(vovworld) - ໃນປະຫວັດສາດນັບພັນປີມານີ້, ປະຊາຊົນຫວຽດນາມ ຍາມໃດກໍຈັດຕັ້ງພິທີໄຫວ້ບູຊາເຈົ້າຊີວິດຮູ່ງໃນວັນທີ 10/3 ປະຈຳປີ ໄລ່ຕາມຈັນທະປະຕິທິນ. ສະນັ້ນ ການເຄື່ອນໄຫວໄຫວ້ບູຊາເຈົ້າຊີວິດຮຸ່ງ ໄດ້ກາຍເປັນການດຳເນີນຊີວິດທາງດ້ານວັດທະນະທຳທີ່ຂາດບໍ່ໄດ້ຂອງຊາດຫວຽດນາມ, ແມ່ນໂອກາດເພື່ອໃຫ້ປະຊາຊົນທຸກຄົນເພີ່ມທະວີຄວາມເຂົ້າອົກເຂົ້າໃຈກ່ຽວກັບກົກເຄົ້າເຫງົ້າກໍ, ເພີ່ມພູນຄູນສ້າງນ້ຳໃຈສາມັກຄີສ້າງສາປະເທດຊາດ. ດ້ວຍບັນດາຄຸນຄ່າດ້ານຄຸນສົມບັດທີ່ເຂັ້ມຂົ້ນໄປດ້ວຍສີສັດວັດທະນະທຳຂອງຊາດຫວຽດນາມນັ້ນ, ການເຄື່ອນໄຫວໄຫວ້ບູຊາເຈົ້າຊີວິດຮຸ່ງໄດ້ຮັບການຮັບຮອງຈາກອົງການ UNESCO ວ່າ: ແມ່ນມໍລະດົກວັດທະນະທຳຂອງມວນມະນຸດ.
ປະຊາຊົນຫວຽດນາມເຂົ້າຮ່ວມພິທີໄຫວ້ບູຊາເຈົ້າຊີວິດຮຸ່ງ
ພາບ:vnexpress.net
|
ກ່ອນນີ້ນັບພັນໆປີ, ເຂດດິນແດນຟູທໍ້ ແມ່ນສະຖານທີ່ຊື່ງບັນດາເຈົ້າຊີວິດຮຸ່ງ (ໄລຍະແຕ່ 2879 - 258 ກ່ອນ ຄສ) ໄດ້ສ້າງເປັນລັດວັນລາງ ທຳອິດຂອງຫວຽດນາມ. ເພາະສະນັ້ນ ບໍລິເວນວິຫານຮຸ່ງ ຢູ່ພູເຫງ໋ຍຫລີງ ແຂວງ ຟູທໍ້ ແມ່ນເຂດດິນແດນແຫ່ງບັນພະບຸລຸດ ແມ່ນສະຖານທີ່ຈຸດສຸມເພື່ອປະຕິບັດພິທີໄຫວ້ບູຊາເຈົ້າຊີວິດຮຸ່ງ. ຕາມບັນດາເອກະສານທີ່ຍັງໄດ້ຮັບການຮັກສາໄວ້ໃນປະຈຸບັນແລ້ວ, ການໄຫວ້ບູຊາເຈົ້າຊີວິດຮຸ່ງ ໄດ້ປະກົດມີໄວກວ່າໝູ່ໃນປະຫວັດສາດ. ໃນສະໄຫມ ທຸກຟານ(Thục Phán) - ອານເຢືອງເວືອງ (An Dương Vương) (ແຕ່ປີ 257- 208 ກ່ອນ ຄສ) ມີເສົາຫີນເສົາຫນຶ່ງ ທີ່ຈາລຶກຄຳໝັ້ນສັນຍາ ຮັກສາສຸສານເຈົ້າຊີວິດຮຸ່ງ ແລະ ປະເທດຊາດໂດຍເຈົ້າຊີວິດຮຸ່ງ ສ້າງຂຶ້ນ ຖືກຕັ້ງຢູ່ເທິງພູ ເຫງ໋ຍຫລີງ. ຜ່ານໄລຍະປະຫວັດສາດນັບພັນປີ, ມີເຈົ້າຊີວິດທີ່ມີຊື່ສຽງຫລາຍອົງໃນສະໄຫມສັກດີນາຂອງຫວຽດນາມ ສືບຕໍ່ສ້າງ “ພົງສາວະດານ“ ກ່ຽວກັບສະໄຫມເຈົ້າຊີວິດຮຸ່ງ ແລະ ຢືນຢັນບົດບາດສຳຄັນຂອງບັນດາເຈົ້າຊີວິດຮຸ່ງທີ່ມີຕໍ່ປະເທດຊາດ. ວັນໄຫວ້ບູຊາເຈົ້າຊີວິດຮຸ່ງ ແລະ ການເຫລື້ອມໄສໄຫວ້ບູຊາເຈົ້າຊີວິດຮຸ່ງ ຂອງຊາວຫວຽດນາມ ຮຸ່ນຄົນຕ່າງໆ ໄດ້ກາຍເປັນຄຸນຄ່າພິເສດສະເພາະຂອງຊາດຫວຽດນາມ. ສາດສະດາຈານ ໂງດືກທີ້ງ, ຜູ້ອຳນວຍການສູນຄົ້ນຄ້ວາ ແລະ ອະນຸລັກຮັກສາວັດທະນະທຳແຫ່ງການເຫລື້ອມໃສຂອງຫວຽດນາມ ໃຫ້ຮູ້ວ່າ:
