ Kim Jong Un ເປັນປະທານພັກແຮງງານ ສປປ ເກົາຫຼີ ແລະ ຮັບຮອງເອົານະໂຍບາຍຊຸກຍູ້ການກໍ່ສ້າງເສດຖະກິດ ແລະ ເພີ່ມທະວີກຳລັງ ນິວເຄຼຍ ປ້ອງກັນກອງປະຊຸມໃຫຍ່ ກໍ່ຮັບຮອງເອົານະໂຍບາຍ ບໍ່ນຳໃຊ້ອາວຸດນິວເຄຼຍ ເວັ້ນເສຍແຕ່ກໍລະນີອະທິປະໄຕຂອງ ສປປ ເກົາຫຼີ ຖືກນາບຂູ່ຈາກປະເທດມະຫາອຳນາດດ້ານນິວເຄຼຍອື່ນໆ, ພ້ອມທັງມຸ່ງໄປເຖິງຈຸດໝາຍແກ້ໄຂການພົວພັນລະຫວ່າງ 2 ພາກເກົາຫຼີ.
ທ່ານ Kim Jong Un
ນີ້ແມ່ນກອງປະຊຸມໃຫຍ່ຄັ້ງທຳອິດຂອງພັກແຮງງານ ສປປ ເກົາຫຼີ ພາຍຫລັງ 36 ປີທັງແມ່ນກອງປະຊຸມໃຫຍ່ຄັ້ງທຳອິດຖືກດຳເນີນ ນັບແຕ່ທ່ານ Kim Jong Un ໄດ້ຮັບດຳລົງຕຳແໜ່ງເປັນການນຳ. ກອງປະຊຸມໃຫຍ່ມີຄວາມໝາຍສືບທອດມູນເຊື້ອ, ທັງໄດ້ທົບທວນຄືນ ແລະ ສຳຫລຸບບັນດາຜົນງານ ເຊິ່ງພັກນີ້ຍາດມາໄດ້ພາຍໃຕ້ການຊີ້ນຳນຳພາຂອງບັນດາອະດີດການນຳ, ທັງເພື່ອກຳນົດແນວທາງ, ນະໂຍບາຍ ແລະ ທິດທາງຂອງພັກແຮງງານ ສປປ ເກົາຫຼີ ໃນສະພາບການໃໝ່. ເຫດການນີ້ກໍ່ເພື່ອແນໃສ່ເພີ່ມທະວີທີ່ຕັ້ງບົດບາດນຳພາຢ່າງສຸດຂີດຂອງພັກ ທີ່ມີຕໍ່ລັດ, ກອງທັບ, ກໍ່ຄືທົ່ວປວງຊົນ ແລະ ທົ່ວກອງທັບ, ສ້າງກາລະໂອກາດເປີດໜ້າປະຫວັດສາດໃໝ່ໃນວຽກງານພົວພັນຕ່າງປະເທດຂອງ ສປປ ເກົາຫຼີ.
ບັນດາໜ້າບຸລິມະສິດທີ່ໄດ້ຍົກອອກມາ
ທີ່ກອງປະຊຸມໃຫຍ່, ການນຳ Kim Jong un ຢັ້ງຢືນໜ້າທ່ີຂອງພັກ ແມ່ນປະຕິບັດສຳເລັດບັນດາແຜນນະໂຍບາຍ, ນະໂຍບາຍກ່ຽວກັບການສ້າງລັດທິສັງຄົມນິຍົມ, ປັບປຸງຊີວິດການເປັນຢູ່ຂອງປະຊາຊົນ, ໂຮມປະເທດຊາດເປັນເອກະພາບກໍ່ຄືປັບປຸງກຳລັງແຮງຂອງພັກ.
ກ່ຽວກັບແຜນການພັດທະນາເສດຖະກິດໄລຍະ 5 ປີ 2016-2020, ບົດລາຍງານກໍ່ຊີ້ແຈ້ງໜ້າທີ່ອັນຮີບດ່ວນ, ແມ່ນຕ້ອງປະຕິບັດຍຸດທະສາດພັດທະນາເສດຖະກິດແຫ່ງຊາດຢ່າງຄົບຖ້ວນ, ເພື່ອແນໃສ່ຊຸກຍູ້ການເຕີບໂຕເສດຖະກິດໃນທຸກດ້ານ, ຮັບປະກັນຄວາມດຸນດ່ຽງໃນການພັດທະນາບັນດາຂະແໜງເສດຖະກິດ ແລະ ສ້າງພື້ນຖານໃຫ້ແກ່ການພັດທະນາເສດຖະກິດຢ່າງໝັ້ນຄົງ. ສືບຕໍ່ເໜັ້ນໜັກເຖິງຄວາມຕັດສິນໃຈຂອງ ສປປ ເກົາຫຼີ ໃນການເພີ່ມທະວີກຳລັງຄວາມສາມາດ, ນາບຂູ່ນຳໃຊ້ນິວຄະເລຍ ຕໍ່ໜ້ານະໂຍບາຍເປັນປໍລະປັກຂອງອາເມລິກາ. ກອງປະຊຸມໃຫຍ່ພັກແຮງງານ ສປປເກົາຫຼີ ຄັ້ງທີ 7 ຢືນຢັນວ່າ, ລັດນີ້ຈະສືບຕໍ່ຊຸກຍູ້ລາຍການພັດທະນາອາວຸດນິວຄະເລຍ ຖ້າຫາກຍັງຕ້ອງປະເຊີນໜ້າກັບໄພນາບຂູ່ນຳໃຊ້ນິວຄະເລຍ.
