(vovworld)- ຫວຽດນາມ ຖືກຖືວ່າແມ່ນປະເທດມີທ່າໄດ້ປຽບກ່ຽວກັບແຫຼ່ງຊັບພະຍາກອນມະນຸດທີ່ອຸດົມສົມບູນດ້ວຍປະຊາກອນ 90 ລ້ານຄົນ, ແມ່ນປະເທດມີປະຂາກອນຫຼາຍອັນດັບ 3 ໃນພາກພື້ນອາຊຽນ ແລະ ອັນດັບ 13 ໃນໂລກ. ຫວຽດນາມ ພວມຢູ່ໃນໄລຍະ “ປະຊາກອນຄຳ“ ໃນຂະນະທີ່ມີ 66-67% ປະຊາກອນໃນເກັ່ນອາຍຸແຮງງານ (ປະມານ 60 ລ້ານຄົນ). ພ້ອມກັນນັ້ນ, ແຫຼ່ງຊັບພະຍາກອນມະນຸດຂອງຫວຽດນາມ ມີຄວາມດຸໝັ່ນຂະຫຍັນພຽນ, ສະຫຼຽວສະຫຼາດ ແລະ ມີຄວາມສຳມາດຮັບເອົາບັນດາຜົນງານດ້ານວິທະຍາສາດ-ເຕັກໂນໂລຊີໃໝ່, ທັນສະໄໝຢ່າງໄວວາ…
(ພາບປະກອບ)
ມະຕິກອງປະຊຸມໃຫ່ຍຄັ້ງທີ 11 ຂອງພັກກອມມູນິດຫວຽດນາມ ໄດ້ກຳນົດແຫຼ່ງຊັບພະຍາກອນມະນຸດແມ່ນປັດໄຈສຳຄັນກ່ວາໝູ່ຂອງກຳລັງການຜະລິດສັງຄົມ, ຕັດສິນຄວາມສາມາດບົ່ມຊ້ອນດ້ານເສດຖະກິດ, ການປ້ອງກັນຄວາມສະຫງົບຂອງປະເທດໜຶ່ງ. ໃນບັນດາແຫຼ່ງກຳລັງ, ແຫຼ່ງຊັບ ພະຍາກອນມະນຸດຖືກຖືວ່າແມ່ນແຫຼ່ງກຳລັງຕົ້ນຕໍ່ຄອບງຳວິວັດການພັດທະນາເສດຖະກິດ-ສັງຄົມ.
ການສຶກສາອົບຮົມຕາມຄວາມຕ້ອງການຂອງສັງຄົມ
ບັນດາຜູ້ຊ່ຽວຊານສາກົນ ແລະ ພາກພື້ນຕີລາຄາວ່າ, ປະຈຸບັນ, ກຳລັງແຮງງານຫວຽດນາມ ມີຄວາມຂະຫຍັນຂັນເຄື່ອນ, ຮ່ຳຮຽນໄວ, ມີຄວາມສາມາດທ່ວງທັນກັບລະດັບຂອງໂລກໃນບາງຂົງເຂດວິຊາຊີບ. ນີ້ແມ່ນເງື່ອນໄຂອຳນວຍຄວາມສະດວກ ແລະ ກໍ່ແມ່ນຈຸດດີຊື່ງຖັນແຖວຊັບພະຍາກອນມະນຸດຫວຽດນາມ ໃນໄລຍະໃໝ່ຈະສືບຕໍ່ຮັກສາ ແລະ ເສີມຂະຫຍາຍເພື່ອຕອບສະໜອງຕາມຄວາມຮຽກຮ້ອງພັດທະນາຂອງປະເທດຊາດ. ເພື່ອຍູ້ແຮງການຫັນປະເທດຊາດເປັນປະເທດອຸດສາຫະກຳ ແລະ ທັນສະໄໝ ແລະ ເຊື່ອມໂຍງເຂົ້າກັບໂລກ, ຫວຽດນາມ ໄດ້ ແລະ ພວມຕັ້ງໜ້າລົງທຶນ ແຫຼ່ງຊັບພະຍາກອນມະນຸດທີ່ມີຄຸນນະພາບສູງ, ມີລະດັບວິຊາສະເພາະສູງ, ໂດຍສະເພາະແມ່ນຕ້ອງຮັບມືໄວກັບບັນດານການປ່ຽນແປງຢ່າງໄວວາຂອງວິທະຍາສາດ, ເຕັກໂນໂລຊີ ແລະ ຖືວ່ານີ້ແມ່ນປັດໄຈຕົ້ນຕໍ່ຮັບປະກັນໃຫ້ພື້ນຖານເສດຖະກິດຫວຽດນາມ ພັດທະນາຕາມທິດທັນສະໄໝ, ໝັ້ນຄົງ. ກະຊວງສຶກສາ ແລະ ບຳລຸງສ້າງຫວຽດນາມ ກຳນົດວ່າ, ການພັດທະນາ, ບຳລຸງສ້າງແຫຼ່ງຊັບພະຍາກອນມະນຸດຂັ້ນມະຫາວິທະຍາໄລຕາມຄວາມຕ້ອງການຂອງສັງຄົມ ແມ່ນຍຸດທະສາດພັດທະນາຂະໜາດໃຫ່ຍຂອງທົ່ວຂະແໜງ, ຜ່ານນັ້ນ, ປະກອບສ່ວນເຂົ້າໃນຜົນສຳເລັດລວມຂອງການພັດທະນາ ແຫຼ່ງຊັບພະຍາກອນມະນຸດທີ່ມີຄຸນນະພາບສູງຂອງປະເທດຊາດ. ທ່ານຫງວຽນທ້ຽນເຍິນ, ປະທານຄະນະກຳມະການສູນກາງແນວໂຮມປະເທດຊາດຫວຽດນາມ ເນັ້ນໜັກວ່າ:
“ຍູ້ແຮງການບຳລຸງສ້າງຕາມຄວາມຕ້ອງການຂອງສັງຄົມແມ່ນສຳຄັນ ແລະ ຈຳເປັນເພື່ອຕອບສະຫນອງຕາມຄວາມຕ້ອງການເຊື່ອມໂຍງ. ຫວ່າງແລ້ວນີ້, ກະຊວງສຶກສາ ແລະ ບຳລຸງສ້າງຫວຽດນາມ ສົມທົບກັບກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ໄດ້ເຊັນຂໍ້ຕົກລົງສຳຄັນ 2 ສະບັບ. ນັ້ນແມ່ນຂໍ້ຕົກລົງກັບສະມາຄົມວິສາຫະກິດເຢຍລະມັນ ແລະ ບັນດາອົງການໜູນຊ່ວຍຂອງລັດຖະບານເຢຍລະມັນ, ຂໍ້ຕົກລົງກັບສະມາຄົມວິສາຫະກິດຍີ່ປຸ່ນ ແລະ ບັນດາອົງການທີ່ກ່ຽວຂ້ອງ ເພື່ອປະຕິບັດການບຳລຸງສ້າງຕາມຄວາມຕ້ອງການຂອງວິສາຫະກິດເຢຍລະມັນ ແລະ ຍີ່ປຸ່ນ ທີ່ພວມລົງທຶນຢູ່ຫວຽດນາມ ຕາມມາດຖານຂອງເຂົາເຈົ້າ. ພວກເຮົາຕ້ອງຍູ້ແຮງການຄົ້ນຄ້ວາວິທະຍາສາດ, ຄຽງຄູ່ກັບການບຳລຸງສ້າງຕາມຄວາມຕ້ອງການແລ້ວ, ການຄົ້ນຄ້ວາວິທະຍາສາດກໍ່ຕ້ອງຕາມຄວາມຕ້ອງອີງການພັດທະນາປະເທດຊາດ“
(ພາບ: giaoducthoidai.vn)
ເອົາໃຈໃສ່ເປັນພິເສດເຖິງວຽກງານສອນວິຊາຊີບໃຫ້ແກ່ຄົນງານຊົນນະບົດ
