ຫວ່າງແລ້ວນີ້, ລັດຖະບານຍີປຸ່ນ ຫາກໍປະກາດປຶ້ມປົກຂາວປ້ອງກັນຊາດປີ 2015 ຊຶ່ງໄດ້ເຕື້ອງເຖິງບັນດາຄວາມວິຕົກກັງວົນຂອງປະເທດນີ້ໃນສະພາວະທີ່ສະພາບແວດລ້ອມດ້ານຄວາມສະຫງົບຢູ່ຍີປຸ່ນພວມຊົ່ວຮ້າຍລົງ. ເປັນໜ້າສົນໃຈ, ປຶ້ມປົກຂາວໄດ້ກ່າວປະນາມບັນດາການກະທຳຖົມດິນເປັນເກາະຢູ່ທະເລຕາເວັນອອກ ກໍຄືບັນດາໂຄງການກໍ່ສ້າງຮາກຖານສຳຫຼວດຊອກຫານ້ຳມັນອາຍແກັສຢູ່ທະເລຮ່ວາຕຸງ ແລະ ຖືວ່ານີ້ເປັນໄພນາບຂູ່ຕໍ່ຄວາມສະຫງົບໃນທົ່ວພາກພື້ນ. ໃນທັນທີ່, ປຶ້ມປົກຂາວປ້ອງກັນຊາດຂອງໂຕກຽວໄດ້ປະສົບກັບການປະຕິກິລີຍາຢ່າງຮຸນແຮງຈາກປັກກິງ. ບັນຍາກາດທີ່ເຄັ່ງຕຶງພັດປົກຄຸມໄປທົ່ວພາກພື້ນອາຊີຕາເວັນອອກສ່ຽງເໜືອພາຍຫຼັງເຫດການນີ້.
ທ່ານນາຍົກລັດຖະມົນຕີ Shinzo Abe ລົງກວດກາກຳລັງປ້ອງກັນຕົວ |
ປຶ້ມປົກຂາວປ້ອງກັນຊາດຂອງຍີປຸ່ນແມ່ນເອກະສານອອກປະຈຳປີ, ໃນນັ້ນລວມມີບັນດາເນື້ອໃນທີ່ກ່ຽວຂ້ອງເຖິງການເຄື່ອນໄຫວ, ນະໂຍບາຍປ້ອງກັນຊາດຂອງຍີປຸ່ນ, ສະພາບການປ້ອງກັນຊາດປ້ອງກັນຄວາມສະຫງົບຂອງບັນດາປະເທດໃນພາກພື້ນ ແລະ ໃນໂລກ ພ້ອມກັບບັນດາຜົນກະທົບຕໍ່ສະພາບແວດລ້ອມດ້ານຄວາມສະຫງົບຂອງຍີປຸ່ນ, ນະໂຍບາຍປ້ອງກັນຊາດຂອງຍີປຸ່ນໃນໄລຍະທີ່ຈະມາເຖິງ.
ຢັ້ງຢືນໄພນາບຂູ່ຈາກຈີນ
ໂດຍເຄີຍໄດ້ເຕື້ອງເຖິງໃນບັນດາປຶ້ມປົກຂາວປ້ອງກັນຊາດປະຈຳປີຂອງຍີປຸ່ນໃນຊຸມປີກ່ອນນີ້, ແຕ່ຮອດປີນີ້, ປຶ້ມປົກຂາວປ້ອງກັນຊາດຍີປຸ່ນ ຈຶ່ງເນັ້ນໜັກເປັນພິເສດເຖິງການພັດທະນາຂອງກອງທັບ ແລະ ກຳລັງປ້ອງກັນຄວາມສະຫງົບຂອງຈີນ. 1/3 ໃນຍອດຈຳນວນ 429 ໜ້າໃນປຶ້ມປົກຂາວ ໄດ້ສະແດງຄວາມວິຕົກກັງວົນຕໍ່ເລື່ອງຈີນ ເພີ່ມເງິນໃຊ້ຈາຍດ້ານປ້ອງກັນຊາດຕາມແຕ່ລະປີ, ວິຕົກກັງວົນຕໍ່ບັນຫາເສລີພາບໃນການເດີນທະເລຊຶ່ງເລີ່ມມາຈາກບັນດາການປ່ຽນແປງກ່ຽວກັບສະພາບແວດລ້ອມດ້ານຄວາມສະຫງົບບົນທະເລໃນໄລຍະທີ່ຜ່ານມາ. ພິເສດ, ຍີປຸ່ນໄດ້ສະແດງໃຫ້ເຫັນແຈ້ງຄວາມວິຕົກກັງວົນຢ່າງໃຫຍ່ຫຼວງຕໍ່ເລື່ອງຈີນບູລະນະ, ຖົມດິນເປັນເກາະຢູ່ທະເລຕາເວັນອອກ, ກໍຄືຕິດຕັ້ງບັນດາຮ້ານເຈາະນ້ຳມັນເພື່ອຊອກຫາ ແລະ ຂຸດຄົ້ນນ່ຳມັນອາຍແກັສຢູ່ທະເລຮ່ວາຕຸງ. ປຶ້ມປົກຂາວໄດ້ເນັ້ນໜັກກ່ຽວກັບຄວາມກະຈ່າງແຈ້ງໃນການເຄື່ອນໄຫວດ້ານການທະຫານ ແລະ ຈຸດປະສົງເພີ່ມງົບປະມານປ້ອງກັນຊາດຂອງຈີນ.
