(vovworld)- ຫວ່າງແລ້ວນີ້, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ຫາກໍເຊັນປະກາດໃຊ້ໂຄງການດຳເນີນງານຂອງລັດຖະບານເພື່ອໃຫ້ ພື້ນຖານເສດຖະກິດພັດທະນາໄວ ແລະ ຍືນຍົງ ຂະນະທີ່ຫວຽດນາມໄດ້ເຂົ້າເປັນສະມາຊິກອົງການການຄ້າໂລກ WTO . ໂຄງການດຳເນີນງານຂອງລັດຖະບານໄດ້ຫັນບັນດາບາດກ້າວປະຕິບັດງານຂອງບັນດາກະຊວງ, ຂະແໜງການເປັນລະອຽດເພື່ອຮ່ວມເດີນທາງພ້ອມກັບວິສາຫາກິດປົວແປງຄວາມສາມາດແກ່ງແຍ້ງ ຂອງພື້ນຖານເສດຖະກິດ, ສ້າງປະຖົມປັດໄຈຢ່າງໝັ້ນຄົງໜັກແໜ້ນເພື່ອໃຫ້ຫວຽດນາມພັດທະນາຢ່າງແຂງແຮງກວ່າໃນໄລຍະຕໍ່ໄປ.
(ພາບປະກອບ)
|
ໂຄງການດຳເນີນງານຂອງລັດຖະບານໄດ້ວາງອອກໜ້າທີ່ຕົ້ນຕໍ 9 ປະການ, ໃນນັ້ນມີການສ້າງລະບົບກົດໝາຍ ແລະ ລະບອບເສດຖະກິດໃຫ້ສົມບູນແບບ; ຍົກສູງກຳລັງຄວາມສາມາດແກ່ງແຍ້ງແຫ່ງຊາດ, ວິສາຫະກິດ ແລະ ຜະລິດຕະພັນ, ຫັນກະສີກຳເປັນທັນສະໄໝ ແລະ ພັດທະນາຊົນນະບົດ; ປັບປຸງ, ເພີ່ມທະວີກົນໄກສົມທົບ, ຕິດຕາມການຜັນຂະຫຍາຍວຽກງານເຊື່ອມໂຍງເຂົ້າກັບເສດຖະກິດສາກົນ.
ສ້າງລະບົບກົດໝາຍ ແລະ ລະບອບເສດຖະກິດໃຫ້ສົມບູນແບບ
ເພື່ອສ້າງລະບອບເສດຖະກິດໃຫ້ສົມບູນແບບ, ນາຍົກລັດຖະມົນຕີຫວຽດນາມໄດ້ສະເໜີໃນໄລຍະທີ່ຈະມາເຖິງ, ບັນດາກະຊວງ, ອົງການສຳນັກງານທຽບເທົ່າກະຊວງ, ອົງການສຳນັກງານສັງກັດລັດຖະບານຈົ່ງກວດການະໂຍບາຍການຄ້າຂອງຫວຽດນາມໃນຂອບເຂດ WTO, ນຳສະເໜີວິທີການກ່ຽວກັບການປັບປຸງກົດໝາຍເພື່ອປະຕິບັດສັນຍາຄູ່ຮ່ວມມືຍຸດທະສາດຂ້າມປາຊີຟິກ, ສ້າງ ແລະ ຜັນຂະຫຍາຍຍຸດທະສາດເຊື່ອມໂຍງເຂົ້າກັບເສດຖະກິດສາກົນເຖິງປີ 2020. ຫວຽດນາມ ກໍສ້າງ ແລະ ຜັນຂະຫຍາຍໂຄງການດຳເນີນງານປະຕິບັດຍຸດທະສາດເຂົ້າຮ່ວມບັນດາສັນຍາການຄ້າເສລີ FTA ເຖິງປີ 2020 ກໍຄືສ້າງຍຸດທະສາດພັດທະນາການພົວພັນຮ່ວມມືດ້ານເສດຖະກິດ-ການຄ້າກັບບັນດາຄູ່ຮ່ວມມືທີ່ສຳຄັນ. ການເຈລະຈາ, ເຊັນບັນດາສັນຍາຮ່ວມມືໃນຂົງເຂດການຄ້າ ແລະ ການລົງທຶນກັບບັນດາຄູ່ຮ່ວມມືທີ່ສຳຄັນ ກໍຖືລັດຖະບານວາງອອກ. ຕີລາຄາກ່ຽວກັບແງ່ຫວັງແຫ່ງການເຈລະຈາດ້ານການຄ້າໃນສະພາບການປະຈຸບັນ, ທ່ານລັດຖະມົນຕີກະຊວງການຄ້າຫວຽດນາມ ວູ້ຮີຮ່ວາງ ໃຫ້ຮູ້ວ່າ :
