ທ່ານນາຍົກລັດຖະມົນຕີຍີປຸ່ນ Shinzo Abe ພ້ອມດ້ວຍພັນລະຍາໄດ້ມາຢ້ຽມຢາມຫວຽດນາມຢ່າງເປັນທາງການໃນວັນທີ 16/1. ການຢ້ຽມຢາມຫວຽດນາມຂອງ ທ່ານນາຍົກລັດຖະມົນຕີຍີປຸ່ນ Shinzo Abe ຖືກດຳເນີນໃນສະພາວະທີ່ການພົວພັນຄູ່ຮ່ວມມືຍຸດທະສາດຢ່າງເລິກເຊິ່ງກ້ວາງຂວາງຫວຽດນາມ-ຍີປຸ່ນນັບມື້ນັບພັດທະນາຢ່າງແຂງແຮງ, ຮອບດ້ານ ແລະ ແທດຈິງພາຍຫຼັງ 44 ປີແຫ່ງການສ້າງຕັ້ງການພົວພັນທາງການທູດ. ຈຸດປະສົງຂອງ ການຢ້ຽມຢາມຫວຽດນາມຂອງ ທ່ານນາຍົກລັດຖະມົນຕີຍີປຸ່ນ Shinzo Abe ແມ່ນເພື່ອເພີ່ມທະວີການຮ່ວມມື, ເປັນຕົ້ນແມ່ນການຮ່ວມມືດ້ານເສດຖະກິດ, ການຄ້າ ແລະ ການລົງທຶນ, ຊຸກຍູ້ການພັດທະນາການພົວພັນຫວຽດນາມ-ຍີປຸ່ນຢ່າງແຂງແຮງ, ຮອບດ້ານ ແລະ ແທດຈິງ.
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ແລະ
ທ່ານນາຍົກລັດຖະມົນຕີຍີປຸ່ນ Shinzo Abe |
ການພົວພັນຫວຽດນາມ-ຍີປຸ່ນໄດ້ຮັບການສ້າງຕັ້ງຢ່າງເປັນທາງການເມື່ອປີ 1973. ຊຸມປີມໍ່ໆມານີ້, ການນຳ 2 ປະເທດໄດ້ດຳເນີນການພົບປະຂັ້ນສູງເປັນປະຈຳ, ອັນໄດ້ນຳມາເຊິ່ງບັນດາກາລະໂອກາດຮ່ວມມື 2 ຝ່າຍໃນຫຼາຍຂົງເຂດ. ການຢ້ຽມຢາມຫວຽດນາມຂອງ ທ່ານນາຍົກລັດຖະມົນຕີຍີປຸ່ນ Shinzo Abeໃນ 2 ວັນຄື 16-17/1 ສືບຕໍ່ຢັ້ງຢືນການພັດທະນາສາຍພົວພັນນີ້.
ພື້ນຖານແຫ່ງຜົນປະໂຫຍດລວມທີ່ໝັ້ນແກ່ນ
ການພົວພັນຫວຽດນາມ-ຍີປຸ່ນພວມຢູ່ໃນໄລຍະອັນດີງາມທີ່ສຸດໃນປະຫວັດສາດນັບຕັ້ງແຕ່ເມື່ອ 2 ປະເທດ ສ້າງຕັ້ງການພົວພັນທາງການທູດ, ມີຄວາມໄວ້ເນື້ອເຊື່ອໃຈຢ່າງສູງ ແລະ ບັນລຸຂອບເຂດການພົວພັນຄູ່ຮ່ວມມືຍຸດທະສາດຢ່າງເລິກເຊິ່ງກ້ວາງຂວາງເພື່ອສັນຕິພາບ ແລະ ວັດທະນາຖາວອນຢູ່ອາຊີ. ການນຳຂັ້ນສູງ 2 ປະເທດໄດ້ດຳເນີນການຢ້ຽມຢາມ ແລະ ພົບປະກັນເປັນປະຈຳໃນເວທີປາໄສສາກົນ ແລະ ພາກພື້ນ. ເດືອນ 9/2015, ເນື່ອງໃນໂອກາດການຢ້ຽມຢາມຍີປຸ່ນຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ, 2 ປະເທດໄດ້ລົງນາມໃນ “ຖະແຫຼງການຮ່ວມກ່ຽວກັບວິໄສທັດລວມແຫ່ງການພົວພັນຫວຽດນາມ-ຍີປຸ່ນ”. ໃນມໍ່ໆມານີ້, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກໄດ້ທຳການຢ້ຽມຢາມຍີປຸ່ນ ແລະ ເຂົ້າຮ່ວມກອງປະຊຸມສຸດຍອດກຸ່ມ 7 ປະເທດອຸດສາຫະກຳພັດທະນາ G7 ເປີດກ້ວາງເມື່ອເດືອນ 5/2016.
