(vovworld)- ເມື່ອຮອດເດືອນ 3 ແຕ່ລະປີ, ບໍ່ພຽງແຕ່ຜູ້ນິຍົມພາສາ ຝລັ່ງເທົ່ານັ້ນ ຫາກປະຊາຊົນຫວຽດນາມເປັນຈຳນວນຫລວງຫລາຍ ກໍຂຳ່ນັບຮັບຕ້ອນວັນບຸນ ພາສາຝລັ່ງ ອີກດ້ວຍ. ໂດຍເຂົ້າຮ່ວມປະຊາຄົມໃຊ້ ພາສາຝລັ່ງ ແຕ່ຊຸມປີ 70 ຂອງສັດຕະວັດກ່ອນ ແລະ ໄດ້ປະກອບສ່ວນຫລາຍຢ່າງເຂົ້າໃນວິວັດການສ້າງຕັ້ງ ແລະ ພັດທະນາຂອງອົງການນີ້, ປະຈຸບັນ ຫວຽດນາມ ພວມສວມບົດບາດແມ່ນສະມາຊິກຕັ້ງຫນ້າໃນອົງການນີ້, ພິເສດໃນສະພາບການເຊື່ອມໂຍງເຂົ້າກັບສາກົນນັບມື້ນັບເລິກເຊິ່ງ ແລະ ກວ້າງຂວາງ.
ທ່ານຮອງນາຍົກລັດຖະມົນຕີ ຟາມບີງມີງ ຕ້ອນຮັບເລຂາທິການໃຫຍ່
ອົງການໃຊ້ພາສາຝລັ່ງສາກົນ
|
ຄະຕິການເຄື່ອນໄຫວຂອງປະຊາຄົມໃຊ້ພາສາຝລັ່ງ ເພື່ອເຊີດຊູ ພາສາຝລັ່ງ ກໍຄືຄວາມອຸດົມສົມບູນ, ຄວາມເປັນຫລາຍຮູບຫລາຍສີກ່ຽວກັບວັດທະນະທຳໃນປະຊາຄົມບັນດາປະເທດໃຊ້ ພາສາຝລັ່ງ ແລະ ນັບທັງພາສາອື່ນອີກໃນປະຊາຄົມໃຊ້ ພາສາຝລັ່ງ. ຜ່ານການພົວພັນແລກປ່ຽນດ້ານພາສາ, ວັດທະນະທຳ, ຮັດແຫນ້ນຄວາມສາມັກຄີ, ບັນດາກາລະໂອກາດຮ່ວມມືດ້ານການເມືອງ, ເສດຖະກິດ ໄດ້ເປີດແຫງ່ຫວັງຫລາຍຢ່າງກວ່າ.
ຫວຽດນາມ ຕັ້ງຫນ້າເຂົ້າຮ່ວມປະຊາຄົມໃຊ້ ພາສາຝລັ່ງ
ຫວຽດນາມ ເຂົ້າຮ່ວມປະຊາຄົມໃຊ້ ພາສາຝລັ່ງ ນັບແຕ່ຊຸມປີ 70 ຂອງສັດຕະວັດກ່ອນ ແລະ ໃນຈຸດເວລານັ້ນ, ຫວຽດນາມ ໄດ້ເອົາໃຈໃສ່ເປັນພິເສດເຖິງການສິດສອນພາສາຝລັ່ງ. ຫວຽດນາມ ໄດ້ຮ່ວມມືກັບອົງການໃຊ້ພາສາຝລັ່ງ ເພື່ອເປີດບັນດາຊຸດຮຽນ ທັງ 2 ພາສາ ເພື່ອນຳໃຊ້ ພາສາຝລັ່ງ ຢູ່ຫວຽດນາມ. ປະຈຸບັນ ພາສາຝລັ່ງ ໄດ້ຮັບຖືວ່າ ແມ່ນພາສາພິເສດຢູ່ ຫວຽດນາມ, ບໍ່ພຽງແຕ່ແມ່ນພາຫະນະໃນການເຮັດວຽກຂອງບັນດາອົງການສາກົນເທົ່ານັ້ນ ຫາກຍັງໄດ້ນຳໃຊ້ຄຽງຄູ່ກັບພາສາ ອັງກິດ ຢູ່ບັນດາວາລະປະຊຸມ ແລະ ເວທີປາໄສສາກົນກໍຄືໃນພາກພື້ນອີກດ້ວຍ.
