ການປ່ຽນແປງຂອງດິນຟ້າອາກາດພວມສົ່ງຜົນກະທົບທີ່ບໍ່ດີເຖິງເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມຊຶ່ງແມ່ນເຂດປະກອບສ່ວນເຖິງ 15% ຍອດ GDP ຂອງທົ່ວປະເທດ. ເວທີປາໄສ “ ເພື່ອເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມວັດທະນາຖາວອນ ແລະ ແທດເໝາະກັບດິນຟ້າອາກາດ ”, ໃນມໍ່ໆມານີ້, ໄດ້ຮຽກຮ້ອງບັນດາອົງການສາກົນຈົ່ງຊ່ວຍເຫຼືອເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມຜ່ານຜ່າສິ່ງທ້າທາຍຂອງສະພາບນ້ຳທະເລຂຶ້ນສູງ ແລະ ການປ່ຽນແປງຂອງດິນຟ້າອາກາດ, ພ້ອມກັນນັ້ນ, ກໍພວມຈັດຕັ້ງການຮ່ວມສຳພັນລະຫວ່າງເຂດເພື່ອພັດທະນາແບບຍືນຍົງ.
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ກ່າວຄຳເຫັນທີ່ເວທີ່ປາໄສເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມປີ 2016 |
ເວທີປາໄສເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມປີ 2016 ໂດຍທະນາຄານໂລກ WB ສົມທົບກັບກະຊວງກະສີກຳ ແລະ ພັດທະນາຊົນນະບົດ, ກະຊວງຊັບພະຍາກອນ ແລະ ສິ່ງແວດລ້ອມ, ກະຊວງແຜນການ ແລະ ການລົງທຶນຈັດຂຶ້ນໃນວັນທີ 27/6 ຢູ່ນະຄອນໂຮ່ຈິມິນ. ບັນດາບົດລາຍງານ, ຄົ້ນຄ້ວາໄດ້ຖືກຍົກອອກມາທີ່ເວທີປາໄສຕ່າງກໍຖືວ່າ ເພື່ອເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ມີບົດບາດສຳຄັນໃຫ້ແກ່ການພັດທະນາຂອງຫວຽດນາມເວົ້າລວມ ແລະ ຄວາມໝັ້ນຄົງດ້ານສະບຽງອາຫານຂອງພາກພື້ນເວົ້າສະເພາະ. ແຫ່ງນີ້ແມ່ນເຂດຜະລິດກະສີກຳ, ສິນໃນນ້ຳເປັນສິນຄ້າໃຫຍ່ກວ່າໝູ່ຂອງຫວຽດນາມ, ປະກອບສ່ວນ 41% ມູນຄ່າການຜະລິດກະສີກຳ, ເກືອບ 70% ວົງເງິນສົ່ງອອກສິນໃນນ້ຳ, 90% ປະລີມານເຂົ້າສານສົ່ງອອກ, ສະໜອງ 1/5 ປະລີມານການຜະລິດເຂົ້າສານເປັນສິນຄ້າທົ່ວໂລກ.
ຜົນກະທົບຈາກການປ່ຽນແປງຂອງດິນຟ້າອາກາດເຮັດໃຫ້ອັດຕາສ່ວນປະກອບ GDP ມີໄພຖືກຫຼຸດລົງ.