ດ້ວຍເລື່ອງສະຫງວນຫຼາຍໜ້າໃນປຶ້ມປົກຂາວປ້ອງກັນຊາດເພື່ອເວົ້າເຖິງຄວາມວິຕົກກັງວົນຕໍ່ຈີນ, ຍີປຸ່ນໄດ້ສະແດງທ່າທີຢ່າງແຂງແຮງທີ່ມີຕໍ່ບັນດາການກະທຳພຽງລຳພັງຝ່າຍດຽວທີີ່ມີລັກສະນະເກາະຜິດຂອງຈີນ. ເປັນທີ່ຈະແຈ້ງແລ້ວວ່າ ຈີນບໍ່ພຽງແຕ່ເຮັດໃຫ້ຍີປຸ່ນມີຄວາມວິຕົກກັງວົນເທົ່ານັ້ນ, ຫາກຍັງເຮັດໃຫ້ຫຼາຍປະເທດບ້ານເຮືອນຄຽງມີຄວາມວິຕົກກັງວົນອີກດ້ວຍ. ນີ້ໄດ້ຮັບຖືວ່າ ແມ່ນການກະທຳທີ່ແຂງແຮງທີ່ສຸດຂອງໂຕກຽວໃນການສູ້ຢັນຜ່ານປຶ້ມປົກຂາວກັບຈີນ. ດັ່ງນັ້ນ, ບໍ່ມີຫຍັງທີ່ຈະເຂົ້າໃຈຍາກເມື່ອຈີນໄດ້ມີປະຕິກິລີຍາຢ່າງຮຸນແຮງໃນທັນທີ່. ໃນແຈ້ງການທີ່ສະເໜີທາງເວບໄຊ, ກະຊວງການຕ່າງປະເທດຈີນໄດ້ເນັ້ນໜັກວ່າ ບົດລາຍງານຂອງຍີປຸ່ນແມ່ນຜິດເຂວ ແລະ ບໍ່ມີເຈດຕະນາດີ. ປັກກິງໄດ້ກ່າວຟ້ອງໂຕກຽວໄດ້ກໍ່ຄວາມເຄັ່ງຕຶງລະຫວ່າງ 2 ປະເທດ. ຊ້ຳບໍໜຳ, ຈີນຍັງຕຳໜິຕິຕຽນໂດຍຖືວ່າ ການກະທຳນີ້ ໄດ້ສະແດງໃຫ້ເຫັນນະໂຍບາຍການຕ່າງປະເທດ 2 ດ້ານຂອງຍີປຸ່ນ ແລະ ຜົນກະທົບທີ່ຫຍໍ້ທໍ້ຕໍ່ສັນຕິພາບ ແລະ ສະຖຽນລະພາບໃນພາກພື້ນ.
ຄວາມບໍ່ລົງລອຍກັນຍິ່ງເລິກເຊິ່ງຂຶ້ນ
ຫວ່າງທ້າຍເດືອນ 5, ຈີນກໍໄດ້ປະກາດປຶ້ມປົກຂາວປ້ອງກັນຊາດຂອງຕົນ, ໃນນັ້ນ ໄດ້ເຕືຶ້ອງເຖິງບັນດາການກະທຳທີ່ຈີນເອີ້ນວ່າແມ່ນ “ ສິດຜົນປະໂຫຍດອັນຊອບທຳ” ຂອງຈີນຢູ່ທະເລຕາເວັນອອກ ແລະ ທະເລຮ່ວາຕຸງ. ແລະ ເປັນທີ່ຈະແຈ້ງແລ້ວວ່າ ປຶ້ມປົກຂາວປ້ອງກັນຊາດຂອງຈີນ ກໍບໍ່ໄດ້ຮັບຄວາມເຫັນດີເຫັນພ້ອມຂອງບັນດາປະເທດເພື່ອນບ້ານໃກ້ຄຽງ, ຊ້ຳບໍໜຳໄດ້ກໍ່ຄວາມວິຕົກກັງວົນໃຫ້ຫຼາຍປະເທດ. ດ້ວຍລັກສະນະສະດຸ້ງໄວຂອງຂົງເຂດປ້ອງກັນຊາດ, ປຶ້ມປົກຂາວປ້ອງກັນຊາດເມື່ອໄດ້ປະກາດໃນແຕ່ລະເທື່ອນັ້ນ, ກໍລ້ວນແຕ່ໄດ້ຮັບຖືວ່າ ແມ່ນຍຸດທະສາດປ້ອງກັນຊາດຂອງແຕ່ລະປະເທດ. ເພາະສະນັ້ນ, ບໍ່ມີຫຍັງທີ່ເປັນໜ້າປະຫຼາດໃຈຕໍ່ໜ້າປະຕິກິລີຍາຢ່າງຮຸນແຮງຂອງຈີນຂະນະທີ່ຍີປຸ່ນຖືຈີນເປັນໄພນາບຂູ່ຕໍ່ຄວາມໝັ້ນຄົງ, ປອດໄພໃນການເດີນທະເລຢູ່ພາກພື້ນ.