ຕາມການສັງເກດຂອງທ່ານນາງ Vanissa Barrak, ຜູ້ອຳນວຍການຫ້ອງການໃຊ້ ພາສາຝລັ່ງ ພາກພື້ນ ອາຊີ-ປາຊີຟີກ ປະຈຳຮ່າໂນ້ຍແລ້ວ, ຫວຽດນາມ ມີທີ່ຕັ້ງສຳຄັນໃນກຸ່ມປະຊາຄົມໃຊ້ ພາສາຝລັ່ງ ຍ້ອນຖືກຕັ້ງຢູ່ຫນຶ່ງໃນບັນດາທະວີບທີ່ມີທຸກປະເທດໃຊ້ພາສາຝລັ່ງໃນໂລກ. ຄວາມຈິງ ຫວຽດນາມ ບໍ່ພຽງແຕ່ແມ່ນປະຕູສຳຄັນຂອງພາກພື້ນອາຊີຕາເວັນອອກສຽງໃຕ້ ເທົ່ານັ້ນ ຫາກຍັງແມ່ນຫນຶ່ງໃນບັນດາສະມາຊິກ ມີຄວາມເອົາໃຈໃສ່ເຖິງການເຄື່ອນໄຫວຂອງປະຊາຄົມໃຊ້ ພາສາຝລັ່ງ ກໍຄື ໄດ້ລົງທຶນຫລາຍຢ່າງໃຫ້ແກ່ການພັດທະນາຂອງ ພາສາຝລັ່ງ. ທ່ານນາງ Vanissa Barrak ຜູ້ອຳນວຍການຫ້ອງການໃຊ້ ພາສາຝລັ່ງ ໃຫ້ຮູ້ວ່າ:
“ ໃນຍຸດທະສາດຂອງຕົນ, ພວກຂ້າພະເຈົ້າໄດ້ເອົາໃຈໃສ່ເຖິງພາກພື້ນ ອາຊີ ປາຊີຟີກ, ດ້ວຍບັນດາການໃຫ້ບຸລິມະສິດ, ໃນນັ້ນ ມີການບຸລິມະສິດພັດທະນາ ພາສາຝລັ່ງ, ເພາະວ່າ ປະຈຸບັນ ພາສາຝລັ່ງໃນພາກພື້ນຍັງຈຳກັດຢູ່. ເຖິງ່ຢ່າງໃດກໍຕາມ, ຢູ່ ຫວຽດນາມ ພາສາຝລັ່ງພັດທະນາ ແລະ ໝູນໃຊ້ເປັນຢ່າງດີ. ຈຸດໝາຍຍາວນານຂອງອົງການໃຊ້ ພາສາຝລັ່ງສາກົນ ແມ່ນຜ່ານ ພາສາຝລັ່ງ, ນອກຈາກເປີດກວ້າງການຮ່ວມມື, ພົວພັນແລກປ່ຽນດ້ານວັດທະນະທຳ, ການສຶກສາ, ພວກຂ້າພະເຈົ້າຢາກຊຸກຍູ້ການຮ່ວມມືດ້ານເສດຖະກິດ ແລະ ບັນດາຂົງເຂດອື່ນກັບຫວຽດນາມ ກໍຄືພາກພື້ນນີ້.”
ປະຈຸບັນ, ພາສາຝລັ່ງ ໄດ້ນຳມາເຊິ່ງກາລະໂອກາດ ກໍຄືຄຸນຄ່າຫລາຍຢ່າງໃຫ້ແກ່ບັນດາຜູ້ນຳໃຊ້ ພາສາຝລັ່ງ. ເປັນຕົ້ນແມ່ນໃນສະພາບໂລກະພິວັດ, ວິກິດການການເງິນ, ເສດຖະກິດທົ່ວໂລກໄດ້ສົ່ງຜົນກະທົບເຖິງຫລາຍປະເທດໃນໂລກປະຈຸບັນ. ເພາະສະນັ້ນ, ພາສາຝລັ່ງ ນັບມື້ນັບສະແດງໃຫ້ເຫັນພະລັງຊີວິດຢ່າງໝັ້ນຄົງຍາວນານ ຜ່ານການໃຊ້ ພາສາຝລັ່ງຄືພາສາທາງການຢູ່ 32 ປະເທດ ແລະ ເຂດແຄ້ວນ. ປະຈຸບັນ, ມີ 220 ລ້ານຄົນ ຢູ່ 77 ປະເທດ ແລະ ເຂດແຄ້ວນ ໃນໂລກ ຊື່ງເປັນສະມາຊິກຂອງອົງການໃຊ້ ພາສາຝລັ່ງ ພ້ອມກັນແບ່ງປັນ ພາສາຝລັ່ງ. ພາສາຝລັ່ງ ຍັງໄດ້ນຳໃຊ້ຢ່າງເປັນທາງການຢູ່ຫລາຍອົງການສາກົນໃຫຍ່, ໃນນັ້ນ ມີ ສປຊ.
ພາສາຝລັ່ງເປີດກາລະໂອກາດຮ່ວມມືຫລາຍຢ່າງໃນສະພາບໂລກະພິວັດ
ສຳລັບຫວຽດນາມ, ໂດຍຮັບຮູ້ບົດບາດຂອງພາສາຝລັ່ງ ຢ່າງຈະແຈ້ງກໍຄືຄວາມສຳຄັນຂອງການຊຸກຍູ້ວັດທະນະທຳທີ່ມີຫລາຍຮູບຫລາຍແບບ ໃນປະຊາຄົມໃຊ້ພາສາຝລັ່ງ, ຍາມໃດຫວຽດນາມກໍເປັນສະມາຊິກຕັ້ງຫນ້າ, ຂະຫຍັນຂັນເຄື່ອນຂອງອົງການໃຊ້ ພາສາຝລັ່ງ. ຍາມໃດຫວຽດນາມ ກໍມີແນວຄວາມຄິດ, ຂໍ້ລິເລີ່ມກ່ຽວກັບການຮ່ວມມື, ພົວພັນແລກປ່ຽນ, ການໂອ້ລົມສົນທະນາໃນປະຊາຄົມໃຊ້ ພາສາຝລັ່ງໃນບັນດາຂົງເຂດຄື: ການເມືອງ, ເສດຖະກິດ, ວັດທະນະທຳ, ການສຶກສາ, ກະສິກຳ, ໃນນັ້ນ ຕ້ອງເວົ້າເຖິງການຮ່ວມມື 3 ຝ່າຍ ລະຫວ່າງຫວຽດນາມກັບປະເທດ ອາຟຼິກາ ແລະ ອົງການອາຫານ ແລະ ກະເສດ ສປຊ. ພິເສດ ຫວຽດນາມ ໄດ້ຈັດຕັ້ງກອງປະຊຸມສຸດຍອດ ພາສາຝລັ່ງ ຢູ່ ຮ່າໂນ້ຍ ເມື່ອປີ 1997 ສຳເລັດຜົນ. ບັນດາປັດໄຈນັ້ນ ນັບມື້ນັບຢືນຢັນບົດບາດ ແລະ ທີ່ຕັ້ງຂອງຫວຽດນາມໃນພາກພື້ນກໍຄືໃນປະຊາຄົມໃຊ້ ພາສາຝລັ່ງ. ເພາະສະນັ້ນ ເມື່ອຮອດເດືອນ 3 ແຕ່ລະປີ, ບັນດາການເຄື່ອນໄຫວສະເຫລີມສະຫລອງວັນໃຊ້ ພາສາຝລັ່ງ ສາກົນ ໄດ້ດຳເນີນໄປຢ່າງຟົດຟື້ນຄື: ພິທີມອບ ລາງວັນ ພາສາຝລັ່ງ, ເສບດົນຕີ, ການວາງສະແດງ, ສາຍຟິມຮູບເງົາ, ກອງປະຊຸມສຳມະນາ, ພົບປະແລກປ່ຽນ… ໄດ້ພິສູດໃຫ້ເຫັນການຮ່ວມມືຢ່າງແຫນ້ນແຟ້ນລະຫວ່າງຫວຽດນາມ ກັບອົງການນີ້. ທ່ານ ຫວູແອງກວາງ, ຮອງຫົວຫນ້າກົມບັນດາອົງການຈັດຕັ້ງສາກົນ, ສັງກັດກະຊວງການຕ່າງປະເທດຫວຽດນາມ ໄດ້ຢືນຢັນ:
“ນີ້ແມ່ນໂອກາດເພື່ອໃຫ້ຫວຽດນາມ ແລະ ບັນດາອົງການໃຊ້ ພາສາຝລັ່ງ ປືກສາຫາລືບັນດາຮູບການຮ່ວມມື ເພືອ່ເພີ່ມທະວີການພົວພັນລະຫວ່າງ ຫວຽດນາມ ກັບອົງການນີ້. ການພົວພັນນີ້ແມ່ນສຳຄັນທີ່ສຸດ, ນອກຈາກການປະຕິບັດບັນດານະໂຍບາຍສຳຄັນຂອງຫວຽດນາມ ແມ່ນເພີ່ມທະວີການເຊື່ອມໂຍງເຂົ້າກັບສາກົນປະຈຸບັນ. ຜ່ານອົງການໃຊ້ພາສາຝລັ່ງ ສາກົນ, ພວກເຮົາ ກໍໄດ້ຊຸກຍູ້ການພົວພັນຮ່ວມມືຫລາຍຢ່າງກັບບັນດາປະເທດສະມາຊິກຂອງອົງການນີ້ໃນໂລກ.”
ໃນຕົ້ນເດືອນ 4 ຈະມາເຖິງ, ເວທີປາໄສ ພາສາຝລັ່ງ ກ່ຽວກັບການຮ່ວມມືເສດຖະກິດຢູ່ ຮ່າໂນ້ຍ, ໂດຍມີການເຂົ້າຮ່ວມຂອງບັນດາຜູ້ຊ່ຽວຊານເສດຖະກິດ, ບັນດາເຈົ້າຫນ້າທີ່ຂັ້ນສູງຮັບຜິດຊອບກ່ຽວກັບເສດຖະກິດຂອງບັນດາປະເທດສະມາຊິກອົງການໃຊ້ ພາສາຝລັ່ງ ສາກົນ ມາຈາກທົ່ວທຸກທະວີບ. ນີ້ແມ່ນຂໍ້ລິເລີ່ມສຳຄັນຂອງຫວຽດນາມ. ເວທີປາໄສນີ້ ແມ່ນກາລະໂອກາດເພື່ອໃຫ້ຜູ້ຕາງຫນ້າບັນດາປະເທດ, ບັນດາຜູ້ຊ່ຽວຊານເສດຖະກິດຍົກອອກຂໍ້ສະເຫນີ, ຈາກນັ້ນ ສາມາດສ້າງຕັ້ງບັນດາໂຄງການຮ່ວມມື, ພົວພັນແລກປ່ຽນເສດຖະກິດລະຫວ່າງບັນດາປະເທດສະມາຊິກໃນປະຊາຄົມໃຊ້ ພາສາຝລັ່ງ ກໍຄືສ້າງບັນດາຮູບແບບຮ່ວມມືເສດຖະກິດໃນຂອບເຂດປະຊາຄົມໃຊ້ພາສາຝລ່ັງກໍຄືໂຄງການດຳເນີນງານລະອຽດ.