ກ່ຽວກັບການພົວພັນລະຫວ່າງ ສເກົາຫຼີ ແລະ ສປປ ເກົາຫຼີ, ທ່ານ Kim Jong – un ເນັ້ນໜັກວ່າ, ໜ້າທີ່ສຳຄັນທີ່ສຸດຂອງພັກແຮງງານ ສປປ ເກົາຫຼີ ແມ່ນປະຕິບັດການໂຮມປະເທດຊາດເປັນເອກະພາບ. ເພື່ອປະຕິບັດໜ້າທີ່ນີ້ໃຫ້ສຳເລັດ, ບັນຫາຮີບດ່ວນທີ່ສຸດແມ່ນຕ້ອງປັບປຸງສາຍພົວພັນກັບ ສເກົາຫຼີ ໂດຍພື້ນຖານ, ຕາມນັ້ນແລ້ວ, ສອງຝ່າຍຄວນເຄົາລົບນັບຖືເຊິ່ງກັນ ແລະ ກັນ ແລະ ພ້ອມກັນຊຸກຍູ້ບັນດາການປຶກສາ ແລະ ເຈລະຈາ, ເປີດໜ້າປະຫວັດສາດໃໝ່ໃຫ້ແກ່ການປັບປຸງການພົວພັນ ລະຫວ່າງ ສເກົາຫຼີ ແລະ ສປປ ເກົາຫຼີ, ເພື່ອຄວາມວັດທະນາຖາວອນລວມ.
ກອງປະຊຸມຂອງພັກແຮງງານ ສປປ ເກົາຫຼີ
ຫາງສຽງສາກົນກ່ຽວກັບແນວທາງໃໝ່ຂອງ ສປປ ເກົາຫຼີ
ບັນດາການປ່ຽນແປງໃນວິວັດແຫ່ງການພັດທະນາປະເທດຊາດ, ເຊິ່ງກອງປະຊຸມໃຫຍ່ພັກແຮງງານ ສປປ ເກົາຫຼີ ຄັ້ງທີ 7 ຍົກອອກມາ ບໍ່ໄດ້ຮັບການສະໜັບສະໜູນຢ່າງຕັ້ງໜ້າຈາກ ສເກົາຫຼີ. ໃນຖະແຫຼງການທີ່ຍົກອອກມາວັນທີ 9/5, ກະຊວງປ້ອງກັນປະເທດ ສ ເກົາຫຼີ ໄດ້ອອກແຈ້ງການຊີ້ແຈ້ງວ່າ, ສ ເກົາຫຼີ ແລະ ປະຊາຄົມສາກົນ ຈະບໍ່ຮັບຮອງ ສປປ ເກົາຫຼີແມ່ນປະເທດມະຫາອຳນາດດ້ານນິວຄະເລຍ. ອຳນາດການປົກຄອງ ເຊີອູນ ຈະສືບຕໍ່ກໍ່ຄວາມດັນບັງຄັບໃຫ້ ພຽງຢາງ ຕ້ອງປະລະຄວາມມັກໃຫຍ່ໄຝ່ສູງດ້ານນິວຄະເລຍ ຜ່ານບັນດາມາດຕະການລົງໂທດຢ່າງແຮງ. ຄຽງຂ້າງນັ້ນ, ກະຊວງປ້ອງກັນປະເທດ ສ ເກົາຫຼີ ກໍ່ປະຕິເສດຂໍ້ສະເໜີປຶກສາດ້ານການທະຫານລະຫວ່າງສອງພາກເກົາຫຼີ, ໂດຍການນຳ ສປປ ເກົາຫຼີ Kim Jong – un ຍົກອອກມາ. ສ ເກົາຫຼີຖືວ່າ, ຂໍ້ສະເໜີດັ່ງກ່າວບໍ່ມີເຈດຕະນາດີ, ພ້ອມທັງສືບຕໍ່ຮຽກຮ້ອງ ສປປ ເກົາຫຼີ ປະລະທ່າທີເກາະຜິດ ແລະ ມຸ່ງເຖິງຈຸດໝາຍລົບລ້າງອາວຸດນິວຄະເລຍ.