ໃນຕົວຈິງ, ການຂັດແຍ້ງກັນລະຫວ່າງຍີປຸ່ນ ແລະ ຈີນຍາມໃດກໍແມ່ນບັນຫາສັບສົນ ທີ່ດຶງດູດຄວາມສົນໃຈຈາກຫາງສຽງສາກົນ. ກໍເຊັ່ນດຽວກັນກັບທະເລຮ່ວາຕຸງ, ທະເລຕາເວັນອອກໃນໄລຍະມໍ່ໆມານີ້ ໄດ້ເກີດການຂັດແຍ້ງກັນຢ່າງຕໍ່ເນື່ອງ ຊຶ່ງກ່ຽວຂ້ອງເຖິງການເຄື່ອນໄຫວພຽງລຳພັງຝ່າຍດຽວຂອງຈີນ, ອັນໄດ້ສົ່ງຜົນສະທ້ອນເຖິງສິດຜົນປະໂຫຍດຂອງຍີປຸ່ນບໍ່ຫຼາຍກໍໜ້ອຍ. ເພາະສະນັ້ນ, ອຳນາດການປົກຄອງຂອງທ່ານທ່ານນາຍົກລັດຖະມົນຕີ Shinzo Abe ຕັດສິນໃຈເດີນຕາມຮ່າງກົດໝາຍປ້ອງກັນຄວາມສະຫງົບໃໝ່, ໃນນັ້ນ, ເປີດກ້ວາງຂອບເຂດການເຄື່ອນໄຫວຂອງກຳລັງປ້ອງກັນຕົວຍີປຸ່ນ. ດ້ວຍຮ່າງກົດໝາຍປ້ອງກັນຄວາມສະຫງົບໃໝ່, ທ່ານທ່ານນາຍົກລັດຖະມົນຕີ Shinzo Abe ໄດ້ຢືນຢັນເຖິງຄວາມຈຳເປັນຕ້ອງສ້າງຕັ້ງສຳພັນທະມິດອາເມລິກາ-ຍີປຸ່ນໃຫ້ແຂງແຮງກວ່າ ແນໃສ່ໂຕ້ຕອບຕໍ່ປັກກິງທີ່ນັບມື້ນັມມັກໃຫຍ່ໃຝ່ສູງ. ດ້ວຍປຶ້ມປົກຂາວປ້ອງກັນຊາດປີ 2015 ທີ່ຫາກໍປະກາດ, ບັນດາການຕຳໜິຕິຕຽນຢ່າງຮຸນແຮງຂອງຍີປຸ່ນທີ່ມີຕໍ່ຈີນນັ້ນ, ອີກເທື່ອໜຶ່ງ ໄດ້ເຮັດໃຫ້ຄວາມບໍ່ລົງລອຍກັນລະຫວ່າງ 2 ປະເທດນີ້ ຍິ່ງເລິກເຊິ່ງຫຼາຍຂຶ້ນ.
ເປັນອັນວ່າ ພາຍຫຼັງທີ່ຮ່າງກົດໝາຍປ້ອງກັນຄວາມສະຫງົບໃໝ່ ຊຶ່ງໄດ້ຮັບການຮັບຮອງເອົາຈາກສະພາຕ່ຳຍີປຸ່ນ, ອີກເທື່ອໜຶ່ງການພົວພັນຍີປຸ່ນ-ຈີນ ພັດຢືນຢູ່ຕໍ່ໜ້າບັນດາສິ່ງທ້າທາຍໃໝ່. ໄລຍະມໍ່ໆມານີ້, 2 ຝ່າຍ ເຖິງວ່າມີຄວາມມານະພະຍາຍາມຫຼາຍຢ່າງເພື່ອປົວແປງການພົວພັນ 2 ຝ່າຍ, ໃນນັ້ນ ເປັນໜ້າສົນໃຈແມ່ນການເລີ່ມດຳເນີນການສົນທະນາການເມືອງຂັ້ນສູງກໍຕາມ, ແຕ່ຄວາມບໍ່ລົງລອຍກັນທີ່ເລີ່ມມາຈາກບັນຫາອະດີດຕະການ ແມ່ນຍາກທີ່ຈະແກ້ໄຂໄດ້.