ໜຶ່ງໃນບັນດາເສົ້າຄ້ຳຕົ້ນຕໍແຫ່ງ ການພົວພັນຫວຽດນາມ-ຍີປຸ່ນ, ນັ້ນແມ່ນການພົວພັນເສດຖະກິດ. ຍ້ອນມີຝັ່ງທະເລຍາວ, ໄດ້ຮັບຜົນປະໂຫຍດດ້ານເສດຖະກິດຈາກທະເລຢ່າງຫຼວງຫຼາຍ, 2 ປະເທດມີຫຼາຍກາລະໂອກາດໄດ້ແລກປ່ຽນບົດຮຽນໃນຂົງເຂດນີ້, ຈາກນັ້ນກໍຮັດແໜ້ນ ແລະ ເປີດກ້ວາງການຮ່ວມມືອອກສູ່ຂົງເຂດອື່ນໆ. ຍີປຸ່ນແມ່ນຄູ່ຮ່ວມມືເສດຖະກິດແຖວໜ້າຂອງຫວຽດນາມ ແລະ ປະເທດທຳອິດໃນກຸ່ມ G7 ໄດ້ຮັບຮູ້ພື້ນຖານເສດຖະກິດຕະຫຼາດຂອງຫວຽດນາມ ແລະ ແມ່ນປະເທດໃຫ້ການຊ່ວຍເຫຼືອທຶນ ODA ອັນດັບໜຶ່ງ, ທັງແມ່ນນັກລົງທຶນໃຫຍ່ອັນດັບ 2 ແລະ ແມ່ນຄູ່ຮ່ວມການຄ້າ 2 ຝ່າຍໃຫຍ່ອັນດັບ 4 ຂອງຫວຽດນາມ. 2 ປະເທດມີຫຼາຍກົນໄກຮ່ວມມືເສດຖະກິດ 2 ຝ່າຍ, ອັນໄດ້ສ້າງປະຖົມປັດໄຈໃຫ້ແກ່ການສົ່ງອອກສິນຄ້າເພີ່ມສະເລ່ຍ 13,9%ໃນຊຸມປີມໍ່ໆນີ້. ປະຈຸບັນ, ຍີປຸ່ນພວມຕັ້ງໜ້າໜູນຊ່ວຍຫວຽດນາມພັດທະນາອຸດສາຫະກຳໃນຂອບເຂດການ ຮ່ວມມືຫວຽດນາມ-ຍີປຸ່ນເຖິງປີ 2020, ວິໄສທັດເຖິງ 2030. ນອກຈາກເສົາຄ້ຳເສດຖະກິດ, ການພົວພັນຫວຽດນາມ-ຍີປຸ່ນພວມພັດທະນາຢ່າງແຂງແຮງໃນ ຫຼາຍປີທີ່ຜ່ານມາໃນຫຼາຍຂົງເຂດຈາກການສຶກສາຕະຫຼອດຮອດກະສີກຳ, ການທ່ອງທ່ຽວ, ແຮງງານ, ການຮັບມືກັບການປ່ຽນແປງຂອງດິນຟ້າອາກາດ, ການພົວພັນຮ່ວມມືລະຫວ່າງບັນດາທ້ອງຖິ່ນ. 2 ປະເທດໄດ້ຮ່ວມມືເປັນຢ່າງດີໃນຂອບເຂດບັນດາອົງການຈັດຕັ້ງ ແລະ ເວທີປາໄສຫຼາຍຝ່າຍຄື : ສ.ປ.ຊ, ອາຊຽນ, ເອເປັກ, ອາແຊມ, ສະພາສິດທິມະນຸດ….
ອາຊີ-ປາຊີຟິກ ກໍແມ່ນພາກພື້ນທີ່ຊ້ອນແຝງຄວາມຂາດສະຖຽນລະພາບຫຼາຍຢ່າງຍ້ອນຄວາມຫຼາຍຮູບຫຼາຍສືທາງດ້ານການເມືອງ ແລະ ຜົນປະໂຫຍດຂອງບັນດາປະເທດ. ສິ່ງນີ້ໄດ້ພາໃຫ້ຫວຽດນາມ ແລະ ຍີປຸ່ນສາມາດແບ່ງປັນຢ່າງງ່າຍດາຍ ແລະ ມີທັດສະນະຄ້າຍຄືກັນທາງດ້ານຜົນປະໂຫຍດ . ຍີປຸ່ນໄດ້ໜູນຊ່ວຍຫວຽດນາມຫຼາຍຢ່າງໃນການຍົກສູງຄວາມສາມາດລາດຕະເວນ, ປ້ອງກັນຕົວ ແລະ ຮັບປະກັນຄວາມໝັ້ນຄົງຢູ່ທະເລ.
