(vovworld)- ເປັນຄັ້ງທຳອິດ ກະຊວງວິທະຍາສາດ ແລະ ເຕັກໂນໂລຊີ ຫວຽດນາມປຸກລະດົມຂະບວນການປ່ຽນໃຫມ່ການປະດິດສ້າງຜ່ານການເຄື່ອນໄຫວຄົ້ນຄ້ວາວິທະຍາສາດ ແລະ ເຕັກໂນໂລຊີ. ຕາມນັ້ນແລ້ວ, ກອງທຶນຫນູນຊ່ວຍການເຄື່ອນໄຫວປ່ຽນໃຫມ່ການປະດິດສ້າງສະເພາະໃຫ້ແກ່ນັກທຸລະກິດ ແລະ ບັນດາວິສາຫະກິດທີ່ຂຶ້ນກັບຂົງເຂດວິທະຍາສາດເຕັກໂນໂລຊີ ໄດ້ຮັບການຜັນຂະຫຍາຍດ້ວຍຈຳນວນເງິນຂຶ້ນເຖິງກວ່າ 2000 ຕື້ດົ່ງ. ສິ່ງດັ່ງກ່າວໂດຍທ່ານ ຫງວຽນກວນ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ຢືນຢັນໃນລາຍການ“ ປະຊາຊົນຖາມ, ລັດຖະມົນຕີຕອບ” ໃນທ້າຍອາທິດ.
ທ່ານຫງວຽນກວນ, ລັດຖະມົນຕີກະຊວງວິທະຍາສາດ
ແລະ ເຕັກໂນໂລຊີ ຫວຽດນາມ
ພາບ:hanoimoi.com.vn
|
ນັບແຕ່ກ່ອນມາຮອດປະຈຸບັນ, ຫວຽດນາມ ບຸລິມະສິດໃຫ້ແກ່ບັນດາວິສາຫະກິດໃນຂົງເຂດວິທະຍາສາດເຕັກໂນໂລຊີ ຜ່ານນະໂຍບາຍຍົກເວັ້ນ, ຫລຸດຜ່ອນອາກອນລາຍຮັບວິສາຫະກິດ. ເຖິງຢ່າງໃດກໍຕາມ, ເລື່ອງຍົກເວັ້ນອາກອນລາຍຮັບວິສາຫະກິດພຽງແຕ່ສົ່ງເສີມການນຳເຂົ້າເຕັກໂນໂລຊີ, ແຕ່ບໍ່ທັນສົ່ງເສີມການປະດິດສ້າງເຕັກໂນໂລຊີ. ດ້ານອື່ນ, ບັນດາລະບອບບຸລິມະສິດກ່ຽວກັບອາກອນ ພຽງນຳໃຊ້ເມື່ອວິສາຫະກິດມີລາຍຮັບຕ້ອງເສຍອາກອນເທ່ົານັ້ນ, ຖ້າຫາກວິສາຫະກິດຫລຸບທຶນ ບໍ່ໄດ້ນຳໃຊ້ບຸລິມະສິດນີ້. ເມື່ອວິສາຫະກິດດຳເນີນທຸລະກິດມີກຳໄລ ແມ່ນນຳໃຊ້ບຸລິມະສິດສູງສຸດສຳລັບວິສາຫະກິດວິທະຍາສາດ, ນັ້ນແມ່ນຍົກເວັ້ນອາກອນທັງໝົດໃນໄລຍະ 4 ປີ, ຍົກເວັ້ນ 50% ໃນ 9 ປີຕໍ່ໄປ ແລະ ອາກອນຕ້ອງເສຍພຽງ 10% ເມື່ອທຽບໃສ່ອາກອນທຳມະດາ. ບັນດາວິສາຫະກິດວິທະຍາສາດເຕັກໂນໂລຊີ ຍັງໄດ້ຊົມໃຊ້ບັນດາບຸລິມະສິດອື່ນ, ຕົວຢ່າງຄື: ໄດ້ເຊົ່າທີ່ດິນ ດ້ວຍລາຄາຕຳ່ສຸດໃນຕາຕະຕາງລາຄາໂດຍລັດກຳນົດ, ໄດ້ສຳພັດກັບບັນດາແຫລ່ງທຶນ ແລະ ບັນດາແຫລ່ງເງິນຕາ, ໄດ້ຮັບການຍົກເວັ້ນອາກອນ ສຳລັບບັນດາວິສາຫະກິດເຄື່ອນໄຫວຄົ້ນຄ້ວາ, ບຳລຸງສ້າງໃນວິສາຫະກິດ, ຜ່ານການຫັກກຳໄລສ່ວນຫນຶ່ງຂອງວິສາຫະກິດ ດ້ວຍການສ້າງຕັ້ງກອງທຶນພັດທະນາວິສາຫະກິດ.