“ການໄຫວ້ບູຊາບັນພະບຸລຸດ ແມ່ນມູນເຊື້ອທີ່ກ່ຽວຂ້ອງເຖິງຜູ້ລິເລີ່ມຂອງວົງຕະກຸນ. ຢູ່ຫວຽດນາມການໄຫວ້ບູຊາບັນພະບຸລຸດໄດ້ກາຍເປັນການເຫລື້ອມໃສ. ເຖິງວ່າຫວຽດນາມໄດ້ຜ່ານຫຼາຍສະໄໝທີ່ແຕກຕ່າງກັນຄື: ສະໄຫມເຈົ້າຊີວິດ ດີງ, ເລ, ລີ, ເຈ່ີນ, ຫງວຽນ ກໍຕາມ, ແຕ່ໃນສະໄຫມໃດກໍ່ລ້ວນແຕ່ຮັກສາຮີດຄອງປະເພນີໄຫວ້ບູຊາເຈົ້າຊີວິດຮຸ່ງໄວ້, ຊ້ຳບໍ່ໜຳຮອດສະໄຫມປະຕິວັດໃນປະຈຸບັນ ຍັງຄົງສືບຕໍ່ຮັກສາ, ປັບປຸງແລະຍົກລະດັບພິທີໄຫວ້ບູຊາເຈົ້າຊີວິດຮຸ່ງຂຶ້ນຕື່ມ ”
ພິທີໄຫວ້ບູຊາເຈົ້າຊີວິດຮຸ່ງໄດ້ຮັບການຈັດຕັ້ງຂຶ້ນໃນໄລຍະຕົ້ນຂອງປະຫວັດແຫ່ງການສ້າງສາແລະ ປົກປັກຮັກສາປະເທດຊາດ, ສິ່ງດັ່ງກ່າວສະແດງໃຫ້ເຫັນວ່າ ປະເທດ ຫວຽດນາມມີສະຕິກ່ຽວກັບກົກເຄົ້າເຫງົ້າກໍມາແຕ່ດົນນານ ແລະ ສືບຕໍ່ໄດ້ຮັບການເພີ່ມພູນຄູນສ້າງ, ສືບທອດບັນດາຄຸນຄ່າວັດທະນະທຳ, ຈິດໃຈຂອງຊາດ ຜ່ານບັນດາການເຄື່ອນໄຫວດັ່ງກ່າວ. ທ່ານ ໂງດືກທີ້ງ, ຜູ້ອຳນວຍການສູນຄົ້ນຄ້ວາ ແລະ ອະນຸລັກຮັກສາວັດທະນະທຳແຫ່ງການເຫລື້ອມໃສຂອງຫວຽດນາມໃຫ້ຮູ້ຕື່ມອີກວ່າ:
“ກ່ຽວກັບດ້ານວັດທະນະທຳ, ວັນໄຫວ້ບູຊາເຈົ້າຊີວິດຮຸ່ງບໍ່ພຽງແຕ່ແມ່ນວັນໄຫວ້ບູຊາລ້າໆເທົ່ານັ້ນຫາກຍັງເຕົ້າໂຮມມູນເຊື້ອວັດທະນະທຳຫລາຍຢ່າງອີກດ້ວຍ. ຄຽງຄູ່ກັນນັ້ນ, ຕາມການຕີລາຄາຂອງອົງການ UNESCO ແລ້ວ, ພິທີໄຫວ້ບູຊາເຈົ້າຊີວິດຮຸ່ງຍັງສະແດງໃຫ້ເຫັນວ່າ ຊາວຫວຽດນາມຍາມໃດກໍຮູ້ບຸນຄຸນຕໍ່ບັນພະບຸລຸດ ຕາມສິນທຳທີ່ວ່າກິນເຂົ້າຄິດຮອດຄຸນນາ, ກິນປາຄິດຮອດຄຸນນ້ຳ.”
ໂດຍສືບທອດມູນເຊື້ອຂອງຊາດ, ແຕ່ລະປີ ຊາວຫວຽດນາມນັບລ້ານໆຄົນໄດ້ເຕົ້າໂຮມຢູ່ວິຫານຮຸ່ງເພື່ອສະແດງຄວາມຮູ້ບຸນຄຸນຕໍ່ບັນພະບຸລຸດ ດ້ວຍພິທີໃຫຍ່ສຸດແມ່ນພິທີໄຫວ້ບູຊາເຈົ້າຊີວິດຮຸ່ງ ຊື່ງດຳເນີນໄປໃນອາທິດຫນຶ່ງ ແລະ ປີນີ້ ພິທີໄຫວ້ບູຊາເຈົ້າຊີວິດຮຸ່ງ ຖືກຈັດຂຶ້ນກົງກັບເຫດການ ອົງການ UNESCO ເຊີດຊູ “ການເຫລື້ອມໃສໄຫວ້ບູຊາເຈົ້າຊີວິດຮຸ່ງ” ແມ່ນມໍລະດົກວັດທະນະທຳຂອງມວນມະນຸດ.
ການນຳພັກ,ລັດ ແລະ ຂະແຫນງການຕ່າງໆຂອງຫວຽດນາມເຂົ້າຮ່ວມພິທີ
ໄຫວ້ບູຊາເຈົ້າຊີວິດຮຸ່ງ
ພາບ:vnexpress.net
|
ໃນວັນດຳເນີນພິທີໄຫວ້ບູຊາເຈົ້າຊີວິດຮຸ່ງ, ທ່ານປະທານປະເທດຫວຽດນາມ ເຈືອງເຕີນຊາງ ສືບຕໍ່ຢັ້ງຢືນ ຄວາມໝາຍຢ່າງເລິກເຊິ່ງຂອງພິທີໄຫວ້ບູຊາເຈົ້າຊີວິດຮຸ່ງສຳລັບການສ້າງອາລົມຈິດ ແລະ ນ້ຳໃຈມະຫາສາມັກຄີທົ່ວປວງຊົນທັງຊາດຂອງຊາວຫວຽດນາມ ແຕ່ລະຄົນໃນທຸກສະໄຫມ. ທ່ານປະທານປະເທດເຈືອງເຕີນຊາງເນັ້ນຫນັກວ່າ:
“ພິທີໄຫວ້ບູຊາບັນດາເຈົ້າຊີວິດຮຸ່ງບໍ່ພຽງແຕ່ແມ່ນການເຄື່ອນໄຫວດ້ານຈິດວິນຍານ ເພື່ອພາວະນາໃຫ້ປະເທດຊາດມີສະຖຽນລະພາບ, ວັດທະນາຖາວອນ, ປະຊາຊົນມີຄວາມອີ່ມໜຳສຳລານ, ສະຫງົບສຸກເທົ່ານັ້ນ, ຫາກມີຄວາມໝາຍຢາກໃຫ້ວົງຄະນາຍາດບັນດາເຜົ່າຢູ່ຫວຽດນາມ ມີຄວາມສາມັກຄີ, ອຸ້ມຊູຊ່ວຍເຫລືອເຊິ່ງກັນ ແລະ ກັນອີກດ້ວຍ. ສະນັ້ນຜ່ານປະຫວັດສາດນັບພັນປີ, ການເຫລື້ອມໃສໄຫວ້ບູຊາເຈົ້າຊີວິດຮຸ່ງຍັງຄົງໄດ້ຮັບການສືບທອດມາຮອດປະຈຸບັນ. ສິ່ງດັ່ງກ່າວໄດ້ສ້າງເປັນກຳລັງແຮງເພື່ອໃຫ້ປະເທດຫວຽດນາມຜ່ານຜ່າຄວາມ ຫຍຸ້ງຍາກ, ການທົດສອບທຸກປະການ ເພື່ອພັດທະນາຢ່າງບໍ່ຢຸດຢັ້ງ.
ພິທີໄຫວ້ບູຊາເຈົ້າຊີວິດຮຸ່ງ ແລະ ການເຫລື້ອມໃສໄຫວ້ບູຊາເຈົ້າຊີວິດຮຸ່ງໄດ້ຮັບການຈັດຕັ້ງຂຶ້ນ ໂດຍມີການເຂົ້າຮ່ວມຂອງປະຊາຊົນພາຍໃນປະເທດເກືອບ 90 ລ້ານຄົນ ແລະ ຊາວຫວຽດນາມ ອາໄສຢູ່ຕ່າງປະເທດເກືອບ 4,5 ລ້ານຄົນ. ພິທີໄຫວ້ບູຊາເຈົ້າຊີວິດຮຸ່ງ ແມ່ນຄວາມເອກອ້າງທະນົງໃຈກ່ຽວກັບບັນດາຄຸນຄ່າພິເສດສະເພາະທີ່ສ້າງເປັນກຳລັງແຮງຂອງຊາດຫວຽດນາມ ຜ່ານຫລາຍສະໄຫມ. ສຳລັບວັນໄຫວ້ບູຊາບັນພະບຸລຸດນີ້, ການເຫລື້ອມໃສໄຫວ້ບູຊາເຈົ້າຊີວິດຮຸ່ງ ສືບຕໍ່ໄດ້ຮັບການສືບທອດ, ລ້ຽງດູຈິດວີນຍານ, ພູມປັນຍາ ຫວຽດນາມ ຕະຫຼອດໄປ ກໍ່ຄືເພີ່ມພູນຄູນສ້າງບັນດາຄຸນຄ່າຫວຽດນາມໃນຍຸກປະຈຸບັນ.