ມາຮອດປະຈຸບັນ, ບໍລິເວນນ້ຳທະເລຊຶມໄດ້ແຜ່ລາມອອກກ້ວາງແຕ່ 100 ຫາ 120 ກີໂລແມັດຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ. ມີເນື້ອທີ່ນາກວ່າ 230.000 ແຮັກຕາ, ຕົ້ນໄມ້ກິນໝາກ 9.400 ແຮັກຕາ, ເນື້ອທີ່ລ້ຽງ, ປູກສິນໃນນ້ຳກວ່າ 5 ພັນແຮັກຕາຖືກຜົນສະທ້ອນ. ຍອດປະລີມານການຜະລິດເຂົ້າລະດູໜາວຕໍ່ລະດູບານໃໝ່ທີ່ຜ່ານມາ ໄດ້ຫຼຸດລົງກວ່າ 400.000 ແຮັກຕາ. ໃນໄລຍະຍາວ, ບັນດາເຂດຊຸມຊົນຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມໄດ້ຮັບການຄາດຄະເນວ່າ ຈະແມ່ນເປົ້າໝາຍຮັບຜົນກະທົບບໍ່ໜ້ອຍຈາກ ການປ່ຽນແປງຂອງດິນຟ້າອາກາດ, ໃນນັ້ນມີປະກົດການນ້ຳທະເລຂຶ້ນສູງ ແລະ ພາຍຸຊົນຮ້ອນມີແນວໂນ້ມນັບມື້ນັບແຮງຂຶ້ນ. ປະລີມານການຜະລິດເຂົ້າຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມໄດ້ຖືກຄາດຄະເນວ່າ ຈະຫຼຸດລົງແຕ່ 6-12%. ການຫຼຸດລົງຂອງປະລີມານການຜະລິດກະສີກຳຢູ່ເຂດນີ້ ຈະບໍ່ພຽງແຕ່ເປັນບັນຫາຂອງຫວຽດນາມເທົ່ານັ້ນ, ຫາກຍັງຈະສົ່ງຜົນກະທົບເຖິງລາຄາສະບຽງອາຫານອີກດ້ວຍ, ອັນໄດ້ສົ່ງຜົນສະທ້ອນເຖິງ ຄວາມໝັ້ນຄົງດ້ານສະບຽງອາຫານຂອງທົ່ວໂລກ.
ປະຕິບັດຮູບແບບຮ່ວມສຳພັນເພ່ືອພັດທະນາ
ແລະກໍຢູ່ເວທີປາໄສນີ້, ຜູ້ນຳລັດຖະບານຫວຽດນາມຖືວ່າ ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ ບໍ່ພຽງແຕ່ແມ່ນອູ່ເຂົ້າໃຫຍ່ທີ່ສຸດຂອງຫວຽດນາມເທົ່ານັ້ນ, ຫາກຍັງຕ້ອງແມ່ນແຫ່ງທີ່ມີພື້ນຖານກະສີກຳຍືນຍົງ, ມີມູນຄ່າເພີ່ມສູງຂອງອາຊີຕາເວັນອອກສ່ຽງໃຕ້ ແລະ ກວ້າງຂວາງກ່ວານັ້ນ ແມ່ນອາຊີໃນອະນາຄົດ. ປະຕິບັດໄດ້ເປົ້າໝາຍນີ້ ກໍແມ່ນໄດ້ສຳເລັດໜຶ່ງໃນບັນດາພາລະກຳທີ່ຫຍຸ້ງຍາກທີ່ສຸດຂອງພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝເວົ້າລວມ, ເວົ້າສະເພາະແມ່ນການຫັນກະສີກຳເປັນປະເທດອຸດສາຫະກຳ ແລະ ທັນສະໄໝ. ເພື່ອໃຫ້ ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມພັດທະນາຍິ່ງກວ່າອີກໃນໄລຍະທີ່ຈະມາເຖິງ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໃຫ້ການຊີ້ນຳວ່າ :