ມີນະໂຍບາຍຕື່ມອີກໃຫ້ແກ່ບັນດາວິສາຫະກິດເຕັກໂນໂລຊີສູງ
ຕາມທ່ານຫງວຽນກວນ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ຫວຽດນາມແລ້ວ,ວິສາຫະກິດທີ່ຜະລິດບັນດາຜະລິດຕະພັນເຕັກໂນໂລຊີສູງ, ເຕັກໂນໂລຊີໃຫມ່, ເຕັກໂນໂລຊີມີມູນຄ່າເພີ່ມສູງ, ລ້ວນແຕ່ຈຳເປັນໄດ້ຮັບການຫນູນຊ່ວຍຈາກກອງທຶນຫນູນຊ່ວຍການເຄື່ອນໄຫວປ່ຽນໃຫມ່ປະສິດສ້າງວິທະຍາສາດເຕັກໂນໂລຊີ, ບໍ່ຈຳແນກວິສາຫະກິດນອນໃນເຂດເຕັກໂນໂລຊີສູງຫລືບໍ່. ລັດ ບໍ່ພຽງແຕ່ລົງທຶນເຂົ້າຂົງເຂດເຕັກໂນໂລຊີສູງເທົ່ານັ້ນ ຫາກຍັງສາມາດລົງທຶນເຂົ້າວິສາຫະກິດທີ່ບໍ່ນອນໃນເຂດເຕັກໂນໂລຊີສູງ, ແຕ່ວິສາຫະກິດນັ້ນຕ້ອງແມ່ນວິສາຫະກິດໝູນໃຊ້ເຕັກໂນໂລຊີສູງ.
“ເຖິງວ່າ ເຂົາເຈົ້າລົງທຶນເຂົ້າບັນດາເຂດອຸດສາຫະກຳ ຊຳ້ບໍ່ຫນຳ ແມ່ນຄົງຕົວຢ່າງເອກະລາດ, ຢູ່ບ່ອນໃດມີເຕັກໂນໂລຊີສູງ ລັດຕ້ອງຫນູນຊ່ວຍ. ຢູ່ບ່ອນໃດຜະລິດອອກບັນດາຜະລິດຕະພັນເຕັກໂນໂລຊີສູງ, ເຕັກໂນໂລຊີໃຫມ່, ເປັນຄັ້ງທຳອິດໄດ້ຮັບການນຳໃຊ້ຢູ່ຫວຽດນາມ, ບັນດາເຕັກໂນໂລຊີມີມູນຄ່າເພີ່ມສູງ ພວກເຮົາລ້ວນແຕ່ຫນູນຊ່ວຍ. ແລະ ພວກເຮົາບໍ່ຈຳແນກເຂດອຸດສາຫະກຳສູງ ຫລື ນອກເຂດ. ແຕ່ພວກເຮົາຍັງຄົງຕ້ອງກໍ່ສ້າງເຂດອຸດສາຫະກຳສູງ, ເພາະວ່າ ບົດຮຽນ ຈາກບັນດາປະເທດພັດທະນາ, ພິເສດຢູ່ບັນດາປະເທດຫາກໍ່ພົ້ນເດັ່ນຂຶ້ນ, ບັນດາເຂດອຸດສາຫະກຳສູງ ສວມບົດບາດນຳຫນ້າເພື່ອແຜ່ຂະຫຍາຍບັນດາເຕັກໂນໂລຊີໃຫມ່, ເຕັກໂນໂລຊີສູງ, ຢູ່ບ່ອນນັ້ນຕ້ອງມີບັນດາສະຖາບັນຄົ້ນຄ້ວາ, ມະຫາວິທະຍາໄລ, ຫາກບໍ່ພຽງແຕ່ບັນດາເຂດອຸດສາຫະກຳ.”
ນັບທັງມີນະໂຍບາຍໃຫ້ແກ່ອຸດສາຫະກຳປະດິດສ້າງ
ຕາມທ່ານ ຫງວຽນກວນ, ລັດຖະມົນຕີກະຊວງວິທະຍາສາດແລະເຕັກໂນໂລຊີ ແລ້ວ, ແຕ່ດົນນານມາແລ້ວ, ລັດຖະບານຫວຽດນາມ ໄດ້ເອົາໃຈໃສ່ເຖິງບັນຫານີ້ ແລະ ປີ 2007, ລັດຖະບານໄດ້ປະກາດໃຊ້ ດຳລັດເລກທີ 80 ກ່ຽວກັບວິທະຍາສາດເຕັກໂນໂລຊີ, ນີ້ແມ່ນພື້ນຖານໃຫ້ແກ່ອຸດສາຫະກຳປະດິດສ້າງ. ໃນເກືອບ 8 ປີຜ່ານມາ, ຫວຽດນາມ ໄດ້ສ້າງລະບົບບັນດາວິສາຫະກິດວິທະຍາສາດເຕັກໂນໂລຊີ ເຖິງວ່າຈຳນວນວິສາຫະກິດຍັງຫນ້ອຍ ແລະ ບໍ່ທັນພັດທະນາຢ່າງແຮງກໍຕາມ, ແຕ່ກໍເປັນການເລີ່ມຕົ້ນໃຫ້ແກ່ວິວັດການເພື່ອສ້າງລະບົບວິສາຫະກິດປະດິດສ້າງ. ພົ້ນເດັ່ນ ແມ່ນບໍລິສັດຂາອອກຂາເຂົ້າ ຫາຍຟ່ອງ, ບໍລິສັດລະບາຍນຳ້ ບ່າເຣ້ຍ ຫວຸງເຕົາ. ນັ້ນແມ່ນບັນດາວິສາຫະກິດມີມູນຄ່າເພີ່ມໃຫຍ່ຫລວງ, ການຈະເລີນເຕີບໂຕສູງ ແລະ ຄົງຕົວຢ່າງໝັ້ນຄົງ ນັບທັງວິກິດການເສດຖະກິດໃນໄລຍະຜ່ານມາ. ຫວຽດນາມ ເອົາໃຈໃສ່ເຖິງບັນດາວິສາຫະກິດດັ່ງກ່າວ ບໍ່ພຽງແຕ່ດ້ວຍບັນດາເອກະສານຂອງລັດຖະບານເທົ່ານັ້ນ ຫາກດ້ວຍການເພີ່ມທະວີຮ່ວມມືກັບສາກົນເພື່ອຫນູນຊ່ວຍບັນດາວິສາຫະກິດໃນຂົງເຂດນີ້. ທ່ານລັດຖະມົນຕີ ຫງວຽນກວນ ຢືນຢັນວ່າ:
“ຫວ່າງແລ້ວນີ້, ທະນາຄານໂລກ ໄດ້ອຸປະຖຳໃຫ້ແກ່ໂຄງການຫນຶ່ງເພ່ືອຊຸກຍູ້ການພັດທະນາວິທະຍາສາດປະດິດສ້າງ ລວມມູນຄ່າ 100 ລ້ານ USD. ລັດຖະບານແຟງລັງ ກໍສືບຕໍ່ອຸປະຖຳໃຫ້ແກ່ໂຄງການປ່ຽນໃຫມ່ການປະດິດສ້າງໃຫ້ແກ່ວິສາຫະກິດຫນຶ່ງ ລວມມູນຄ່າ 10 ລ້ານ ເອີໂຣ. ແລະ ລັດຖະບານ ຫວຽດນາມ ກໍສະຫງວນງົບປະມານຫລາຍພໍສົມຄວນເພື່ອພັດທະນາ ແລະ ຫວ່າງແລ້ວນີ້ ລັດຖະບານມີຂໍ້ຕົກລົງເລກທີ 592 ເພື່ອຫນູນຊ່ວຍບັນດາອົງການວິທະຍາສາດເຕັກໂນໂລຊີຂອງຫວຽດນາມ ສ້າງເປັນບັນດາວິສາຫະກິດວິທະຍາສາດ ຈາກບັນດາໝາກຜົນຄົ້ນຄ້ວາຂອງບັນດາອົງການຈັດຕັ້ງວິທະຍາສາດເຕັກໂນໂລຊີ. ພວກເຮົາຫວັງວ່າ ຮອດປີ 2020 ຈະມີວິສາຫະກິດວິທະຍາສາດເຕັກໂນໂລຊີ ປະມານ 5000 ແຫ່ງ ຄືດັ່ງຍຸດທະສາດພັດທະນາວິທະຍາສາດເຕັກໂນໂລຊີ ຊື່ງນາຍົກລັດຖະມົນຕີໄດ້ອະນຸມັດ ແລະ ຈະນຳມາໃຫ້ GDP ຈາກ 7-15% ຈາກບັນດາວິສາຫະກິດວິທະຍາສາດເຕັກໂນໂລຊີດັ່ງກ່າວ.”
ທ່ານລັດຖະມົນຕີ ຫງວຽນກວນ ຍັງໃຫ້ຮູ້ວ່າ: ບັນດາກະຊວງ, ຂະແຫນງການ ທີ່ມີບັນດາໂຄງການຄົ້ນຄ້ວາກ່ຽວກັບສິ່ງແວດລ້ອມກໍຈະໄດ້ຮັບການຫນູນຊ່ວຍຈາກແຫລ່ງເງິນຂອງກອງທຶນ 2000 ຕື້ດົ່ງ. ກ່ອນຫນ້ານັ້ນ ກະຊວງວິທະຍາສາດເຕັກໂນໂລຊີ ໄດ້ຫນູນຊ່ວຍມະຫາວິທະຍາໄລແຫ່ງຊາດ ຮ່າໂນ້ຍ ປະຕິບັດກິດຈະກຳຄົ້ນຄ້ວາກ່ຽວກັບ Asen ໃນນຳ້ໃຕ້ດິນຢູ່ ຮ່າໂນ້ຍ ຫລື ສະຖາບັນມະຫາບັນດິດວິທະຍາສາດເຕັກໂນໂລຊີຫວຽດນາມ ປະຕິບັດໂຄງການຄົ້ນຄ້ວາຜະລິດຕະພັນຊີວະສາດເພື່ອແກ້ໄຂທີ່ດິນຖືກມົນລະພິດດີໂອຊີນໃນສົງຄາມ.