ບັນດາຖະແຫຼງການຈາກກອງປະຊຸມໃຫຍ່ນີ້, ກໍ່ໄດ້ດຶງດູດຄວາມສົນໃຈພິເສດຈາກບັນດາປະເທດ: ຍີ່ປຸ່ນ, ລັດເຊຍ, ອາເມລິກາ, ຈີນ. ບັນດາປະເທດນີ້ພວມວິຕົກກັງວົນຕໍ່ຄວາມສາມາດພັດທະນາດ້ານນິວຄະເລຍ ກໍ່ຄືການຜັນແປດ້ານການເມືອງພາຍໃນ ສປປ ເກົາຫຼີ. ປັກກິງ ໃຫ້ຂໍ້ສັງເກດກ່ຽວກັບຜົນສະທ້ອນຂອງກອງປະຊຸມໃຫຍ່ພັກແຮງງານ ສປປ ເກົາຫຼີ ຄັ້ງທີ 7 ສຳລັບສະພາບການພາຍໃນປະເທດ, ເຊິ່ງຕົ້ນຕໍແມ່ນດ້ານເສດຖະກິດ. ໃນຊຸມປີມໍ່ໆມານີ້, ສປປ ເກົາຫຼີ ເລີ່ມຜ່ອນຄາຍນະໂຍບາຍດ້ານເສດຖະກິດ. ໃນຂະນະນັ້ນວົງການນັກໄຈ້ແຍກ ປາຣີ ພັດຖືວ່າ, ເຂົາເຈົ້າບໍ່ລໍຖ້າການຫັນປ່ຽນໃຫຍ່ດ້ານການເມືອງຢູ່ ພຽງຢາງ, ຫາກພຽງແຕ່ແມ່ນໂອກາດເພື່ອໃຫ້ການນຳ Kim Jong – un ຫັນສິດອຳນາດຢ່າງເດັດຂາດ, ພາຍຫຼັງ ກຳອຳນາດມາເປັນເວລາ 4 ກວ່າປີເທົ່ານັ້ນ. ວົງການສື່ມວນຊົນ ອາເມລິກາ ໃຫ້ຂໍ້ສັງເກດວ່າ, ເລື່ອງ ສປປ ເກົາຫຼີ ສະເໜີວິທີການໃໝ່ໃນການແກ້ໄຂບັນຫານິວຄະເລຍຜ່ານການປຶກສາຢ່າງຕັ້ງໜ້ານັ້ນ ຈະປະກອບສ່ວນແກ້ໄຂສະພາບການຢູ່ແຫຼມເກົາຫຼີ ກໍ່ຄືເຮັດໃຫ້ຄວາມເຄັ່ງຕຶງໃນການພົວພັນລະຫວ່າງ ອາເມລິກາ - ສປປ ເກົາຫຼີ ຫຼຸດຜ່ອນລົງ. ແລະ ລັດຖະບານ ອາເມລິກາ ກໍ່ຕ້ອງນຳໃຊ້ບັນດາມາດຕະການຮັບມືຢ່າງມີໄຫວພິກ ແລະ ມີຫົວຄິດປະດິດສ້າງກວ່າ.
ກອງປະຊຸມໃຫຍ່ພັກແຮງງານ ສປປ ເກົາຫຼີ ຄັ້ງທີ 7 ດຳເນີນໄປໃນສະພາບທີ່ການນຳ Kim Jong – un ກຳອຳນາດມາເປັນເວລາເກືອບ 5 ປີ. ດ້ວຍບັນດາຄຳຖະແຫຼງຂອງການນຳ ສປປ ເກົາຫຼີ, ປະຊາຄົມສາກົນຫວັງວ່າ, ຄຽງຂ້າງການຊຸກຍູ້ເຕີບໂຕດ້ານເສດຖະກິດ ພ້ອມກັບການພັດທະນາຄວາມສາມາດດ້ານອາວຸດນິວຄະເລຍນັ້ນ, ສປປ ເກົາຫຼີຈະມີການປ່ຽນແປງ ແລະ ຄວາມມານະພະຍາຍາມຫຼາຍຢ່າງ ເພື່ອໂລກປອດນິວຄະເລຍ, ແລະປະຕິບັດບັນດາພັນທະບໍ່ເຜີຍແຜ່ອາວຸດນິວຄະເລຍຢ່າງຄົບຖ້ວນ.