ບາດກ້າວປັບປຸງການພົວພັນໂດຍຈຳເປັນ
ການຢ້ຽມຢາມຫວຽດນາມຂອງ ທ່ານນາຍົກລັດຖະມົນຕີຍີປຸ່ນ Shinzo Abeໄດ້ສະແດງໃຫ້ເຫັນການພົວພັນຄູ່ຮ່ວມມືຍຸດທະສາດຢ່າງເລິກເຊິ່ງກ້ວາງຂວາງຫວຽດນາມ-ຍີປຸ່ນສືບຕໍ່ໄດ້ຮັບການປັບປຸງ, ພັດທະນາຢ່າງແຂງແຮງ, ຮອບດ້ານ ແລະ ແທດຈິງ. ການຢ້ຽມຢາມກໍເປັນການຢັ້ງຢືນອາລົມຈິດ, ຄວາມຮັກແພງ, ຄວາມຈິງໃຈຂອງທ່ານນາຍົກລັດຖະມົນຕີຍີປຸ່ນ Shinzo Abe ໃນການຊຸກຍູ້ການພົວພັນມິດຕະພາບ ຫວຽດນາມ-ຍີປຸ່ນ. ໃນການຢ້ຽມຢາມຄັ້ງນີ້, ເຖິງວ່າດຳເນີນໃນເວລາອັນສັ້ນໆກໍຕາມ, ແຕ່ບັນດາພາກສ່ວນໃນຄະນະຜູ້ແທນກໍປະກອບດ້ວຍການນຳ, ປະທານບັນດາກຸ່ມບໍລິສັດແຖວໜ້ານັບສິບທ່ານ ແລະ ການນຳທ້ອງຖິ່ນຂອງຍີປຸ່ນອີກຫຼາຍທ່ານໄດ້ມາຫວຽດນາມດ້ວຍຈຸດປະສົງຢາກຊອກຮູ້ກາລະໂອກາດລົງທຶນຢູ່ຫວຽດນາມ. ທ່ານນາຍົກລັດຖະມົນຕີຍີປຸ່ນ Shinzo Abe ພ້ອມດ້ວຍບັນດາສະມາຊິກໃນຄະນະຈະພ້ອມກັບທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ແລະ ບັນດາສະມາຊິກລັດຖະບານ, ບັນດາການນຳທ້ອງຖິ່ນຂອງຫວຽດນາມ ຈະຮັບຟັງຄຳເຫັນຂອງກັນເພື່ອພ້ອມກັນປຶກສາຫາລື, ຈາກນັ້ນຈະສ້າງເງື່ອນໄຂທີ່ດີກວ່າໃຫ້ແກ່ການຮ່ວມມືລະຫວ່າງ 2 ຝ່າຍໃຫ້ນັບມື້ນັບເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ.
ການຢ້ຽມຢາມຫວຽດນາມຂອງ ທ່ານນາຍົກລັດຖະມົນຕີຍີປຸ່ນ Shinzo Abe ແມ່ນສະແດງໃຫ້ເຫັນການຖືເປັນສຳຄັນທີ່ສຸດການພົວພັນຄູ່ຮ່ວມມືຍຸດທະສາດຢ່າງເລິກເຊິ່ງກ້ວາງຂວາງຫວຽດນາມ-ຍີປຸ່ນ, ຢັ້ງຢືນຫວຽດນາມຍາມໃດກໍແມ່ນຄູ່ຮ່ວມມືທີ່ສຳຄັນ ແລະ ຍາວນານຂອງຍີປຸ່ນ ແລະ ມີຄວາມຫວັງສືບຕໍ່ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ ແລະ ຊຸກຍູ້ການຮ່ວມມືກັບຫວຽດນາມໃນຫຼາຍຂົງເຂດ. ໃນຕະຫຼອດໄລຍະ 40 ປີທີ່ຜ່ານມາ, ດ້ວຍການຜັນແປ ແລະ ບັນດາເຫດການທັງຢູ່ພາຍໃນປະເທດ ແລະ ສາກົນ, ການພົວພັນມິດຕະພາບລະຫວ່າງ 2 ປະເທດໄດ້ນັບມື້ນັບພັດທະນາ ແລະ ແຕກດອກອອກຜົນຍິ່ງໆຂຶ້ນ.