“ ປະຈຸບັນ, ຫວຽດນາມພວມມີເງື່ອນໄຂສະດວກຫຼາຍຢ່າງໃນການເຊື່ອມໂຍງເຂົ້າກັບສາກົນ. ບັນດາຄູ່ຮ່ວມມືໃຫຍ່ຕ່າງກໍມີຄວາມສົນໃຈເຖິງຫວຽດນາມ. ມີຫຼາຍກຸ່ມເສດຖະກິດ, ນັບທັງສະຫະພາບເອີລົບ, ບັນດາປະເທດອາຊີປາຊີຟິກລ້ວນແຕ່ຫວັງຢາກເຈລະຈາ ແລະ ຕົກລົງກັນກ່ຽວກັບບັນດາສັນຍາຮ່ວມເສດຖະກິດກັບຫວຽດນາມ. ຫວຽດນາມພວມມີແຜນນະໂຍບາຍຍູ້ແຮງການເຈລະຈານີ້. ພວກເຮົາໄດ້ເຊັນ ສັນຍາການຄ້າເສລີ FTA 8 ສະບັບ ແລະ ພ້ອມກັນນັ້ນ ກໍພວມເຈລະຈາເພື່ອເຊັນສັນຍາອີກ 6 ສະບັບ. ດ້ວຍການເຈລະຈາ ແລະ ອາດຈະສຳເລັດການເຊັນສັນຍາ 6 ສະບັບນີ້, ໃນຂັ້ນພື້ນຖານ ສຳລັບບັນດາຄູ່ຮ່ວມມືເສດຖະກິດທີ່ສຳຄັນກວ່າໝູ່, ຫວຽດນາມລ້ວນແຕ່ມີສັນຍາການຄ້າເສລີ ແລະ ຜ່ານນັ້ນ,ຈະປະກອບສ່ວນສ້າງຄວາມສະດວກຕື່ມອີກເພື່ອໃຫ້ສິນຄ້າຫວຽດນາມສາມາດແຊກຊຶມເຂົ້າບັນດາຕະຫຼາດນີ້ໄດ້”
ກ່ຽວກັບການ ສ້າງລະບົບກົດໝາຍໃຫ້ສົມບູນແບບ, ນາຍົກລັດຖະມົນຕີ ຫວຽດນາມໄດ້ສະເໜີບັນດາກະຊວງ, ຂະແໜງການຕ່າງໆຍູ້ແຮງການຫັນລະບຽບການບໍລິຫານເກືອບ 260 ຢ່າງເປັນງ່າຍດາຍ; ສຳເລັດການປັບປຸງຮ່າງກົດໝາຍຫຼາຍສະບັບ, ໃນນັ້ນມີກົດໝາຍວ່າດ້ວຍວິສາຫະກິດ, ກົດໝາຍວ່າດ້ວຍການລົງທຶນ, ກົດໝາຍວ່າດ້ວຍການກໍ່ສ້າງ, ກົດໝາຍວ່າດ້ວຍການປ້ອງກັນ ແລະ ຕ້ານການສໍ້ລາດບັງຫຼວງ.... ນາຍົກລັດຖະມົນຕີຮຽກຮ້ອງໃຫ້ເດັດດຽວລົບລ້າງບັນດາເອກະສານກຳນົດແບບຊ້ອນກັນ, ພ້ອມກັນນັ້ນ ແມ່ນປະກາດໃຊ້ບັນດາເອກະສານໃໝ່, ຈະແຈ້ງ, ລະອຽດ, ຮັບປະກັນລັກສະນະຄົບຊຸດ, ອາດສາມາດປະຕິບັດໄດ້, ສອດຄ່ອງກັບບັນດາຄຳໝັ້ນສັນຍາສາກົນ ແລະ ສະພາບຕົວຈິງ.