“ ຄະນະຊີ້ນຳເຂດຕາເວັນຕົກພາກໃຕ້ພ້ອມກັບບັນດາແຂວງເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມສົມທົບກັບລັດຖະບານສຸມໃສ່ຊີ້ນຳການກໍ່ສ້າງຮ່ວມສຳພັນລະຫວ່າງເຂດ, ສ້າງຍຸດທະສາດພັດທະນາ ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມເພື່ອເສີມຂະຫຍາຍທ່າແຮງຂອງແຕ່ລະທ້ອງຖິ່ນ, ຫຼີກລ້ຽງສະພາບແກ່ງແຍ້ງຢູ່ພາຍໃນ, ຈັດແບ່ງວຽກງານໃຫ້ເຂດໃດ, ແຂວງໃດ, ສຸມໃສ່ຜະລິດທັນຍາຫານ, ອາຫານຫຼືປູກຕົ້ນໄມ້ຫຍັງໃຫ້ແທດເໝາະ. ”
ທີ່ເວທີປາໄສ, ຜູ້ແທນທີ່ເຂົ້າຮ່ວມຫຼາຍທ່ານໄດ້ພ້ອມກັນປຶກສາຫາລືບັນດາວິທີການແກ້ໄຂຮັບມືກັບການປ່ຽນແປງຂອງດິນຟ້າອາກາດໃນເຂດ, ບັນດາຄວາມສ່ຽງທີ່ໄປພ້ອມກັບ ການປ່ຽນແປງຂອງດິນຟ້າອາກາດ, ບັນດາຍຸດທະສາດທີ່ດັດປັບໃຫ້ແທດເໝາະ, ໃນນັ້ນລວມທັງການສ້າງເປັນແຜນການຄົບຊຸດ, ວຽກງານສົມທົບກັນລະຫວ່າງບັນດາທ້ອງຖິ່ນ, ຂະແໜງການຕ່າງໆ.
ເພີ່ມທະວີການຮ່ວມມືກັບບັນດາຄູ່ຮ່ວມມືພັດທະນາ
ທີ່ເວທີປາໄສເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມປີ 2016, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ເນັ້ນໜັກເຖິງການຮ່ວມມືກັບບັນດາຄູ່ຮ່ວມມືເພື່ອພັດທະນາເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ, ໃນນັ້ນການຮ່ວມມືທີ່ສຳຄັນກວ່າໝູ່ແມ່ນກັບ WB. ທ່ານນາງ Victoria Kwakwa, ຮອງປະທານຮັບຜິດຊອບພາກພື້ນອາຊີຕາເວັນອອກ ແລະ ປາຊີຟິກຂອງ WB ໃຫ້ຮູ້ວ່າ :
“ ເວທີປາໄສນີ້ ແມ່ນໂອກາດເພື່ອໃຫ້ບັນດາຝ່າຍທີ່ກ່ຽວຂ້ອງປຶກສາຫາລື ຍົກອອກບັນດາມາດຕະການໜູນຊ່ວຍ, ໃນນັ້ນມີບັນດາຄູ່ຮ່ວມມືສາກົນ. ພວກຂ້າພະເຈົ້າກໍລ້ວນແຕ່ມີຈຸດປະສົງຮ່ວມ ແມ່ນຊ່ວຍຊາວກະສີກອນເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມມີຄວາມສາມາດຮັບມືກັບສິ່ງທ້າທາຍ, ນຳມາຊຶ່ງຄວາມວັດທະນາຖາວອນໃນອະນາຄົດ. ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ຍົກອອກບາງວິທີການແກ້ໄຂ, ພ້ອມກັບການຍົກອອກວິທີການແກ້ໄຂນັ້ນ, ບັນດາອົງການສຳນັກງານຂັ້ນສູນກາງ ແລະ ທ້ອງຖິ່ນໄດ້ມີວິໄສທັດຮ່ວມກັນ ”
ພ້ອມກັບການເພີ່ມທະວີການຮ່ວມມືກັບບັນດາອົງການສາກົນ, ລັດຖະບານຫວຽດນາມໄດ້ໃຫ້ບຸລິມະສິດ ແລະ ສືບຕໍ່ໃຫ້ບຸລິມະສິດລົງທຶນກໍ່ສ້າງຫຼາຍເຂດອຸດສາຫະກຳ, ຍົກລະດັບໂຄງປະກອບໂຄງລ່າງ, ພິເສດແມ່ນຄົມມະນາຄົມທາງບົກ, ການບິນເພື່ອເປົາໝາຍພັດທະນາຢູ່ ຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ.