(vovworld)- ມະຫາສະໝຸດກວມເອົາປະມານ 2/3 ເນື້ອທີ່ຂອງຫນ່ວຍໂລກ ແລະ ແມ່ນແຫ່ງດຳເນີນການເຄື່ອນໄຫວຫລາຍຢ່າງທີ່ນຳມາເຊິ່ງຜົນປະໂຫຍດໃຫ້ບັນດາປະເທດ. ສະນັນ ການຮ່ວມມືເປັນລະບຽບຮຽບຮ້ອຍ, ມີຄວາມເຂົ້າໃຈ ແລະ ການແບ່ງປັນລະຫວ່າງບັນດາປະເທດໃນການນຳໃຊ້ທະເລ, ຂຸດຄົ້ນແຫລ່ງປະໂຫຍດຈາກທະເລແມ່ນມີຄວາມຈຳເປັນທີ່ສຸດ. ຍູ້ແຮງການຮ່ວມມືເພື່ອຮັບປະກັນຄວາມໝັ້ນຄົງຢູ່ທະເລ, ສ້າງສະພາບແວດລ້ອມສະຖຽນລະພາບເພື່ອພັດທະນາວັດທະນາຖາວອນແມ່ນຜົນປະໂຫຍດ ແລະ ຄວາມຮັບຜິດຊອບລວມຂອງແຕ່ລະປະເທດເຂດແຄມທະເລກໍຄືບັນດາປະເທດກ່ຽວຂ້ອງ. ແລະຊຸມມື້ຜ່ານມາໄດ້ມີກາລະໂອກາດຮ່ວມມືຫລາຍຢ່າງໄດ້ປະກົດອອກໃນຂົງເຂດນີ້.
ກອງປະຊຸມສຳມະນາສາກົນກ່ຽວກັບ "ການພັດທະນາ
ແລະຄວາມໝັ້ນຄົງຢູ່ທະເລ"
|
ໃນສະພາວະສະພາບການສາກົນພວມມີການເພີ່ມຂຶ້ນຂອງການແກ່ງແຍ້ງຍຸດທະສາດຂອງຫລາຍປະເທດ, ທະເລພວມກາຍເປັນສະພາບແວດລ້ອມມີການຊ່ວງເສັງເພື່ອຍາດທ່າໄດ້ປຽບ. ຕໍ່ຫນ້າຄວາມຈິງຢູ່ທະເລຕາເວັນອອກ ແລະ ທະເລຮົວຕຸງໃນໄລຍະມໍ່ໆມານີ້ ຍາມໃດກໍເກີດການຜັນແປຢ່າງເຄັ່ງຕຶງ, ເປັນຕົ້ນແມ່ນການຖົມດິນ, ບູລະນະ ແລະ ກໍ່ສ້າງບັນດາຫາດດອນຫິນຂະຫນາດໃຫຍ່, ນຳໃຊ້ກຳລັງທະຫານຢູ່ບັນດາເກາະທຽມ ແລະ ມີບັນດາການກະທຳຢັ້ງຢືນອະທິປະໄຕ ໂດຍບໍ່ອີງໃສ່ກົດໝາຍສາກົນ, ເລື່ອງຊອກຫາກົນໄກຮ່ວມມືຢ່າງວ່ອງໄວເພື່ອຫລຸດຜ່ອນການປະທະກັນ, ການຮ່ວມມືຕ່າງຝ່າຍຕ່າງມີຜົນປະໂຫຍດແມ່ນຄວາມຈຳເປັນຢ່າງແນ່ນອນ.
ຄວາມໝັ້ນຄົງຢູ່ທະເລ: ຄວາມເອົາໃຈໃສ່ລວມຕົ້ນຕໍ
ມີຜູ້ແທນກວ່າ 180 ຄົນທີ່ມາຈາກບັນດາປະເທດ ອາຊີ ແລະ ເອີລົບ ໄດ້ພ້ອມກັນປຶກສາຫາລືກ່ຽວກັບບັນຫາຄວາມໝັ້ນຄົງຢູ່ທະເລໃນຂອບເຂດກອງປະຊຸມສຳມະນາ “ຄວາມໝັ້ນຄົງ ແລະ ການພັດທະນາທະເລ: ການຮ່ວມມືສາກົນ ແລະ ແບ່ງປັນບົດຮຽນ ຈາກອາຊີ - ເອີລົບ” ໄດ້ດຳເນີນໄປຢູ່ ນະຄອນ ຫ້າລອງ ຂຶ້ນກັບແຂວງ ກວ໋າງນີງ ຂອງຫວຽດນາມໃນອາທິດຜ່ານມາ ໄດ້ຊີ້ໃຫ້ເຫັນລະດັບຄວາມສົນໃຈນັບມື້ນັບເພີ່ມຂຶ້ນຂອງບັນດາປະເທດພາຍໃນ ແລະ ນອກພາກພື້ນ ຕໍ່ຫນ້າຄວາມຮຽກຮ້ອງຕ້ອງການທີ່ຮີບດ່ວນ ຄວນມີສະພາບແວດລ້ອມທະເລຢ່າງໝັ້ນຄົງ, ສັນຕິພາບ ແລະ ສະຖຽນລະພາບ.
ໃນ 2 ມື້ດຳເນີນກອງປະຊຸມສຳມະນາ, ບັນດາຜູ້ແທນມາຈາກຫລາຍປະເທດ ອາຊີ ແລະ ເອີລົບ ໄດ້ປຶກສາຫາລືຫລາຍມາດຕະການເພື່ອຊຸກຍູ້ການຮ່ວມມືໃນບັນດາບັນຫາຄວາມໝັ້ນຄົງຢູ່ທະເລມີມາ ແລະ ບໍ່ເຄີຍມີມາກ່ອນ, ຢັ້ງຢືນການຮ່ວມມືແມ່ນມີຄວາມຈຳເປັນຢ່າງເດັດຂາດ, ພິເສດໃນສະພາບການສາກົນພວມເພີ່ມຂຶ້ນການແກ່ງແຍ້ງຍຸດທະສາດຂອງຫລາຍປະເທດ. ບໍ່ມີປະເທດໃດທີ່ມີສ່ວນກ່ຽວຂ້ອງພັດ ຢືນຢູ່ນອກບັນດາຄວາມມານະພະຍາຍາມລວມນັ້ນ, ຫລືໄປຝືນກັບຄວາມເປັນລະບຽບຮຽບຮ້ອຍສາກົນທີ່ໄດ້ຮັບການກຳນົດ. ດຣ ດັ້ງດີງກູຍ, ຮອງລັດຖະມົນຕີກະຊວງການຕ່າງປະເທດ ຫວຽດນາມ ໄດ້ຢືນຢັນວ່າ:
“ຄວາມໝັ້ນຄົງຢູ່ທະເລນັບມື້ນັບມີຄວາມສຳຄັນ ແລະ ຈຳເປັນທີ່ສຸດ. ໃນຂະນະທີ່ຄວາມໝັ້ນຄົງຢູ່ທະເລນັບມື້ນັບມີຄວາມຈຳເປັນທີ່ສຸດນັ້ນ, ຄວາມສ່ຽງເກີດການປະທະກັນ, ຈາກບັນດາຈຸດຮ້ອນເຮັ່ງຊ້ອນແຝງຢູ່ບໍລິເວນທະເລນັບມື້ນັບໃຫຍ່ກວ່າ, ນາບຂູ່ເຖິງບັນດາຄວາມມານະພະຍາຍາມຮ່ວມມື ແລະ ຄວາມໄວ້ເນື້ອເຊື່ອໃຈລະຫວ່າງບັນດາປະເທດໃນບັນຫາປ້ອງກັນຄວາມໝັ້ນຄົງຢູ່ທະເລ ແລະ ບໍລິເວນທະເລປະຈຸບັນ.”
ທີ່ກອງປະຊຸມສຳມະນາຄັ້ງນີ້, ຄຳເຫັນຂອງບັນດາຜູ້ຊ່ຽວຊານ, ສາດສະດາຈານຊັ້ນນຳຂອງສອງທະວີບ ລ້ວນແຕ່ເນັ້ນຫນັກເຖິງຄວາມສຳຄັນຂອງການຮ່ວມມື, ການແບ່ງປັນຂໍ້ມູນຂ່າວສານ ແລະ ບົດຮຽນ. ຄຳເຫັນຂອງຫລາຍທ່ານຖືວ່າ ບັນດາປະເທດ ອາຊີ ອາດຈະຖອດຖອນໄດ້ບົດຮຽນກ່ຽວກັບກົນໄກຄວາມໝັ້ນຄົງລວມໝູ່ພວມໄດ້ຮັບການນຳໃຊ້ຢ່າງມີປະສິດທິຜົນຢູ່ ເອີລົບ. ການສະສົມ, ແບ່ງປັນບົດຮຽນ, ຂໍ້ມູນ ແມ່ນວິທີມີປະສິດທິຜົນທີ່ສຸດ ເພື່ອຕ້ານຄືນບັນດາການກະທຳກໍ່ຜົນສະທ້ອນຄວາມໝັ້ນຄົງຢູ່ທະເລ, ຮັບປະກັນຄວາມປອດໄພໃຫ້ແກ່ບັນດາຜູ້ໄປມາບົນທະເລ. ຄຽງຄູ່ກັນນັ້ນ, ມີຫລາຍຄຳເຫັນກໍຖືວ່າ ອາຊຽນ ພວມປະເຊີນຫນ້າກັບຫລາຍບັນຫາກ່ຽວກັບຄວາມໝັ້ນຄົງຢູ່ທະເລຄື: ກໍ່ການຮ້າຍ, ຈົນສະຫລັດ ແລະ ບັນດາການເຄື່ອນໄຫວໃຊ້ຄວາມຮຸນແຮງອື່ນ. ສະນັ້ນ ເລື່ອງບັນດາປະເທດດັ່ງກ່າວສ້າງລະບົບຂໍ້ມູນຂ່າວແມ່ນມີຄວາມຈຳເປັນທີ່ສຸດໃຫ້ແກ່ຄວາມໝັ້ນຄົງ ແລະ ຄວາມປອດໄພຂອງບັນດາເສັ້ນທາງໄປມາຂອງບັນດາເຮືອກຳປັ່ນການຄ້າຢູ່ທະເລ. ກ່ຽວຂ້ອງເຖິງບັນຫາການຫາປາຢ່າງຜິດກົດໝາຍ, ມີຄຳເຫັນຂອງຜູ້ຊ່ຽວຊານຫລາຍທ່ານຖືວ່າ ນີ້ແມ່ນບັນຫາໃຫຍ່, ນາບຂູ່ເຖິງຄວາມໝັ້ນຄົງບົນທະເລ ຢູ່ ອາຊີ ໃນປະຈຸບັນ. ສາຍເຫດຕົ້ນຕໍພາໄປເຖິງສະພາບການນີ້ ນັ້ນແມ່ນຍ້ອນຄວາມຂັດແຍ້ງກັນກ່ຽວກັບການທວງເອົາອະທິປະໄຕໃນໄລຍະຍາວພາໄປເຖິງຄວາມຈິງທີ່ວ່າ ມີປະເທດຈຳນວນຫນຶ່ງນຳໃຊ້ການເຄື່ອນໄຫວຫາປາເພື່ອປັບປຸງການທວງເອົາອະທິປະໄຕຂອງຕົນ. ເພື່ອແກ້ໄຂສະພາບການດັ່ງກ່າວ ຄວນມີກົນໄກຮ່ວມມືຫລາຍຝ່າຍຢ່າງກວ້າງຂວາງກວ່າອີກ ພ້ອມກັບຄວາມຕັດສິນໃຈດ້ານການເມືອງຢ່າງສູງ ຈຶ່ງສາມາດສ້າງການຫັນປ່ຽນໃນບັນຫານີ້ໄດ້. ດຣ Felix Heiduk, ຜູ້ຊ່ຽວຊານສະຖາບັນບັນດາບັນຫາຄວາມໝັ້ນຄົງສາກົນ ຂອງ ເຢຍລະມັນ ຖືວ່າ:
“ຂ້າພະເຈົ້າຖືວ່າ ເພື່ອຫລຸດພົ້ນອອກຈາກສະພາບແມ່ນບໍ່ມີຂອບເຂດ, ພວກເຮົາຄວນຊອກຂອບເຂດໃຫມ່ໃຫ້ແກ່ການປະທະກັນ, ຫລົບຫລີກການແກ່ງແຍ້ງ, ບັນດາການທວງເອົາອະທິປະໄຕເພື່ອມຸ່ງໄປເຖິງການຮ່ວມມືຜ່ານການຊອກຫາບັນດາຂົງເຂດແທນທີ່.”
ຍູ້ແຮງການສ້າງຄວາມໄວ້ເນື້ອເຊື່ອໃຈ ແລະ ການທູດເພື່ອປ້ອງກັນ
ບັນຫາຫລຸດຜ່ອນການປະທະກັນ, ການຮ່ວມມື ຢູ່ ທະເລຕາເວັນອອກ ອີກຄັ້ງຫນຶ່ງກໍແມ່ນຫົວຂໍ້ຕົ້ນຕໍທີ່ກອງປະຊຸມພິເສດລັດຖະມົນຕີການຕ່າງປະເທດ ອາຊຽນ - ຈີນ ຊື່ງຫາກໍດຳເນີນໄປໃນວັນທີ 14/6 ຢູ່ ແຂວງ ຢູນຫນານປະເທດຈີນ. ບັນດາຝ່າຍໄດ້ສະແດງໃຫ້ເຫັນຄວາມຕັດສິນໃຈດ້ານການເມືອງຢ່າງສູງ ເພື່ອຮັບປະກັນສັນຕິພາບ ແລະ ຄວາມໝັ້ນຄົງ ຢູ່ທະເລຕາເວັນອອກ. ສອງຝ່າຍໄດ້ເຫັນດີ ຍູ້ແຮງການຜັນຂະຫຍາຍບັນດາມາດຕະການສ້າງຄວາມໄວ້ເນື້ອເຊື່ອໃຈ ແລະ ການທູດເພື່ອປ້ອງກັນ, ເຄົາລົບບັນດາຫລັກການພື້ນຖານຂອງກົດໝາຍສາກົນ, ເປັນຕົ້ນແມ່ນເຄົາລົບບັນດາວິວັດການດ້ານນິຕິກຳ ແລະ ການທູດ, ແກ້ໄຂການຂັດແຍ້ງໂດຍສັນຕິວິທີ, ສອດຄ່ອງກັບກົດໝາຍສາກົນ.
ອາດຈະເຫັນວ່າ ບໍ່ວ່າໃນການພົວພັນຮ່ວມມືໃດ ຫລື ຢູ່ເຂດທະເລໃດ, ການຮັບປະກັນການປະຕິບັດກົດໝາຍສາກົນ ຍາມໃດກໍແມ່ນປັດໄຈຫລັກແຫລ່ງແກ່ນສານ. ເປັນທີ່ຈະແຈ້ງແລ້ວວ່າ ບັນດາປະເທດເຂດແຄມທະເລ ແລະ ບັນດາປະເທດໃນພາກພື້ນທີ່ມີສ່ວນກ່ຽວຂ້ອງ ພວມຢືນຢູ່ຕໍ່ຫນ້າບັນດາກາລະໂອກາດຮ່ວມມືເພື່ອຊຸກຍູ້ການຮ່ວມມືປ້ອງກັນຄວາມສະຫງົບຢູ່ທະເລ.