ຍົກສູງກຳລັງຄວາມສາມາດແກ່ງແຍ້ງແຫ່ງຊາດ
ນີ້ແມ່ນໜຶ່ງໃນບັນດາເນື້ອໃນທີ່ສຳຄັນໃນ ໂຄງການດຳເນີນງານຂອງ ລັດຖະບານ. ເພື່ອປະຕິບັດຈຸດໝາຍນີ້, ແຕ່ລະປີ,ກະຊວງແຜນການ ແລະ ການລົງທຶນຫວຽດນາມຕ້ອງລາຍງານລັດຖະບານກ່ຽວກັບການຜັນຂະຫຍາຍແຜນຮ່າງສັງລວມສ້າງໂຄງປະກອບເສດຖະກິດຄືນໃໝ່ຕິດພັນກັບການຫັນປ່ຽນຮູບແບບການເຕີບໂຕຕາມທິດຍົກສູງຄຸນນະພາບ, ປະສິດທິຜົນ ແລະ ກຳລັງຄວາມສາມາດແກ່ງແຍ້ງໄລຍະ 2013-2020. ບັນດາກະຊວງ, ຂະແໜງການທີ່ ກ່ຽວຂ້ອງຕ້ອງສ້າງແຜນຮ່າງຍົກສູງກຳລັງຄວາມສາມາດແກ່ງແຍ້ງແຫ່ງຊາດ, ຜັນຂະຫຍາຍໂຄງການດຳເນີນງານປະຕິບັດຍຸດທະສາດນຳເຂົ້າ, ສົ່ງອອກສິນຄ້າ ໄລຍະ 2011-2020, ກຳນົດທິດເຖິງປີ 2030. ແຕ່ລະປີ, ກະຊວງການຄ້າ ແລະ ອຸດສາຫະກຳຕ້ອງລາຍງານຕໍ່ລັດຖະບານ ກ່ຽວກັບການ ຜັນຂະຫຍາຍແຜນຮ່າງພັດທະນາບັນດາຂະແໜງອຸດສາຫະກຳໜູນຊ່ວຍ, ຄຽງຄູ່ກັນນັ້ນ, ຄວນສ້າງແຜນການຍຸດທະສາດພັດທະນາບັນດາຜະລິດຕະພັນອຸດສາຫະກຳຢ່າງລະອຽດຕິດພັນກັບ ຍຸດທະສາດພັດທະນາເຄື່ອງໝາຍການຄ້າແຫ່ງຊາດ ແນໃສ່ຍູ້ແຮງການເຄື່ອນໄຫວນຳເຂົ້າ, ສົ່ງອອກສິນຄ້າໃຫ້ມີລວງເລິກ, ບັນລຸປະສິດທິຜົນ ແລະ ຍືນຍົງ; ພ້ອມກັນນັ້ນ, ກໍນຳໃຊ້ບັນດາຂໍ້ກຳນົດສາກົນກ່ຽວກັບການແນະນຳດ້ານພູມສາດ, ຕົ້ນກຳເນີດ, ຈົດທະບຽນລິຂະສິດ, ເຄຶ່ອງໝາຍການຄ້າເພື່ອປົກປ້ອງວິສາຫະກິດ ແລະ ຜະລິດຕະພັນຂອງຫວຽດນາມໃນການຄ້າສາກົນ.
ຫັນກະສີກຳເປັນທັນສະໄໝ ແລະ ພັດທະນາຊົນນະບົດ
ຕາມໂຄງການດຳເນີນງານຂອງລັດຖະບານ, ໃນໄລຍະທີ່ຈະເຖິງ, ຫວຽດນາມຈະສ້າງຍຸດທະສາດເຊື່ອມໂຍງເຂົ້າກັບເສດຖະກິດສາກົນສຳລັບຂະແໜງກະສີກຳ ແລະ ພັດທະນາຊົນນະບົດ, ແຜນຮ່າງຍົກສູງມູນຄ່າເພີ່ມຂອງຜະລິດຕະພັນກະສີກຳ, ເຄື່ອງປ່າຂອງດົງ, ສິນໃນນ້ຳຫວຽດນາມ; ສ້າງນະໂຍບາຍ, ວິທີການແກ້ໄຂໃຫ້ສົມບູນແບບ ແລະ ລະອຽດເພື່ອພັດທະນາບັນດາຮູບແບບເສດຖະກິດຮ່ວມມືໃນຂົງເຂດກະສີກຳ. ເມື່ອເຕື້ອງເຖິງການຜັນຂະຫຍາຍປະຕິບັດແຜນນະໂຍບາຍສ້າງໂຄງປະກອບຂະແໜງກະສີກຳຄືນໃໝ່ຕິດພັນກັບການກໍ່ສ້າງຊົນນະບົດໃໝ່, ທ່ານລັດຖະມົນຕີກະຊວງກະສີກຳ ແລະ ພັດທະນາຊົນບົດຫວຽດນາມກາວດຶກຟາດໃຫ້ຮູ້ວ່າ :
“ ໃນເກືອບ 1 ປີທີ່ຜ່ານມາ, ທາງກະຊວງໄດ້ສ້າງແຜນການປະຕິບັດງານ ແລະ ຊີ້ນຳການສ້າງ 12 ແຜນຮ່າງລົງເລິກຂະແໜງເພື່ອຫັນແຜນນະໂຍບາຍໄປສູ່ແຕ່ລະຂົງເຂດໂດຍລະອຽດ, ເພື່ອແນະນຳໃຫ້ບັນດາທ້ອງຖິ່ນປະຕິບັດ, ເລືອກເຟັ້ນ, ຜັນຂະຫຍາຍບັນດາວິທີການແກ້ໄຂແບບບຸລິມະສິດ, ໃນນັ້ນເອົາໃຈໃສ່ເປັນພິເສດເຖິງນະໂຍບາຍພັດທະນາສິນໃນນ້ຳ, ໜູນຊ່ວຍຊາວປະມົງ ແລະ ນະໂຍບາຍນຳໃຊ້ດິນປູກເຂົ້າທີ່ອຳນວຍຄວາມສະດວກກວ່າເກົ່າ”
ການປະກາດໃຊ້ ແລະ ຜັນຂະຫຍາຍໂຄງການດຳເນີນງານຂອງລັດຖະບານ ເພື່ອໃຫ້ພື້ນຖານ ເສດຖະກິດພັດທະນາໄວ ແລະ ຍືນຍົງ ຈະປະກອບສ່ວນປະຕິບັດບັນດາແຜນນະໂຍບາຍ, ນະໂຍບາຍໃຫຍ່ຊຶ່ງໄດ້ວາງອອກຢູ່ທີ່ກອງປະຊຸມສູນກາງພັກຄັ້ງທີ 4 ຊຸດທີ 10, ສ້າງປະຖົມປັດໄຈຢ່າງໝັ້ນຄົງໜັກແໜ້ນເພື່ອໃຫ້ຫວຽດນາມພັດທະນາຢ່າງແຂງແຮງກວ່າໃນໄລຍະຕໍ່ໄປ.