ໃນໄລຍະຜ່ານມາ, ພື້ນຖານເສດຖະກິດຫວຽດນາມ ໄດ້ພັດທະນາຢ່າງໄວວາ, ເຊື່ອມໂຍງກັບເສດຖະກິດໂລກຢ່າງເລິກເຊິ່ງກ້ວາງຂວາງ, ສະນັ້ນ, ຍາມໃດຫວຽດນາມ ກໍ່ຕ້ອງການແຫຼ່ງຊັບພະຍາກອນມະນຸດທີ່ມີຄຸນນະພາບສູງດ້ວຍຈຳນວນຫຼາຍ, ໃນນັ້ນ, ຍຸດທະສາດການສອນວິຊາຊີບໃຫ້ແກ່ຄົນງານຊົນນະບົດໂດຍລັດຖະບານເຊັນອະນຸມັດຖືກຖືວ່າ, ແມ່ນຂໍ້ກຸນແຈເພື່ອໃຫ້ບັນດາໂຄງການ, ຈຸດໝາຍແຫ່ງຊາດສຳເລັດຜົນ. ແຜນຮ່າງສອນວິຊາຊີບໃຫ້ແກ່ຄົນງານຊົນນະບົດຮອດປີ 2020 ຂອງລັດຖະບານໄດ້ຮັບການປະຕິບັດໃນເວລາເກືອບ 4 ປີແລ້ວ ດ້ວຍຈຸດໝາຍສະເລ່ຍແຕ່ລະປີຈະສອນວິຊາຊີບໃຫ້ແກ່ຄົນງານຊົນນະບົດໃຫ້ໄດ້ກ່ວາ 1 ລ້ານຄົນ ຊື່ງແກ້ໄຂ ບັນດາ ບັນຫາໃນການພັດທະນາເສດຖະກິດສັງຄົມຢູ່ທ້ອງຖິ່ນຕ່າງໆພວມໃນວິວັດ ການຫັນປ່ຽນໂຄງປະກອບເສດຖະກິດໂດຍພື້ນຖານ. ທ່ານກາວວັນເຊີມ, ຮອງຫົວໜ້າກົມໃຫ່ຍສອນວິຊາຊີບ- ກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ຢືນຢັນວ່າ:
“ແຜນຮ່າງສອນວິຊາຊີບໃຫ້ແກ່ຄົນງານຊົນນະບົດແມ່ນມາດຕະການສຳຄັນເພື່ອພັດທະນາເສດຖະກິດ, ປະກອບສ່ວນກໍ່ສ້າງຊົນນະບົດໃໝ່. ພວກເຮົາດັດສົມບັນດາມາດຖານທັກສະພື້ນຖານໃນການສອນວິຊາຊີບຢູ່ເຂດຊົນນະບົດ. ໃນນັ້ນ, ການນຳໃຊ້ເຕັກໂນໂລຊີໃນການຜະລິດມີວິວັດການບຳລຸງສ້າງເໝາະສົມເພື່ອໃຫ້ຄົນງານຊົນນະບົດເປັນເຈົ້າເຕັກໂນໂລຊີໄດ້. ບັນດາໂຮງຮຽນສອນວິຊາຊີບຕອ້ງກຳນົດວ່າ, ເມື່ອໄດ້ຮັບການບຳລຸງສ້າງແລ້ວ, ແຫຼ່ງຊັບພະຍາກອນມະນຸດນີ້ຕ້ອງມີລະດັບຄວາມຮູ້, ທັກສະ, ຕອບສະໜອງຄວາມຕ້ອງການຂອງສັງຄົມ“.
ການພັດທະນາ ແລະ ຍົກສູງຄຸນນະພາບແຫຼ່ງຊັບພະຍາກອນມະນຸດຫວຽດນາມ ແມ່ນບາດກ້າວບຸກທະລຸໃນພາລະກິດສ້າງສາ ແລະ ປົກປັກຮັກສາປະເທດຊາດ. ນີ້ແມ່ນປັດໄຈຕັດສິນຊິ້ຂາດຮັບປະກັນນຳພື້ນຖານເສດຖະກິດຂອງປະເທດຊາດພັດທະນາຢ່າງໄວວາ ແລະ ໝັ້ນຄົງ./.